29 nō Māti–4 nō ’Ēperēra

Pāsa

« ’O vau nei ho’i ’oia ’o tē ora ra, ’o vau nei ’oia ’o tei taparahihia »

E riro te ha’api’ira’a Paraimere i te sābati Pāsa ’ei rāve’a maita’i roa nō te tauturu i te mau tamari’i ’ia ha’apūai i tō rātou fa’aro’o ia Iesu Mesia ’e tāna tāra’ehara. ’A ’imi i te arata’ira’a a te Fatu nō te ’ite ē, nāhea ’ia rave i te reira. E nehenehe ’outou e ’ite mai i te tahi mau mana’o tauturu i roto i teie arata’i. E nehenehe e ’itehia ia ’outou te tahi mau mana’o maita’i i roto i teie arata’ira’a parau.

Pāpa’i i te mau mana’o e tae mai

Tītau i te mana’o

E vaiiho i te mau tamari’i ’ia fa’a’ite mai ia ’outou e aha tā rātou i ’ite nō ni’a i te tumu tātou e fa’ahanahana ai i te Pāsa. E ani ia rātou e aha tā tō rātou ’utuāfare e rave nō te fa’ahanahana i te ti’afa’ahoura’a o Iesu Mesia i te pu’e tau nō Pāsa. ’Aore rā, e vaiiho ia rātou ’ia fa’a’ite mai e aha tā rātou i ha’api’i mai i te fare nō ni’a ia Iesu Mesia ’e i roto i te mau pāpa’ira’a mo’a.

Ha’api’i i te ha’api’ira’a tumu : Te mau tamari’i ’āpī

Te Parau Ha’api’ira’a ’e te mau Parau Fafau 138:11–17

Maoti Iesu Mesia, e ti’afa’ahou vau.

’A ha’api’i ai ’outou i te mau tamari’i nō ni’a i te ti’afa’ahoura’a o Iesu Mesia, e nehenehe Te Parau Ha’api’ira’a ʼe te mau Parau Fafau 138:11–17 e tauturu ia ’outou ’ia fa’ata’a i te aura’a nō te parau ra, ’ia ti’afa’ahou. E nehenehe ato’a teie mau ’īrava e tauturu i te patu i tō rātou fa’aro’o ē, e ti’afa’ahou rātou i te hō’ē mahana.

Te mau ’ohipa e nehenehe e rave

• E fa’a’ite i te mau hōho’a o te pohera’a, te hunara’a, ’e te ti’afa’ahoura’a o te Fa’aora (hi’o i te Buka hōho’a o te ’evanelia, nos. 57, 58, ’e 59). Ani i te mau tamari’i e aha tā rātou i ’ite nō ni’a i teie mau ’ohipa i tupu. E fa’a’ite pāpū ē, ’ua pohe Iesu nō tātou ’e ’ua ti’afa’ahou mai te pohe mai ’ia nehenehe ho’i ia tātou pā’āto’a ’ia ti’afa’ahou i muri mai i te pohe.

• ’A feruri i te hō’ē ha’api’ira’a tao’a ’o tē nehenehe e tauturu i te mau tamari’i ’ia māramarama i te ’ohipa e tupu ’ia pohe ana’e tātou (e ta’a ’ē tō tātou vārua ’e tō tātou tino) ’e ’ia ti’afa’ahou tātou (e ’āmui fa’ahou tō tātou vārua ’e tō tātou tino). ’Ei hi’ora’a, e aha te ’ohipa e tupu ’ia tātara ana’e tātou i te putu uira i rāpae i te hō’ē moripata ’aore rā, te inita i rāpae i te hō’ē tuira ? E aha te tupu ’ia tāhō’ē-fa’ahou-ana’e-hia teie mau mea ?

