Independence i Missouri, nā Al Rounds

24–30 nō Mē

Te Parau Ha’api’ira’a ’e te mau Parau Fafau 58–59

« ’Ia ’ana’anatae i te ’ohipa maita’i »

’Ia tai’o ’oe i Te Parau Ha’api’ira’a ’e te mau Parau Fafau 58–59, ’a pāpa’i i te mau mana’o pae vārua tā ’oe e fāri’i. E nehenehe teie mau mana’o e tauturu ia ’oe ’ia fa’anaho nō te ha’api’i i te mau tamari’i i te parau ha’api’ira’a tā ’oe i ’apo mai. E riro i te ’ite-ato’a-hia ia ’oe te mau mana’o i roto i teie arata’i ha’api’ira’a, i roto i te Mai, pe’e mai—nō te ta’ata hō’ē ’e te ’utuāfare, ’e ’aore rā, i roto i te mau ve’a a te ’Ēkalesia.

Pāpa’i i te mau mana’o e tae mai

Tītau i te mana’o

’A ani i te tahi mau tamari’i ’ia fa’a’ite mai i te hō’ē mea tā rātou i rave i roto i te hepetoma nō te ha’api’i mai nā roto mai i te mau pāpa’ira’a mo’a.

Ha’api’i i te ha’api’ira’a tumu : Te mau tamari’i ’āpī

Te Parau Ha’api’ira’a ’e te mau Parau Fafau 58:27–28

’Ua hōro’a mai te Metua i te ao ra iā’u i te mana nō te mā’iti.

’A tauturu i te mau tamari’i ’ia ’ite ē, tē hina’aro nei te Metua i te ao ra ’ia rave tātou i te mau mā’itira’a maita’i, ’o tē hōro’a mai i te ’oa’oa i tō tātou orara’a ’e ia vetahi’ē.

Te mau ’ohipa ri’i e nehenehe e rave

• ’A tai’o i te mau fa’ahitira’a parau i roto i Te Parau Ha’api’ira’a ’e te mau Parau Fafau 58:27–28 nō te tauturu i te mau tamari’i ’ia hāro’aro’a ē, e nehenehe tā rātou e mā’iti ’ia rave i te maita’i. ’A tu’u i te hō’ē hōho’a mata ’oa’oa i te hō’ē pae o te piha ’e i te hō’ē hōho’a mata ’oto i te tahi atu pae o te piha. E aha tō tātou huru ’ia mā’iti ana’e tātou e rave i te maita’i ? ’A fa’ata’a e rave rahi hi’ora’a tei roto te hō’ē mā’itira’a maita’i ’aore rā te hō’ē mā’itira’a ’ino, nō te ta’ata tāta’itahi. ’Ia oti te fa’ata’ara’a o te hi’ora’a tāta’itahi ’e te mā’itira’a, ’a ani i te mau tamari’i ’ia ti’a i pīha’i iho i te hōho’a mata ’oa’oa mai te mea ē, e mea maita’i te mā’itira’a, ’e i pīha’i iho i te mata ’oto mai te mea ē, e mea ’ino te mā’itira’a.

• ’A fa’a’ite i te mau tamari’i i te hō’ē fa’ari’i pēni tara e rave rahi ’ū. ’A fa’a’ite ia rātou i te piti o te fa’ari’i hō’ē ana’e pēni tara i roto. ’A ani i te mau tamari’i e aha te fa’ari’i tā rātou e hina’aro e fa’a’ohipa. Nō te aha ? ’A fa’ata’a ē, ’ua riro te ti’ara’a ’ia mā’iti, ’ei ha’amaita’ira’a nō ’ō mai i te Metua i te ao ra ra. ’A fa’a’ite pāpū ē, tē here nei te Metua i te ao ra ’e ’o Iesu Mesia ia tātou, ’e tē hina’aro nei rāua ’ia rave tātou i te mau mā’itira’a maita’i.

