26 nō ’Ēperēra–2 nō Mē

Te Parau Ha’api’ira’a ’e te mau Parau Fafau 45

« E fa’atupuhia… te mau fafaura’a »

’Ua ha’api’i mai te Peresideni Russell M. Nelson : « ’A pāpa’i i te mau mana’o o te tae mai i roto i tō ’outou ferurira’a. ’A tāpa’o i tō ’outou mau mana’o ’e ’a fa’a’ohipa i te reira i roto i te mau ’ohipa e fa’auruhia ia ’outou ’ia rave » (« Heheura’a nō te ’Ēkālesia, heheura’a nō tō tātou orara’a », Ensign ’aore rā Liahona, Mē 2018, 95).

E pāpa’i i tō ʼoutou mau mana’o

Tē ora nei tātou i roto i te mau tau fifi, e nehenehe e riro ’ei mea pe’ape’a. Te mau pipi ato’a a Iesu, ’a fa’aro’o ai rātou iāna i te tohura’a i te mau ’ati rahi o te tupu mai i tō tātou nei ’anotau, « ’ua pe’ape’a ihora rātou » (Te Parau Ha’api’ira’a ʼe te mau Parau Fafau 45:34). ’Ua pe’ape’a ato’a te feiā mo’a mātāmua i Kirtland, Ohio, i te mau tau fifi tā rātou i ora. I rotopū i te tahi atu mau mea, tē vai ra « e rave rahi mau parau ha’avare… ’e te mau ’ā’amu ma’ama’a » tei ha’afifi roa i te parau poro’i o te ’evanelia (Te Parau Ha’api’ira’a ʼe te mau Parau Fafau 45, upo’o parau nō te tuha’a). Terā rā, te pāhonora’a a te Fatu, nō taua taime ra ’e nō teie tau, ’oia ho’i, « ’eiaha e pe’ape’a » (’īrava 35). ’Oia mau, tē vai nei te ’ino, tē vai ato’a ra rā te ha’apāpūra’a ē, tē ha’ape’epe’e nei te Atua i tāna ’ohipa. ’Oia mau, ’ua tohu-ato’a-hia te mau ’ati rahi hou te tae-piti-ra’a mai, ’e e mea ti’a ia tātou ’ia ’ite i te reira. Terā rā, e ’ere teie i te mau fa’aarara’a noa nō te fifi ; e mau tāpa’o fa’a’ite ato’a rā te reira ē, tē fātata nei te mau fafaura’a a te Atua i te tupu. Penei a’e nō reira Te Parau Ha’api’ira’a ʼe te mau Parau Fafau 45—e heheura’a ’o tē fa’ata’a pāpū mai nei i teie mau tāpa’o e rave rahi—i fāri’ihia ai « ma te ’oa’oa o te feiā mo’a » (upo’o parau nō te tuha’a).

Mau mana’o nō te tuatāpapara’a pāpa’ira’a mo’a a te ta’ata hō’ē

Te Parau Ha’api’ira’a ’e te mau Parau Fafau 45:1–5

O Iesu Mesia tō tātou pāruru i te Metua ra.

’Ua tupu ānei i roto ia ’outou te mana’o tū-’ore ’aore rā ti’amā ’ore i mua i te Atua ? E ’itehia ia ’outou te ha’apāpūra’a i roto i Te Parau Ha’api’ira’a ʼe te mau Parau Fafau 45:1–5. E aha te mana’o tā te mau parau mai te « pāruru » ’e te « tāparu » e fa’atupu i roto ia ’outou ? Nāhea te Fa’aora i te pāruru ia ’outou ’aore rā, ’ia tāparu nō ’outou ? E aha te aura’a nō ’outou ’ia ’ite ē, te Mesia tō ’outou pāruru ?

E nehenehe te mau parau i muri nei, nō roto mai i te peresideni Joseph Fielding Smith, e tauturu ia ’outou ’ia feruri hōhonu i teie mau ’īrava : « O Iesu tō tātou pāruru, te tāparura’a ’ei arai nō tātou nā roto i tāna tāvinira’a ’e tāna mau ’ohipa nō te fa’afa’ite ia tātou, nō te fa’aau ia tātou i te Atua » (i roto i te Conference Report, ’Ātopa 1953, 58).

’A hi’o ato’a 2 Nephi 2:8–9; Mosia 15:7–9; Moroni 7:27–28; Te Parau Ha’api’ira’a ʼe te mau Parau Fafau 29:5; 62:1.

Te Parau Ha’api’ira’a ’e te mau Parau Fafau 45:9–10

’Ua riro te ’evanelia ’ei reva nō te mau nūna’a.

