fenua nō Missouri

Springhill, Daviess County, Missouri, nā Garth Robinson Oborn

7–13 nō Tiunu

Te Parau Ha’api’ira’a ’e te mau Parau Fafau 63

« ’O tei nō ni’a mai ra, e mea mo’a ïa »

E nehenehe te mau parau mau i ha’api’ihia i roto i Te Parau Ha’api’ira’a ’e te mau Parau Fafau 63 e tauturu i te mau tamari’i tā ’oe e ha’api’i ra ’ia patu i tō rātou fa’aro’o i roto i te Metua i te ao ra ’e ia Iesu Mesia. Nō te iti tō ’oe taime i pīha’i iho ia rātou, ’a feruri e aha te mau parau mau faufa’a a’e nō rātou, ’ia au i tō rātou mau hina’aro.

Pāpa’i i te mau mana’o e tae mai

ītona fa’a’itera’a

Tītau i te mana’o

’A feruri i te mau rāve’a ’ōhie ’e te māramarama nō te hōro’a i te mau tamari’i i te mau rāve’a nō te fa’a’ite i te mau mea tā rātou e ’apo nei. ’Ei hi’ora’a, ’a fa’aineine e rave rahi fāito pāpie tāpūpūhia, ’e ’a vaiiho i te tamari’i tāta’itahi ’ia mā’iti hō’ē. ’A ani i te tamari’i mea roa a’e tāna pāpie ’ia fa’a’ite i tōna mana’o nā mua.

ītona ha’api’ira’a

Ha’api’i i te ha’api’ira’a tumu : Te mau tamari’i ’āpī

Te Parau Ha’api’ira’a ’e te mau Parau Fafau 63:23

Tē hina’aro nei te Metua i te Ao ra ’ia ha’api’i mai au i te ’evanelia.

E ha’api’i tāmau noa mai te mau tamari’i. ’A tauturu ia rātou ’ia ’ite ē, e tauturu te Metua i te ao ra ia rātou ’ia ha’api’i mai nō ni’a iāna mai te mea ē, e ha’apa’o rātou i tāna mau fa’auera’a.

Te mau ’ohipa ri’i e nehenehe e rave

• ’A tai’o i Te Parau Ha’api’ira’a ’e te mau Parau Fafau 63:23 i te mau tamari’i, ’e ’a ani ia rātou ’ia fa’aro’o e aha te mea tā te Atua e hōro’a mai ia tātou mai te mea ē, e ha’apa’o tātou i te mau fa’auera’a. ’A tauturu ia rātou ’ia māramarama ē, « te mau parau ’aro » ’o te mau mea ïa tā te Atua e nehenehe e ha’api’i rahi atu ā ia tātou, mai te riro-rahi-atu-ā-ra’a mai ia Iesu Mesia te huru.

• ’A hōpoi mai i roto i te piha ha’api’ira’a i te mau hōho’a ’o tē fa’ahōho’a i te mau tumu parau o te ’evanelia tā te mau tamari’i e nehenehe e ha’api’i hau atu mai, mai te bāpetizora’a, te Fa’aora, te mau hiero, ’e tē vai atu ra. ’A tu’u i te mau hōho’a i ni’a i te tahua ma te huri i te hōho’a i raro, ’e ’a vaiiho i te mau tamari’i, te tahi i muri i te tahi, ’ia huri hō’ē. ’A ani ia rātou ’ia fa’a’ite mai i te mea tā rātou i ’ite, nā reira ato’a tā rātou mau uira’a nō ni’a i te tumu parau tāta’itahi.

Te Parau Ha’api’ira’a ’e te mau Parau Fafau 63:49

E ti’afa’ahou vau.

I teienei ānei ’aore rā a muri a’e, e riro te mau tamari’i tā ’oe e ha’api’i ra i te putapū i te hau nō te ’itera’a ē, maoti te tāra’ehara a te Fa’aora, ’ia tae i te hō’ē mahana, e ti’afa’ahou te feiā ato’a i pohe ra.

