Daviess County, Missouri

14–20 nō Tiunu

Te Parau Ha’api’ira’a ’e te mau Parau Fafau 64–66

« Tē tītau nei te Fatu i te ’ā’au ’e te mana’o ’ana’anatae »

’A fa’aineine ai ’oe nō te ha’api’i, ’a feruri nāhea ’oe e nehenehe e fa’atano i tā ’oe hi’ora’a i ni’a i te mau hina’aro o te mau tamari’i. ’A ha’amana’o ē, e nehenehe ’oe e fa’a’ohipa i te mau huru ’ohipa ri’i i roto i teie arata’i ha’api’ira’a nō te mau tamari’i ’āpī ’aore rā nō te mau tamari’i pa’ari.

Pāpa’i i te mau mana’o e tae mai

Tītau i te mana’o

’A hōro’a i te tamari’i tāta’itahi i te fāna’ora’a ’ia tāpe’a i te hō’ē hōho’a o te Fa’aora ’e ’ia fa’a’ite mai i te hō’ē mea tā rātou i ha’api’i mai nō ni’a iāna ’e tāna ’evanelia.

Ha’api’i i te ha’api’ira’a tumu : Te mau tamari’i ’āpī

Te Parau Ha’api’ira’a ’e te mau Parau Fafau 64:9–10

Tē ani mai nei Iesu Mesia iā’u ’ia fa’a’ore i te hapa a vetahi ’ē.

E aha te mau ha’api’ira’a ’aore rā te mau ’ohipa ri’i e nehenehe ’oe e feruri ’o tē tauturu i te mau tamari’i ’ia māramarama i te aura’a ’ia fa’a’ore i te hapa ? ’Ia paraparau ana’e ’oe nō ni’a i te fa’a’orera’a hapa, ’a fa’aha’amana’o i te mau tamari’i ē, te fa’a’orera’a hapa e ’ere ïa te fa’ati’ara’a ia vetahi ’ē ’ia ha’apēpē ia tātou.

Te mau ’ohipa ri’i e nehenehe e rave

• ’A tai’o i te pereota « ’ia fa’a’ore ’outou te tahi i tā te tahi ra hapa » (Te Parau Ha’api’ira’a ’e te mau Parau Fafau 64:9), ’e ’a ani i te mau tamari’i e aha te aura’a ’ia fa’a’ore i te hapa a te hō’ē ta’ata. Nō te tauturu ia rātou ’ia māramarama, ’a fa’a’ite i te tahi mau hi’ora’a ’ōhie. ’A tauturu ia rātou ’ia ha’uti mai i teie mau hi’ora’a nō te ha’api’ipi’i i te fa’a’ore i te hapa.

• ’A tai’o marū noa i te tamari’i i Te Parau Ha’api’ira’a ’e te mau Parau Fafau 64:10 ’e ’a ani ia rātou ’ia aroha rima i te tahi atu tamari’i ’ia fa’aro’o ana’e rātou i te ta’o ra, « fa’a’ore i te hapa. » ’A fa’a’ite i tō ’oe ’itera’a pāpū nō te hau ’e te ’oa’oa e tae mai ’ia fa’a’ore ana’e tātou i te hapa a vetahi ’ē.

• E hīmene i te hō’ē hīmene nō ni’a i te fa’a’orera’a hara, mai te hīmene « Aide-moi, Père » (Chants pour les enfants, 52). E aha tā teie hīmene e ha’api’i nei ia tātou nō ni’a i te fa’a’orera’a i te hapa a vetahi ’ē ?

Te Parau Ha’api’ira’a ’e te mau Parau Fafau 64:34

E nehenehe au e ha’apa’o i te parau a Iesu ma tō’u ’ā’au ’e tō’u mana’o.

’Ua ha’api’i te Fatu i te feiā mo’a ē, nō te patu ia Ziona, e tītauhia ia rātou ’ia hōro’a iāna i tō rātou ’ā’au ’e te mana’o ’ana’anatae. ’A feruri nāhea ’oe i te tauturu i te mau tamari’i ’ia ha’amata i te feruri nō ni’a i te aura’a o te reira nō rātou.

