19–25 nō ’Ēperēra

Te Parau Ha’api’ira’a ’e te mau Parau Fafau 41-44

« Tā’u nei ture nō te fa’atere i tā’u nei ’Ēkālesia »

I roto i tā ’outou fa’aineinera’a i teie hepetoma, e ha’apa’o maita’i i te mau mana’o tā ’outou e fāri’i nō ’ō mai i te Vārua ra. I tō ’outou mana’o e aha tā te mau tamari’i e hina’aro e ha’api’i mai nā roto mai i Te Parau Ha’api’ira’a ’e te mau Parau Fafau 41–44 ?

Pāpa’i i te mau mana’o e tae mai

Tītau i te mana’o

E tāora i te hō’ē pōpō i te hō’ē tamari’i ra, ’e e ani i te reira tamari’i ’ia fa’a’ite mai i te hō’ē fa’auera’a tāna i ’ite. E tāmau noa i te tāora i te pōpō e tae noa atu i te taime ’ua hope pauroa te mau tamari’i i te fa’a’ite mai i te hō’ē mea.

Ha’api’i i te ha’api’ira’a tumu : Te mau tamari’i ’āpī

Te Parau Ha’api’ira’a ’e te mau Parau Fafau 42:2.

E nehenehe au e ha’apa’o i te mau ture a te Atua.

’A tupu noa ai te ’Ēkālesia i te rahi ’e ’a ha’aputuputu noa ai te mau melo i Kirtland, Ohio, ’ua heheu mai te Fatu i te peropheta Iosepha Semita i te mea tāna i pi’i tāna « mau ture » ’e ’ua fa’aue ’oia i te feiā mo’a « ’a ara mai ’e ’a fa’aro’o na ’e ’a ha’apa’o ho’i » i te reira. Nāhea e ti’a ia ’outou ’ia tauturu i te mau tamari’i ’ia māramarama ē, e ha’amaita’ihia tātou ’ia ha’apa’o ana’e tātou ?

Te mau ’ohipa e nehenehe e rave

• E tai’o i Te Parau Ha’api’ira’a ’e te mau Parau Fafau 42:2, ma te ha’apāpū i te parau « ha’apa’o ». Hōro’a i te mau tamari’i i te tahi mau fa’ahōho’ara’a ha’uti ’ōhie i reira te hō’ē tamari’i e mā’iti ai ’ia ha’apa’o ’aore rā, ’ia ha’apa’o ’ore i te hō’ē ture ’aore rā, i te hō’ē arata’ira’a. E ani i te mau tamari’i ’ia fa’aro’o maita’i ’e ’ia ata mai te mea ē, e ha’apa’o te ta’ata i roto i te ’ā’amu, ’e ’ia fa’atu’atu’a i te mata mai te mea ē, e ha’apa’o ’ore ’oia. E fa’a’ite i te mau ha’amaita’ira’a tā ’outou i fāri’i i tō ’outou ha’apa’ora’a i te ture a te Atua.

• E ha’uti i te hō’ē ha’uti nā roto i te hōro’ara’a i te mau tamari’i i te hō’ē ture nō te pe’e. ’Ei hi’ora’a, e nehenehe ’outou e parau ia rātou ē, e ti’a ia rātou ’ia ’āfa’i i tō rātou rima i ni’a ’e ’ia pi’ihia nō te pāhono i te mau uira’a. I muri iho e vaiiho ia rātou ’ia fa’a’ohipa i te ha’apa’ora’a nā roto i te uira’a ia rātou i te mau uira’a ’e te pi’ira’a ia rātou ’ia ’āfa’i i tō rātou rima i ni’a. E aha te mau ture tā te Atua i hōro’a mai ia tātou ?

• E fa’a’ī i te ’api ’ohipara’a ’e te mau tamari’i, ’aore rā, e hīmene i te hō’ē hīmene nō ni’a i te ha’apa’ora’a i te mau ture a te Atua, mai te « Je veux suivre l’évangile » (Chants pour les enfants, 72). E parau i te mau tamari’i ē, e mea nāhea te ha’apa’ora’a i te mau ture a te Atua i te hōro’ara’a mai i te ’oa’oa ia ’outou.

