te mau ta’ata e putuputu nei i te pae roto

Te rurura’a a te puhapara’a, nā Worthington Whittredge

3–9 nō Mē

Te Parau Ha’api’ira’a ’e te mau Parau Fafau 46–48

« ’A ’imi onoono ’outou i te mau hōro’a maita’i roa ra »

’Ia tai’o ’outou i Te Parau Ha’api’ira’a ’e te mau Parau Fafau 46–48 ’a pāpa’i i te mau mana’o ato’a e tae mai. I reira ’outou e ui ai, mai tā Elder Richard G. Scott i parau, « tē vai atu ā ānei te mau mea e ti’a iā’u ’ia ’ite ? »« (« ’Ia noa’a te arata’ira’a Vārua » Ensign ’aore rā Liahona, Novema 2009,8).

E pāpa’i i tō ʼoutou mau mana’o

’A fa’aru’e ai ’o Parley P. Pratt, Oliver Cowdery, Ziba Peterson ’e ’o Peter Whitmer Jr i Kirtland nō te haere i te tahi atu mau vāhi ’ohipara’a, ’ua fa’aru’e mai rātou hau atu i te hānere feiā fa’afāriuhia tei ’ī roa i te itoito, terā rā, e mea iti roa tō rātou mau ’itera’a, ’aore rā, te fa’aterera’a. ’Aita e mau buka arata’i, ’aita e mau putuputura’a ha’api’ipi’ira’a nā te feiā fa’atere, ’aita e ha’apūrorora’a nō te ’āmuira’a rahi—’oia mau, ’aita ato’a i rahi te mau Buka a Moromona nō te ’ōpere. E rave rahi o teie feiā ti’aturi ’āpī tei umehia mai i roto i te ’evanelia i fa’aho’ihia mai nā roto i te fafaura’a o te mau fa’a’itera’a fa’ahiahia o te Vārua, terā iho ā rā tā rātou i ’ite nō ni’a i te tuatāpapara’a i te faufa’a ’āpī (’ei hi’ora’a, ’a hi’o 1 Korinetia 12:1–11). ’Aita i maoro, ’ua tu’uhia mai i roto i tā rātou mau purera’a a te ’Ēkālesia te tahi mau huru ha’amorira’a mātaro-’ore-hia, mai te fa’atopara’a i ni’a i te repo ’aore rā, te tāvirivirira’a mai te ophi. E rave rahi tei ’ite ē, e mea fifi roa ’ia fa’ata’a ē, e aha te mau fa’a’itera’a nā te Vārua, ’e e aha e ’ere nā te Vārua. I te ’itera’a Iosepha Semita i te pāpū ’ore o taua ’ohipa ra, ’ua pure atura ’oia nō te ani i te tauturu. ’Ua riro te pāhonora’a a te Fatu ’ei mea faufa’a rahi ato’a nō teie ’anotau, mai te mea ē, e pāto’i pinepine ’aore rā, e tau’a ’ore te ta’ata i te mau mea o te Vārua. ’Ua heheu mai te Fatu ē, e parau mau te mau fa’a’itera’a pae vārua ’e ’ua ha’apāpū mai i te reira—e mau hōro’a nō ’ō mai i te hō’ē Metua here i te ao ra, « ’ua hōro’ahia mai taua mau mea ra ’ei maita’i nō rātou ’o tei here mai [iāna] ’e ’o tei ha’apa’o noa i [tāna] mau fa’auera’a ato’a ra », (Te Parau Ha’api’ira’a ʼe te mau Parau Fafau 46:9).

’ītona tuatāpapara’a a te ta’ata hō’ē

Mau mana’o nō te tuatāpapara’a pāpa’ira’a mo’a a te ta’ata hō’ē

Te Parau Ha’api’ira’a ’e te mau Parau Fafau 46:1–6

E fāri’i-pōpou-hia te feiā ato’a e ’imi tu’utu’u ’ore nei nō te ha’amori i roto i te ’Ēkālesia a te Fatu.

E ti’a i te mau purera’a a Te ’Ēkālesia a Iesu Mesia i te Feiā Mo’a i te mau Mahana Hope’a nei ’ia riro ’ei mau putuputura’a fāri’i pōpou a’e ’e te fa’auru a’e i te ao nei. E mea nāhea tā te Fatu a’ora’a mai ia tātou i roto i Te Parau Ha’api’ira’a ʼe te mau Parau Fafau 46:1–6 nō te fāri’i i te feiā e ’āmui mai i roto i tā tātou mau putuputura’a ? Tē mana’o ra ānei tō ’outou mau hoa ’e te mau ta’ata tāpiri mai ia ’outou ē, e mea fāri’i-pōpou-hia rātou i roto i te mau ’ohipa ha’amorira’a a tā ’outou pāroita ? E aha tā ’outou e rave nei nō te fa’ariro i tā ’outou mau putuputura’a a te ’Ēkālesia ’ei mau vāhi e hina’aro te ta’ata e ho’i fa’ahou mai ? ’A feruri ē, nāhea tā ’outou mau tauto’ora’a ’ia pe’e i te Vārua Maita’i i roto i te mau putuputura’a a te ’Ēkālesia e nehenehe ai e fa’auru i tō ’outou ’itera’a.

