Te ’ānāvai nō Missouri

Te auahi ura i ni’a i te Missouri, nā Bryan Mareko Taylor

31 nō Mē–6 nō Tiunu

Te Parau Ha’api’ira’a ’e te mau Parau Fafau 60–62

« Tei roto i tō’u nei rima te ta’ata ato’a ra »

’A ha’amana’o ē, tā ’oe fa’aineinera’a maita’i roa a’e nō te ha’api’i i Te Parau Ha’api’ira’a ’e te mau Parau Fafau 60–62 e tae mai ïa nā roto i tā ’oe iho ’e tā te ’utuāfare tuatāpapara’a i teie mau tuha’a.

Pāpa’i i te mau mana’o e tae mai

ītona fa’a’itera’a

Tītau i te mana’o

’A hōro’a i te tamari’i tāta’itahi i te taime nō te fa’a’ite mai i te hō’ē mea tāna i ’apo mai i roto i te mau pāpa’ira’a mo’a i roto i te hepetoma i ma’iri ’aore rā i roto i te ha’api’ira’a Paraimere nō te sābati i ma’iri. ’Ia hope te tamari’i tāta’itahi i te fa’a’ite mai i tō rātou mana’o, ’a ani i te tahi atu tamari’i i roto i te piha ha’api’ira’a ’ia ha’apoto mai i te mau mea tāna i parau.

ītona ha’api’ira’a

Ha’api’i i te ha’api’ira’a tumu : Te mau tamari’i ’āpī

Te Parau Ha’api’ira’a ’e te mau Parau Fafau 60:4; 61:1–2, 36; 62:1

Tē ha’api’i mai nei te mau pāpa’ira’a mo’a iā’u nō ni’a ia Iesu Mesia.

Tē vai ra i roto i Te Parau Ha’api’ira’a ’e te mau Parau Fafau 60–62 e rave rahi fa’ahitira’a parau ’o tē nehenehe e tauturu i te mau tamari’i tā ’oe e ha’api’i nei ’ia hāro’aro’a ē, ’o vai ’o Iesu Mesia, ’e ’ia fa’arahi i tō rātou here iāna.

Te mau ’ohipa ri’i e nehenehe e rave

• ’A pia i te hō’ē hōho’a nō Iesu Mesia, ’e ’a ani i te mau tamari’i ’ia fa’a’ite mai ē, nō te aha rātou i here ai ia Iesu. ’A rave mai i te tahi mau pereota i roto i Te Parau Ha’api’ira’a ’e te mau Parau Fafau 60–62 ’o tē ha’api’i mai nei ia ’oe nō ni’a i te Fa’aora, ’e ’a fa’a’ite i te reira i te mau tamari’i (hi’o, ’ei hi’ora’a, Te Parau Ha’api’ira’a ’e te mau Parau Fafau 60:4; 61:1–2, 36; 62:1). ’A tauturu i te mau tamari’i ’ia fa’ahiti fa’ahou i te reira mau pereota nā muri iho ia ’oe. ’A fa’a’ite e aha tō ’oe mana’o nō ni’a ia Iesu Mesia.

• ’A fa’a’ite i te tahi mau hōho’a nō Iesu i roto i tāna tāvinira’a i te fenua nei (hi’o te Buka hōho’a nō te ’evanelia, nūmera 34–61). ’A vaiiho i te mau tamari’i ’ia tauturu mai ia ’oe ’ia fa’ata’a e aha tā Iesu e rave ra i roto i te mau hōho’a. Mea nāhea tāna fa’a’itera’a i tōna here i te mau tamari’i a te Metua i te ao ra ? ’A fa’a’ite i te mau tamari’i i te hō’ē o tā ’oe ’īrava au roa ’o tē ha’api’i nei nō ni’a ia Iesu.

