5–11 nō ’Ēperēra

Te Parau Ha’api’ira’a ʼe te mau Parau Fafau 30–36

« ’Ua parauhia atu ’oe ’ia a’o atu i tā’u nei ’evanelia »

’A tuatāpapa ai ’outou nā roto i te pure i Te Parau Ha’api’ira’a ’e te mau Parau Fafau 30–36 ma te feruri i te mau tamari’i i roto i tā ’outou piha ha’api’ira’a, e hōro’a mai te Vārua ia ’outou i te mau mana’o e nāhea e ha’api’i ia rātou. ’A ’imi i te tahi atu mau mana’o i roto i teie arata’i.

Pāpa’i i te mau mana’o e tae mai

Tītau i te mana’o

’A fa’a’ite i te hō’ē hōho’a nō te mau misiōnare, ’e e ani i te mau tamari’i ’ia fa’a’ite mai e aha tā rātou i ’ite nō ni’a i te ’ohipa misiōnare.

Ha’api’i i te ha’api’ira’a tumu : Te mau tamari’i ’āpī a’e

Te Parau Ha’api’ira’a ’e te mau Parau Fafau 33:2–3, 6–10

E nehenehe au e fa’a’ite i te ’evanelia a Iesu Mesia.

E nehenehe ato’a te mau tamari’i ’āpī a’e e fa’a’ite i tō rātou ’itera’a nō te ’evanelia a Iesu Mesia. Nāhea ’outou i te fa’a’ohipa i teie mau ’īrava nō te fa’auru ia rātou ’ia rave i te reira ?

Mau ’ohipara’a e nehenehe e rave

• E ani i te mau tamari’i ’ia tāmata i te parau i te hō’ē pereota mai teie « ’ua here te Atua ia ’oe » ma te tāpiri noa i te vaha. E ha’apāpū atu ē, e’ita tā tātou e nehenehe e ha’api’i i te ta’ata i te ’evanelia mai te mea ’aita tātou e hāmama i tō tātou vaha. E tai’o i Te Parau Ha’api’ira’a ’e te mau Parau Fafau 33:8–10, ’e e ani i te mau tamari’i ’ia hāmama i tō rātou vaha i te mau taime ato’a e fa’aro’o rātou i te pereota ra « hāmama i tō ’oe vaha ». Nō te aha te Metua i te Ao ra e hina’aro ai ’ia hāmama tātou i tō tātou vaha ’e ’ia fa’a’ite i te ’evanelia ia vetahi ’ē ?

• E muhumuhu i te hō’ē mea ma te marū i te mau tamari’i, mai teie « e peropheta Iosepha Semita nā te Atua », ’e e ani ia rātou ’ia fa’ahiti mai i te parau tā ’outou i parau. I muri iho ’a parau i te reira ma te reo pūai. Tai’o i Te Parau Ha’api’ira’a ’e te mau Parau Fafau 33:2. ’A tauturu i te mau tamari’i ’ia māramarama ē, te aura’a nō te parau ra « fa’ateitei i tō tātou reo » ’oia ho’i, ’eiaha e mata’u ’ia parau ia vetahi ’ē nō ni’a ia Iesu Mesia, te Buka a Moromona, ’e te tahi atu mau parau mau o te ’evanelia.

• E tu’u i te mau pēpe ’api parau ’aore rā, te mau hōho’a nā roto i te piha. E ani i te mau tamari’i ’ia ’imi mai i te mau ta’ata ’e ’ia ha’aputuputu ia rātou i mua i te piha. E tai’o i Te Parau Ha’api’ira’a ’e te mau Parau Fafau 33:6, ’e e fa’ata’a e aha te aura’a te parau e « ha’aputuputu [te Fatu i tāna] i mā’iti ». ’A fa’a’ite pāpū ē, e nehenehe tātou e tauturu i te ha’aputuputura’a i te ta’ata i te Fatu ra nā roto i te fa’a’itera’a tātou i te ’evanelia.