  

  Tē ha’api’i nei tātou i te mau fa’auera’a a te Atua i roto i te Paraimere.

Te Parau Ha’api’ira’a ’e te mau Parau Fafau 42:38

Tē tāvini nei au ia Iesu Mesia ’ia tāvini ana’e au ia vetahi ’ē.

Tē hina’aro nei te Fatu i tōna feiā mo’a ’ia ’atu’atu i te feiā veve ’e te nava’i ’ore. E tauturu i te mau tamari’i ’ia māramarama ē, ’ia tāvini ana’e rātou i te ta’ata nava’i ’ore, tē tāvini ato’a ra ïa rātou i te Fa’aora.

Te mau ’ohipa e nehenehe e rave

• ’Āhiri ē, tei roto Iesu Mesia i tā tātou piha ha’api’ira’a i teie mahana, e aha tā tātou e parau iāna ? Nāhea tātou iāna ? E fa’a’ite i te hō’ē hōho’a o te Fa’aora, ’e ’a fa’ata’a i te ha’api’ira’a a Iesu ē, ’ia fa’a’ite ana’e tātou i te here ia vetahi ’ē, tē fa’a’ite ato’a ra ïa tātou i te here iāna. E tauturu i te mau tamari’i ’ia fa’ahiti fa’ahou i te ’īrava 38 ’e o ’outou, te tahi noa mau ta’o i te taime hō’ē.

• E tauturu i te mau tamari’i ’ia feruri i te mau rāve’a e nehenehe ai rātou e tāvini ia Iesu nā roto i te tāvinira’a ia vetahi ’ē. E ’itehia ia rātou te tahi mau mana’o i roto i te video « ’A hōro’a i te parau » (ChurchofJesusChrist.org) ’aore rā, nā roto mai i te hō’ē hōho’a o te Fa’aora e tauturu ra ia vetahi ’ē, mai te hōho’a i tōna fa’aorara’a i te ma’i ’aore rā, te fa’a’itera’a i te maita’i i te mau tamari’i (hio i te Buka hōho’a o te ’evanelia, nos.42, 47). ’A fa’a’ite pāpū ē, ’ia tāvini ana’e rātou ia vetahi ’ē, tē tāvini ato’a ra ïa rātou ia Iesu.

Te Parau Ha’api’ira’a ’e te mau Parau Fafau 43:1–7

E arata’i te Fatu i tāna ’Ēkālesia nā roto i tāna peropheta.

E nehenehe ’outou e tauturu i te mau tamari’i ’eiaha ’ia fa’ahemahia i roto i tō rātou orara’a nā roto i te ha’api’ira’a ia rātou, i tō rātou ’āpīra’a, te ravera’a a te Fatu nō te arata’i i tāna ’Ēkālesia nā roto mai i te peropheta ora.

Te mau ’ohipa e nehenehe e rave

• E fa’a’ite i te mau hōho’a o te mau ta’ata rau, tae noa atu i te hō’ē hōho’a o te peropheta nō teie ’anotau. E huri i te mau hōho’a i raro, ’e e vaiiho i te mau tamari’i ’ia huri tātā’i hō’ē i te mau hōho’a ’ia ’itehia ia rātou te peropheta. E fa’ata’a ē, te ha’api’ira’a a te Fatu ē, te peropheta ana’e tei « ha’apa’ohia nā ’outou ’ia fāri’i i te mau fa’auera’a ’e te mau heheura’a nō ō mai i [te Fatu]ra » nō te arata’i i te ’Ēkālesia (Te Parau Ha’api’ira’a ’e te mau Parau Fafau 43:2).

• E hīmene ’āmui i te hō’ē hīmene nō ni’a i te mau peropheta, mai te ’īrava hōpe’a o te « Suis les prophètes » (Chants pour les enfants,58-59). ’A fa’a’ite i tō ’outou ’itera’a pāpū ē, nā te peropheta e arata’i i te ’Ēkālesia.

Ha’api’i i te ha’api’ira’a tumu : Te mau tamari’i pa’ari

Te Parau Ha’api’ira’a ’e te mau Parau Fafau 41:5

Hō’ē pipi o te hō’ē ïa ta’ata ’o tē fāri’i i te mau ture a te Atua ’e ’o tē ha’apa’o i te reira.

