Chʼol 13
Laj Jose ut li xEmma
Julio re 1830
Laj Jose ut li xEmma ke’xkuy k’iila ch’a’ajkilal. Kiyo’la jun xk’uula’al, a’b’anan kikam. Jwal ke’raho’ sa’ xch’ool.
Yoo lix k’a’uxl laj Jose chirix lix junkab’al. Neb’a’eb’, ut kiraj rilb’aleb’ chi us. Ki’ajman naq taa’awq re naq taawanq xtzakemq lix junkab’al.
Yoo ajwi’ xk’a’uxl laj Jose chirix li Iglees. Toj ke’wan li ani yookeb’ chixch’i’ch’i’inkileb’ laj Santil Paab’anel, ut ki’ajman naq junjunq reheb’ laj jolominel re li Iglees te’xmuq rib’ chiruheb’.
Wan naq teneb’anb’il laj Jose chi elk sa’ ochoch re xtenq’ankileb’ laj Santil Paab’anel. Ra xch’ool rik’in naq tento taa’elq, ut kika’ch’ino’ xch’ool li xEmma naq xko’o.
Laj Jose kitijok re xnawb’al li tento tixb’aanu. Li Jesus kixye re naq mixxuwa ruheb’ li ani k’eek’ookeb’ xch’ool chixrahob’tesinkil. Li Jesus kixye re laj Jose naq aj kuyunelaq sa’ lix ch’a’ajkilal. Kixye naq junelik taatenq’anq re laj Jose.
Li Jesus kixye naq laj Jose tento taaraw li riyaj ut chirix a’an taaxik chixtenq’ankileb’ laj Santil Paab’anel sa’ jalaneb’ chi na’ajej. Li Jesus kixye ajwi’ re naq mixk’oxla li tzakemq, li aq’ej, chi moko li tumin. Eb’ laj Santil Paab’anel te’xk’e re li k’a’ru na’ajman chiru.
Li Jesus kixk’e jun k’utb’esinb’il na’leb’ re laj Jose Smith choq’ re li xEmma. Li Jesus kixye naq li xEmma a’an jun ixq q’axal chaab’il. Sik’b’il ru re xb’aanunkil jun xnimal ru k’anjel.
Li Jesus kixye naq li xEmma tento tixk’ojob’ xch’ool laj Jose naq wan xch’a’ajkilal. Tento tixtenq’a re naq sa xch’ool ut re naq ink’a’ taaka’ch’ino’q xch’ool.
Li Jesus kixye naq li xEmaa tento taak’utuq chiruheb’ laj Santil Paab’anel ut tixtenq’aheb’ chixtawb’al ru li loq’laj hu. Kixye naq li Santil Musiq’ej tixtenq’a chixnawb’al li k’a’ru tixk’ut.
Li Jesus kixye ajwi’ naq li xEmma tento taaroksi lix hoonal chi tzolok. Tento tixtzol ut tixtz’iib’a naab’al li k’a’aq re ru.
Li Jesus kixpatz’ re li xEmma naq tixsik’ li b’ich choq’ re laj Santil Paab’anel. Eb’ li b’ich te’k’uub’aq sa’ jun li b’ichleb’aal.
Li qaChoxahil Yuwa’ naxra rab’inkileb’ chi b’ichank li tiikeb’ xch’ool. Eb’ lix b’ich chanchaneb’ jun tij chiru, ut eb’ li tij a’in te’sumeeq rik’in jun li osob’tesink.
Li Jesus kixye re li xEmma naq tuulanaq xch’ool ut naq tixra lix b’eelom. Kixye re naq taasaho’q sa’ xch’ool rik’ineb’ li osob’tesink li te’chalq sa’ xb’een laj Jose.
Li Jesus kixye re li xEmma naq taasaho’q sa’ xch’ool. Kixye ajwi’ re naq tixpaab’eb’ lix sumwank. Wi tixb’aanu, tixk’ul xninqal ru osob’tesink ut taaruuq taasutq’iiq rik’in a’an sa’ choxa.
Li Jesus kixye naq li k’a’ru kixye re li xEmma a’an choq’ reheb’ chixjunil.