Chʼol 35
Eb’ laj Santil Paab’anel neke’el chaq sa’ li Condado Jackson, Missouri
Septiembre–diciembre re 1833
Rik’in naq li ch’uut chi aj rahob’tesinel sa’ li Condado Jackson yoo chixyoob’ankil k’iila ch’a’ajkilal, eb’ laj Santil Paab’anel ke’xsik’ xtenq’ankil rik’in laj jolominel re Missouri. Laj William Phelps ut laj Orson Hyde xkoheb’ re rilb’al laj jolominel. Ke’xye re resil li ch’uut chi aj rahob’tesinel ut chanru naq ke’sache’ li rochocheb’ laj Santil Paab’anel.
Laj jolominel ink’a’ kiraj xtenq’ankileb’. Kixye reheb’ naq te’xpatz’ xtenq’ chiruheb’ laj raqol aatin. A’b’anan eb’ laj raqol aatin a’aneb’ ramiiw li ch’uut chi aj rahob’tesinel, ut ink’a’ ajwi’ ke’tenq’an.
Li ch’uut chi aj rahob’tesinel kixpleetiheb’ laj Santil Paab’anel chiru waqib’ kutan. Ke’xrum li rochocheb’, ke’xsak’eb’ li winq, ut ke’weqok sa’ jun li k’ayib’aal ut ke’xkut chixjunil chi ch’och’.
Li ch’uut chi aj rahob’tesinel ke’xmineb’ ru laj Santil Paab’anel chi elk chaq sa’ rochocheb’. Yoo li hab’alq’e, ut naab’aleb’ ke’kam xb’aan naq maak’a’ rochocheb’ chiru li kehileb’ kutan a’an. Eb’ laj Santil Paab’anel xkoheb’ sa’ jalaneb’ chik na’ajej sa’ xweent Missouri re te’najto’q rik’in li ch’uut chi aj rahob’tesinel.
Ke’raho’ sa’ xch’ooleb’ laj Santil Paab’anel. Eb’ li rochoch, li rawimq, ut lix k’ayibaal ke’sache’ chaq. Ke’maq’e’ lix jar paay chi xul. Laj jolominel chi moko eb’ laj raqol aatin te’xtenq’aheb’.
A’ut eb’ laj Santil Paab’anel toj yoo xpaab’aaleb’ chirix li Dios. Ke’xnaw naq tz’aqal yaal lix Iglees li Jesukristo, ut ke’xnaw naq laj Jose Smith a’an jun xprofeet li Dios.
Naq yookeb’ chi rahob’tesiik laj Santil Paab’anel sa’ Missouri, laj Jose Smith wan sa’ Kirtland, Ohio. Li Jesus kixk’e jun k’utb’esinb’il na’leb’ re laj Jose li kixch’olob’ k’a’ut naq yookeb’ chixk’ulb’al li ch’a’ajkilal eb’ laj Santil Paab’anel sa’ Missouri.
Li Jesus kixye naq junjunq reheb’ laj Santil Paab’anel ink’a’ ke’ab’in chaq chiruheb’ li chaq’rab’. Ink’a’ ke’wan chi junajinb’ileb’ xch’ool, jo’ na’ajman choq’ re li tenamit Sion. Junjunq reheb’ ke’xwech’ ut ke’xhob’ rib’ chirib’ileb’ rib’. Junjunq reheb’ a’an aj sowen, ut ink’a’ ke’raj wotzok.
Us ta li ch’a’ajkilal a’in, li Jesus kixye naq kixraheb’ laj Santil Paab’anel ut ink’a’ te’sachq sa’ xch’ool. Kixye naq tento te’k’ojob’aaq xch’ooleb’ xb’aan naq li saqeb’ ru li raameb’ te’sutq’iiq junaq kutan ut te’xyiib’ Sion. Li Jesus kixye reheb’ laj Santil Paab’anel naq te’xkawresi rib’ choq’ re xkutankil naq taak’ulunq wi’chik sa’ ruchich’och’. Naq taak’ulunq, li tenamit te’xra rib’ ut taawanq li tuqtuukilal. Eb’ li ke’xk’ul li rahob’tesink rik’in naq ke’xtaaqe li Jesus te’osob’tesiiq. Maak’a’aq xwankil laj Satanas re aalenk. Maak’a’aq li kamk jo’ nawb’il ru qab’aan anajwan. Chixjunil te’saho’q sa’ xch’ool.