• ’A hīmene ’e te mau tamari’i « Jésus-Christ est mon modèle » (Chants pour les enfants, 40–41; ’a hi’o ato’a i te video i ni’a i te ChurchofJesusChrist.org). ’A hīmene ai ’outou i te mau rāve’a nō te riro mai ia Iesu, i te tahi taime, ’a fa’aea te hīmene, ’e ’a ani i te mau tamari’i ’ia fa’ahope i te pereota « E nehenehe au e riro mai ia Iesu nā roto i… »

  te Fa’aora tei ti’afa’ahou mai

  Nō teie tumu vau i haere mai ai, nā Yongsung Kim

Te Parau Ha’api’ira’a ’e te mau Parau Fafau 62:3

Tē hina’aro nei Iesu Mesia ’ia fa’a’ite au i tāna ’evanelia.

E mea au nā te mau tamari’i ’ia fa’a’ite ia vetahi’ē i te mea tā rātou i ’ite. ’A tauturu ia rātou ’ia hāro’aro’a ē, ’ia fa’a’ite ana’e rātou i te mea tā rātou i ’ite nō ni’a i te ’evanelia, e māuruuru te Metua i te ao ra ia rātou.

Te mau ’ohipa ri’i e nehenehe e rave

• ’A fa’ata’a ē, ’ua ani te Fatu i te peropheta Iosepha Semita ’e i te tahi atu feiā fa’atere o te ’Ēkālesia ’ia rātere mai Kirtland, i Ohio, haere atu i Jackson County Missouri. ’Ua ani ’oia ia rātou ’ia poro i te ’evanelia i roto i tō rātou tere ’e i te ho’ira’a rātou i te fare. ’A tai’o i Te Parau Ha’api’ira’a ’e te mau Parau Fafau 62:3, ’e ’a ani i te mau tamari’i ’ia fa’aro’o e aha tā te mau misiōnare i rave tei māuruuruhia e te Fatu. ’A fa’a’ite pāpū ē, e māuruuru te Fatu ia tātou ’ia fa’a’ite ana’e tātou i te ’evanelia ia vetahi ’ē.

• ’A tauturu i te mau tamari’i ’ia hāmani i te mau tāreta ’o tē fa’a’ite ē, ’ua hina’aro rātou ’ia riro ’ei misiōnare nō te ’Ēkālesia. ’A vaiiho ia rātou ’ia tāmau i tō rātou tāreta ’e ’ia ha’api’i i te fa’a’ite i tō rātou ’itera’a pāpū i te tahi ’e te tahi.

• Hīmene ’āmui i te hō’ē hīmene nō ni’a i te fa’a’itera’a i te ’evanelia, mai te « Je voudrais déjà partir en mission » (Chants pour les enfants, 90). ’A tauturu i te mau tamari’i ’ia feruri i te mea tā rātou e nehenehe e parau mai te mea ē, e ui mai te hō’ē ta’ata ia rātou ē, e aha tā rātou e au nei nō ni’a ia Iesu Mesia ’e tāna ’Ēkālesia. ’A ani ia rātou ’ia pāpa’i i te mau hōho’a nō te mau mea tā rātou e au nō ni’a i te ’evanelia a te Mesia.

ītona ha’api’ira’a

Ha’api’i i te ha’api’ira’a tumu : Te mau tamari’i pa’ari

Te Parau Ha’api’ira’a ’e te mau Parau Fafau 60:7, 13; 62:3, 9

E nehenehe au e hāmama i tō’u vaha nō te fa’a’ite i te ’evanelia a Iesu Mesia.

E nehenehe te ’itera’a pāpū o te hō’ē tamari’i e pūai ato’a mai mai tō te hō’ē ta’ata pa’ari, nō te mea, te mana o te ’itera’a pāpū e ’ere ïa nō roto mai i te matahiti ’aore rā te ’itera’a o te hō’ē ta’ata, nō roto mai rā i te Vārua Maita’i. ’A tauturu i te mau tamari’i ’ia roa’a te ti’aturira’a ē, e nehenehe rātou e hāmama i tō rātou vaha, ’e e fa’a’ite ia vetahi ’ē ē, e parau mau te mau mea tā rātou i ’ite.