Te mau ’ohipa ri’i e nehenehe e rave

• ’A fa’a’ite i te mau tamari’i i te hōho’a o te hō’ē ta’ata i herehia e ’oe, tei pohe, ’e ’a fa’a’ite i te hō’ē ’ā’amu nō ni’a i te reira ta’ata. ’A tai’o i Te Parau Ha’api’ira’a ’e te mau Parau Fafau 63:49 i te mau tamari’i, ’e ’a fa’a’ite pāpū ē, ’ia tae i te hō’ē mahana, « e ti’afa’ahou mai » taua ta’ata ra « mai te pohe mai » ’e e’ita roa atu e pohe fa’ahou. ’A ani i te mau tamari’i ē, ’ua ’ite ānei rātou i te hō’ē ta’ata tei pohe. ’A fa’a’ite pāpū ē, e ti’afa’ahou tātou pā’āto’a maoti Iesu Mesia.

• ’A fa’a’ite i te mau hōho’a nō te hunara’a ’e te ti’afa’ahoura’a ’o te Fa’aora (hi’o te Buka hōho’a o te ’evanelia, nūmera. 58, 59). ’A ani ia rātou ’ia paraparau mai nō ni’a i te ’ohipa e tupu ra i roto i te mau hōho’a. ’A ani i te mau tamari’i ’ia tārava i raro ’a fa’ati’a ai ’oe i te hunara’a ’o Iesu, ’e ’ia ti’a mai ’a fa’ati’a ai ’oe i tōna ti’afa’ahoura’a. ’A tai’o i Te Parau Ha’api’ira’a ’e te mau Parau Fafau 63:49, ’e ’a fa’a’ite i tō ’oe ’itera’a pāpū ē, e ti’afa’ahou tātou pā’āto’a mai te pohe mai, i te hō’ē mahana, mai ia Iesu i nā reira.

  Tē fāra’a mai Iesu ia Maria

  Te ’āua o te mēnema, nā Jon McNaughton

Te Parau Ha’api’ira’a ’e te mau Parau Fafau 63:64

E fa’a’ite au i te fa’atura i te mau mea mo’a.

Tē ora nei tātou i te hō’ē tau ’a ha’afaufa’a-’ore-hia ai ’aore rā ’a fa’ao’ō’ōhia ai te mau mea mo’a ra. E nehenehe ’oe e tauturu i te mau tamari’i ’ia fa’a’ite i te fa’atura i te mau mea mo’a.

Te mau ’ohipa ri’i e nehenehe e rave

• ’A tai’o i te mau tamari’i i Te Parau Ha’api’ira’a ’e te mau Parau Fafau 63:64 : « ’O tei nō ni’a mai ra, e mea mo’a ïa. » ’A ani ia rātou ’ia feruri i te hō’ē ’ohipa tei riro ’ei mea ta’a ’ē nō rātou, mai te hō’ē tao’a ha’uti au-roa-hia ’aore rā hō’ē buka. Nāhea rātou i te ’atu’atu i te reira ’e i te pāruru i te reira ? ’A tauturu ia rātou ’ia feruri i te mau mea ta’a ’ē—’aore rā, te mau mea mo’a—nō te Metua i te ao ra. Nāhea tātou ’ia paraparau nō ni’a i teie mau mea ? Nāhea tātou ia rātou ?

• ’A hīmene ’e te mau tamari’i i te hō’ē hīmene nō ni’a i te fa’atura, mai te « Humblement, calmement » (Chants pour les enfants, 26). ’A tauturu ia rātou ’ia feruri i te mau rāve’a e ti’a ai ia rātou ’ia fa’a’ite i te fa’atura i te mau mea mo’a.

ītona ha’api’ira’a

Ha’api’i i te ha’api’ira’a tumu : Te mau tamari’i pa’ari

Te Parau Ha’api’ira’a ’e te mau Parau Fafau 63:9–10

E tae mai te mau tāpa’o nā roto i te fa’aro’o ’e te hina’aro o te Atua.

