Chʼol 16
Laj Jose Smith ut laj Sidney Rigdon neke’tzolok chirix Sion
1830
Naq toj wankeb’ sa’ xtaqlanb’il k’anjel laj Oliver Cowdery ut li ramiiw, ke’kana nach’ rik’in Kirtland, Ohio. Ke’xnaw ru jun li winq, laj Sidney Rigdon xk’ab’a’. A’an laj jolominel sa’ jalan chik li iglees.
Eb’ laj k’amol aatin ke’xk’e jun lix Hu laj Mormon re laj Sidney Rigdon ut ke’xk’ut li evangelio chiru. Laj Sidney kiril ru lix Hu laj Mormon ut kitijok chirix. Li qaChoxahil Yuwa’ kixye re naq tz’aqal yaal li evangelio, ut kikub’e xha’ laj Sidney.
Laj Sidney Rigdon kixye reheb’ li komon sa’ li ch’uut najolomin wi’ naq te’rab’i li raatineb’ laj k’amol aatin, ut jo’kan ke’xb’aanu naab’al reheb’. Tikto, 1,000 chi kristiaan kub’enaqeb’ xha’ sa’ Kirtland.
Laj Sidney Rigdon kiraj xnawb’al ru laj Jose Smith, jo’kan naq xko’o Nueva York. Chirix naq ak kiwulak laj Sidney, laj Jose Smith kixk’ul jun k’utb’esinb’il na’leb’ choq’ re. Sa’ li k’utb’esinb’il na’leb’, li Jesus kixye naq laj Sidney Rigdon tixb’aanu xninqal ru b’aanuhom. Tixk’ut li evangelio chiru naab’aleb’. Tixkub’siheb’ xha’ ut tixk’e reheb’ li maatan re li Santil Musiq’ej.
Li Jesus kixye ajwi’ re laj Jose ut laj Sidney naq ke’wan raqal sa’ li Santil Hu li ke’jalman junxil. Jalan chik li xninqal ru raqal ke’isiman chaq. Li Jesus kixye naq tixk’utb’esi chiru laj Jose li b’arwan reheb’ li raqal sa’ li Santil Hu tento te’tuqub’amanq. Laj Sidney tixtz’iib’a li tuqub’anb’il aatin jo’ yeeb’il xb’aan laj Jose.
Jun esil li moko tz’aqal ta sa’ li Santil Hu a’an li esil chirix laj Enok, jun xnimal ru profeet. Lix tenamit k’a’jo’ xtiikilal xch’ooleb’ jo’kan naq Sion ke’k’ab’a’iik xb’aan li Qaawa’. Lix tenamit laj Enok ke’xyiib’ ajwi’ jun tenamit, Sion xk’ab’a’. Sa’ Sion, ke’xra ut ke’ril rib’ chirib’ileb’ rib’. Maak’a’ li neb’a’il sa’ xyanqeb’ chi moko li ani ra xch’ool.
Chixjunileb’ sa’ Sion ke’xpaab’eb’ lix taqlahom li qaChoxahil Yuwa’. Xb’aan naq k’a’jo’ xtiikilal xch’ooleb’ li tenamit, kiwan li Qaawa’ sa’ xyanqeb’. Toja’ naq kixk’ameb’ li tenamit Sion sa’ choxa re te’wanq rik’in.
Li Jesus kixye re laj Jose Smith naq laj Santil Paab’anel tento te’xyiib’ jun chik li tenamit Sion. Chaq’alaq ru li tenamit. Maak’a’aqeb’ aj maak aran. Eb’ li te’wanq sa’ li tenamit te’xra rib’ ut sahaqeb’ xch’ool. Li Jesus kixye naq taachalq chi kanaak sa’ xyanqeb’.
Tzolʼlebʼ ut Sumwank 45:64–71; chi’ilmanq awji’ Moises 7:62–64