Feiā mo’a e fa’aineine nei e reva

Tē haere nei te feiā mo’a i Kirtland, nā Sam Lawlor

12–18 nō ’Ēperēra

Te Parau Ha’api’ira’a ʼe te mau Parau Fafau 37–40

« Mai te mea ’aita ’outou e riro ’ei hō’ē ra e ’ere ho’i ’outou nō’u nei »

’Ua ’ite te Atua e aha tā te mau tamari’i i roto i tā ’outou piha ha’api’ira’a e ti’a ’ia ha’api’i mai. E vaiiho iāna ’ia arata’i ia ’outou nō te mā’iti i te mau parau tumu ’e te mau ’ohipara’a nō te tauturu ia ’outou ’ia ha’api’i ia rātou.

Pāpa’i i te mau mana’o e tae mai

ītona fa’a’itera’a

Tītau i te mana’o

E hōro’a fa’a’ati i te hō’ē buka pāpa’ira’a mo’a. ’Ia tāpe’a ana’e te tamari’i tāta’itahi i te buka pāpa’ira’a mo’a, e vaiiho i te reira tamari’i ’ia fa’a’ite mai i te hō’ē mea tāna e ha’amana’o ra i roto i te ha’api’ira’a i te hepetoma i ma’iri a’e nei ’aore rā, nā roto mai i te tai’ora’a i te mau pāpa’ira’a mo’a i te fare i teie hepetoma.

ītona ha’api’ira’a

Ha’api’i i te ha’api’ira’a tumu : Te mau tamari’i ’āpī

Te Parau Ha’api’ira’a ’e te mau Parau Fafau 38:24–27

E nehenehe au e here ia vetahi ʼē.

’Ua hina’aro te Fatu ’ia ha’aputuputu te feiā mo’a i Ohio ’e ’ia here te tahi ’e te tahi ’ei feiā ’aifāito. Nāhea e ti’a ai ia ’outou e tauturu i te mau tamari’i ’ia ’ite i te hō’ēra’a ’e te here ia vetahi ’ē ?

Te mau ’ohipa e nehenehe e rave

• E fa’a’ohipa i teie ’api ’ohipara’a o te hepetoma nō te fa’a’ite i te mau tamari’i ē, i te tau e mea ’āpī roa te ’Ēkālesia, ’ua ani te Fatu i te mau melo ’ia fa’anu’u ’āmui i Ohio (hi’o ato’a i te hōho’a fenua i roto i te arata’i nō teie hepetoma i roto i te Mai, pe’e mai—nō te ta’ata hō’ē ’e te ’utuāfare). ’Ua hina’aro te Atua ’ia ha’api’i mai rātou nāhea ’ia here ’e ’ia hoa te tahi i te tahi. E ani i te mau tamari’i i te mau mana’o nō ni’a e nāhea rātou e ti’a ai e fa’a’ite i te here te tahi i te tahi.

• Tai’o i Te Parau Ha’api’ira’a ’e te mau Parau Fafau 38:25 i te mau tamari’i, ’e e parau ia rātou nā roto i tā ’outou iho mau parau, e aha te aura’a ’ia fa’atura atu i tō ’outou taea’e ’aore rā, tuahine mai ia ’outou iho (hi’o ato’a Mataio 7:12). Tauturu ia rātou ’ia fa’ahiti fa’ahou i te ’īrava, ma te mono i « tōna taea’e » i te i’oa o te tahi.

• E hīmene i te hō’ē hīmene nō ni’a i te herera’a ’e ’oia ato’a ia vetahi ’ē, mai te « Je viens vers toi » ’aore rā, « We Are Different » (Chants pour les enfants, 78–79). ’A hīmene ai ’outou, e vaiiho i te mau tamari’i ’ia tāpe’a i te mau hōho’a o te mau tamari’i nō te tahi atu mau vāhi o te ao nei.

• E tauturu i te mau tamari’i ’ia ha’uti teata i te hō’ē fa’anahora’a tei roto te hō’ē ta’ata ’āpī tei haere mai i roto i te piha Paraimere. Nāhea tātou i te tauturu iāna ’ia ’ite ē, ’ua fāri’i-maita’i-hia ’oia ? E ’oa’oa te tamari’i ’ia ha’uti ma te fa’a’ohipa i te mau pēpē hurio nō te manimani rima ’aore rā, te mau hōho’a tāpūpūhia.

