26 nō ’Ēperēra–2 nō Mē

Te Parau Ha’api’ira’a ’e te mau Parau Fafau 45

« E fa’atupuhia te mau parau i fafauhia »

’Ei ’orometua ha’api’i, tā ’oe fa’aineinera’a faufa’a roa a’e, ’o te pae vārua ïa. ’A ha’amata nā roto i te tuatāpapara’a i Te Parau Ha’api’ira’a ’e te mau Parau Fafau 45 ’e te purera’a nō te arata’ira’a a te Vārua Maita’i. E hōro’a mai teie arata’i i te mau mana’o ’o te nehenehe e tauturu ia ’outou. E nehenehe ato’a ’outou e ’ite mai i te mau mana’o i roto i te arata’i nō teie hepetoma i roto i te Mai, pe’e mai—nō te ta’ata hō’ē ’e te ’utuāfare ’aore rā, i roto i te Liahona ’aore rā te Hoa.

Pāpa’i i te mau mana’o e tae mai

Tītau i te mana’o

’A ani i te mau tamari’i e hina’aro ānei rātou e fa’a’ite mai i te tahi mea tā rātou i ha’api’i mai i roto i te mau pāpa’ira’a mo’a i teie hepetoma. E mā’iti i te hō’ē ta’ata nō te fa’a’ite mai, ’e e ani i te tahi atu mau tamari’i ’ia ’āfa’i i te rima i ni’a mai te mea ’ua ha’api’i ato’a mai rātou i te hō’ē mea mai te reira.

Ha’api’i i te ha’api’ira’a tumu : Te mau tamari’i ’āpī a’e

Te Parau Ha’api’ira’a ’e te mau Parau Fafau 45:32

E nehenehe au e « ti’a i roto i te mau vāhi mo’a ».

I roto i Te Parau Ha’api’ira’a ’e te mau Parau Fafau 45:32, ’ua ha’api’i te Fatu ē, ’ua ’ite mai tāna mau pipi i te pārurura’a i te mau mahana hope’a nei ma te ti’ara’a i roto i te mau vāhi mo’a—e mau vāhi ta’a ’ē ïa i te Fatu. Nāhea ’outou i te tauturu i te mau tamari’i ’ia ’ite i te mau vāhi mo’a i roto i tō rātou orara’a ?

Mau ’ohipara’a e nehenehe e rave

• ’A tu’u i te hōho’a nō te hō’ē fare, te hō’ē fare purera’a, ’e te hō’ē hiero i terā ’e i terā vāhi nā roto i te piha. E hōro’a i te tahi mau tāpa’o fa’a’ite nō ni’a i teie mau vāhi, ’e e ani i te mau tamari’i ’ia ti’a i pīha’i iho i te hōho’a tā ’oe e fa’ata’a ra. ’A tai’o i te rēni mātāmua i roto i Te Parau Ha’api’ira’a ’e te mau Parau Fafau 45:32. E fa’a’ite pāpū ē, e ha’amaita’ihia tātou ’ia pārahi ana’e tātou i roto i te mau vāhi mo’a mai tō tātou fare, tā tātou mau fare purera’a, ’e te hiero. E ani i te mau tamari’i ’ia parau mai e aha tā rātou e fāri’i mai te mea tei roto rātou i te mau vāhi mo’a mai teie.

• E ani i te mau tamari’i ’ia fa’a’ī i te ’api ’ohipara’a nō teie hepetoma. E tauturu ia rātou ’ia pāpa’i « E nehenehe au e tauturu i tō’u fare ’ia riro ’ei vāhi mo’a » ’e « Te Parau Ha’api’ira’a ’e te mau Parau Fafau 45:32 » i ni’a i tā rātou hōho’a pāpa’i. E aha tā rātou e rave nō te tauturu i tō rātou fare ’ia riro ’ei vāhi mo’a ?