Hi’o ato’a 3 Nephi 18:22–23; Moroni 6:5–9; « Welcome », video, ComeUntoChrist.org; « Religious Enthusiasm among Early Ohio Converts », Revelations in Context, 105–11.

Te Parau Ha’api’ira’a ’e te mau Parau Fafau 46:7–33

’Ua hōro’a mai te Atua i te mau hōro’a pae vārua nō te ha’amaita’i i tāna mau tamari’i.

’Ua ti’aturi te feiā mo’a mātāmua i te mau hōro’a pae vārua terā rā, ’ua tītauhia te tahi arata’ira’a nō ni’a i tā rātou ’ōpuara’a. ’A tuatāpapa ai ’outou nō ni’a i te mau hōro’a a te Vārua ma te fa’a’ohipa i Te Parau Ha’api’ira’a ʼe te mau Parau Fafau 46:7–33, ’a feruri ’outou nō te aha e mea faufa’a ’ia « [ha’amana’o] noa i te tumu i hōro’ahia mai ai taua mau mea ra » (’īrava 8). ’A feruri nāhea teie mau ’īrava e tū’ati ai i teie fa’ahitira’a parau a Elder Robert D. Hales : « ’Ua hōro’ahia teie mau hōro’a ia rātou ’o tei ha’apa’o maita’i i te Mesia. E tauturu te reira ia tātou ’ia ’ite ’e ’ia ha’api’i i te mau parau mau o te ’evanelia. E tauturu te reira ia tātou ’ia ha’amaita’i ia vetahi ’ē. E arata’i te reira ia tātou ’ia ho’i i tō tātou Metua i te ao ra » (« Gifts of the Spirit », Ensign, Fepuare 2002, 16). E aha atu ā tā ’outou i ha’api’i mai i roto i teie mau ’īrava nō ni’a i te mau fa’a’itera’a pae vārua ? Nāhea teie mau parau mau i te tauturu ia ’outou « ’ia ’ore ’outou ’ia ha’avarehia » ?( ’īrava 8).

’A feruri e aha tā ’outou mau hōro’a pae vārua—’e e nāhea ’outou e nehenehe ai e fa’a’ohipa i te reira « ’ei maita’i nō te mau tamari’i a te Atua » (’īrava 26). Mai te mea ē, e ha’amaita’ira’a pātereāreha tō ’outou, e riro te reira i tē fa’a’ite mai i te mau hōro’a i hōro’ahia ia ’outou.

Hi’o ato’a Gospel Topics, « Spiritual Gifts », topics.ChurchofJesusChrist.org.

Te Parau Ha’api’ira’a ’e te mau Parau Fafau 47

Tē hina’aro nei te Fatu ’ia tāpe’a tāna ’Ēkālesia i te hō’ē ’ā’amu.

’Ua tāmau noa te pi’ira’a o John Whitmer ’ia tāpe’a i te hō’ē ’ā’amu o te ’Ēkālesia ’ei peu maoro nō te feiā ha’apa’o i te parau pāpa’i i rotopū i te mau ta’ata o te Atua (hi’o 2 Nephi 29:11–12; Mose 6:5; Aberahama 1:28, 31). ’Oia mau, tē vai noa ra te ti’ara’a o te ta’ata pāpa’i ’ā’amu ’e te pāpa’i parau o te ’Ēkālesia i teie mahana. Nō te aha ’outou e mana’o ai ē, e mea faufa’a te tāpe’ara’a i te hō’ē ’ā’amu nō te Fatu ? ’A feruri i te reira ’a tai’o ai ’outou i tāna mau ha’api’ira’a ia John Whitmer nō ni’a i teie ’ohipa i roto i te tuha’a 47. ’A feruri ato’a e aha tō ’outou iho mau ’itera’a ’o tē ti’a ia ’outou ’ia pāpa’i. ’Ei hi’ora’a, e aha tā te Fatu i ha’api’i ia ’outou o tā ’outou e hina’aro e fa’aherehere ?

’A feruri ai ’outou i teie mau uira’a, ’a feruri i teie mana’o nō Elder Marlin K. Jensen nō te Hitu ’Ahuru, ’o tei tāvini na ’ei Pāpa’i ’ā’amu ’e ’ei pāpa’i parau nō te ’Ēkālesia mai te matahiti 2005 ’e tae atu i te 2012 :

« E tāpe’a tātou i te mau pāpā’a parau nō te tauturu ia tātou ’ia ha’amana’o … Tē hina’aro nei tātou e tauturu i te mau melo o te ’Ēkālesia ’ia ha’amana’o i te mau mea rarahi tā te Atua i rave nō tāna mau tamari’i… E tauturu te mau ha’api’ira’a nō tahito ra ia tātou ’ia ti’a i mua i tō tātou nei ’anotau ’e ’ia hōro’a ia tātou i te ti’aturira’a i tō tātou ananahi » (« There Shall Be a Record Kept among You », Ensign, Tītema. 2007, 28, 33).

