te mau ta’ata e putuputu ra i te pae roto

Te purera’a i te pūhapara’a, nā Worthington Whittredge

3–9 nō Mē

Te Parau Ha’api’ira’a ’e te mau Parau Fafau 46–48

« ’A ’imi onoono ’outou i te mau hōro’a maita’i roa ra »

’A feruri i te mau tamari’i tā ’outou e ha’api’i ’ia tai’o ana’e ’outou i Te Parau Ha’api’ira’a ’e te mau Parau Fafau 46–48. ’A hi’o i te « Pāhonora’a i te mau hina’aro o te mau tamari’i ’āpī a’e » i te ha’amatara’a o teie rāve’a tauturu nō te tahi atu mau mana’o.

Pāpa’i i te mau mana’o e tae mai

ītona fa’a’itera’a

Tītau i te mana’o

’A ani i te mau tamari’i ’ia pāpa’i i te mau hōho’a o te hō’ē mea tā rātou i ha’api’i mai i roto i te ha’api’ira’a nō te hepetoma i ma’iri a’enei ’aore rā, i te fare i te hepetoma i ma’iri. Hōro’a ia rātou i te mau fa’aha’amana’ora’a mai te mea e tītauhia. I muri iho ’a vaiiho ia rātou ’ia paraparau mai nō ni’a i tā rātou mau hōho’a.

ītona ha’api’ira’a

Ha’api’i i te ha’api’ira’a tumu : Te mau tamari’i ’āpī

Te Parau Ha’api’ira’a ’e te mau Parau Fafau 46:2–6

E nehenehe au e tauturu ia vetahi ’ē ’ia fāri’i-maita’i-hia rātou i te fare purera’a.

Tē hina’aro nei tātou pā’āto’a, tae noa atu i te mau tamari’i, ’ia ’ite ē ’ua fāri’i-maita’i-hia tātou. Nāhea ’outou ’ia fa’a’ohipa i teie mau ’īrava nō te tauturu i te mau tamari’i ’ia fāri’i maita’i ia vetahi ’ē i te fare purera’a ?

Te mau ’ohipa ri’i e nehenehe e rave

• ’A tai’o ha’apūai i Te Parau Ha’api’ira’a ’e te mau Parau Fafau 46:5, ’e ’a parau i te mau tamari’i nā roto i tā ’outou iho mau parau i te aura’a o teie ’īrava. ’A fa’a’ite i te hōho’a nō te mau ta’ata nō te ao nei. ’A ani i te mau tamari’i ’o vai o teie mau ta’ata tā te Metua i te ao ra e hina’aro ’ia ani tātou ’ia haere mai i tā tātou mau purera’a a te ’Ēkālesia. ’A tauturu i te mau tamari’i ’ia ha’api’ipi’i nō te ani ia ’outou ’aore rā, i te tahi ’e te tahi ’ia haere mai i te hō’ē purera’a a te ’Ēkālesia ’aore rā, i te mau ’ohipara’a a a te ’Ēkālesia.

• ’A ani i te mau tamari’i ’ia feruri ē, tē haere mai nei hō’ē hoa i te purera’a nō te taime mātāmua. ’A tauturu ia rātou ’ia feruri i te mau rāve’a e nehenehe ai ia rātou ’ia tauturu i tō rātou hoa ’ia fāri’i-maita’i-hia. ’A vaiiho ia rātou ’ia ha’api’ipi’i i te mea tā rātou e parau ’aore rā, e rave mai te mea e ’ite rātou i te hō’ē hoa ’ia tomo mai i roto i te fare purera’a ’aore rā, i roto i te piha ha’api’ira’a nō te taime mātāmua.

Te Parau Ha’api’ira’a ’e te mau Parau Fafau 46:13–26

ʼUa haʼamaitaʼi mai te Metua i te Ao ra iāʼu i tāna mau hōro’a.

E tamaiti ’aore rā, e tamāhine te mau tamari’i tāta’itahi tā ’outou e ha’api’i nei nā te Metua i te ao ra, ’e ’ua ha’amaita’i ’oia ia rātou i te mau hōro’a pae vārua.

