Chʼol 41

Li ch’a’ajkilal sa’ Kirtland

1837–1838

Saheb’ xch’ool laj Santil Paab’anel sa’ Kirtland, Ohio. Li Qaawa’ kirosob’tesiheb’.

Junjunq reheb’ li xb’eenil ke’el chaq Kirtland ut xkoheb’ re xjultikankil li evangelio sa’ jalaneb’ na’ajej. Naab’al ke’rab’i raatineb’ li xb’eenil ut ke’xjunaji rib’ rik’in li Iglees.

Toja’ naq kitikla li ch’a’ajkilal sa’ Kirtland. Laj Jose Smith ut jalan chik laj jolominel re li Iglees ke’xtikib’ jun li k’uuleb’aal tumin b’ar wi’ k’uulanb’il xtumin naab’aleb’ laj Santil Paab’anel.

Junjunq reheb’ laj Santil Paab’anel ke’raj xk’ulb’al naab’al xtumineb’. Aj tik’ti’ jun winq li yoo chi trab’ajik sa’ li k’uuleb’aal tumin. Kirelq’a jun xraqal li tumin.

Laj Jose Smith kixye reheb’ jalaneb’ naq te’xk’uula chi us li tumin, a’b’anan toj kiwakli li ch’a’ajkilal sa’ li k’uuleb’aal tumin. Moko najt ta chirix a’an tento taatz’ape’q xb’aan naq maak’a’ chik li tumin. A’an a’in jun xq’ehil li ch’a’ajkilal choq’ reheb’ naab’aleb’ li k’uuleb’aal tumin sa’ li Estados Unidos, ut naab’aleb’ chik ke’tz’ape’ ajwi’.

Naab’al reheb’ laj Santil Paab’anel ke’josq’o’ xb’aan naq ink’a’ te’xk’ul lix tumin wi’chik. Junjunq reheb’ ke’xye naq xmaak laj Jose Smith naq kitz’ape’ li k’uuleb’aal tumin. Junjunq reheb’ li amiiw q’axal chaab’il re laj Jose ke’xye li yib’ ruhil aatin chirix. Junjunqeb’ ke’raj xkamsinkil.

Ke’josq’o’ ajwi’ junjunq reheb’ laj jolominel re li Iglees. Junjunq reheb’ ink’a’ chik ke’raj wank choq’ komon sa’ li Iglees. Junjunq reheb’ ke’ok choq’ aj xik’ ilonel re li Iglees.

Jalaneb’ chik laj jolominel re li Iglees ke’xra laj Jose ut ke’xtenq’a. Laj Brigham Young a’an jun reheb’ li chaab’il aj jolominel. A’an kixye reheb’ laj Santil Paab’anel naq kixnaw naq laj Jose a’an jun xprofeet li Dios. Junjunqeb’ ke’josq’o’ rik’in laj Brigham Young xb’aan naq kixxaqab’ xwankil li Profeet, ut teneb’anb’il sa’ xb’een elk chaq Kirtland re naq ink’a’ taarahob’tesiiq xb’aaneb’.

Eb’ laj xik’ ilonel re li Iglees ke’xyoob’ k’iila ch’a’ajkilal sa’ Kirtland. Ke’relq’a li k’a’ru re laj Santil Paab’anel ut ke’xsach rochocheb’. Ke’xrahob’tesi ajwi’ laj Santil Paab’anel ut ke’xyeechi’i naq te’xkamsi junjunq reheb’.

Junjunq reheb’ li xb’eenil sa’ li Iglees ke’xb’aanuheb’ li ch’utam sa’ li Santil Ochoch re Kirtland b’ar wi’ ke’xhob’ laj Jose ut ke’aatinak chirix xsik’b’al ru jalan chik laj jolominel sa’ xna’aj. Moqon ke’chal junjunqeb’ rik’in li puub’ ut li yok’leb’ ch’iich’ re xmaqb’al li santil ochoch. Xiwxiw chik li wank sa’ Kirtland choq’ re laj Jose, jo’kan naq sa’ enereo re 1838 ki’el chaq aran ut xko’o Missouri.

Rik’in naq toj yoo li rahob’tesink sa’ Kirtland, eb’ laj jolominel re li Iglees ke’xtikib’ k’uub’ank na’leb’ chirix chanru te’elq chaq laj Santil Paab’anel aran. Sa’ julio re 1838, numenaq 500 li komon re li Iglees ke’el chaq Kirtland. Sa’ octubre, chirix jun b’eek q’axal ch’a’aj chiru haye’ 1,600 kiloom, ke’wulak Far West, Missouri. Ak wankeb’ aran laj Jose Smith ut naab’al chik li komon sa’ li Iglees.