• Nō te tauturu i te mau tamari’i ’ia feruri, e aha te aura’a « e ’ore roa rātou e fa’anu’uhia atu », e ani ia rātou ’ia ti’a ma te ha’uti ’ore hō’ē minuti te maoro. E tai’o i te rēni mātāmua o Te Parau Ha’api’ira’a ’e te mau Parau Fafau 45:32. E tauturu i te mau tamari’i ’ia māramarama ē, te aura’a nō te parau « te ti’ara’a i roto i te mau vāhi mo’a ra, ’e e ’ore roa e fa’anu’uhia atu » ’o te mā’itira’a ïa i te parauti’a i te mau taime ato’a, noa atu te ’ohipa e tupu ra. E ani ia rātou « ’eiaha ’ia fa’anu’uhia atu » i te mau mana’o ’e te mau ’ohipa parauti’a.

Te Parau Ha’api’ira’a ’e te mau Parau Fafau 45:44–45

E ho’i fa’ahou mai Iesu Mesia.

’A fa’aro’o ai te feiā mo’a i Kirtland Ohio i te heheura’a e ’itehia i roto i Te Parau Ha’api’ira’a ’e te mau Parau Fafau 45, ’o tē parau ra nō te mau mahana hope’a nei ’e nō te tae-piti-ra’a mai o te Fa’aora, ’ua fāri’i rātou i te reira ma te ’oa’oa. ’A feruri nāhea ’outou i te tauturu i te mau tamari’i ’ia fa’aineine ma te ’oa’oa nō te tae-piti-ra’a mai.

Mau ’ohipara’a e nehenehe e rave

• E tauturu i te mau tamari’i ’ia feruri e aha tā rātou e fāri’i ’ia ’ite ana’e rātou ē, e haere mai te hō’ē ta’ata ta’a ’ē e fārerei ia rātou, mai te hō’ē metua rū’au ’aore rā hō’ē hoa. Nāhea rātou i te fa’aineine nō te fārereira’a ? E fa’a’ite i te hō’ē hōho’a o te Fa’aora, ’e e tai’o i te tahi tuha’a ’aore rā i te tā’āto’ara’a o Te Parau Ha’api’ira’a ’e te mau Parau Fafau 45:44–45. E parau i te mau tamari’i e aha tō ’outou mana’o nō ni’a i te ho’i-fa’ahou-ra’a mai o te Fa’aora, ’e e vaiiho ia rātou ’ia fa’a’ite mai i tō rātou mau mana’o.

• E fa’a’ite i te hō’ē hōho’a nō te tae-piti-ra’a mai o te Fa’aora (hi’o i te arata’i nō teie hepetoma i roto i te Mai, pe’e mai—nō te ta’ata hō’ē ’e te ’utuāfare), ’e e ani i te mau tamari’i ’ia fa’a’ite mai e aha tā rātou e fāri’i ’ia ’ite ana’e rātou i te hōho’a. ’A fa’a’ite i tō ’outou ’itera’a pāpū ē, e ho’i fa’ahou mai ’o Iesu Mesia.

• E hīmene i te hō’ē hīmene nō ni’a i te tae-piti-ra’a mai o te Fa’aora, mai te « Quand Jésus reviendra » (Chants pour les enfants, 46–47). E fa’a’ohipa i te hīmene nō te ’āparau i te mau rāve’a e nehenehe ai tātou e fa’aineine nō te ho’i-fa’ahou-ra’a mai ’o Iesu, mai te ravera’a i te hina’aro ’o te Atua ’e te fa’a’ana’anara’a i tō tātou māramarama nō vetahi ’ē.

Ha’api’i i te ha’api’ira’a tumu : Te mau tamari’i pa’ari

Te Parau Ha’api’ira’a ’e te mau Parau Fafau 45:3–5

’O Iesu Mesia tō tātou ārai i te Metua ra.