Te mau ’ohipa ri’i e nehenehe e rave

• ’A fa’a’ohipa i Te Parau Ha’api’ira’a ’e te mau Parau Fafau 46:13–26 ’aore rā te « Pene 20: Te mau hōro’a o te vārua » (Te mau ’ā’amu nō Te Parau Ha’api’ira’a ’e te mau Parau Fafau, 77–80) nō te fa’ata’a i te mau tamari’i i te tahi o te mau hōro’a tā te Metua i te ao ra i hōro’a mai ia tātou nā roto i tōna Vārua ’e nō te aha ’oia i hōro’a mai ai i te reira. Mai te mea ē, e nehenehe, ’a fa’a’ite i te mau tao’a ’aore rā, i te mau hōho’a ’o tē fa’ahōho’a nei i te hōro’a tāta’itahi. ’A fa’aea i te tahi taime nō te ui i te mau tamari’i nāhea teie mau hōro’a i te ha’amaita’i i te hō’ē ta’ata.

• ’A hōro’a i te hō’ē tamari’i i te tahi mea ’o tē nehenehe e hōro’ahia, mai te hō’ē tāpū faraoa ’aore rā, e piti tao’a ha’uti. ’A ani i te tamari’i ’ia hōro’a i te mea tā ’outou i hōro’a iāna i te tahi atu melo o te piha ha’api’ira’a. ’A fa’ata’a ē, ’ua hōro’a mai te Metua i te ao ra ia tātou i te mau hōro’a, ’e tē hina’aro nei ’oia ’ia fa’a’ohipa tātou i te reira nō te tauturu ia vetahi ’ē. ’A parau i te mau tamari’i nō ni’a i te hō’ē taime ’ua ha’amaita’ihia ’outou nō te mea ’ua ’ōpere mai te hō’ē ta’ata i tāna mau hōro’a pae vārua.

ītona ha’api’ira’a

Ha’api’i i te ha’api’ira’a tumu : Te mau tamari’i pa’ari

Te Parau Ha’api’ira’a ’e te mau Parau Fafau 46:8–26

’Ua hōro’a mai te Metua i te ao ra iā’u i te mau hōro’a pae vārua nō te ha’amaita’i ia vetahi ’ē.

Te mau hōro’a tei fa’ata’ahia i roto i Te Parau Ha’api’ira’a ’e te mau Parau Fafau 46—’e e rave rahi atu ā mau hōro’a pae vārua—nō ’ō mai ïa i te Atua ra nā roto i te Vārua Maita’i. E nehenehe ’outou e tauturu i te mau tamari’i ’ia ’imi i te mau hōro’a tei hōro’ahia mai ia rātou—’e te tahi atu e nehenehe ia rātou ’ia ’imi—’ia tuatāpapa ’āmui ’outou i Te Parau Ha’api’ira’a ’e te mau Parau Fafau 46.

Te mau ’ohipa ri’i e nehenehe e rave

• ’A pāpa’i i ni’a i te mau ’api parau i te tahi o te mau hōro’a pae vārua tei ’itehia i roto i Te Parau Ha’api’ira’a ’e te mau Parau Fafau 46:13–26 ’e te Mau Hīro’a Fa’aro’o 1:7, ’e ’a huna i te reira nā roto i te piha. ’A ani i te tamari’i tāta’itahi ’ia ’imi hō’ē o te mau ’api parau ’e ’ia ’imi i te mau ’īrava i reira te hōro’a i te fa’a’itera’ahia i roto i te mau pāpa’ira’a mo’a. I muri iho ’a tai’o ’āmui i Te Parau Ha’api’ira’a ’e te mau Parau Fafau 46:8–9, 12. Nō te aha te Metua i te ao ra e hōro’a mai ai ia tātou i te mau hōro’a pae vārua ?