• E tai’o i te mau tamari’i i roto i Te Parau Ha’api’ira’a ʼe te mau Parau Fafau 138:17  :« E tāhō’ē-fa’ahou-hia te vārua ’e te tino e ’ore ho’i e fa’ata’a-’ē-fa’ahou-hia, ’ia fāri’i ho’i rāua i te ’īra’a o te ’oa’oa » Nō te aha tātou e māuruuru ai nō tō tātou tino ? E fa’a’ite i te ’oa’oa tā ’outou e fāri’i nei nō te ’itera’a ē, e ti’afa’ahou tātou pā’āto’a ’e e fāri’i fa’ahou tātou i tō tātou tino.

• E hīmene ’āmui i te hō’ē hīmene nō ni’a i te ti’afa’ahoura’a, mai te « Jésus est-il ressuscité ? » ’aore rā « Jésus est ressuscité » (Chants pour les enfants, 44, 45). Hōro’a i te mau tamari’i i te mau hōho’a ’o tē fa’ahōho’a ra i te mau ta’o ’aore rā, i te mau pereota i roto i te hīmene (’ei hi’ora’a, hi’o te Buka hōho’a o te ’evanelia nos., 59, 60 ’e 61), ’e e ani ia rātou ’ia ’āfa’i i tā rātou hōho’a i ni’a ’ia hīmene ana’e rātou i te reira mau ta’o.

Te Parau Ha’api’ira’a ʼe te mau Parau Fafau 76:11– 24 ; 110: 1–7 ; Iosepha Semita—’Ā’amu 1:14-17

’Ua ’ite te peropheta Iosepha Semita ia Iesu Mesia.

Hō’ē rāve’a nō te tauturu i te mau tamari’i ’ia ha’apūai i tō rātou fa’aro’o i te Fa’aora ’o tē fa’a’itera’a ïa ia rātou i te ’itera’a pāpū o Iosepha Semita : « Te ora nei ’oia ! Nō te mea ’ua ’ite mata atura māua iāna, i te pae ’atau ho’i nō te Atua » (Te Parau Ha’api’ira’a ʼe te mau Parau Fafau 76:22–23).

Te mau ’ohipa e nehenehe e rave

• E fa’a’ite i te mau tamari’i i te hō’ē hōho’a nō te ’Ōrama Mātāmua a Iosepha Semita (hi’o Te arata’i nō te 4–10 nō Tēnuare i roto i te Mai, pe’e mai—nō te ta’ata hō’ē ’e te ’utuāfare). E ani i te mau tamari’i ’ia fa’a’ite mai ia ’outou e aha te tupu nei i roto i te hōho’a, ’e e ani ia rātou ’ia ’imi ia Iesu Mesia. E ui i te mau tamari’i, ’ua ’ite ānei rātou nō ni’a i te tahi atu mau taime ’a ’ite ai Iosepha Semita i te Fa’aora. I roto i tā ’outou iho mau parau, e fa’ati’a i te mau ’itera’a i tātarahia i roto i Te Parau Ha’api’ira’a ʼe te mau Parau Fafau 76:11–24 ; 110:1–7. E parau i te mau tamari’i e mea nāhea teie mau pāpa’ira’a mo’a i te patura’a i tō ’outou fa’aro’o ia Iesu Mesia.

• ’A fa’aū ai te mau tamari’i i te ’api ’ohipara’a o teie hepetoma, ’a tai’o ia rātou i te mau pāpa’ira’a mo’a e fa’a’ite ra i te reira. E ha’apāpū i te mau fa’a’itera’a i roto i te mau hōho’a ’o tei tātarahia i roto i te mau ’īrava. ’A fa’a’ite pāpū i te mau tamari’i ē, ’ua ’ite Iosepha Semita ia Iesu Mesia, ’e teie te hō’ē tumu i ’ite ai tātou ē, tē ora nei Iesu.

Ha’api’i i te ha’api’ira’a tumu : Te mau tamari’i pa’ari

Te Parau Ha’api’ira’a ʼe te mau Parau Fafau 76:11–24 ; 110:1–10 ; Iosepha Semita—’Ā’amu 1:14–17

’Ua fa’a’ite pāpū te peropheta Iosepha Semita ē, tē ora nei Iesu Mesia.