Nāhea ’outou i te tauturu i te mau tamari’i ’ia ha’apūai i tō rātou fa’aro’o ē, ’o Iesu Mesia tō rātou ārai ? Nāhea ’outou i te ha’api’ira’a mai i te reira nā roto ia ’outou iho ?

Mau ’ohipara’a e nehenehe e rave

• Pāpa’i e rave rahi mau ta’o ’e mau pereota e ’itehia i roto i Te Parau Ha’api’ira’a ’e te mau Parau Fafau 45:3–5 i ni’a i te mau paeha’a ’api parau ta’a ’ē. E hōro’a i te mau tamari’i hō’ē minuti nō te tuatāpapa i teie mau ’īrava i roto i tā rātou mau pāpa’ira’a mo’a, ’e i muri iho, e ani ia rātou ’ia tāpiri i tā rātou pāpa’ira’a mo’a ’e ’ia ’āna’i tano maita’i i te mau ta’o i ni’a i te mau ’api parau, mai te ’itehia i roto i te ’īrava. ’Ia au i teie mau ’īrava, e aha tā te Fa’aora e parau nei ’ei tāparura’a nō tātou i mua i te Metua i te Ao ra ?

• E tauturu i te mau tamari’i ’ia tātara i te ta’o ra ārai, penei a’e nā roto i te hi’ora’a i roto i te buka fa’atoro parau. E aha tā te Fa’aora i rave tei fa’ati’a iāna ’ia riro ’ei ārai nō tātou ? ’A fa’a’ite i tō ’outou ’āehuehu nō ni’a i te mea tā Iesu Mesia i rave nō tātou, ’e ’a vaiiho i te mau tamari’i ’ia fa’a’ite mai i tō rātou mau ’āehuehu.

Te Parau Ha’api’ira’a ’e te mau Parau Fafau 45:9

E māramarama te ’evanelia a Iesu Mesia nō tō te ao nei.

Tauturu i te mau tamari’i tā ’outou e ha’api’i ra ’ia feruri i te mau rāve’a e fa’aineine ai te ’evanelia i te ao nei nō te tae-piti-ra’a mai o te Fa’aora.

Mau ’ohipara’a e nehenehe e rave

• E fa’a’ite i te hōho’a o te hō’ē mōrī ’e te hō’ē reva, ’aore rā ’a pāpa’i hōho’a i teie mau mea i ni’a i te tāpura ’ere’ere. E ani i te mau tamari’i ’ia tai’o i Te Parau Ha’api’ira’a ’e te mau Parau Fafau 45:9 ’e ’ia feruri i te mau rāve’a e riro ai te ’evanelia mai te hō’ē māramarama, hō’ē reva, ’e hō’ē ve’a. E ti’a ia ’outou ’ia fa’ata’a ē, i tahito ra, e amohia te hō’ē reva i roto i te tāma’i. ’Ua tauturu te reira i te mau fa’ehau ’ia ’ite ē, i hea e ha’aputuputu ai, ’e e aha te rave.

  

  Te tāpa’o nō te ti’amāra’a, nā Larry Conrad Winborg

• E tauturu i te mau tamari’i ’ia tāmau ’ā’au i te tā’āto’ara’a, ’aore rā i te hō’ē tuha’a o te ’īrava 9 nā roto i te pāpa’ira’a i te reira i ni’a i te tāpura ’ere’ere ’e ’ia tūmā i te tahi mau ta’o i te taime hō’ē.

Te Parau Ha’api’ira’a ’e te mau Parau Fafau 45:37–38

E ho’i fa’ahou mai Iesu Mesia.

E ri’ari’a paha te mau tamari’i ’ia tai’o rātou nō ni’a i te mau tama’i, te mau ’ino, ’e te ha’amoura’a tei tohuhia e tupu hou te tae-piti-ra’a mai o te Fa’aora. Nāhea ’outou i te tauturu ia rātou ’ia tīa’i ma te ’oa’oa i taua mahana i fafauhia ?

