Chʼol 50
Eb’ laj Santil Paab’anel sa’ Nauvoo
Enero–julio re 1841
Eb’ laj Santil Paab’anel yookeb’ chixyiib’ankil Navuoo re taawanq choq’ jun chaq’al ru tenamit. Sa’ junpaat kiniman li tenamit naq li ak’ komon sa’ li Iglees li ke’el chaq Inglaterra ut jalaneb’ chik na’ajej ke’xch’utub’ rib’ aran. Li Jesus kixk’e re laj Jose Smith jun k’utb’esinb’il na’leb’ aajel ru chirix li k’a’ru tento te’xb’aanu eb’ laj Santil Paab’anel sa’ Nauvoo.
Li Jesus kixye re laj Jose Smith naq tixtz’iib’a jun hu ut tixtaqla reheb’ chixjunil li rey ut aj jolominel sa’ ruchich’och’ re xyeeb’aleb’ resil li evangelio k’ojob’anb’il wi’chik. Li Jesus kixye ajwi’ naq eb’ laj Santil Paab’anel tento te’xyiib’ jun santil ochoch sa’ Nauvoo. Kiraj naq te’xk’am chaq li oor, li plaat, jalan paay chiw ch’iich’, ut k’iila paay chi che’ re xyiib’ankil li santil ochoch.
Li Jesus kixye naq taak’ulunq sa’ li santil ochoch. Aran tixk’eheb’ li k’utb’esinb’il na’leb’ chirix li tijonelil. Jo’kan ajwi’ tixk’ojob’ wi’chik li k’ojob’anb’il k’anjel ut tixk’utb’esi xkomon li na’leb’.
Li Jesus kixye re laj Jose naq eb’ laj Santil Paab’anel tento te’kub’eeq xha’ sa’ xk’ab’a’eb’ li ak kamenaqeb’. Li Jesus kixye naq eb’ laj Santil Paab’anel tento te’xyiib’ jun kub’sib’aal ha’ sa’ li santil ochoch b’ar wi’ te’ruuq te’kub’eeq xha’ sa’ xk’ab’a’eb’ li kamenaq.
Li Jesus kixk’utb’esi ajwi’ naq laj Hyrum Smith, li ras laj Jose, taawanq choq’ yuwaʼbʼejil aj kʼanjel. Jo’ yuwaʼbʼejil aj kʼanjel, laj Hyrum tixk’eheb’ xnimal ru osob’tesink reheb’ li komon sa’ li Iglees.
Li Jesus kixk’e ajwi’ re laj Jose jun k’utb’esinb’il na’leb’ chirix laj Brigham Young. Li Jesus kixye naq kixnaw naq kaw kik’anjelak laj Brigham sa’ li Iglees. Ak naab’al sut xkanab’ahom li rochoch ut lix junkab’al re xik sa’ taqlanb’il k’anjel.
Li Jesus kixye re laj Brigham Young naq chikanaaq rochb’een xjunkab’al ut taarileb’ ru chi us.