Te misiōni faufa’a roa a’e a te hō’ē peropheta ’o tē fa’a’ite-pāpū-ra’a ïa nō Iesu Mesia. E tauturu i te mau tamari’i ’ia patu i tō rātou fa’aro’o i te Fa’aora nā roto i te ha’api’ira’a mai nā roto mai i te ’itera’a pāpū o Iosepha Semita nō ni’a iāna.

Te mau ’ohipa e nehenehe e rave

• Tē fa’ata’a nei teie mau tuha’a parau i muri nei i te mau taime ’a fā mai ai Iesu Mesia ia Iosepha Semita : Te Parau Ha’api’ira’a ʼe te mau Parau Fafau 76:11–24 ; 110:1–10 ; Iosepha Semita—-’Ā’amu 1:14–17. Pāpa’i i ni’a i te tāpura ’ere’ere i te tahi mau parau mau tā tātou i ’apo mai nō ni’a i te Fa’aora nā roto mai i teie mau ’īrava. E ani i te mau tamari’i ’ia ’imi mai e aha te mau ’īrava e ha’api’i nei i te mau parau mau i tāpurahia i ni’a i te tāpura ’ere’ere. E aha atu ā tā tātou i ’apo mai nō ni’a ia Iesu Mesia nā roto mai i te mau ’itera’a o Iosepha Semita ?

• I ni’a i te ’api ’ohipara’a nō teie hepetoma, e tauturu i te mau tamari’i ’ia fa’atano i te mau hōho’a i ni’a i te mau ’īrava o te pāpa’ira’a mo’a. Nō te aha te ’itera’a ē, ’ua ’ite Iosepha Semita i te Fa’aora tei ti’afa’ahou i riro ai ’ei ha’amaita’ira’a ? ’A fa’a’ite i tō ’outou ’itera’a pāpū ē, tē ora nei Iesu Mesia ’e e peropheta ’o Iosepha Semita.

Te Parau Ha’api’ira’a ʼe te mau Parau Fafau 63:49 ; 88:14–17, 27 ; 138:11, 14–17

Maoti Iesu Mesia, e ti’a fa’ahou vau.

Nāhea ’outou i te tauturu i te mau tamari’i ’ia fa’ahōhonu i tō rātou māuruuru i te hōro’a o te ti’afa’ahoura’a o te Fa’aora ia tātou pā’āto’a ?

Te mau ’ohipa e nehenehe e rave

• Hōro’a i te tamari’i tāta’itahi i te hō’ē o te mau tuha’a parau pāpa’ira’a mo’a i muri nei : Te Parau Ha’api’ira’a ʼe te Mau Parau Fafau 63:49 ; 88:14–17, 27 ; 138:11, 14–17. E ani i te mau tamari’i ’ia ’imi i tā rātou mau ’īrava nō te ’ite mai i te hō’ē pereota tā rātou e mana’o ra e tū’ati i ni’a i te parau poro’i o te pāsa. ’A vaiiho ia rātou ’ia fa’a’ite mai i tō rātou mau mana’o. Mai te mea e taimehia, e vaiiho ia rātou ’ia hāmani i te mau tāreta ’o tē fa’ahōho’a i te mau pereota tei ’itehia e rātou, tā rātou e nehenehe e hōro’a i te mau melo o te ’utuāfare ’aore rā, i te mau hoa.

• E ui i te mau tamari’i nāhea rātou ’ia fa’ata’a i te hō’ē teina ’aore rā, i te hō’ē hoa i te aura’a nō te parau ē, ’ia ti’afa’ahou. Nō te mau mana’o, ’a tai’o ’āmui Te Parau Ha’api’ira’a ʼe te mau Parau Fafau 138:14–17, ’e ’a feruri i te mau uira’a mai teie te huru : E aha te tupu i ni’a i tō tātou vārua ’e tō tātou tino ’ia pohe ana’e tātou ? E aha te tupu ’ia ti’afa’ahou tātou ? Nāhea tō Iesu Mesia ravera’a ’ia tupu te ti’afa’ahoura’a ?