• ’A fa’ati’a i te mau tamari’i nō ni’a i te hō’ē taime ’ua rave ’oe i te hō’ē mā’itira’a maita’i, ’e ’a fa’ata’a e aha tō ’oe huru i muri iho. ’A ani i te mau tamari’i ’ia pāpa’i i te hō’ē hōho’a nō tā ’oe ’ā’amu ’aore rā nō te hō’ē ’ā’amu nō rātou iho. I muri iho, ’a vaiiho ia rātou ’ia fa’a’ite mai i tā rātou mau hōho’a i te piha ha’api’ira’a ’e ’ia parau mai e aha tā rātou i ha’api’i mai nā roto mai i te reira ’ā’amu.

Te Parau Ha’api’ira’a ’e te mau Parau Fafau 59:7

Tē hina’aro nei te Metua i te ao ra ’ia māuruuru vau.

Nāhea e nehenehe ai ia ’oe ’ia tauturu i te mau tamari’i ’ia māramarama i te faufa’a o te ha’amāuruurura’a i te Metua i te ao ra nō tō rātou mau ha’amaita’ira’a ?

Te mau ’ohipa ri’i e nehenehe e rave

• ’A parau i te mau tamari’i i te hō’ē mea tā ’oe e māuruuru nei, ’e ’a ani ia rātou ’ia fa’a’ite mai i te mau mea tā rātou e māuruuru nei. ’A tai’o i Te Parau Ha’api’ira’a ’e te mau Parau Fafau 59:7, ’e ’a tauturu i te mau tamari’i ’ia feruri i te mau rāve’a e nehenehe ai rātou e ha’amāuruuru i te Metua i te ao ra nō tō rātou mau ha’amaita’ira’a. E aha tā rātou e nehenehe e rave nō te fa’aho’i i te fare i te hō’ē fa’aha’amana’ora’a ’ia ha’amāuruuru i te Metua i te ao ra nō tō rātou mau ha’amaita’ira’a ?

• ’A hīmene ’āmui i te hō’ē hīmene nō ni’a i te ’ā’au mēhara, mai te « For Health and Strength » (Children’s Songbook, 21). ’A ani i te mau tamari’i ’ia mono i te mau ta’o i roto i te hīmene, i te tahi atu mau mea tā rātou e māuruuru nei.

• ’A vaiiho i te mau tamari’i ’ia pāpa’i i te mau hōho’a o te mau mea tā rātou e māuruuru nei.

Te Parau Ha’api’ira’a ’e te mau Parau Fafau 59:9–12

Te sābati e mahana ïa nō te Fatu.

Mai te mea ē, e fa’a’ite ’oe i te ’oa’oa tei ’itehia ia ’oe nā roto i te ha’amo’ara’a i te mahana sābati, e nehenehe ’oe e tauturu i te mau tamari’i ’ia hi’o i te sābati ’ei mahana e ha’amori ai tātou i te Fatu.

Te mau ’ohipa ri’i e nehenehe e rave

• ’A hōpoi mai i te mau hōho’a ’aore rā i te mau tauiha’a e fa’a’ite ra i te mau mea maita’i tā tātou e nehenehe e rave i te sābati nō te ha’amori i te Fatu ’e ’ia ’ite i te ’oa’oa. E ’itehia te tahi mau mana’o i roto i Te Parau Ha’api’ira’a ’e te mau Parau Fafau 59:9–12 ’e i roto i « Ha’apa’ora’a i te mahana Sābati » (Nō te pūai o te feiā ’āpī, 30–31). ’Ei hi’ora’a, nō te fa’ahōho’a i te ’ōro’a mo’a, e nehenehe ’oe e fa’a’ite i te hōho’a 108 i roto i te Buka hōho’a nō te ’evanelia ’aore rā hō’ē hāpaina ’ōro’a ’e hō’ē tāpū faraoa. Nāhea teie mau mea tāta’itahi i te tauturu ia tātou ’ia ha’afātata atu ā i te Metua i te ao ra ’e ia Iesu Mesia i te sābati ?

• ’A fa’a’ī i te ’api ’ohipara’a nō teie hepetoma ’e te mau tamari’i nō te hōro’a ia rātou i te mau mana’o nō te fa’ariro i te sābati ’ei mahana mo’a.

