Chʼol 12

Lix taqlanb’il k’anjel laj Samuel Smith

Junio re 1830

Laj Samuel Smith a’an li riitz’in laj Jose Smith. Li Jesus kiraj naq laj Samuel taaxik sa’ jun taqlanb’il k’anjel. Laj Samuel Smith a’an li xb’een aj k’amol aatin re li Iglees.

Laj Samuel xko’o re xk’utb’al li evangelio chiruheb’ li tenamit ut xyeeb’al resil lix Hu laj Mormon reheb’. Sa’ li xb’een kutan kib’eek 40 kiloom, a’b’an eb’ li tenamit ke’xhob’ ut ink’a’ ke’raj ab’ink.

Naq ak kiq’ojyino’ ru li kutan, laj Samuel ki’ok sa’ jun ochochnal. Kixpatz’ re laj eechal re wi taaraj chixloq’b’al jun lix Hu laj Mormon. Laj eechal re kixpatz’ re laj Samuel b’ar kixtaw chaq li hu. Laj Samuel kixye naq li ras kixjaltesi ru li aatin chiru jun perel ch’iich’ oor.

Kijosq’o’ laj eechal re. Kixye naq aj tik’ti’ laj Samuel ut kixye re naq taa’elq sa’ li ochochnal.

Kika’ch’ino’ xch’ool laj Samuel Smith. Chiru li q’ojyin a’an, kiwar rub’el jun xtoonal li che’.

Sa’ eq’la jun laj Samuel xko’o re rilb’al laj John Greene, a’an aj jolominel sa’ jalan chik iglees. Maak’a’ na’ok wi’ lix Hu laj Mormon chiru Qawa’ Greene, a’b’an kixye naq tixpatz’ reheb’ li komon sa’ lix iglees wi te’raj xloq’b’al. Naq kisutq’iik laj Samuel chirix oxib’ xamaan, maajun hu kik’ayiman. A’ut, li rixaqil li Qawa’ Greene kixye naq rilom chaq li hu.

Ch’a’aj lix taqlanb’il k’anjel aj Samuel Smith. Naq kisutq’i sa’ rochoch, kixk’oxla sa’ xch’ool naq maak’a’ li us xb’aanuhom chaq.

Laj Samuel ink’a’ kixnaw sa’ hoonal a’an naq lix k’anjel sa’ jun kutan tixk’e chixb’eresinkil naab’aleb’ chi ok sa’ li Iglees, jo’ li Qawa’ ut Qana’ Greene.

Laj Samuel kixk’ayi ajwi’ jun lix Hu laj Mormon re jun li winq, laj Phineas Young xk’ab’a’. Laj Phineas kiril ru li hu ut kixk’e re li riitz’in, laj Brigham Young xk’ab’a’.

Laj Brigham Young kiril ru lix Hu laj Mormon ut kixpaab’ naq yaal. Laj Phineas ut laj Brigham Young ke’xye resil lix Hu laj Mormon reheb’ li ramiiw, ut ke’rileb’ ajwi’ ru ut ke’xpaab’ naq yaal. Moqon, laj Phineas ut laj Brigham Young ut eb’ li ramiiw ke’xjunaji rib’ rik’in li Iglees.

Chiru xnumik junjunq chihab’, kib’oqe’ laj Brigham Young choq’ apostol. Chirix xnumik k’iila chihab’ ki’ok choq’ Awa’b’ej re li Iglees. A’an ut jalaneb’ chik li ke’jale’ xch’ooleb’ xb’aan lix k’anjel aj Samuel Smith ke’ok jo’ xnimal ru aj jolominel sa’ li Iglees.