• E hīmene i te hō’ē hīmene nō ni’a i te fa’a’itera’a i te ’evanelia, mai te « Je voudrais déjà partir en mission », (Chants pour les enfants, 90). E tauturu i te mau tamari’i ’ia feruri i te mau rāve’a tā rātou e nehenehe e tauturu i te tahi atu mau ta’ata ’ia ha’api’i mai nō ni’a ia Iesu Mesia.

Te Parau Ha’api’ira’a ’e te mau Parau Fafau 33:12–17

E nehenehe au e patu i tō’u orara’a i ni’a i te ’evanelia a Iesu Mesia.

E nehenehe te parau a’o tā te Fatu i hōro’a ia Ezra Thayer ’e ia Northrop Sweet e tauturu i te mau tamari’i tā ’outou e ha’api’i ra ’ia patu i tō rātou orara’a i ni’a i te ’evanelia a Iesu Mesia.

Mau ’ohipara’a e nehenehe e rave

• E fa’a’ite i te mau tamari’i i te hō’ē hōho’a nō te niu o te hō’ē fare teitei, ’e e ani ia rātou ’ia fa’ata’a mai i te reira. Nō te aha te hō’ē fare teitei e tītau ai i te hō’ē niu pūai ’e te pa’ari ? E tai’o ’e te mau tamari’i i Te Parau Ha’api’ira’a ’e te mau Parau Fafau 33:12–13, ’e e fa’ata’a ē, tē hina’aro nei te Fatu ia tātou ’ia patu i tō tātou orara’a i ni’a i tāna ’evanelia. E tauturu i te mau tamari’i ’ia feruri i te tahi mau rāve’a e nehenehe ai rātou e patu i tō rātou orara’a i ni’a i te ’evanelia a Iesu Mesia.

• Hōro’a i te mau tamari’i i te tahi mau tao’a tā rātou e nehenehe e fa’a’ohipa nō te patu i te hō’ē pare teitei, mai te mau tao’a patura’a ’aore rā, te mau fa’ari’i urina. Tāpa’o i te tao’a tāta’itahi i te hō’ē hōho’a ’o tē fa’ahōho’a i te mau mea tā te Fatu i parau i roto i Te Parau Ha’api’ira’a ’e te mau Parau Fafau 33:14–17. E ani i te mau tamari’i ’ia patu i te hō’ē pare teitei ’a parau ai ’outou ia rātou e nāhea teie mau mea i te tauturu ia tātou ’ia patu i tō tātou orara’a i ni’a i te ’evanelia a Iesu Mesia.

Ha’api’i i te ha’api’ira’a tumu : Te mau tamari’i pa’ari

Te Parau Ha’api’ira’a ’e te mau Parau Fafau 30:1–2

E ti’a iā’u ’ia fa’atumu hau atu i ni’a i te mau mea a te Atua i te mau mea o te fenua nei.

E nehenehe te parau a’o a te Fatu ia David Whitmer i roto i te tuha’a 30 e tauturu i te mau tamari’i tā ’outou e ha’api’i nei ’ia vai ha’apa’o noa i te ’evanelia a Iesu Mesia.

Mau ’ohipara’a e nehenehe e rave

• Tai’o ’āmui i Te Parau Ha’api’ira’a ’e te mau Parau Fafau 30:1, ’e e ani i te mau tamari’i ’ia ha’apoto mai, nā roto i tā rātou iho mau parau, i te parau a’o tā te Fatu i hōro’a ia David Whitmer. E aha te tahi huru e nehenehe ai tātou i te tahi taime e « mata’u i te ta’ata » ’aore rā, e ha’ape’ape’a ai i te mea tā vetahi ’ē e nehenehe e mana’o, ’āhani i te rave noa i te mea tā tātou i ’ite e ti’a ’ia rave ?