  

  E tauturu te ravera’a i te ’ōro’a mo’a ia tātou ’ia fa’atura i te mahana sābati.

Ha’api’i i te ha’api’ira’a tumu : Te mau tamari’i pa’ari

Te Parau Ha’api’ira’a ’e te mau Parau Fafau 58:27–28

Te ti’amāra’a ’o te mana ïa nō te mā’iti.

’Ua hōro’a mai te Atua ia tātou i te mana nō te mā’iti, ’e nā roto i te reira mana, e nehenehe tātou « e fa’atupu fa’arahi i te parau-ti’a » (’īrava 27). Nāhea e nehenehe ai ia ’oe ’ia tauturu i te mau tamari’i tā ’oe e ha’api’i ra, ’ia ’ite ē, noa atu te ’ino i roto i te ao nei, « tei roto ia rātou te mana » nō te « rave i te maita’i » ? (’īrava 28).

Te mau ’ohipa ri’i e nehenehe e rave

• ’A fa’a’ite i te mau tamari’i i te hō’ē ’api parau ’ua pāpa’ihia i te hō’ē pae te ta’o ra te mā’itira’a ’e i te tahi pae ’ua pāpa’ihia te ta’o ra hope’ara’a. ’A fa’ata’a ē, e hope’ara’a tō te mau mā’itira’a, ’aore rā e pe’e iho ā te mau hope’ara’a i te mau ’ohipa. ’A ani i te hō’ē tamari’i ’ia rave i te ’api parau nō te fa’a’ite ē, ’ia rave ana’e ’oe i te ’api parau, tē rave ra ïa ’oe i nā mea e piti, te mā’itira’a ’e te hope’ara’a nō taua mā’itira’a ra. ’A ani i te hō’ē tamari’i ’ia tai’o i Te Parau Ha’api’ira’a ’e te mau Parau Fafau 58:27–28. E aha te mau mā’itira’a tā tātou e nehenehe e rave ’o tē « fa’atupu fa’arahi i te parau-ti’a » ’aore rā i te mau hope’ara’a maita’i ? ( ’īrava 27). Afea ra tō tātou ravera’a i te mau mā’itira’a maita’i tei fa’atupu i te mau hope’ara’a ’o tei ha’amaita’i ia vetahi ’ē ?

• ’A pāpa’i i te mau fa’ahitira’a parau nō roto mai i Te Parau Ha’api’ira’a ’e te mau Parau Fafau 58:27–28 i ni’a i te mau ’api parau, ’e ’a hōro’a hō’ē i te tamari’i tāta’itahi. ’A ani ia rātou ’ia tai’o i te mau ’īrava ma te māniania ’ore ’e ’a feruri i tā rātou pereota. ’A ani i te mau tamari’i ’ia ’āpapa ia rātou mai te au i te fa’ahitira’ahia tā rātou mau pereota i roto i te mau ’īrava 27–28 ’e ’ia fa’a’ite mai i te tahi ’e te tahi e aha tā rātou i ’apo mai. E aha te parau poro’i a te Fatu ia tātou i roto i teie mau ’īrava ?

• ’A hīmene i te hō’ē hīmene nō ni’a i te mau mā’itira’a, mai te « mā’iti i te maita’i » (Te mau hīmene, n°144). ’A ui i te mau uira’a nō te tauturu i te mau tamari’i ’ia feruri hōhonu i te mau ta’o o te hīmene—’ei hi’ora’a, nā vai e tauturu e arata’i ia ’oe nō te rave i te mā’itira’a ti’a ? ’O vai te tāmata nei e tūra’i ia ’outou ’ia rave i te mā’itira’a tano ’ore ? E aha tō ’outou huru ’ia mā’iti ’outou i te maita’i ?

Te Parau Ha’api’ira’a ’e te mau Parau Fafau 59:9–16

Te sābati e mahana ïa nō te Fatu.

