Chʼol 34
Li Dios naxtijeb’ li tenamit re Sion
Julio–agosto re 1833
Li Dios kixtaqlaheb’ xkomon chik laj Santil Paab’anel chi xik sa’ li Condado Jackson, Missouri. Haye’ rajlal xamaan yookeb’ chi wulak, ut ke’xkab’laheb’ li kab’l, li k’ayib’aal, ut jun k’uub’leb’aal hu.
Eb’ laj Santil Paab’anel sa’ Missouri ke’wan sa’ tuqtuukilal ut sahil ch’oolejil chiru jarub’aq kutan. A’b’anan, tikto ke’wakli li ch’a’ajkilal. Junjunq reheb’ laj Santil Paab’anel ke’wan chaq chi q’etok aatin ut rahob’tesink. Junjunq reheb’ ke’xwech’ rix laj jolominel reheb’. Jalaneb’ chik li ke’wan aran yookeb’ xk’a’uxl chirix naq naab’aleb’ laj Santil Paab’anel yookeb’ chi wulak aran. Eb’ li wankeb’ aran ke’raj naq te’elq chaq laj Santil Paab’anel.
Jun josq’il ch’uut chi aj rahob’tesinel ke’xch’utub’ rib’. Ke’xtaqla junjunqeb’ li winq re xyeeb’al reheb’ aj jolominel re li Iglees naq eb’ laj Santil Paab’anel te’elq chaq li Condado Jackson. A’b’anan laj jolominel ke’xnaw naq li Dios kiraj naq te’xyiib’ li tenamit Sion sa’ li Condado Jackson.
Eb’ li winq sa’ li ch’uut chi aj rahob’tesinel ke’josq’o’ chi numtajenaq. Ke’weqok ut ke’xsach lix k’uub’leb’aal hu laj Santil Paab’anel.
Chirix a’an, li ch’uut chi aj rahob’tesinel ke’xchapeb’ li Obiisp Partridge ut laj Charles Allen ut ke’xb’on li tiqwal q’ol ut ke’xk’e rismal li kaxlan chiru xtib’eleb’. Li ch’uut ke’xsak’eb’ junjunqeb’ chik laj Santil Paab’anel.
Oxib’ kutan chirix a’an, lix komon li ch’uut chi aj rahob’tesinel ke’wulak sa’ tenamit ut ke’nume’puub’aheb’ li kab’l. Ke’xjap re chixhob’b’aleb’ laj Santil Paab’anel ut ke’xye naq te’xraple chi tz’uum yalaq ani te’xchap. Ke’xk’ateb’ li awimq ut ke’xsach’eb’ li kab’l, li k’uuleb’aal xul, ut li k’ayib’aal.
Laj Oliver Cowdery a’an jun reheb’ laj jolominel re li Iglees sa’ Missouri. Kitaqlaak sa’ Kirtland re rilb’al laj Jose Smith.
Naq laj Oliver kiwulak Kirtland, kixye re laj Jose li k’a’ru yoo chi k’ulmank sa’ li Condado Jackson. Eb’ laj Santil Paab’anel ke’raj xnawb’al li k’a’ru tento te’xb’aanu.
Laj Jose kixye re laj Oliver resil junjunqeb’ li k’utb’esinb’il na’leb’ kixk’ul chaq. Li Qaawa’ kixk’utb’esi chaq naq eb’ laj Santil Paab’anel tento te’xkab’la jun santil ochoch sa’ Sion. Li santil ochoch taatoje’q rik’in xlajetqil li tenamit. Li Jesus kixye re laj Jose naq k’a’jo’aq xnimal ru Sion wi te’ab’inq chiruheb’ li chaq’rab’. A’b’anan te’xk’ul li tojb’a-maak wi ink’a’ te’ab’inq chiruheb’ li chaq’rab’.
Li Jesus kixye naq eb’ laj Santil Paab’anel che’ab’inq chiruheb’ xchaq’rab’il li tenamit. Tento te’xsik’ ru li ani tiikeb’ xch’ool choq’ laj jolominel re li tenamit. Naq eb’ laj maa’us neke’ok choq’ laj jolominel, neke’raho’ sa’ xch’ool li tenamit.
Li Qaawa’ kixtaqlaheb’ laj Santil Paab’anel chi ab’ink chiru chixjunil li raatin. Kixye naq me’xxuwa ruheb’ laj xik’ ilonel reheb’. Ruuchil a’an, eb’ laj Santil Paab’anel tento te’xkuy xmaakeb’ laj xik’ ilonel reheb’. Me’xpleetiheb’ laj xik’ ilonel reheb’ wi ink’a’ taqlanb’ileb’ chi jo’kan xb’aan li Dios. Li Qaawa’ kixye naq a’an tixk’e tojb’a-maak reheb’ laj maa’us.
Junjunqeb’ xamaan chirix a’in, li Jesus kixye naq eb’ laj Santil Paab’anel sa’ Sion te’xk’ul li ch’a’ajkilal chiru jarub’aq kutan xb’aan naq ink’a’ ke’ab’in chiruheb’ lix chaq’rab’. A’b’anan, li Jesus kixyeechi’i naq sa’ junaq kutan tixtenq’aheb’ laj Santil Paab’anel chixyiib’ankil Sion.