Te Parau Ha’api’ira’a ’e te mau Parau Fafau 38:30

Mai te mea ’ua ineine au, e’ita vau e mata’u.

Hō’ē rāve’a tā te Metua i te ao ra nō te tauturu ia tātou ’eiaha ’ia mata’u nā roto ïa i te ha’api’ira’a ia tātou ’ia vai ineine noa.

Te mau ’ohipa e nehenehe e rave

• E fa’ahiti e rave rahi taime i te pereota « Mai te mea rā ’ua vai ineine noa ’outou e ’ore ’outou e mata’u » (’īrava 30). Te tahi tau taime i muri a’e, e tūmā i te hō’ē ta’o, ’e ’a vaiiho i te mau tamari’i ’ia parau i te ta’o i ma’iri. E parau i te mau tamari’i nō ni’a i te hō’ē taime ’a ineine ai ’outou nō te hō’ē mea ’e nō tō ’outou ineine, ’ua tauturu te reira ia ’outou ’eiaha e mata’u.

• Tauturu i te mau tamari’i ’ia feruri i te mau mea tā te Metua i te ao ra e hina’aro ia rātou ’ia fa’aineine nō te reira, mai te bāpetizora’a ’aore rā, te haerera’a i te hiero. Fa’a’ohipa i te mau hōho’a ’aore rā, te mau tao’a nō te hōro’a i te mau mana’o ia rātou. ’A paraparau nō te mau rāve’a tā rātou e nehenehe e fa’aineine, ’e e vaiiho ia rātou ’ia pāpa’i i tō rātou iho mau hōho’a tē fa’aineine ra ’aore rā, tē ’āmui ra i roto i te mau mea tā rātou i feruri.

Te Parau Ha’api’ira’a ’e te mau Parau Fafau 39:6, 23

’Ua fāri’i au i te hōro’a o te Vārua Maita’i i te taime ’a ha’amauhia ai au.

E aha tā te mau tamari’i i roto i tā ’outou piha ha’api’ira’a e tītau ’ia hāro’aro’a nō ni’a i te fāri’ira’a i te hōro’a o te Vārua Maita’i ? E nehenehe te mau arata’ira’a tā te Fatu i hōro’a ia James Covel nō ni’a i teie ’ōro’a e tauturu.

Te mau ’ohipa e nehenehe e rave

• E fa’a’ite i te hō’ē hōho’a nō te hō’ē ta’ata e bāpetizohia ra ’e te hō’ē ta’ata e ha’amauhia ra (hi’o i te Buka hōho’a o te ’evanelia , nos.104, 105). E tai’o i Te Parau Ha’api’ira’a ’e te mau Parau Fafau 39:23, ’e e ani i te mau tamari’i ’ia fa’atoro i ni’a i te hōho’a tano ’ia fa’aro’o ana’e rātou ia ’outou ’ia tai’o nō ni’a i te bāpetizora’a ’aore rā, nō ni’a i te ha’amaura’a.

• E tai’o ’āmui i Te Parau Ha’api’ira’a ’e te mau Parau Fafau 39:6, ’e e fa’a’ite i te mau tamari’i i te mau hōho’a ’aore rā, i te mau tao’a ’o tē fa’ahōho’a ra i te mau rāve’a e ha’amaita’i ai te Vārua Maita’i ia tātou (tae noa atu i tei fa’ahitihia i roto i te ’īrava 6). E vaiiho i te mau tamari’i ’ia tāpe’a, te tahi i muri mai i te tahi, i te mau hōho’a ’aore rā, te mau tao’a, ’e ’ia nā reira rātou, ’a fa’a’ite i te ’itera’a pāpū nō ni’a e nāhea te Vārua Maita’i i te ha’amaita’ira’a ia ’outou i roto i teie mau rāve’a. Tauturu i te mau tamari’i ’ia ’ite i te mau taime e ’ite ai rātou i te fa’aurura’a a te Vārua.