Nō te ha’api’i atu ā nō ni’a i te ’ohipa e ravehia nei i raro a’e i te fa’aterera’a a te ta’ata pāpa’i ’ā’amu o te ’Ēkālesia, a haere i ni’a i te history.ChurchofJesusChrist.org.

John Whitmer

’Ua pi’ihia o John Whitmer ’ia pāpa’i i te ’ā’amu o te ’Ēkālesia.

’ītona tuatāpapara’a a te ’utuāfare

Mau mana’o nō te tuatāpapara’a pāpa’ira’a mo’a a te ’utuāfare ’e te purera’a pō ’utuāfare

Te Parau Ha’api’ira’a ’e te mau Parau Fafau 46:2–6.E aha tā tātou e nehenehe e rave ’ei ’utuāfare, ’ia mana’o vetahi ’ē e fāri’i-maita’i-hia rātou i tā tātou mau purera’a a te ’Ēkālesia ?(hi’o ato’a 3 Nephi 18:22–23). E nehenehe te hōho’a i roto i teie arata’ira’a e ’āpitihia i teie ’āparaura’a.

Te Parau Ha’api’ira’a ’e te mau Parau Fafau 46:7–26.E aha te mau hōro’a pae vārua tā tātou e ’ite nei i roto i te tahi ’e te tahi ? Nāhea taua mau hōro’a ra i te ha’amaita’i i tō tātou ’utuāfare ?

Te Parau Ha’api’ira’a ’e te mau Parau Fafau 47.Nāhea ’outou i te fa’aitoito i tō ’outou ’utuāfare ’ia pāpa’i i tō rātou iho mau ’ā’amu i te roara’a o te hepetoma ? E nehenehe ’outou e fa’a’ite i te tahi mau pāpa’ira’a nō roto mai i tō ’outou iho buka ’ā’amu ’aore rā, e fa’a’ite i te hō’ē ’ā’amu nō ni’a i te hō’ē tupuna (hi’o FamilySearch.org). Tē fa’ata’a nei te tahi mau ’utuāfare i te tahi tau minuti i te hepetoma tāta’itahi nō te pāpa’i i roto i tā rātou mau buka ’ā’amu. E nehenehe ’outou e hōro’a i te tahi mau mana’o, mai teie te huru « e aha te ’ohipa tei tupu i teie hepetoma ’o tā ’outou e hina’aro ’ia ’ite tā ’outou mau mo’otua ? » ’aore rā, « e mea nāhea tō ’outou ’itera’a i te rima o te Fatu i roto i tō ’outou orara’a i teie hepetoma ? ». E nehenehe te mau tamari’i na’ina’i e pāpa’i i te mau hōho’a nō tō rātou mau ’itera’a, ’aore rā, e nehenehe ’outou e haruharu i tō rātou reo ’a fa’ati’a ai rātou i tō rātou mau ’ā’amu. E aha te mau ha’amaita’ira’a e tae mai nō te tāpe’ara’a i « te hō’ē ’ā’amu tāmau » ?(’īrava 1).

Te Parau Ha’api’ira’a ’e te mau Parau Fafau 48.’Ua fa’auehia i te feiā mo’a i Ohio ’ia ’ōpere i tō rātou fenua nō te feiā e haere mai ra i Ohio nā te pae hiti’a o te rā mai o te Fenua Marite. E aha tā tātou e nehenehe e fa’a’ite nō te pāhono i te mau hina’aro o vetahi ’ē ?

Nō te tahi atu mau mana’o nō te ha’api’ira’a i te mau tamari’i, hi’o te arata’i o teie hepetoma i roto i te Mai, pe’e mai—nō te Paraimere.

Hīmene tei mana’ohia : « Have I Done Any Good ? » Hymns, n°223.

Ha’amaita’ira’a i tā tātou ha’api’ira’a

Fa’a’ohipa i te mau ’ā’amu ’e te mau hi’ora’a. ’Ua fa’a’ohipa pinepine te Fa’aora i te mau ’ā’amu ’e te mau parabole nō te ha’api’i i te mau parau tumu o te ’evanelia. ’A feruri i te mau hi’ora’a ’e te mau ’ā’amu nō roto mai i tō ’outou iho orara’a ’o tē nehenehe e fa’ariro i te hō’ē parau tumu o te ’evanelia ’ei mea ora nō tō ’outou ’utuāfare (hi’o Ha’api’ira’a mai tā te Fa’aora, 22).

mau ta’ata i te fare purera’a

’Ua hōro’a mai te Metua i te ao ra i tāna mau tamari’i i te mau hōro’a pae vārua nō te ha’amaita’i i te orara’a o vetahi ’ē.