’Ua fa’afāriuhia ’o Ezra Booth i te ’Ēkalesia i muri a’e i tōna ’itera’a ia Iosepha Semita i te fa’aorara’a i te rima ’o Elsa Johnson. Terā rā, i muri mai, ’ua ’ore te fa’aro’o ’o Ezra, ’e ’ua fa’ahapahapa ’oia i te peropheta. Tei roto i Te Parau Ha’api’ira’a ’e te mau Parau Fafau 63 te mau fa’aarara’a nō ni’a i te tāmatara’a i te patu i tō tātou fa’aro’o i ni’a i te mau tāpa’o, mai te mau fa’aorara’a temeio, ’eiaha rā i ni’a i te ha’apāpūra’a pae vārua o te parau mau.

Te mau ’ohipa ri’i e nehenehe e rave

• ’A fa’a’ite i te hōho’a i roto i te arata’i ha’api’ira’a nō teie hepetoma i roto i te Mai, pe’e mai—nō te ta’ata hō’ē ’e te ’utuāfare, ’e ’a parau i te mau tamari’i ē, ’ua fa’a’ohipa ’o Iosepha Semita i te autahu’ara’a nō te fa’aora i te rima ’o Elsa Johnson, e rima ho’i tāna i ’ore e nehenehe e fa’a’ohipa e piti matahiti te maoro. ’A ani i te mau tamari’i ’ia tai’o i Te Parau Ha’api’ira’a ’e te mau Parau Fafau 63:9–10, ’e ’a ani ia rātou ’ia fa’a’ite mai i te tahi mea tā te Fatu i parau nō ni’a i te fa’aro’o ’e te mau tāpa’o (’aore rā te mau temeio).

• ’A ani i te mau tamari’i ’ia pāpa’i hōho’a i te hō’ē fare, i ni’a i te hō’ē ’oehā ’e te tahi atu fare, i ni’a i te ’oe’oera’a o te hō’ē porotoru. ’A parau i te mau tamari’i ē, te mau fare, ’o tō tātou ïa fa’aro’o ’e te ’itera’a pāpū. ’A ani ia rātou ’ia tai’o i Te Parau Ha’api’ira’a ’e te mau Parau Fafau 63:9–10 ’e te Helamana 5:12. I muri iho, ’a fa’aue ia rātou ’ia pāpa’i i roto i te ’oehā i te mau mea i ni’a iho tātou e patu ai i tō tātou fa’aro’o, ’e i roto i te porotoru, te mau mea i ni’a iho tātou e ’ore ai e patu i tō tātou fa’aro’o. ’A ha’apāpū ē, e hōro’a te ’oehā i te hō’ē vāhi pāpū nō te patu, ’āre’a te porotoru ra, e ’ere ïa i te mea pāpū ’e te atāta ’ore. Nō te aha e mea faufa’a ’ia patu i tō tātou fa’aro’o i ni’a ia Iesu Mesia ’eiaha rā i ni’a i te tahi atu mau mea ?

Te Parau Ha’api’ira’a ’e te mau Parau Fafau 63:23

’Ia ha’apa’o vau i te mau fa’auera’a, e ha’api’i mai te Atua iā’u i tāna mau parau mau.

’Ei te feiā ana’e e ha’apa’o i te mau fa’auera’a a te Atua e hōro’ahia ai te « mau parau ’aro nō te bāsileia [’o te Atua] ». Teie te tumu i riro ai te reira ’ei mau parau ’aro nō te mau ta’ata e rave rahi. E tauturu teie parau tumu i te mau tamari’i ’a ’imi ai rātou i te parau mau.

Te mau ’ohipa ri’i e nehenehe e rave

• ’A fa’a’ite i te mau tamari’i i te hōho’a o te hō’ē ’āpo’o pape, ’e ’a ani ia rātou ’ia pāpa’i i te hōho’a o te hō’ē ’āpo’o pape. ’Ia oti te tai’ora’a ’āmui i Te Parau Ha’api’ira’a ’e te mau Parau Fafau 63:23, ’a tauturu ia rātou ’ia feruri i te mau parau mau tā rātou i ’ite nō ni’a i te ’evanelia, ’e ’a ani ia rātou ’ia pāpa’i i te reira mau parau mau nā te hiti i tā rātou ’āpo’o pape. Nāhea teie mau parau mau e hōho’a ai i te « pape ora » ?