ītona ha’api’ira’a

Ha’api’i i te ha’api’ira’a tumu : Te mau tamari’i pa’ari

Te Parau Ha’api’ira’a ’e te mau Parau Fafau 37 ; 38:31–33

E ha’aputuputu te Atua ia tātou nō te ha’amaita’i ia tātou.

’Ua riro te ha’aputuputura’a i Ohio ’ei tusia rahi nō te feiā mo’a mātāmua e rave rahi. I teie mahana ’aita tātou e fa’auehia ’ia ha’aputuputu i te hō’ē vāhi, e ha’aputuputu rā tātou ’ei mau ’utuāfare, ’ei mau pāroita, ’e ’ei mau titi.

Te mau ’ohipa e nehenehe e rave

• E fa’a’ite i te mau tamari’i i te ’api ’ohipara’a nō teie hepetoma ’aore rā, te hōho’a fenua i roto i te arata’i nō teie hepetoma i roto i te Mai, pe’e mai—nō te ta’ata hō’ē ’e te ’utuāfare. E tai’o ’āmui i Te Parau Ha’api’ira’a ’e te mau Parau Fafau 37, ’e e tauturu i te mau tamari’i ’ia ’imi i ni’a i te hōho’a fenua i te mau vāhi i fa’ahitihia i roto i te heheura’a. E aha tā te Fatu i fa’aue i te feiā mo’a ’ia rave ?

• E mā’iti i te hō’ē parau tumu ’aore rā, i te ’īrava nō roto mai i Te Parau Ha’api’ira’a ’e te mau Parau Fafau 38:31–33 tā outou e mana’o nei e fa’ata’a ra ē, nō te aha te Fatu e hina’aro ai i tōna mau ta’ata ’ia ha’aputu ’āmui mai. E ha’apūrara i te mau ta’o nō roto mai i teie pereota nā roto i te piha, ’e e ani i te mau tamari’i ’ia ha’aputuputu i te reira, ’ia fa’anaho i te reira i roto i te ’āna’ira’a tano, ’e ’ia ’imi i hea e ’itehia ai te reira pereota i roto i te mau ’īrava. Nō te aha te Fatu e hina’aro ai ’ia ha’aputuputu tātou ?

Te Parau Ha’api’ira’a ’e te mau Parau Fafau 38:24–27

Tē hina’aro nei te Atua ’ia hō’ē tōna mau ta’ata.

Nō te fa’aineine i te feiā mo’a ’ia ha’aputuputu, ’ua ha’api’i te Fatu ia rātou ’ia hi’o i te tahi ’e te tahi ’ei ’aifāito ’e « ’ia tāhō’ē » (’īrava 27). Nāhea teie ha’api’ira’a i te ha’amaita’i i te mau tamari’i tā ’outou e ha’api’i ra ?

Te mau ’ohipa e nehenehe e rave

• E tai’o ’āmui i Te Parau Ha’api’ira’a ’e te mau Parau Fafau 38:24–27, ’e e ani i te mau tamari’i ’ia pāpa’i i te mau parau nō roto mai i teie mau ’īrava tā rātou e mana’o ra ē, e mea faufa’a, tae noa atu i te mau parau i fa’ahiti-fa’ahou-hia. Nō te aha te Fatu i fa’ahiti ai nā ni’a iho fa’ahou i teie mau parau ? E vaiiho ia rātou ’ia fa’a’ite mai i te mau mea tā rātou i pāpa’i, ’e e ’āparau i te mau mea tā rātou i ’apo mai nā roto mai i teie mau parau.

• Tauturu i te mau tamari’i ’ia feruri i te mau huru tupura’a i reira te hō’ē ta’ata e feruri ai ē, ’ua tu’uhia ’oia i te hiti, mai te rirora’a ’ei melo ’āpī nō te ’Ēkālesia, ’aore rā, te fa’anu’ura’a i roto i te hō’ē vāhi fa’aeara’a ’āpī ’aore rā, te hō’ē fare ha’api’ira’a ’āpī. E aha tā Te Parau Ha’api’ira’a ’e te mau Parau Fafau 38:24–27 e parau nei nō ni’a i tō tātou huru i ni’a i te hō’ē ta’ata i roto i teie mau huru tupura’a ? ’A ha’uti teata ta’ata ora i te tahi o te reira mau huru tupura’a.