’Ua ’ite ānei te mau tamari’i tā ’outou e ha’api’i ra i te aura’a o te parau, ’ia riro ’ei pipi nā Iesu Mesia ? Te Parau Ha’api’ira’a ’e te mau Parau Fafau 41:5 e nehenehe e tauturu ia rātou ’ia hāro’aro’a e nāhea ’ia riro ’ei mau pipi maita’i a’e.

Te mau ’ohipa e nehenehe e rave

• Pāpa’i i Te Parau Ha’api’ira’a ’e te mau Parau Fafau 41:5 i ni’a i te hō’ē tuha’a ’api parau, ma te pāpa’i ’ore i te ta’o ra « pipi » i te mau vāhi i tītauhia ’ia pāpa’i. E ani i te mau tamari’i ’ia fa’a’ī i te mau vāhi vata, ma te hi’o i roto i Te Parau Ha’api’ira’a ’e te mau Parau Fafau 41:5 mai te mea e hina’aro rātou i te tauturu. E aha te aura’a o te parau ’ia riro ’ei pipi nā Iesu Mesia ? E fa’a’ite e mea nāhea ’outou i te fa’aitoitora’a ’ia riro ’ei pipi maita’i a’e nā te Mesia.

• I muri a’e i te ’āparaura’a i Te Parau Ha’api’ira’a ’e te mau Parau Fafau 41:5, e ani i te mau tamari’i ’ia feruri i te mau ture tā tātou i fāri’i nō ō mai i te Fatu ra. E ani ia rātou, te tahi i muri mai i te tahi, ’ia ha’uti teata ta’ata ora i te ha’apa’ora’a i te hō’ē o te reira mau ture, ’a tāmata ai te toe’a o te piha ha’api’ira’a i te ’imi e aha te reira.

• E hōro’a i te melo tāta’itahi o te piha ha’api’ira’a i te hō’ē tuha’a ’api parau, ’e e ani ia rātou ’ia pāpa’i i ni’a iho i te reira, i te hō’ē rāve’a e ti’a ai ia rātou ’ia riro ’ei pipi maita’i a’e. E ani i te tamari’i tāta’itahi ’ia fa’a’ite mai i te mea tā rātou i pāpa’i, i muri iho, e tāpiri ’āmui i te mau tuha’a ’api parau nō te hāmani i te hō’ē fifi parau.

Te Parau Ha’api’ira’a ’e te mau Parau Fafau 42:61,68

E heheu te Atua i te pa’ari i te feiā e ani.

E ui i te mau tamari’i i te mau uira’a e rave rahi ’a tupu ai tō rātou ’ite i te rahi nō ni’a i te ao nei ’e nō ni’a i te ’evanelia. Nāhea e ti’a ai ia ’outou ’ia fa’a’ohipa i Te Parau Ha’api’ira’a ’e te mau Parau Fafau 42: 61, 68 nō te tauturu ia rātou ’ia ’ite nāhea e roa’a ai te pa’ari nō ō mai i te Fatu ra ?

Te mau ’ohipa e nehenehe e rave

• E ani i te mau tamari’i ’ia fa’a’ite mai ia ’outou i te hō’ē mea ’o tē tauturu ia rātou ’ia fāri’i i te hau ’e te hō’ē mea ’o tē tauturu ia rātou ’ia ’oa’oa. E ani ia rātou ’ia tai’o i Te Parau Ha’api’ira’a ’e te mau Parau Fafau 42:61 ma te ’imi i te mau parau ra « te mau mea hau » ’e te « ’oa’oa » Tauturu i te mau tamari’i ’ia feruri i te mau parau mau tā te Atua i heheu mai ’o tē hōro’a mai ia rātou i te hau ’e te ’oa’oa.

