Chʼol 30
Jun k’utb’esinb’il na’leb’ chirix li pleetik
25 xb’e li po diciembre re 1832
Naab’aleb’ yookeb’ chi kub’eek xha’ sa’ li Iglees. Ke’saho’ sa’ xch’ool rik’in li evangelio, a’b’anan yookeb’ xk’a’uxl chirix li k’a’ru yoo chi k’ulmank sa’ ruchich’och’.
Yookeb’ chi uxmank li hiik ut li pleet sa’ naab’aleb’ chi na’ajej.
Li k’a’aq re ru ra yookeb’ ajwi’ chi uxmank sa’ li Estados Unidos. Ke’wan junjunqeb’ li ink’a’ ke’raj kanaak sa’ li tenamit. Ke’raj lix jolominel xjuneseb’ rib’.
Sa’ li kutan re Ralankil sa’ 1832, li Jesus kixk’e jun k’utb’esinb’il na’leb’ re laj Jose Smith chirix li pleetik.
Li Jesus kixye naq li tenamit sa’ li Estados Unidos te’xpleeti rib’ sa’ jun li pleet. Li profeetil aatin a’in kitz’aqlo ru naq li Guerra Civil re li Estados Undos kitikla 30 chihab’ chirix a’in.
Li Jesus kixk’utb’esi ajwi’ naq te’wanje’q li pleet sa’ chixjunileb’ li na’ajej sa’ li ruchich’och’. Naab’aleb’ te’kamq, ut taawanq li xuwajel rahil ch’oolejil. Li Jesus kixye naq tento naq eb’ laj Santil Paab’anel tiikaqeb’ chi paab’ank chiruheb’ li kutan re ch’a’ajkilal a’in.
Ra xch’ool laj Jose Smith rik’in xnawb’al naq te’wanq naab’al li pleet. Kixnaw naq wi li tenamit te’ab’inq chiruheb’ lix taqlahom li Dios, ink’a’ te’pleetiq.