I mūta’a ihora, ’ua riro te reva ’ei tāoro ’aore rā, ’ei reva e ta’ita’ihia i roto i te tama’i. E ’āpiti ’e e tāhō’ē te reira i te mau fa’ehau ’e e tauturu ia rātou ’ia ’ite ē, i hea e ha’aputuputu ai, ’e e aha te rave. E riro ato’a te reva ’ei hi’ora’a ’aore rā, ’ei rēni nō te fāito i te tahi atu mau mea. ’A tai’o ai ’outou i Te Parau Ha’api’ira’a ’e te mau Parau Fafau 45:9–10, ’a feruri nāhea te mau fafaura’a o te ’evanelia i te rirora’a ’ei reva nō ’outou. Nāhea tō ’outou orara’a e ta’a ’ē ai mai te mea ē, ’aita i roa’a ia ’outou teie mau fafaura’a ?

’A hi’o ato’a i te Isaia 5:26; 11:10–12; Te Parau Ha’api’ira’a ʼe te mau Parau Fafau 115:5–6.

Te Parau Ha’api’ira’a ’e te mau Parau Fafau 45:11–75

E tupu te mau parau fafau a te Fatu.

E tupu te tama’i, te hara, ’e te otora’a nā mua a’e i te Tae-piti-ra’a mai o te Fa’aora. ’Ua parau mai te Fatu ē, « ’Eiaha e pe’ape’a, nō te mea, ’ia hope teie nei mau mea ato’a i te tupu, e ’ite ai ’outou ē, e fa’atupuhia te mau parau tā’u i fafau atu ia ’outou nā i reira » (Te Parau Ha’api’ira’a ʼe te mau Parau Fafau 45:35)

’A tuatāpapa ai ’outou i Te Parau Ha’api’ira’a ʼe te mau Parau Fafau 45:11–75, ’a feruri ’ia fa’atumu ’eiaha i ni’a iho noa i te mau mea pe’ape’a tei tohuhia, i ni’a ato’a rā i te mau ha’amaita’ira’a tā te Fatu i fafau mai (’ei hi’ora’a, te mau parau fafau i roto i te mau ’īrava 54–59 nō ni’a i te fa’aterera’a Mileniuma a te Fa’aora). E nehenehe ’outou e rave i te reira nā roto i te hāmanira’a i te hō’ē tāpura ’aore rā, nā roto i te tāpa’ora’a i te mau ’īrava. E aha tā ’outou e ’ite nei ’o tē tauturu ia ’outou « ’eiaha e pe’ape’a » nō ni’a i te mau mahana hope’a nei ?

Te Parau Ha’api’ira’a ’e te mau Parau Fafau 45:31–32, 56–57

« ’A ti’a na i roto i te mau vāhi mo’a », ’e ’eiaha e fa’anu’u-’ē-hia’tu ».

Hō’ē tumu te Fa’aora ’e tāna mau peropheta e ha’api’i ai ia tātou nō ni’a i te mau tāpa’o o te tae-piti-ra’a mai maori rā, nō te tauturu ia tātou ’ia fa’aineine. E aha tā ’outou i ha’api’i mai i roto i Te Parau Ha’api’ira’a ʼe te mau Parau Fafau 45 :31–32, 56–57 nō ni’a i te fa’aineinera’a nō te tae-piti-ra’a mai o te Fatu ? E nehenehe e riro ’ei mea maita’i ’ia hi’o fa’ahou i te parabole o nā paretenia hō’ē ’ahuru, ’o tē ’itehia i roto i te Mataio 25:1–13. ’Ua fa’aau te Fa’aora i te hinu i roto i teie parabole i te parau mau ’e i te Vārua Mo’a (’a hi’o Te Parau Ha’api’ira’a ʼe te mau Parau Fafau 45:57). E aha te mau mana’o e noa’a ia ’outou ’ia tai’o ana’e ’outou i te parabole mai teie te huru ?

Parabole nō nā Paratenia hō’ē ’ahuru, nā Dan Burr.

Te Parau Ha’api’ira’a ’e te mau Parau Fafau 45:11–15, 66–71

Ziona o te hō’ē ïa vāhi hau nō te feiā mo’a a te Atua.

E hina’aro rahi tō te feiā mo’a i te ’anotau o Iosepha Semita ’ia patu ia Ziona, te Ierusalema ’āpī, mai tei fa’ata’ahia i roto i te Buka a Moromona (’a hi’o i te Etera 13:2–9) ’e i roto i te fa’atītī’aifarora’a fa’auruhia nō te Bibilia a Iosepha Semita (’a hi’o Mose 7:62–64). E aha tā ’outou i ha’api’i mai nō ni’a ia Ziona—te ’oire tahito i te ’anotau nō Enoha ’e te ’oire nō te ’anotau hope’a nei—i roto i Te Parau Ha’api’ira’a ʼe te mau Parau Fafau 45:11–15, 66–71 ?