Te mau ’ohipa ri’i e nehenehe e rave

• E aha te mau ha’amaita’ira’a tā te Fatu i fafau i roto i Te Parau Ha’api’ira’a ’e te mau Parau Fafau 60:7; 62:3, 9 i te feiā e fa’a’ite i tāna ’evanelia ? Nāhea te fa’a’itera’a i te ’evanelia i te ha’amaita’i ia vetahi ’ē ? ’A feruri ’ia fa’a’ite i te hō’ē ’ohipa i tupu i roto i tō ’oe orara’a ’a fa’a’ite ai ’oe i te ’evanelia—e aha te mau ha’amaita’ira’a tei tae mai nā roto i tā ’oe mau tauto’ora’a ? ’A ani i te mau tamari’i ’ia fa’a’ite mai i te tahi mau ’ohipa i tupu nō rātou. E nehenehe ato’a ’outou e hīmene i te hō’ē hīmene nō ni’a i te ’ohipa misiōnare, mai te « Go Forth with Faith » (Hymns, no. 263), ’e ’ia paraparau nō ni’a i te mau ha’amaita’ira’a i fa’ahitihia i roto i te hīmene.

• ’A tauturu i te mau tamari’i ’ia ha’uti ta’ata ora, mai te huru ra ē tē fa’a’ite ra rātou i te ’evanelia i tō rātou mau hoa. ’Ei hi’ora’a, e aha tā rātou e parau mai te mea ē, e ui mai te hō’ē ta’ata ia rātou ē, nō te aha rātou e haere ai i te purera’a ? ’Aore rā, mai te mea e ’ite te hō’ē hoa i tō rātou tāpe’a rima MTM i ni’a i te rima ’aore rā, e ’ite ’oia ē, tē tai’o ra rātou i te Buka a Moromona ’e e ui mai i te mau uira’a ? E aha tā rātou e parau ?

Te Parau Ha’api’ira’a ’e te mau Parau Fafau 60:7; 61:1–2, 36; 62:1

Tē hina’aro nei te Fatu ’e fa’a’ore i tā’u hapa mai te mea ē, e tātarahapa vau.

’Aita ’o Iosepha Semita ’e te tahi atu feiā fa’atere o te ’Ēkālesia i tae i te fāito maita’i hope roa. I te tahi mau taime ’ua mārō rātou ’e ’aita i fa’a’oroma’i (hi’o « Ezra Booth ’e ’o Isaac Morley », Revelations in Context, 133). Terā rā, ’ua aroha te Fatu ia rātou, ’e ’ua hōro’a tāmau noa i te fa’a’orera’a hara mai te mea ē, e tātarahapa rātou.

Te mau ’ohipa ri’i e nehenehe e rave

• ’A tai’o ’e te mau tamari’i i Te Parau Ha’api’ira’a ’e te mau Parau Fafau 60:7; 61:2, ’e ’a ani ia rātou ’ia ’imi i te hō’ē ā mau ta’o e ’itehia i roto i nā ’īrava to’opiti. ’A fa’aha’amana’o i te mau tamari’i ē, ’ua hōro’ahia mai teie mau heheura’a ia Iosepha Semita ’e i te tahi atu feiā fa’atere o te ’Ēkālesia. E aha tā te Fatu i hinaʼaro ’ia ’ite rātou ? E aha tā tātou e ha’api’i mai nei i roto i teie nā ’īrava nō ni’a i te mana’o ’o te Fa’aora nō tātou, ’ia rave ana’e tātou i te hape ?

• ’A pāpa’i E aha te huru o Iesu Mesia ? i ni’a i te tāpura ’ere’ere. ’A tai’o ’āmui i Te Parau Ha’api’ira’a ’e te mau Parau Fafau 61:1–2, 36; 62:1, ’e ’a hāmani i te hō’ē tāpura pāhonora’a i teie uira’a, tā te mau tamari’i e ’ite i roto i te mau ’īrava. Nāhea te mau huru i ni’a i te tāpura i te tauturu ia tātou ’ia māramarama ē, e aha te Fatu e hina’aro ai e fa’a’ore i tā tātou hapa ? E aha te mau rāve’a e ti’a ai ia tātou ’ia pe’e i tōna hi’ora’a ?