’Ua parau te Fatu ē, e tauturu te ha’apa’ora’a i te sābati ia tātou « ’ia pāruru ia [tātou iho] ’ia ’ore ’ia vi’ivi’i i te mau mea nō teie nei ao » (Te Parau Ha’api’ira’a ’e te mau Parau Fafau 59:9). Nāhea e nehenehe ai ia ’oe ’ia tauturu i te mau tamari’i tā ’oe e ha’api’i ra ’ia fa’atura i te sābati ’e ’ia fa’ariro i te reira ’ei tāpa’o nō tō rātou here i te Metua i te ao ra ’e ia Iesu Mesia ?

Te mau ’ohipa ri’i e nehenehe e rave

• ’A ani i te mau tamari’i ’ia tai’o ’āpipiti i Te Parau Ha’api’ira’a ’e te mau Parau Fafau 59:9–16 ’e ’a ani i te to’opiti tāta’itahi ’ia pāpa’i i te hō’ē mea tā rāua i ’apo mai nō ni’a i te mahana sābati i roto i te ’īrava tāta’itahi. I muri a’e e rave rahi minuti, ’a ani i te pupu tāta’itahi ’ia fa’a’ite mai i te piha ha’api’ira’a i te mea tā rāua i pāpa’i. E aha tā tātou e rave ta’a ’ē i te sābati nā roto i te mea tā tātou i ha’api’i mai ?

• ’A fa’aineine i te hō’ē ha’uti fa’atū’ati ’ōhie i reira te mau tamari’i e fa’atū’ati ai i te mau pereota nō roto mai i Te Parau Ha’api’ira’a ’e te mau Parau Fafau 59:9–16 i ni’a i te ’īrava ti’a. ’A mā’iti i te mau pereota ’o tē ha’api’i i te mea tā te Fatu e hina’aro ’ia rave tātou i te sābati. ’A ’āparau e aha tā teie mau pereota e ha’api’i nei ia tātou nō ni’a i te mahana o te Fatu, ’e nāhea e nehenehe ai ia tātou ’ia ha’afātata iāna.

• Te mahana Sābati e « mahana ïa nō te Fatu » (Te Parau Ha’api’ira’a ’e te mau Parau Fafau 59:12)—te hō’ē mahana nō te fa’a’ite ē, tē ha’amana’o ra tātou i te mau ’ohipa rau a te Fatu ’a ha’amori ai tātou iāna (hi’o Bible Dictionary, « Sabbath »). ’A tauturu i te mau tamari’i ’ia feruri hōhonu i teie mau ’ohipa nā roto i te anira’a ia rātou ’ia tai’o i te mau ’īrava pāpa’ira’a mo’a i muri nei, ’e te fa’a’itera’a ia rātou i te mau pāpa’ira’a mo’a e tū’ati i te reira: Genese 2:1–3 (hi’o te Buka hōho’a nō te ’evanelia, no. 3); Ioane 20:1–19 ( hi’o te Buka hōho’a nō te ’evanelia, no. 59). E aha te tahi atu mau ’ohipa pūai a te Fatu tā tātou e nehenehe e ha’amana’o i te sābati ? E aha atu ā tā tātou e ha’api’i mai nei nō ni’a i te sābati i roto i Te Parau Ha’api’ira’a ’e te mau Parau Fafau 59:9–16 ?

Fa’aitoito i te ha’api’ira’a mai i te fare

’A ani i te mau tamari’i ’ia fa’a’ite i tō rātou ’utuāfare i te hō’ē mea tā rātou e nehenehe e rave nō te ha’amo’a i te mahana sābati.

Ha’amaita’ira’a i tā tātou ha’api’ira’a

’A patu i te ti’aturira’a o te mau tamari’i i ni’a ia rātou iho. E riro te tahi mau tamari’i i te mana’o ē, e’ita tā rātou e nehenehe e ’apo mai i te ’evanelia nā roto ia rātou iho. ’A parau i te mau tamari’i ē, e tauturu te Vārua Maita’i ia rātou ’ia ’apo mai i te ha’api’ira’a.