• Fa’a’ite i te video « Nō te mea te ora nei ’oia » (ChurchofJesusChrist.org), ’e e vaiiho i te mau tamari’i ’ia fa’a’ite mai i tō rātou mana’o nō ni’a i te ’ohipa tā te Fa’aora i rave nō rātou.

  

  Te Fatu nō te pure, nā Yongsung Kim

Te Parau Ha’api’ira’a ʼe te mau Parau Fafau 18:10–13 ; 19:16–19 ; 45:3–5 ; 58:42–43

Maoti Iesu Mesia, e nehenehe e fa’a’orehia tā’u mau hara.

Ta’a ’ē noa atu tōna fa’aorara’a ia tātou i te pohe tino, ’ua hōro’a mai Iesu Mesia i te hō’ē rāve’a ’ia fa’aorahia tātou i te pohe vārua—’oia ho’i, ’ia fa’a’orehia tā tātou mau hara ’e ’ia ho’i fa’ahou i mua i te aro o te Atua.

Te mau ’ohipa e nehenehe e rave

• Pāpa’i i ni’a i te tāpura ’ere’ere e piti upo’o parau e tū’ati i teie : E aha tā te Fa’aora i rave ’e E aha tē tītauhia iā’u ’ia rave. E ani i te tamari’i tāta’itahi ’ia ’imi i te hō’ē o te mau tuha’a parau i muri nei nō te ’ite mai i te hō’ē mea e tano i raro a’e i teie mau upo’o parau : Te Parau Ha’api’ira’a ʼe te mau Parau Fafau 18:10–13 ; 19:16–19 ; 45:3–5 ; 58:42–43. E fa’a’ite i tō ’outou ’oa’oa ’e te māuruuru nō te ’ohipa tā te Fa’aora i rave nō tātou.

• Tauturu i te mau tamari’i ’ia tāmau ’ā’au i te hīro’a fa’aro’o toru. E nehenehe ’outou e tauturu ia rātou ’ia tāmau ’ā’au i te reira nā roto i te fa’a’itera’a i te mau hōho’a e tū’ati i ni’a i te mau pereota faufa’a.

• E fa’a’ite i te video « Te pere’o’o ta’ata’ahi ’ana’ana » (ChurchofJesusChrist.org), ’aore rā, e fa’ati’a i te hō’ē ’ā’amu nā ’outou iho nō ni’a i te hō’ē tamari’i tei rave i te hō’ē mā’itira’a ti’a ’ore ’e i muri iho, ’ua tātarahapa. Tauturu i te mau tamari’i ’ia ’āparau e aha tā te tamari’i i roto i te ’ā’amu i rave nō te fāri’i i te fa’a’orera’a hara. E aha tā te Fa’aora i rave i ti’a ai ’ia fa’a’orehia tā tātou hara ?

Fa’aitoito i te ha’api’ira’a mai i te fare

E tauturu i te mau tamari’i ’ia feruri i te hō’ē mea tā rātou e nehenehe e rave nō te parau i te tahi atu mau ta’ata—te mau melo ihoā rā nō tō rātou ’utuāfare—e aha tā Iesu Mesia i rave nō tātou. ’Ia fārerei fa’ahou ’outou, ’a ani ia rātou ’ia fa’a’ite mai ia ’outou i te mea tā rātou i rave.

Ha’amaita’ira’a i tā tātou ha’api’ira’a

E fāna’o te mau tamari’i nā roto i te tāpiti-noa-ra’a. ’Eiaha e mata’u i te nā ni’a-fa’ahou-noa-ra’a te mau ’ohipara’a e rave rahi taime, nō te mau tamari’i ’āpī ihoā rā. E tauturu te tāpiti-noa-ra’a i te mau tamari’i ’ia ha’amana’o i te mea tā rātou i ha’api’i mai.