Te mau ’ohipa ri’i e nehenehe e rave

• ’A tai’o i te mau tamari’i i roto i Te Parau Ha’api’ira’a ’e te mau Parau Fafau 64:34 : « Inaha, tē tītau nei te Fatu i te ’ā’au ’e te mana’o ’ana’anatae. » ’A fa’ahiti i teie pereota e rave rahi taime, ma te fa’atoro i ni’a i tō ’oe ’ā’au ’e te upo’o ’a tai’o ai ’oe i teie mau ta’o, ’e ’a ani i te mau tamari’i ’ia nā reira ato’a. Nāhea tātou e nehenehe ai e hōro’a i tō tātou ’ā’au ’e te mana’o i te Fa’aora ? (E mea maita’i ’ia fa’ata’a ē, te parau nō tō tātou ’ā’au, te parau ïa nō tō tātou mau mana’o ’e te here, ’e te parau nō tō tātou vārua, te parau ïa nō tō tātou mau ferurira’a.)

• ’A hīmene i te hō’ē hīmene nō ni’a i te herera’a ’e te pe’era’a i te Fa’aora, mai te « Je ressens son amour » (Chants pour les enfants, 74–75 ; te ’īrava 3 iho ā rā). Nāhea tātou i te fa’a’ite i te Fa’aora ē, ’ua here tātou iāna ? ’A fa’a’ite i tō ’oe mau mana’o nō ni’a ia Iesu Mesia.

Te Parau Ha’api’ira’a ’e te mau Parau Fafau 66

’Ua ’ite te Fatu ē, ’o vai au ’e ’ua here ’oia iā’u.

E pae uira’a pāpū tā William E. McLellin i te Fatu. ’Ua fāri’i Iosepha Semita i te mau pāhonora’a i te reira mau uira’a i roto i te hō’ē heheura’a, noa atu ē, ’aita ’oia i ’ite i te mau uira’a a William. E nehenehe teie ’ohipa e tauturu ia ’oe ’ia ha’api’i i te mau tamari’i ē, ’ua ’ite te Atua ia rātou ’e e nehenehe tāna e pāhono i tā rātou mau uira’a.

Te mau ’ohipa ri’i e nehenehe e rave

• ’A parau nō ni’a i te huru o tō te Fatu pāhonora’a i te mau uira’a a William E. McLellin nā roto mai ia Iosepha Semita (hi’o Te Parau Ha’api’ira’a ’e te mau Parau Fafau 66, tuha’a upo’o parau). ’A fa’a’ite pāpū ē, ’ua ’ite te Metua i te ao ra ia tātou ’e tē hina’aro nei ’oia ’ia tauturu ia tātou. ’A ani i te mau tamari’i ’ia fa’a’ite mai e mea nāhea tō rātou ’itera’a ē, tē here nei te Atua ia rātou.

• ’A tai’o i te mau tamari’i i Te Parau Ha’api’ira’a ’e te mau Parau Fafau 66:4. ’A fa’ati’a i te mau tamari’i i te hō’ē taime ’a fa’a’ite ai te Fatu ia ’oe i te mea tāna e hina’aro ’ia rave ’oe. ’A tai’o fa’ahou i te ’īrava, ma te tu’u i teie taime i te i’oa o te hō’ē o te mau tamari’i. ’A tāpiti fa’ahou te fa’ahitira’a nō te mau tamari’i tāta’itahi.

  

  ’Ua here Iesu Mesia ia tātou tāta’itahi.

Ha’api’i i te ha’api’ira’a tumu : Te mau tamari’i pa’ari

Te Parau Ha’api’ira’a ’e te mau Parau Fafau 64:7–10

’Ua hina’aro te Fa’aora ’ia fa’a’ore au i te hapa a te mau ta’ata ato’a.