• E ani i te mau tamari’i ’ia tāmata e rave e piti ’ohipa i te hō’ē ā taime, mai te fa’ahitira’a i te hō’ē hīro’a fa’aro’o ’e ’a pāpa’i ato’a ai i te mau i’oa o te mau tamari’i ato’a i roto i te piha ha’api’ira’a. E ui ia rātou nō te aha e mea pa’ari ’ia fa’atumu i ni’a i te ’ohipa mātāmua. E aha te tahi mau « mea nō te fenua nei » (Te Parau Ha’api’ira’a ’e te mau Parau Fafau 30:2) ’o te ruri ’ē ia tātou nō te ha’amana’o ia Iesu Mesia ’e i tāna ’evanelia ? Nāhea tātou ’ia tāpe’a fa’atumu noa i ni’a iāna, ’eiaha rā i ni’a i te mau mea e iti a’e te faufa’a ?

Te Parau Ha’api’ira’a ʼe te mau Parau Fafau 30-34

E nehenehe au e fa’a’ite i te ’evanelia a Iesu Mesia.

E rave rahi mau tamari’i i roto i te ’Ēkālesia e tīa’i nei nō te tāvini i te hō’ē misiōni rave tāmau ’aore rā, te tāvinira’a misiōni. E nehenehe te mau ’itera’a o te mau misiōnare i fa’a’itehia i roto i te mau tuha’a 30–34 e tauturu ia rātou nō te fa’aineine.

Mau ’ohipara’a e nehenehe e rave

• E ani i te hō’ē melo nō te pāroita ’ia ha’api’i mai nō ni’a i te hō’ē o te mau misiōnare tei pi’ihia i roto i Te Parau Ha’api’ira’a ’e te mau Parau Fafau 30–34 ’e ’ia fa’a’ite mai i te mau tamari’i e aha tā rātou i ha’api’i mai (hi’o « Te mau reo o te Fa’aho’i-fa’ahou-ra’a mai : Te feiā fa’afāriu-mātāmua-hia » i roto i te Mai, pe’e mai—nō te ta’ata hō’ē ’e te ’utuāfare ’aore rā, « Te fa’aro’o ’e te hi’ara’a o Thomas Marsh », Ezra Thayer : Mai te ta’ata ti’aturi ’ore e tae atu i te ta’ata ti’aturi », « Te pi’ira’a o Orson Pratt nō te tāvini », Revelations in Context, 54–69).

• Pāpa’i hōho’a i te hō’ē vaha rarahi i ni’a i te tāpura ’ere’ere, ’e e tauturu i te mau tamari’i ’ia ’imi i roto i Te Parau Ha’api’ira’a ’e te mau Parau Fafau 33:8–10 i te mau parau fafau a te Fatu ia tātou ’ia hāmama ana’e tātou i tō tātou vaha nō te fa’a’ite i te ’evanelia. Vaiiho i te mau tamari’i ’ia pāpa’i i teie mau parau fafau i ni’a i te tāpura ’ere’ere, ’e e tauturu ia rātou ’ia hāro’aro’a e aha te aura’a o teie mau parau fafau. E ani i te tamari’i tāta’itahi ’ia pāpa’i i roto i te vaha i te hō’ē parau mau o te ’evanelia tā rātou e nehenehe e fa’a’ite ia vetahi ’ē.

• Fa’a’ite i te hō’ē hōho’a o te hō’ē pū, ’e e parau e aha te aura’a ’ia poro i te ’evanelia « mai te ’otora’a o te hō’ē pū » Nāhea tātou i te « fa’ateitei » i tō tātou reo? (Te Parau Ha’api’ira’a ’e te mau Parau Fafau 33:2 ; 34:6).

