Chʼol 1
Laj Jose Smith ut lix junkab’al
1805–1820
Laj Jose Smith kiyo’la sa’ 23 xb’e li po diciembre re 1805. Lix junkab’al ke’wan aran sa’ li estado Vermont sa’ li Estados Unidos. Lix yuwa’ laj Jose a’an ajwi’ laj Jose xk’ab’a’. Li xLucy xk’ab’a’ lix na’.
Oob’eb’ li ras riitz’in ut oxib’eb’ li ranab’ laj Jose.
Chaab’ileb’ xch’ool lix na’ xyuwa’ laj Jose. Ke’xraheb’ li ralal xk’ajol ut kaw ke’k’anjelak re xk’iresinkileb’ chi us.
Naq ch’ina al chaq laj Jose, kiwan jun xuwajel xox chiru li ra’. Eb’ aj b’anonel ke’xyal xq’e chixk’irtesinkil, a’b’an moko ke’ru ta.
Laj Hyrum Smith a’an jun reheb’ li ras laj Jose. A’an kixra laj Jose ut ra xch’ool naq q’axal ra li roq. Kichunla chixk’atq lix ch’aat laj Jose ut kixyal xq’e chixsahob’resinkil xch’ool.
Eb’ laj b’anonel ke’raj xch’otb’al li ra’ laj Jose, a’ut lix na’ moko kixkanab’eb’ ta chixb’aanunkil. Jo’kan naq eb’ laj b’anonel ke’xye naq te’risi jun raqal lix b’aqel. Laj Jose kixnaw naq k’a’jo’ li rahilal taareek’a naq eb’ laj b’anonel te’risi, a’ut kiwan xpaab’aal naq li qaChoxahil Yuwa’ tixxtenq’a.
Eb’ laj b’anonel ke’xpatz’ re laj Jose naq taaruk’ b’ayaq li viin re naq taak’osmanq li rahilal. Laj Jose ink’a’ kiraj ruk’b’al li viin. Laj Jose kixpatz’ re lix na’ naq taa’elq chaq chirix kab’l xb’aan naq ink’a’ kiraj naq a’an taaril naq eb’ laj b’anonel yookeb’ chixyok’b’al li ra’.
Laj Jose kixpatz’ re lix yuwa’ naq tixq’alu naq eb’ laj b’anonel yookeb’ chixyok’b’al li ra’. Ke’risiheb’ li raqal lix b’aqel wan wi’ li majelal. Q’axal ra a’in, a’b’an kaw xch’ool laj Jose. Chirix xnumik k’iila kutan, k’irtesinb’il chik li ra’.
Naq nim chik laj Jose, lix junkab’al kiq’axon toj sa’ li estado Nueva York. Ke’wan sa’ jun ochoch re yok’b’il toon che’ sa’ jun raqal chi ch’och’ nach’ rik’in Palmyra.
Neb’a’ lix junkab’al laj Jose. Kaw ke’k’anjelak re xtojb’al lix ch’och’. Eb’ li saaj al ke’xtenq’a lix yuwa’ chi awk ut chixk’aak’alenkileb’ li xul. Li saaj ixq ke’k’anjelak rochb’een lix na’.
Chaab’il xch’ool laj Jose. Sa xch’ool ut sa naril li se’ek ut li b’atz’unk.