Chʼol 46
Laj Jose Smith sa’ li tz’alam sa’ Liberty
Noviembre re 1838–abril re 1839
Laj Jose Smith ut eb’ li ramiiw ke’tz’ape’ sa’ tz’alam chiru k’iila kutan sa’ Richmond, Missouri. Toja’ naq k’amb’ileb’ sa’ jun tz’alam sa’ Liberty, Missouri.
Laj Jose ut eb’ li ramiiw ke’wan choq’ preex sa’ li tz’alam sa’ Liberty chiru kaahib’ po. K’a’jo’ li rahilal ke’xnumsi aran. Tz’aj ru ut ke li tz’alam, ut wan naq b’ak’b’ileb’ rik’in kadeen. Teneb’anbil sa’ xb’eeneb’ li wark chiru ch’och’.
Moko sa ta li tzakemq. Wan naq kiwan xmay li tzakemq ut ke’yajer xb’aan.
Ra xch’ool laj Jose. Ink’a’ kixnaw ma taa’elq chaq sa’ tz’alam a’an rochb’eeneb’ li ramiiw. Yoo chixk’oxlankil lix junkab’al ut eb’ li komon sa’ li Iglees.
Laj Jose kitijok re xpatz’b’al re li qaChoxahil Yuwa’ jo’ najtil chik a’an ut eb’ laj Santil Paab’anel te’xnumsi li rahilal. Kixpatz’ ajwi’ re li qaChoxahil Yuwa’ naq tixtenq’aheb’.
Re xsumenkil lix tij, li Jesus kixye re laj Jose naq chiwanq li tuqtuukilal sa’ raam. Kixye naq naq lix ch’a’ajkilal laj Jose yal chiru jun ch’ina k’amok taawanq. Li Jesus kixye ajwi’ naq wi tiikaq chi paab’ank laj Jose, li Dios taarosob’tesi. Li Jesus kixye re laj Jose ut eb’ li ramiiw naq toj naxraheb’ ut naq sa’ junpaat a’an taawanq sa’ xyanqeb’.
Li Jesus kixye naq eb’ aj maa’us li ke’rahob’tesin re laj Santil Paab’anel te’q’use’q. Eb’ a’an rochb’eeneb’ li ralaj xk’ajol te’xnumsi rahilal. Ink’a’ te’xk’ul li tijonelil.
Li Jesus kixye re laj Jose naq eb’ laj Santil Paab’anel te’xk’ul k’iila usilal. Maak’a’ kiru chixramb’al ru li Dios sa’ rosob’tesinkileb’. Li Santil Musiq’ej tixk’ut chiruheb’ xninqal ru na’leb’ chirix li choxa ut li ruchich’och’.
Li Jesus kixye re laj Jose naq mixxuwa ru li k’a’ru te’xb’aanu li winq re. Li Jesus kixye naq wan naq us li ch’a’ajkilal ut li rahilal choq’ qe xb’aan naq naru naqataw qana’leb’ rik’ineb’. Li Jesus kixjultika re laj Jose naq a’an kixnumsi li rahilal q’axal nim wi’chik chiru chixjunil. Li Jesus kixwaklesi xch’ool laj Jose re naq tixyal xq’e chi paab’ank ut kixyeechi’i re naq li Dios taawanq rik’in.