Chʼol 22
Eb’ laj Santil Paab’anel neke’ok chi q’axonk Missouri
Julio–agosto re 1831
Li Profeet aj Jose Smith, laj Sidney Rigdon, laj Edward Partridge, ut jalaneb’ chik xkoheb’ Missouri. Q’axal ke’saho’ sa’ xch’ool chi xik xb’aan naq ke’raj xtzolb’al xkomon chirix lix yiib’ankil li tenamit Sion.
Xkoheb’ chiru junpaataq sa’ jukub’. Naq ke’wulak Missouri, laj Jose kiraj b’eek. Kixnaw naq loq’ li ch’och’ Missouri, ut kiraj rilb’al.
Laj Jose Smith ut li ramiiw ke’b’eek 500 tana’ kiloom chiru Missouri toj sa’ li Condado Jackson.
Junjunq kutan chirix xwulajikeb’ laj Jose Smith ut eb’ li ramiiw sa’ li Condado Jackson, ke’wulak laj Santil Paab’anel re Nueva York.
Ke’wulak ajwi’ eb’ laj k’amol aatin re Kirtland sa’ li Condado Jackson.
Laj Jose Smith ut li Obiisp Edward Partridge ke’xye reheb’ li k’a’ru te’xb’aanu. Junjunqeb’ te’xloq’ ch’och’ sa’ Missouri. Laj Oliver Cowdery ut laj William W. Phelps te’xtikib’eb’ li tzoleb’aal. Tento ajwi’ te’xsik’ ru ut te’xtz’iib’a hu choq’ reheb’ li kok’al re te’ril ru sa’ li tzoleb’aal.
Laj Jose kiraj xnawb’al li na’ajej taayiib’amanq wi’ li tenamit Sion. Kitijok chiru li qaChoxahil Yuwa’, ut kisumeek ru lix tij.
Tzolʼlebʼ ut Sumwank 57, xtiklajik li tasal
Li Qaawa’ kixk’utb’esi naq li tenamit Sion taawanq sa’ li Condado Jackson, Missouri. Kixk’utb’esi ajwi’ naq jun li santil ochoch taayiib’amanq sa’ Independence, jun k’aleb’aal sa’ xweent li Condado Jackson (chi’ilmanq li reetalil ch’och’ sa’ li perel 89). Li Qaawa’ kixyeechi’i ajwi’ naq eb’ li te’ab’inq chiruheb’ lix taqlahom ut te’xkuy xnumsinkil li yalox-ix rik’in paab’al te’k’ehe’q loq’alil choq’ xkorooneb’.
Li Qaawa’ kixye reheb’ laj Santil Paab’anel sa’ Missouri naq tento te’ab’inq chiruheb’ lix chaq’rab’il li tenamit. Tento te’xb’aanu naab’al li chaab’il k’anjel chi ink’a’ yeeb’il reheb’ naq te’xb’aanu. Li Qaawa’ kixyeechi’i ajwi’ naq junaq naxjal xk’a’uxl chirix lix maak, ink’a’ chik neke’jultiko’ re.
Li Qaawa’ kixye naq laj Sidney Rigdon chixk’ojob’ li ch’och’. Laj Sidney Rigdon kixpatz’ reheb’ laj Santil Paab’anel ma neke’xk’ul li ch’och’ rik’in b’antioxink sa’ xch’ooleb’ ut ma neke’xk’e rib’ sa’ aatin chixpaab’ankileb’ li chaq’rab’. “Jo’kan naqab’aanu,” chankeb’. Toja’ naq laj Sidney Rigdon kitijok ut kixk’ojob’ li ch’och’.
Sa’ li kutan jun, laj Jose Smith, laj Oliver Cowdery, laj Sidney Rigdon, ut jalaneb’ chik aj jolominel ke’xb’aanu jun ch’utam sa’ jun li chaab’il na’ajej sa’ Independence. Ke’rileb’ ru li loq’laj hu ut ke’tijok. Chirix a’an laj Jose Smith kixk’ojob’ li na’ajej choq’ re xkab’lankil jun santil ochoch.
Sa’ li kutan jun chixjunileb’ laj Santil Paab’anel sa’ xweent Missouri ke’wulak sa’ jun ch’utub’aj-ib’. Ke’nuje’ rik’in li Santil Musiq’ej, ut ke’saho’ sa’ xch’ool. Laj Jose kixye reheb’ naq li Dios taarosob’tesiheb’ wi tiikaqeb’ chi paab’ank.
Junjunq kutan chik chirix a’an, li Jesus kixk’e jun k’utb’esinb’il na’leb’ re laj Jose chirix li hilob’aal kutan, a’ li domingo. Li Jesus kixye naq li domingo a’an lix santil kutan. Sa’ domingo tento taqab’aanu li k’a’ru nokoxtenq’a chixjultikankil a’an. Tento toohilanq chiru li qatrab’aaj. Tento toowulaq sa’ iglees ut taqak’ul li loq’laj wa’ak. Tento taqajal qak’a’uxl chirix li qamaak. Tento taqakuy qasa’ ut tootijoq. Tento naq nokob’antioxink xb’aan chixjunileb’ li qosob’tesihom.
Eb’ laj Santil Paab’anel li neke’xb’aanu li k’a’ re ru a’in te’xk’ul chixjunil li k’a’ru chaab’il li nak’anjelak reheb’. Te’saho’q sa’ xch’ool, te’wanq sa’ tuqtuukilal, ut te’xk’ul li yu’am maak’a’ roso’jik.