• E tai’o i Te Parau Ha’api’ira’a ’e te mau Parau Fafau 42:61, 68 ’e te mau tamari’i, ma te ha’apāpū i te pereota ra, « te heheura’a nā ni’a i te heheura’a, te ’ite ho’i nā ni’a i te ’ite ». E fa’ata’a ē, ’aita te Atua e heheu mai i te mau mea ato’a i te hō’ē taime ; e hōro’a mai rā ’oia ia tātou mā’a vāhi iti i te hō’ē taime. E fa’a’ite i te huru nō te fa’a’īra’a i te hō’ē puzzle, te hō’ē vāhi iti i ni’a i te tahi vāhi iti, ’aore rā, te hō’ē mea mai te reira te huru nō te tauturu i te mau tamari’i ’ia māramarama i teie parau tumu. E fa’a’ite i te hō’ē ’itera’a ’a fāri’i ai ’outou i te hō’ē heheura’a tei ha’amaita’i ia ’outou.

Te Parau Ha’api’ira’a ’e te mau Parau Fafau 43:1–7

O te peropheta ana’e tē nehenehe e fāri’i i te heheura’a nō te ’Ēkālesia tā’āto’a.

’A tupu ai te mau tamari’i i te pa’arira’a, e mea pāpū ē, e fārerei rātou i te mau ta’ata ’o tē ruri ’ē ia rātou. Nāhea e nehenehe ai ia ’outou ’ia tauturu i te mau tamari’i ’ia ti’aturi i te fa’anahora’a a te Atua nō te arata’ira’a i tāna mau tamari’i nā roto i tāna peropheta i mā’itihia ?

Te mau ’ohipa e nehenehe e rave

• E ani i te mau tamari’i ’ia feruri ē, e ti’a mai hō’ē ta’ata i ni’a i roto i te purera’a ’īritira’a mana’o ’e ’a parau ai i tō te pāroita ē, ’ua fāri’i ’oia i te hō’ē heheura’a nō te ’Ēkālesia (’ei hi’ora’a, ’oia ho’i, ’eiaha tātou e inu fa’ahou i te ū ’aore rā, e ha’amata tātou i te fa’atupu i te purera’a ’ōro’a i te mahana piti ’eiaha rā i te sābati). Tē parau nei ’oia ē, e ti’a ia tātou ’ia fa’aro’o i te mea tāna e parau ’eiaha rā i tā te peropheta. E aha te hape i roto i te reira ? E tauturu i te mau tamari’i ’ia ’imi i Te Parau Ha’api’ira’a ’e te mau Parau Fafau 43:1–7 nō te ’ite nāhea te Fatu ’ia hōro’a i te mau fa’auera’a i tāna ’Ēkālesia.

• E fa’a’ite i te hō’ē hōho’a o te peropheta ora, ’e e ani i te mau tamari’i ’ia fa’a’ite mai i te hō’ē mea tāna i ha’api’i mai ’aita i maoro a’e nei. Mai te mea e hina’aro rātou i te tauturu, ’a fa’a’ite i te hō’ē hōho’a video ’aore rā, e tai’o i te hō’ē tuha’a i roto i te hō’ē parau poro’i nō te ’āmuira’a rahi i ma’iri a’e nei. Nō te aha e riro ai ’ei ha’amaita’ira’a ’ia vai te hō’ē peropheta ora i teie mahana ?

Fa’aitoito i te ha’api’ira’a mai i te fare

E ani i te mau tamari’i ’ia mā’iti i te hō’ē ture ’aore rā, te hō’ē fa’auera’a tā rātou e mana’o ra e ha’apa’o i teie hepetoma. E fa’aitoito ia rātou ’ia fa’a’ite i tā rātou ’ōpuara’a i tō rātou ’utuāfare.

Ha’amaita’iraʼa i tā tātou ha’api’ira’a

E ha’api’i i te mau tamari’i ’ia pāpa’i i te mau mana’o e tae mai. E nehenehe ato’a te mau tamari’i e ha’api’i mai i te ha’amatau i te pāpa’ira’a i te mau mana’o pae vārua e tae mai. E nehenehe rātou e pāpa’i i te mau mana’o nā roto i te tāpa’ora’a i te mau ’īrava, te pāpa’ira’a i te mau hōho’a, ’aore rā, te pāpa’ira’a ma te ’ōhie i te hō’ē buka ’ā’amu.