Te Parau Ha’api’ira’a ’e te mau Parau Fafau 60:5; 61:22; 62:5–8

Tē hinaaro nei te Fatu iā’u ’ia fa’a’ohipa i tō’u ti’amāra’a ’ia mā’iti, nā reira ato’a tōna vārua nō te rave i te mau mā’itira’a maita’i.

Nāhea e nehenehe ai ia ’oe ’ia fa’a’ohipa i teie mau ’īrava nō te ha’api’i i te mau tamari’i ē, nāhea te Fatu i te tauturu ia rātou ’ia rave i te mau mā’itira’a maita’i ?

Te mau ’ohipa ri’i e nehenehe e rave

• ’A ani i te mau tamari’i ’ia paraparau mai nō ni’a i te hō’ē taime ’a tītauhia ai ia rātou ’ia rave i te hō’ē fa’aotira’a. Nāhea rātou i te fa’aotira’a e aha tē rave ? ’A tai’o ’āmui i Te Parau Ha’api’ira’a ’e te mau Parau Fafau 62:5, 7–8 nō te ha’api’i mai nō ni’a i te parau tā te Fatu i parau i te mau peresibutero e fa’aineine ra e tere nā Missouri haere atu i Kirtland, Ohio. E aha te mau mā’itira’a i tītauhia ia rātou ’ia rave nō tō rātou tere ? E aha tā te Fatu i hōro’a mai ia tātou nō te tauturu ia tātou ’ia rave i te mau mā’itira’a ? ’A fa’a’ite i te mau tamari’i nō ni’a i tō ’oe fa’a’ohipara’a i te arata’ira’a a te Vārua ’e i tō ’oe iho ferurira’a maita’i nō te rave i te mau fa’aotira’a.

• ’A vāhi i te piha ha’api’ira’a i roto e toru pupu, ’e ’a ani i te pupu tāta’itahi ’ia tai’o i te hō’ē o teie mau ’īrava i muri nei, i reira ho’i tō te Fatu ha’api’ira’a i te tahi mau misiōnare nō ni’a i te huru nō te ravera’a i tā rātou misiōni : Te Parau Ha’api’ira’a ’e te mau Parau Fafau 60:5; 61:22; 62:5. E aha tā tātou e ’ite nei nō ni’a i te mau arata’ira’a a te Fatu i roto i teie mau ’īrava ? Nō te aha i te tahi taime e mea maita’i nō tātou ’ia fa’a’ohipa i tō tātou iho ferurira’a ’eiaha rā e tīa’i i te arata’ira’a pāpū nō ’ō mai i te Atua ra i ni’a i te mau mea ato’a ?

ītona ’apora’a ha’api’ira’a

Fa’aitoito i te ha’api’ira’a mai i te fare

’A ani i te mau tamari’i ’ia ha’api’ipi’i i te fa’a’ite i te ’evanelia i te hō’ē melo o te ’utuāfare. ’Ei hi’ora’a, e nehenehe rātou e fa’a’ite i te hō’ē mea tā rātou i ha’api’i mai i roto i te Paraimere.

Ha’amaita’ira’a i tā tātou ha’api’ira’a

Fa’a’ite i te ’itera’a pāpū i tā ’oe piha ha’api’ira’a. Pinepine te fa’a’itera’a i tō ’oe ’itera’a pāpū i te tauturu i te mau tamari’i tā ’oe e ha’api’i ra, ’ia fāri’i i tō rātou iho ’itera’a pāpū. E nehenehe hō’ē ’itera’a pāpū ’ia riro ’ei mea ’ōhie roa mai teie te huru, « ’ua ’ite au ē, ’ua here te Metua i te Ao ra ia ’outou tāta’itahi » ’e ’aore rā « E tupu te au māite i roto iā’u, ’ia ha’api’i ana’e au nō ni’a ia Iesu Mesia ».

’api ’ohipara’a : E nehenehe tā’u e fa’a’ite i te ’evanelia.