Te Parau Ha’api’ira’a ’e te mau Parau Fafau 63:58–64

’Eiaha vau e fa’ahiti faufa’a ’ore noa i te i’oa o te Atua.

E nehenehe te mau tamari’i tā ’oe e ha’api’i ra e fa’aro’o ia vetahi ’ē ’ia fa’a’ohipa i te i’oa o te Atua ma te fa’atura ’ore ’e te fa’a’ino. Nāhea e nehenehe ai ia ’oe ’ia tauturu ia rātou ’ia ’ite ē, te i’oa ’o te Metua ’e ’o Iesu Mesia « ’ia parauhia te reira mai te ara e ti’a ai »? (Te Parau Ha’api’ira’a ’e te mau Parau Fafau 63:64).

Te mau ’ohipa ri’i e nehenehe e rave

• ’A tai’o i te mau tamari’i mai roto mai i Te Parau Ha’api’ira’a ’e te mau Parau Fafau 63:58 : « ’O teie te mahana nō te fa’aarara’a. » ’A ani ia rātou ’ia ’āparau nō ni’a i te mau fa’aarara’a tā rātou e fa’aro’o mai roto mai i tō rātou mau metua, te mau ’orometua, ’e te feiā fa’atere o te ’Ēkālesia. I muri iho, ’a tauturu ia rātou ’ia ’imi i te mau fa’aarara’a nō ’ō mai i te Fatu ra i roto i te mau ’īrava 58–64. E aha te tahi huru tano nō te « fa’a’ohipa i te i’oa ’o te Fatu » ? (’īrava 62).

• ’A hi’o ’āmui i « Te parau » i roto i te Nō te puai o te feiā ’āpī (te mau ’api 20–21). ’A ani i te mau tamari’i ’ia hāmani i te mau hōho’a pia na’ina’i nō te fa’aha’amana’o ia rātou i te hō’ē mea tā rātou i ha’api’i mai nō ni’a i te huru nō te fa’a’ohipara’a i te i’oa ’o te Metua i te ao ra ’e ’o Iesu Mesia.

• ’A hīmene ’āmui i te hō’ē hīmene nō ni’a i te fa’atura, mai te « Reverence Is Love » (Children’s Songbook, 31). Nāhea e nehenehe ai ia tātou ’ia ha’apāpū ē, e mea fa’atura tātou ’a paraparau ai nō ni’a i te Metua i te ao ra ’e ia Iesu Mesia ?

ītona ’apora’a ha’api’ira’a

Fa’aitoito i te ha’api’ira’a mai i te fare

Mai te mea ē, ’aita tō ’oe e taime nō te rave i te ’api ’ohipara’a nō teie hepetoma i roto i te piha ha’api’ira’a, e nehenehe e hōro’a i te tamari’i tāta’itahi i te hō’ē hōho’a nō te hōpoi i te fare nō te fa’a’ī ’e te ’utuāfare.

Haʼamaitaʼiraʼa i tā tātou haʼapiʼiraʼa

E haʼamau i te tiʼaturiraʼa o te mau tamariʼi. E riro te tahi mau tamari’i i te ’ore e nehenehe e ’apo mai i te ’evanelia nā roto ia rātou iho. Hō’ē rāve’a nō te tauturu ia rātou ’ia patu i te ti’aturi, ’o te ’āruera’a ïa ia rātou ’ia ’āmui ana’e mai rātou i roto i te piha ha’api’ira’a. ’A parau fafau i te mau tamari’i ē, e tauturu te Vārua Maita’i ia rātou ’a ha’api’i mai ai rātou.

’api ’ohipara’a : E fa’a’ite au i te fa’atura i te mau mea mo’a