Chʼol 18
Li chaq’rab’ re li Iglees
9 xb’e li po febrero re 1831
Li Qaawa’ kixye naq eb’ laj Santil Paab’anel tento te’xk’ut li evangelio chiru chixjunileb’. Eb’ li winq li neke’xik sa’ taqlanb’il k’anjel tento te’k’ojob’aaq sa’ li tijonelil xb’aaneb’ laj jolominel re li Iglees.
Tzolʼlebʼ ut Sumwank 42, xtiklajik li tasal
Sa’ ka’kab’il tento te’k’anjelaq laj k’amol aatin. Tento te’xk’ut li na’leb’ li wan sa’ li Santil Hu ut lix Hu laj Mormon. Tento te’tijoq re xk’ulb’al jo’ rochb’een li Santil Musiq’ej. Li Santil Musiq’ej tixye reheb’ li k’a’ru te’xk’ut.
Eb’ laj k’amol aatin tento te’xkub’siheb’ xha’ li neke’paab’ank re li evangelio.
Li Qaawa’ kixye naq li komon sa’ li Iglees tento te’xpaab’ li Lajeeb’ chi Taqlahom. Me’kamsin. Me’tik’ti’i’ik. Me’xhob’eb’ li ras riitz’in. Me’xb’aanu k’a’ruhaq chik li ink’a’ us.
Eb’ laj Santil Paab’anel tento te’xwotz li wan reheb’ rik’ineb’ li ras riitz’in. Li wotzok rik’in yalaq ani, a’an chanchan li wotzok rik’in li Jesus.
Li Jesus kixk’e xkomon chik li chaq’rab’ reheb’ laj Santil Paab’anel. Maajun laj Santil Paab’anel tixk’oxla naq chaab’il a’an chiru jalan chik. Tento naq ch’ajch’ookeb’ ru. Tento te’k’anjelaq chi anchaleb’ xmetz’ew.
Eb’ laj Santil Paab’anel tento te’rileb’ li komon li yajeb’. Eb’ li winq sa’ li tijonelil tento te’rosob’tesiheb’ li ani yaj. Eb’ li wan xpaab’aal te’ruuq te’k’irtesiiq. Ink’a’ te’kamq wi maji’ xwulak xq’ehil xkamikeb’.
Eb’ laj Santil Paab’anel li tiikeb’ xch’ool ink’a’ te’xxuwa ru li kamk. Q’axal chaab’il li kamk choq’ reheb’ li tiikeb’ xch’ool.
Li Jesus kixye naq tixk’utb’esi naab’aleb’ li na’leb’ chiruheb’ li komon tiikeb’ xch’ool. Eb’ li k’utb’esinb’il na’leb’ a’in te’xk’am li sahil ch’oolejil. Li Qaawa’ kixye reheb’ laj Santil Paab’anel naq che’xpaab’ li chaq’rab’ re li Iglees.