Mai tā teie mau ’īrava e fa’a’ite nei, te mau pipi ato’a a Iesu Mesia, ’ua fifi i te tahi taime ’ia fa’a’ore i te hapa a te tahi ’e te tahi. ’A feruri nāhea ’oe i te tauturu i te mau tamari’i ’ia māramarama i te fa’auera’a a te Fatu « ’ia fa’a’ore i te hapa a te ta’ata ato’a » (’A ha’apāpū ē, te fa’a’orera’a i te hapa a vetahi ’ē, e ’ere ïa te fa’ati’ara’a i te ta’ata ’ia ha’apēpē mai ia tātou ; tītauhia ia rātou ’ia parau i te mau taime ato’a i te hō’ē ta’ata pa’ari mai te mea ē, tē ha’apēpē nei te hō’ē ta’ata ia rātou.)

Te mau ’ohipa ri’i e nehenehe e rave

• ’A ani i te mau tamari’i ’ia feruri ē, ’ua anihia ia rātou ’ia ha’api’i i te hō’ē taea’e ’āpī a’e nō ni’a i te fa’a’orera’a i te hapa a vetahi ’ē. Nāhea rātou i te rave i te reira ? ’A ani ia rātou ’ia tai’o ’āpipiti i Te Parau Ha’api’ira’a ’e te mau Parau Fafau 64:7–10 ’e ’ia ’imi i te mau pereota tā rātou e fa’a’ohipa i roto i tā rātou ha’api’ira’a. E nehenehe ato’a rātou e ha’api’i te tahi ’e te tahi.

• ’A hīmene ’āmui « Aide moi, Père » (Chants pour les enfants, 99). Nāhea te Metua i te ao ra ’ia tauturu ia tātou ’ia fa’a’ore i te hapa a vetahi ’ē ?

• ’A feruri i te hō’ē fa’aaura’a parau ’o tē nehenehe e tauturu i te mau tamari’i ’ia māramarama ē, nāhea tātou e « ’ati » ai, ’ia ’ore ana’e tātou e fa’a’ore i te hapa (’īrava 8). ’Ei hi’ora’a, ’a fa’a’ite i te mau tamari’i i te hō’ē pūtē vari paruparu ’aore rā, e pūtē repo ; ’a ani ia rātou ’ia feruri ē, ’ua tāora mai te hō’ē ta’ata i te vari paruparu i ni’a ia rātou. Nāhea te ’orera’a e fa’a’ore i te hapa i te riro mai ’ei tāpe’a-noa-ra’a i te vari paruparu ’e te ta’ita’i-noa-ra’a i te reira i ni’a ia tātou ? Nō te aha e mea maita’i a’e ’ia fa’aru’e i te vari paruparu ? ’A tauturu i te mau tamari’i ’ia feruri i te tahi atu mau fa’aaura’a parau ’o tē ha’api’i nei nō te aha e mea faufa’a ’ia fa’a’ore i te hapa.

Te Parau Ha’api’ira’a ’e te mau Parau Fafau 64:33–34

Tē tītau nei te Fatu i tō’u « ’ā’au ’e te mana’o ’ana’anatae. »

Te patura’a ia Ziona—’e ’aore rā, te tauturura’a i te ’Ēkālesia ’ia tupu i te rahi—e « ’ohipa rahi » ïa. Nō te fa’aoti i te reira, tē tītau mai nei te Fatu ia tātou ’ia pūpū iāna i tō tātou ’ā’au ’e te mana’o ’ana’anatae. Te feiā e ora i Ziona, « hō’ē ā tō rātou ’ā’au ’e hō’ē ā tō rātou mana’o » (Mose 7:18).

Te mau ’ohipa ri’i e nehenehe e rave

• ’A fa’a’ite i te mau tamari’i i te tahi mau mea tei hāmanihia i te mau mea ri’i ha’iha’i e rave rahi, mai te piriapu ’aore rā te hō’ē vauvau tahua. ’A tauturu ia rātou ’ia feruri i te tahi atu mau hi’ora’a. ’A ani i te mau tamari’i ’ia tai’o i Te Parau Ha’api’ira’a ’e te mau Parau Fafau 64:33. E aha tā te Atua e hina’aro ia tātou ’ia rave nō te tauturu iāna ’ia fa’aoti i tāna « ’ohipa rahi » ? E aha te « mau mea ha’iha’i » e nehenehe tātou e rave ’o tē tauturu i te fa’aotira’a i teie ’ohipa ?

