Chʼol 45

Xkomon chik ch’uut chi aj rahob’tesinel sa’ Missouri

1838–1839

Ke’wan naab’aleb’ laj Santil Paab’anel sa’ Far West, Missouri, ut aran kiwan ajwi’ laj Jose Smith. Ke’xyiib’ li kab’l ut li tzoleb’aal ut saheb’ xch’ool.

A’b’anan, sa’ junpaat ki’oso li tuqtuukilal ke’wan wi’. Jalaneb’ sa’ Missouri ke’ok wi’chik chixyoob’ankil li ch’a’ajkilal choq’ reheb’ laj Santil Paab’anel.

Jun ch’uut chi aj rahob’tesinel ke’xch’utub’ rib’ re xk’uub’ankil xna’leb’ chirix chanru te’xrahob’tesi laj Santil Paab’anel.

Li ch’uut chi aj rahob’tesinel kixb’aanu k’iila xuwajel aj k’anjel. Ke’risiheb’ laj Santil Paab’anel sa’ rochocheb’.

Ke’xk’at li rochocheb’ ut ke’xsacheb’ lix ch’och’.

Ke’xsak’eb’ li winq ut ke’xk’e junjunq reheb’ sa’ tz’alam.

Li ch’uut chi aj rahob’tesinel ke’xrahob’tesi junjunq reheb’ li ixq.

Eb’ laj Santil Paab’anel ke’xpatz’ xtenq’ankil rik’in li Gobernador Boggs, aj jolominel re Missouri. A’ut, ke’wan jalaneb’ li yookeb’ chixyeeb’al re li tik’ti’ chirix laj Santil Paab’anel, ut jo’kan ink’a’ kixtenq’aheb’.

Ke’ninqan li ch’a’jkilal sa’ xyanqeb’ laj Santil Paab’anel ut eb’ li ch’uut chi aj rahob’tesinel. Sa’ xch’ool naq xmaakeb’ laj Santil Paab’anel li ch’a’ajkilal, li Gobernador Boggs kixye reheb’ junjunqeb’ aj pleet naq te’xkamsiheb’ laj Santil Paab’anel wi ink’a’ te’elq chaq Missouri.

Ke’wan junjunq reheb’ laj Santil Paab’anel sa’ jun li k’aleb’aal, Haun’s Mill xk’ab’a’. Sa’ jun kutan, kichal jun ch’uut chi aj rahob’tesinel ut ke’ok chixpleetinkileb’.

Junjunq reheb’ laj Santil Paab’anel ke’eelelik toj’ sa’ li k’iche’. Jalaneb’ chik ke’ok sa’ jun kab’l re che’ re xkolb’al rib’. Li ch’uut chi aj rahob’tesinel ke’xyal puub’ank chi sa’ chiru li kok’ itz’il chiru li kab’l. Toja’ naq ki’ok li ch’uut sa’ kab’l ut ke’ok chi puub’ank wi’chik.

Li ch’uut chi aj rahob’tesinel ke’xkamsiheb’ 17 sa’ Haun’s Mill ut ke’xsak’eb’ 13 chik. Junjunqeb’ li kok’al ke’puub’aak ut ke’kamsiik.

Toja naq’ li ch’uut chi aj rahob’tesinel ke’xmaq’ li k’a’ru wan sa’ rochocheb’ ut eb’ lix b’eleb’aal laj Santil Paab’anel.

Moqon junjunqeb’ laj pleet ke’xchap laj Jose Smith ut xkomon chik laj jolominel re li Iglees. Kiyeeman reheb’ laj pleet naq te’xpuub’a laj Jose ut eb’ li ramiiw.

A’b’anan, laj jolominel reheb’ laj pleet ink’a’ ki’ab’in. A’an kixye naq xpuub’ankil laj Jose ut li jun ch’ol chik, a’an li kamsink.

Jun li raqb’a-aatin kik’uub’aman choq’ re laj Jose ut eb’ li ramiiw. Naq maji’ kitikla ut naq yoo ajwi’ li raqb’a-aatin , ke’k’ehe’ sa’ preexil sa’ li k’aleb’aal Richmond, Missouri. Eb’ laj k’aak’alenel ke’xk’eheb’ sa’ kadeen. Teneb’anb’il chiur laj Jose ut eb’ li ramiiw li wark chiru li kehil ch’och’.

Eb’ laj k’aak’alenel ke’xrahob’tesiheb’ li preex. Ke’aatinak rik’in li yib’ aj aatin ut ke’xye li esilal yib’eb’ ru. Ke’aatinak chirix chanru ke’relq’a li k’a’ru reheb’ laj Santil Paab’anel ut chanru ke’xkamsiheb’. Ke’aatinak chirix chanru ke’xrahob’tesiheb’ li ixq ut li kok’al. Sa’ jun q’ojyin yookeb’ chi se’ek ut chixnimankil rib’ chiru k’iila hoonal.

Laj Jose q’axal kijosq’o’ xb’aan li k’a’ru yookeb’ chixyeeb’al. Ink’a’ chik kiraj rab’inkil xkomon, jo’kan naq kixaqli ut kixtaqlaheb’ naq te’xkanab’. “Ch’anch’ooqex,” chan. “Sa’ xk’ab’a’ li Jesukristo, laa’in … nekexintaqla chi ch’anaak; ink’a’ chik tinkuy rab’inkil aatin k’a’jo’ xyib’al ru chi ink’a’ tinkamq. Kanab’omaq chi aatinak jo’kan, malaj laae’x malaj laa’in tixk’ul li kamk sa’ tz’aqal hoonal a’in!” Ke’xuwak laj k’aak’alenel ut ke’xpatz’ xkuyb’al rik’in laj Jose. Ke’kana chi ch’anch’o sa’ xxuk li kab’l chiru chixjunil li q’ojyin.