• E ani i te mau tamari’i ’ia fa’a’ite mai nāhea rātou ’ia fa’aineine nō te tāvini i te misiōni i te hō’ē mahana. Mai te mea ’ua mātau rātou i te hō’ē ta’ata (penei a’e i te hō’ē melo o te ’utuāfare) ’o tē tāvini nei, e ani atu ia rātou ’ia fa’ati’a mai i tōna mau ’itera’a. ’Aore rā, e ani i te mau misiōnare, hō’ē misiōnare tei ho’i mai, ’aore rā, hō’ē ta’ata e fa’aineine ra nō te hō’ē misiōni, ’ia fa’a’ite mai i tōna ’oa’oa rahi nō te ’ohipa misiōnare. E fa’a’ite i te tahi o tō ’outou mau ’itera’a i te fa’a’itera’a i te ’evanelia, e tae noa atu i te mau ’itera’a i roto i tō ’outou orara’a i te mau mahana ato’a.

  

  E nehenehe au e faʼaʼite i te ’evanelia i tō’u mau hoa.

Te Parau Ha’api’ira’a ’e te mau Parau Fafau 33:12-17

E nehenehe au e patu i tō’u orara’a i ni’a i te ’evanelia a Iesu Mesia.

Mai te mea e nehenehe te mau tamari’i e ha’api’i mai ma te fāito matahiti ’āpī roa e nāhea ’ia patu i tō rātou orara’a i ni’a i te ’evanelia a Iesu Mesia, ’ua fana’o rahi ïa rātou i te vai-ha’apa’o-ra’a iāna. E tauturu te parau a’o i hōro’ahia i roto i teie mau ’īrava ia rātou.

Mau ’ohipara’a e nehenehe e rave

• E hōpoi mai i roto i te piha ha’api’ira’a i te mau tao’a pa’ari ta’a ’ē, mai te hō’ē animala huruhuru ha’avare, hō’ē rimu, te ’araea, ’e hō’ē ’ōfa’i. E vaiiho i te mau tamari’i ’ia tāpe’a tāta’itahi i te reira. E ani ia rātou ’ia hi’o i roto i Te Parau Ha’api’ira’a ’e te mau Parau Fafau 33:12–13 nō te ’ite mai nāhea te Fatu i te tātarara’a i tāna ’evanelia. Nō te aha te « papa » i riro ai ’ei ta’o maita’i nō te tātara i te ’evanelia ? Nāhea tātou e nehenehe ai e patu i tō tātou orara’a i ni’a i te papa o te ’evanelia ?

• Tauturu i te mau tamari’i ’ia tai’o i Te Parau Ha’api’ira’a ’e te mau Parau Fafau 33:12–17 ’e ’ia ’ite mai i te mau mea tā tātou e nehenehe e rave nō te patu i tō tātou orara’a i ni’a i te ’evanelia a Iesu Mesia. E ani i te mau tamari’i ’ia pāpa’i i te hō’ē hōho’a nō te hō’ē mea tei ’itehia ia rātou, ’e e vaiiho ia rātou ’ia ’imi e aha te mau hōho’a tā te tahi pae i pāpa’i.

Fa’aitoito i te ’apora’a mai i te fare

E ani i te mau tamari’i ’ia riro ’ei mau misiōnare nā roto i te fa’a’itera’a i tō rātou ’utuāfare i te tahi mea tā rātou i ha’api’i mai i roto i te Paraimere i teie mahana.

Haʼamaitaʼiraʼa i tā tātou haʼapiʼiraʼa

E fa’a’ite pāpū i te mau ha’amaita’ira’a i fafauhia mai. ʼIa ani anaʼe ʼoutou i te mau tamariʼi ’ia ora i te hōʼē parau tumu o te ’evanelia, ’a fa’a’ite i te mau fafaura’a tā te Atua i parau i te feiā e ora i te reira parau tumu. ’Ei hi’ora’a, e nehenehe ’outou e fa’a’ite i te ’itera’a pāpū nō te mau ha’amaita’ira’a tā te Fatu i hōro’a i te feiā e hāmama i tō rātou vaha ’e e fa’a’ite i te ’evanelia.