• ’A ani i te mau tamari’i ’ia fa’ahope i te hō’ē ’ohipa ’o tē tītau e piti nā tauiha’a, hōro’a noa rā ia rātou hō’ē (’ei hi’ora’a, pāpa’i i ni’a i te tāpura ’ere’ere ’aita rā e pu’a pāpa’i ’aore rā tāpūpū i te hō’ē ’api parau ’aita rā e paoti). ’A ani i te mau tamari’i ’ia tai’o i Te Parau Ha’api’ira’a ’e te mau Parau Fafau 64:34 nō te ’imi e aha nā mea e piti tā te Fatu e ani mai nei ia tātou. Nō te aha e tītauhia ia tātou ’ia hōro’a i tō tātou ’ā’au ’e te mana’o i te Fatu ? Nāhea tātou ’ia rave i te reira ?

Te Parau Ha’api’ira’a ’e te mau Parau Fafau 65

E nehenehe au e tauturu i te fa’aineinera’a i te ao nei ’ia fāri’i ia Iesu Mesia.

Te misiōni a te ’Ēkālesia—te bāsileia ’o te Atua i ni’a i te fenua nei—’o te fa’aineinera’a ïa i te ao nei nō te ho’ira’a mai ’o te Fa’aora. E tuha’a faufa’a te mau tamari’i tā ’oe e ha’api’i ra nō teie misiōni. E aha tā ʼoe e nehenehe e rave nō te tauturu ia rātou ’ia ’āmui mai i roto ?

Te mau ’ohipa ri’i e nehenehe e rave

• ’Ei piha ha’api’ira’a, ’aore rā, ’ei piti piti, ’a tai’o i Te Parau Ha’api’ira’a ’e te mau Parau Fafau 65, ’e ’a tai’o e hia taime te pāpa’ira’ahia te ta’o ra « fa’aineine » E aha tā te Fatu e ani mai nei ia tātou ’ia fa’aineine ? E aha tā tātou e nehenehe e rave nō te fa’aineine ia tātou iho, ’e nō te fa’aineine i te fenua nei ?

• ’A fa’a’ite i te hō’ē hōho’a nō te tae-piti-ra’a mai ’o te Fa’aora (hi’o te Vaira’a hōho’a nō te ’evanelia, nūmera 66), ’e ’a ani i te mau tamari’i ’ia fa’ata’a mai i te mea tā rātou e ’ite ra ’aore rā i te mea tā rātou i ’ite nō ni’a i teie ’ohipa. ’A hōro’a i te mau tamari’i i te mau ta’o ’e te mau parau faufa’a e ’imi i roto i Te Parau Ha’api’ira’a ’e te mau Parau Fafau 65 (mai te mau parau « e ’ī te ao ato’a nei » ’e « mau ’ohipa māere »). E aha tā teie mau ta’o e mau parau e ha’api’i nei ia tātou nō ni’a i te tae-piti-ra’a mai, ’e e aha tā tātou ’ohipa nō te fa’aineinera’a nō te reira.

Fa’aitoito i te ha’api’ira’a i te fare

’A tauturu i te mau tamari’i ’ia ’imi i te hō’ē ’īrava i roto i Te Parau Ha’api’ira’a ’e te mau Parau Fafau 64–66 tā rātou e au ’e e hina’aro ’ia fa’a’ite i te hō’ē melo o te ’utuāfare ’aore rā i te hō’ē hoa.

Ha’amaita’ira’a i tā tātou ha’api’ira’a

Ha’api’i ’ia ’ite i te heheura’a. ’Ia pure ’oe ’e ’ia feruri hōhonu ’oe nō ni’a i te mau pāpa’ira’a mo’a, e ’ite ’oe ē, e nehenehe te mau mana’o ’e te mau ferurira’a e tae mai i te mau taime ato’a ’e i te mau vāhi ato’a—« ’a haere ai ’outou i te ’ohipa, ’a rave ai i te mau ’ohipa i te fare, ’aore rā ’a fārerei ai i te ’utuāfare ’e i te mau hoa » (Ha’api’ira’a mai tā te Fa’aora, 12).