• E fa’a’ite i te hō’ē ha’api’ira’a tao’a ’o tē fa’ahōho’a nei i te huru e nehenehe ai e ’āmui ’aore rā, e tāhō’ē nō te riro mai ’ei hō’ē, mai te mau tuha’a o te hō’ē tīfaifai ’aore rā, te mau ’āno’i nō te hāmani i te faraoa. E aha tā teie mau hi’ora’a e ha’api’i mai nei ia tātou nō ni’a i te rirora’a ’ei mau ta’ata hō’ē nō te Atua ?

Te Parau Ha’api’ira’a ’e te mau Parau Fafau 39–40

E nehenehe au e ha’apa’o i tā’u mau fafaura’a.

’Ua rave o James Covel i te hō’ē fafaura’a ’ia fa’aro’o i te Fatu, ’aita rā ’oia i tāpe’a i tāna fafaura’a. E nehenehe tē ha’api’ira’a mai nō ni’a i tōna ’itera’a e tauturu i te mau tamari’i ’ia ha’amana’o i te faufa’a rahi nō te rirora’a ’ei ta’ata ha’apa’o.

Te mau ’ohipa e nehenehe e rave

• E ani i te mau tamarii ’ia tai’o i te mau upo’o parau o te tuha’a nō te Te Parau Ha’api’ira’a ’e te mau Parau Fafau 39 ’e 40, ’e e ani ia rātou ’ia puohu mai nā roto i te mau parau ’aore rā, i te mau hōho’a i te mea tā rātou i ha’api’i mai nō ni’a ia James Covel.

• Pāpa’i i te mau uira’a i ni’a i te tāpura ’ere’ere ’o tē tauturu i te mau tamari’i ’ia māramarama i te tuha’a 40 mai teie E aha tā James Covel i fafau e rave ? Nō te aha ’aita ’oia i tāpe’a i tāna fafaura’a ? E ani i te mau tamari’i ’ia ’ite mai i te mau pāhonora’a i roto i te tuha’a 40.

• Tauturu i te mau tamari’i ’ia ha’amana’o i te mau fafaura’a tā rātou i rave i te taime ’a bāpetizohia ai rātou (hi’o Mosia 18:8–10). Tauturu i te mau tamari’i ’ia tāpura i te tahi mau mata’u ’aore rā, te tahi « mau pe’ape’a o teie nei ao » (Te Parau Ha’api’ira’a ’e te mau Parau Fafau 40:2) ’o tē nehenehe e tāpe’a i te hō’ē ta’ata ’ia ha’apa’o i te reira mau fafaura’a. E ani i te mau tamari’i ’ia pāpa’i rātou iho i te hō’ē parau poro’i poto ’ei hō’ē fa’aha’amana’ora’a ē, e tauturu te ha’apa’ora’a i te mau fa’auera’a a te Metua i te ao ra ia rātou ’ia upo’oti’a i te mau mata’u ’aore rā, i te mau ha’ape’ape’ara’a a tō te ao nei. E fa’aitoito ia rātou ’ia vaiiho i tā rātou parau fa’aha’amana’ora’a i te hō’ē vāhi e nehenehe rātou e ’ite pinepine i te reira.

ītona ’apora’a ha’api’ira’a

Fa’aitoito i te ha’api’ira’a mai i te fare

E ani i te mau tamari’i ’ia paraparau ’e tō rātou mau metua ’aore rā, ’e te tahi atu mau melo o te ’utuāfare nāhea e ti’a ai ia rātou ’ia tāhō’ē hau atu ’ei ’utuāfare.

Ha’amaita’iraʼa i tā tātou ha’api’ira’a

Tāmau ’ā’au i te hō’ē ’īrava. E mā’iti i te hō’ē tuha’a o te pāpa’ira’a mo’a tā ’outou e mana’o nei ē, e ha’apūai te reira i te ’itera’a pāpū o te mau tamari’i, ’e e tauturu ia rātou ’ia tāmau ’ā’au i te reira. E nehenehe te mau tamari’i ’āpī e tāmau ’ā’au i te hō’ē tuha’a o te pāpa’ira’a mo’a ’aore rā, hō’ē noa a’e pereota.

’api ’ohipara’a : E nehenehe au e here ia vetahi ’ē.