Chʼol 53

Li ch’a’ajkilal sa’ Nauvoo

Mayo–agosto re 1842

K’iila mil laj Santil Paab’anel ke’q’axon Nauvoo. Ke’xyiib’ jun chaq’al ru tenamit ut ke’ok chixyiib’ankil jun li santil ochoch.

Eb’ laj Santil Paab’anel ke’xsik’ ru laj John C. Bennett choq’ awa’b’ej re Nauvoo. Sa’ xtiklajik chaab’il xna’leb’ jo’ awa’b’ej, a’b’anan ki’ok chixb’aanunkil li ink’a’ us ut kixtz’eqtaana laj Jose Smith.

Eb’ li wankeb’ sa’ Nauvoo ke’raj jun kutan re ninq’ehink, sa’ wi’ eb’ laj pleet sa’ li Teep aj Pleet re Nauvoo te’b’eeq sa’ jun li desfile.

Laj John Bennett kixk’ulub’a xch’ool naq eb’ laj pleet te’okenq sa’ jun pak’b’il pleetik. A’an naraj naxye naq moko yaal ta li pleetik a’an.

Li Qawa’ Bennett kixpatz’ re laj Jose Smith naq tixjolomi jun reheb’ li teep aj pleet sa’ li pleetik, a’b’an laj Jose ink’a’ kiraj xb’aanunkil. Li Santil Musiq’ej xyehom re laj Jose naq k’uub’anb’il sa’ xch’ool laj John Bennett naq tixkamsi sa’ li pleetik. Kijosq’o’ laj John Bennett.

Rik’in naq laj John Bennett kixtz’eqtaana li Profeet ut kixb’aanu xkomon chik li maa’usilal, ki’isiman sa’ li Iglees, jo’kan ajwi’ sa’ xk’anjel choq’ awa’b’ej re Nauvoo. Laj Jose Smith ki’ok choq’ li ak’ awa’b’ej.

Ki’ok xk’ahil li raam laj John Bennett. Ki’el chaq Nauvoo ut ki’ok chixyeeb’al ut chixtz’iib’ankil li ink’a’ us chirix laj Jose Smith ut chirix li Iglees. Kixsik’eb’ jalaneb’ re xjunajinkil rib’ rik’in.

Laj Jose Smith kixye re junjunq reheb’ li winq sa’ li Iglees naq eb’ laj Santil Paab’anel te’xk’ul xkomon li ch’a’ajkilal. Junaq kutan teneb’anb’ilaqeb’ chi elk chaq Nauvoo. Laj Jose kiril chi rub’elaj naq te’xik sa’ eb’ li Tzuul Rocky ut aran te’xyiib’eb’ li tenamit. Te’ab’inq chiru li Dios ut te’ok choq’ jun tenamit kaw xmetz’ew.