Chʼol 42
Far West, Missouri
Enero–julio re 1838
Laj Jose Smith ki’el chaq Kirtland, Ohio, xb’aan naq ke’wan junjunqeb’ aran li ke’xyal xkamsinkil. Yoo li hab’alq’e ut q’axal ke li kutan. Eb’ laj xik’ ilonel re laj Jose ke’xtaaqe rik’in yok’leb’ ch’iich’ ut puub’.
Aajel ru nat tixmuq rib’ laj Jose. Li Qaawa’ kixkol rix re naq laj xik’ ilonel re ink’a’ ke’ru chixtawb’al. Sa’ jun q’ojyin kihilan sa’ jun li kab’l wankeb’ wi’ laj xik’ ilonel re chi ink’a’ ke’xnaw naq wan chaq aran.
Sa’ jalan chik li hoonal laj xik’ ilonel re laj Jose ink’a’ ke’xnaw ru naq ke’nume’ sa’ li b’e.
Laj Jose kib’eek haye’ 1600 kiloom toj Far West, Missouri. Eb’ laj Santil Paab’anel sa’ Missouri yookeb’ chixyiib’ankil li k’aleb’aal a’in chirix naq minb’ileb’ ru chi elk chaq sa’ jalan chik na’ajej sa’ li estado. Ke’saho’ xch’ool chirilb’al li Profeet.
Junjunq reheb’ laj jolominel re li Iglees sa’ Missouri ink’a’ yookeb’ chi ab’ink chiruheb’ li chaq’rab’. Junjunq reheb’ ke’xyal xk’ulb’al naab’al li tumin. Wan naq ke’josq’o’ li jun rik’in li jun chik chirix chanru te’jolominq reheb’ laj Santil Paab’anel. Ke’wan ajwi’ junjunq li ke’josq’o’ rik’in laj Jose Smith.
Laj Oliver Cowdery, laj David Whitmer, ut jalaneb’ chik ke’isiman chaq sa’ li Iglees. A’an a’in naraj naxye naq ink’a’ chik komoneb’ sa’ li Iglees. Laj Jose kiraho’ sa’ xch’ool xb’aan naq ramiiweb’ li winq a’in.
Jalaneb’ chik li winq ke’sik’e’ ru re xjolominkil li Iglees sa’ Far West. Chirix junpaat ki’ok chi usaak wi’chik li Iglees sa’ li na’ajej a’an.
Sa’ mayo re 1838, li Profeet ut eb’ li ramiiw yookeb’ chixsik’b’al jalan chik li na’ajej te’xyiib’ wi’ li k’aleb’aal eb’ laj Santil Paab’anel. Sa’ jun kutan ke’wulaq sa’ jun xnimal ru na’ajej, li Adan-ondi-Ahman kik’ab’a’iik xb’aan li Jesus. Li Jesus ki’aatinak aran rik’in laj Adan junxil. Laj Adan kixch’utub’ lix junkab’al aran ut kirosob’tesiheb’ rub’elaj naq kikam. Sa’ junaq kutan, li Jesus ut laj Adan ut jalaneb’ chik li tiikeb’ xch’ool te’ch’utub’aaq aran wi’chik.