• ’A tauturu i te mau tamari’i ’ia pāpa’i i ni’a i te tāpura ’ere’ere i te mau hōro’a o te Vārua tei fa’ahitihia i roto i Te Parau Ha’api’ira’a ’e te mau Parau Fafau 46. ’Ia pāpa’ihia te hōro’a tāta’itahi, ’a parau e mea nāhea te reira hōro’a e nehenehe ai e fa’a’ohipahia nō te ha’amaita’i ia vetahi ’ē. E nehenehe te mau fa’a’itera’a i roto i te « Pene 20: Te mau hōro’a a te Vārua » (Te mau ’ā’amu nō Te Parau Ha’api’ira’a ’e te mau Parau Fafau, 77–80), e tauturu. ’A parau i te mau tamari’i ē, e hōro’a pae vārua tō rātou tāta’itahi. ’A fa’aitoito ia rātou ’ia ani i te Metua i te ao ra nō te tauturu ia rātou ’ia ’ite i tō rātou mau hōro’a ’e e nāhea e nehenehe ai ia rātou ’ia fa’a’ohipa i te reira nō te tauturu ia vetahi ’ē.

Te Parau Ha’api’ira’a ’e te mau Parau Fafau 47:1, 3

E nehenehe au e pāpa’i i tō’u ’ā’amu.

’Ua pi’i te Fatu ia John Whitmer ’ia pāpa’i i te hō’ē ’ā’amu o te ’Ēkālesia. I teie mahana e ha’amaita’ira’a rahi tō tātou nō te mau ’ā’amu o te ’Ēkālesia tei pāpa’ihia i te mau matahiti e rave rahi.

Te mau ’ohipa ri’i e nehenehe e rave

• ’A tai’o ’āmui i Te Parau Ha’api’ira’a ’e te mau Parau Fafau 47: 1, 3, ’e ’a ani i te mau tamari’i ’ia ’imi e aha tā te Fatu i hina’aro ia John Whitmer ’ia rave. E aha te aura’a o tē parau ra « te mau taime ato’a » i roto i te ’īrava 3 ? Nāhea tātou i te ha’amaita’ihia nō te ’itera’a i te ’ā’amu o te ’Ēkālesia ?

• Mai te mea ē, tē pāpa’i nei te mau tamari’i tā ’outou e ha’api’i ra i te hō’ē buka ’ā’amu, ’a ani ia rātou ’ia paraparau mai i te mau mea tā rātou e pāpa’i i roto i tō rātou buka ’ā’amu. E au mai paha te mau tamari’i ’ia fa’aro’o i te hō’ē ’ā’amu nō roto mai i tā ’outou buka ’ā’amu nō tō ’outou tamari’ira’a ’aore rā, te buka ’ā’amu o te hō’ē tupuna.

• ’A fa’a’ite i te mau tamari’i i te mau rāve’a nō te pāpa’i tāmau i te ’ā’amu o tō rātou orara’a. ’Ei hi’ora’a, e nehenehe rātou e pāpa’i i roto i te hō’ē buka, e ha’aputu i te mau hōho’a i roto i te buka hōho’a, e patapata i ni’a i te hō’ē rorouira, ’aore rā, e haruharu i te reo ’aore rā, e hāmani i te hōho’a tāvirihia. ’A tauturu i te mau tamari’i ’ia hāmani i te hō’ē tāpura nō te mau mea maita’i e tu’u i roto i tō rātou iho ’ā’amu, mai tō rātou ’itera’a pāpū nō Iesu Mesia. ’A ani i te mau tamari’i ’ia hāmani i te hō’ē tāpa’o ’aore rā, hō’ē hōho’a pia nō te hōpoi i te fare ’e te tahi o teie mau mana’o nō te fa’aha’amana’o ia rātou ’ia pāpa’i i tō rātou iho mau ’ā’amu.

  tamāhine e tuatāpapa nei

  ’O te mau buka ’ā’amu te hō’ē rāve’a e nehenehe ai tātou e pāpa’i i te hō’ē ’ā’amu.

Te Parau Ha’api’ira’a ’e te mau Parau Fafau 48:1–4

E nehenehe au e tauturu ia vetahi ’ē nā roto i te fa’a’itera’a i te mea tei hōro’ahia mai iā’u.

’Ua fa’aitoito te Fatu i te feiā mo’a i Ohio ’ia tauturu i te tahi atu feiā mo’a nā roto i te hōro’ara’a i tō rātou fenua ’e tā rātou moni. Nāhea ’outou e nehenehe ai e fa’a’ohipa i teie mau ’īrava nō te tauturu i te mau tamari’i ’ia ’imi i te mau rāve’a nō te ’ōpere ia vetahi ’ē i te mau mea tā te Atua i hōro’a mai ia rātou ?