I teie mahana, te fa’auera’a ’ia ha’amau ia Ziona, ’o te ha’amaura’a ïa i te bāsileia o te Atua i te mau vāhi ato’a e orahia nei e tātou—i te huru vāhi ato’a e ha’aputuputu te mau tamari’i a te Atua nō te pārurura’a i tāna « fafaura’a mure ’ore » (’īrava 9). E aha tā ’outou e nehenehe e rave nō te patu ia Ziona i te vāhi tei reira ’outou ?

Hi’o ato’a Gospel Topics, « Ziona », topics.ChurchofJesusChrist.org.

Mau mana’o nō te tuatāpapara’a pāpa’ira’a mo’a a te ’utuāfare ’e te purera’a pō ’utuāfare

Te Parau Ha’api’ira’a ’e te mau Parau Fafau 45:3–5.E aha tā te hō’ē arai e rave nō tātou ? E nehenehe ’outou e māta’ita’i i te video « The Mediator » (ChurchofJesusChrist.org) ’e ’ia paraparau nō te aha te Fa’aora i parauhia ai ē, tō tātou arai.

Te Parau Ha’api’ira’a ’e te mau Parau Fafau 45:9–10.Mai te mea ē, e « reva » tō tō ’outou ’utuāfare nō te fa’ahōho’a i tā ’outou fafaura’a i te ’evanelia, mai te aha ïa tōna huru ? E mea ’ārearea ’ia hāmani ’āmui ’outou i te hō’ē reva ’utuāfare ’e ’ia ’āparau nāhea ’outou e nehenehe ai e tauturu ia vetahi ’ē ’ia pe’e i te mau ture o te ’evanelia.

Te Parau Ha’api’ira’a ’e te Mau Parau Fafau 45:32.E aha tō tātou « mau vāhi mo’a » ? E aha te aura’a ’eiaha ’ia « fa’anu’uhia atu » ? Nāhea tātou i te fa’ariro i tō tātou fare ’ei vāhi mo’a ?

Te Parau Ha’api’ira’a ’e te mau Parau Fafau 45:39–44.Nāhea ’outou i te tauturu i te mau melo o te ’utuāfare ’ia hāro’aro’a e aha te aura’a ’ia tīa’i i te tae-piti-ra’a mai o te Fa’aora ? E nehenehe paha ’outou e feruri i te hō’ē ’ohipa tā ’outou e ’ōpua nei ’e e fa’a’ite i te mau rāve’a tā ’outou e « tīa’i » nei nō taua ’ohipa ra. E ’aore rā, e nehenehe ’outou e tunu ’āmui i te hō’ē mea ’e ’ia tīa’i i te mau tāpa’o fa’a’itera’a ē, ’ua ineine nō te ’amu. E aha tā tātou e rave nei nō te tīa’i i te tae-piti-ra’a mai o te Fa’aora ?

Te Parau Ha’api’ira’a ’e te mau Parau Fafau 45:55.E nehenehe te tai’ora’a i te 1 Nephi 22:26 ’e Apokalupo 20:1–3 e tauturu i tō ’outou ’utuāfare ’ia hāro’aro’a e mea nāhea Sātane « ’ia ru’uru’uhia » i roto i te Mileniuma. Nāhea e nehenehe ai ia tātou ’ia ru’uru’u ia Sātane i roto i tō tātou orara’a ?

Nō te tahi atu mau mana’o nō te ha’api’ira’a i te mau tamari’i, hi’o te arata’i o teie hepetoma i roto Mai, pe’e mai—nō te Paraimere.

Hīmene tei mana’ohia : « Quand Jésus reviendra » Chants pour les enfants, 46–47; hi’o ato’a « Te mau mana’o nō te ha’amaita’i i te tuatāpapara’a pāpa’ira’a mo’a a tō ’outou ’utuāfare »

Ha’amaita’i i tā te ta’ata iho tuatāpapara’a pāpa’ira’a mo’a

Fa’a’ohipa i te mau tauturu tuatāpapara’a. ’A fa’a’ohipa i te mau nota i raro i te ’api, te Arata’i parau tumu, te Buka fa’atoro parau o te Bibilia ’e te buka arata’i i te mau pāpa’ira’a mo’a nō te fāri’i i te mau mana’o i roto i te mau pāpa’ira’a mo’a.

Te taera’a mai o te Mesia, nā Jubal Aviles Saenz