Mau ’ohipara’a e nehenehe e rave

• E ani i te mau tamari’i nāhea rātou e ’ite ai tē piri mai ra te hō’ē pu’e tau ’āpī. E aha te mau tāpa’o tā rātou e ’imi ? ’A fa’ata’a ē, mai te mau tāpa’o e fa’a’ite mai i te hō’ē pu’e tau ’āpī, tē vai ato’a ra te mau tāpa’o nō te tae-piti-ra’a mai. E tai’o ’āmui i Te Parau Ha’api’ira’a ’e te mau Parau Fafau 45:37–38. E aha tā Iesu i parau nō ni’a i te huru o te mau tāpa’o o tōna tae-piti-ra’a mai ? Nō te tauturu i te mau tamari’i ’ia ’ite i te mau tāpa’o e ti’a ia tātou ’ia ’imi, ’a hōro’a i te tamari’i tāta’itahi (’aore rā, hō’ē pupu tamari’i) ’ia tai’o i te tahi mau ’īrava i roto i Te Parau Ha’api’ira’a ’e te mau Parau Fafau 45 ’o tē fa’ata’a ra i teie mau tāpa’o. E nehenehe e fa’a’ohipa i te mau ’īrava 26–27, 31–33, 40–42, ’ei hi’ora’a. E vaiiho i te mau tamari’i ’ia fa’a’ite mai i te mea tā rātou i ’ite mai. E aha te mau tāpa’o e tupu nei i teie mahana ?

• ’A pāpa’i i ni’a i te mau paeha’a ’api parau ta’a ’ē i te tahi mau parau fafau nō ni’a i te mau mea a muri a’e tā ’outou i ’ite i roto i tā ’outou tuatāpapara’a i te tuha’a 45. E ’itehia te tahi mau hi’ora’a nō teie mau parau fafau i roto i te mau ’īrava 44–45, 51–52, 55, 58–59, 66–71. E tāpura i ni’a i te tāpura ’ere’ere i te mau ’īrava i reira e ’itehia ai te mau parau fafau. E hōro’a i te mau ’api parau i te mau tamari’i, ’e e ani ia rātou ’ia fa’a’ohipa i tā rātou mau pāpa’ira’a mo’a nō te fa’atū’ati i te mau ’īrava i ni’a i te tāpura ’ere’ere, i ni’a i te mau parau fafau. E ’āparau e aha te aura’a o teie mau parau fafau, ’e e ani i te mau tamari’i ’ia fa’a’ite mai e aha te mau parau fafau tei tauturu ia rātou ’ia ’oa’oa nō ni’a i te tae-piti-ra’a mai o te Fa’aora.

Fa’aitoito i te ’apora’a mai i te fare

E ani i te mau tamari’i ’ia feruri i te hō’ē mea tā rātou i ha’api’i mai i roto i te piha ha’api’ira’a, ’o tā rātou e nehenehe e fa’a’ite atu i tō rātou ’utuāfare. E ani i te tahi o rātou ’ia fa’a’ite i te piha ha’api’ira’a e aha tā rātou e hina’aro e fa’a’ite atu i te fare.

Ha’amaita’ira’a i tā tātou ha’api’ira’a

’A tauturu i te mau tamari’i ’ia ’ite i te Vārua. ’A ha’api’i noa ai ’outou i te mau tamari’i, e parau ia rātou ’ia putapū ana’e ’outou i te Vārua Maita’i. ’A paraparau e nāhea ’outou e ’ite ai i tāna fa’aurura’a. ’Ei hi’ora’a, e fāri’i paha ’outou i te hau ’aore rā, i te ’oa’oa ’a hīmene ai ’outou i te hō’ē hīmene nō ni’a i te Fa’aora. E tauturu te ’itera’a i teie mau ’āehuehu i te mau tamari’i ’ia ’ite e aha te taime rātou e fāri’i ai i te Vārua.