Te mau ’ohipa ri’i e nehenehe e rave

• ’A fa’a’ite i te mau tamari’i i te hōho’a fenua nō New York ’e nō Ohio (hi’o te arata’i nō te ’āva’e ’Ēperēra 12–18 i roto i te Mai, Pe’e mai—nō te ta’ata hō’ē ’e te ’utuāfare). ’A fa’ata’a ē, ’ua fa’aue te Fatu i te feiā mo’a i New York ’e i te tahi ato’a mau vāhi ’ia ha’aputuputu i Ohio, terā rā, e rave rahi o rātou ’aita i rava’i te moni nō te patu i te hō’ē fare i tō rātou taera’a i reira. ’A tauturu i te mau tamari’i ’ia ’imi i roto i Te Parau Ha’api’ira’a ’e te mau Parau Fafau 48:1–4 i te mea tā te Fatu i ani i te feiā mo’a i Ohio ’ia rave nō te tauturu. ’A ani i te mau tamari’i e aha tā rātou e hina’aro e rave nō te tauturu ’āhiri ē, tē ora ra rātou i Ohio i taua taime ra. E aha tei hōro’ahia mai ia tātou i teie mahana ’o tā tātou e nehenehe e fa’a’ohipa nō te tauturu ia vetahi ’ē ? ’Ei hi’ora’a, ’a hi’o « The Coat » (video, ChurchofJesusChrist.org).

• ’A tai’o ’āmui i Te Parau Ha’api’ira’a ’e te mau Parau Fafau 48:4, ’e ’a ani i te mau tamari’i ’ia ’imi i te tahi mea tā te Fatu i ani i te feiā mo’a ’ia rave nō te tauturu i tāna ’ohipa. ’A fa’ata’a ē, e tauturu te ha’aputura’a i te moni ia rātou ’ia ho’o i te fenua ’e ’ia patu i te hō’ē hiero i te hō’ē mahana. Nō tei hea mea e nehenehe ai tātou e ha’aputu i te moni, e ti’a ai ia tātou ’ia tauturu ’ia rave i te ’ohipa a te Fatu ? ’A fa’a’ite i te video « First Things First » (ChurchofJesusChrist.org), ’e ’a ’āparau e mea nāhea te mau tamari’i i roto i te video i te fa’atupura’a i te fa’auera’a a te Fatu nō te ha’aputu i te moni.

ītona ’apora’a ha’api’ira’a

Fa’aitoito i te ha’api’ira’a mai i te fare

’A fa’aitoito i te mau tamari’i ’ia ani i te mau melo o te ’utuāfare i te fare nō ni’a i te hō’ē hōro’a pae vārua tā rātou e mana’o ra ē, ’ua hōro’ahia mai ia rātou. ’A fa’aitoito ato’a i te mau tamari’i ’ia pure ’e ’ia ’imi i te hō’ē hōro’a o te Vārua tā rātou e hina’aro e fa’ahotu.

Haʼamaitaʼiraʼa i tā tātou haʼapiʼiraʼa

Tauturu i te mau tamari’i ’ia ha’api’i mai nā roto mai i te mau pāpa’ira’a mo’a. E’ita paha e ti’a i te mau tamari’i ʼāpī ’ia tai’o rahi roa, terā rā, e nehenehe ’outou e tauturu ia rātou ’ia ha’api’i mai nā roto i te mau pāpa’ira’a mo’a. ’Ei hi’ora’a, e nehenehe ’outou e tai’o i te hō’ē tuha’a ’e e ani ia rātou ’ia ti’a mai ’e ’aore rā, ’ia ’āfa’i i tō rātou rima i ni’a ’ia fa’aro’o ana’e rātou i te hō’ē ta’o ’e ’aore rā, te hō’ē pereota ta’a ’ē.

’api nō te mau ’ohipara’a : ’Ua hōro’a mai te Atua iā’u i te mau hōro’a pae vārua