Iesu e ti’a ra i mua i te mau ta’ata i tūturi i raro

E tu’u te mau turi ato’a i raro, nā J.Kirk Richards

22–28 nō Māti

Te Parau Ha’api’ira’a ’e te mau Parau Fafau 29

E ha’aputuputu Iesu Mesia i tōna mau ta’ata

’Ua matau ’outou i te mau tamari’i ’o tā ’outou e ha’api’i ra, ’e tē vai nei e rave rahi mau parau mau i roto i Te Parau Ha’api’ira’a ’e te mau Parau Fafau 29 ’o te nehenehe e ha’amaita’i ia rātou. E pe’e i te fa’aurura’a a te Vārua ’a tuatāpapa ai ’outou i te tuha’a 29 ’e e pāpa’i i te mau mana’o e tae mai nō ni’a e nāhea ’outou e ha’api’i i te mau tamari’i i teie mau parau mau.

Pāpa’i i te mau mana’o e tae mai

ītona fa’a’itera’a

Tītau i te mana’o

E feruri ’ia ani i te tahi mau tamari’i ’ia fa’a’ite mai i te tahi mau rāve’a ’a ha’api’i mai ai rātou i te ’evanelia i te fare—rātou ana’e ’aore rā, ’e tō rātou ’utuāfare. E ani i te hō’ē ’aore rā, e rave rahi mau tamari’i ’ia fa’a’ite mai i tō rātou ’itera’a pāpū nō te hō’ē mea tā rātou i ’apo mai i te fare i teie hepetoma.

ītona ha’api’ira’a

Ha’api’i i te ha’api’ira’a tumu : Te mau tamari’i ’āpī

Te Parau Ha’api’ira’a ’e te mau Parau Fafau 29:1–2

E ha’aputuputu Iesu Mesia i tōna mau ta’ata hou ’oia e ho’i fa’ahou mai ai.

’Ua ha’aputuputuhia tātou e te Fa’aora ’ia fāri’i ana’e tātou ’e ’ia ha’apa’o ana’e tātou i tāna mau ha’api’ira’a.

Te mau ’ohipa e nehenehe e rave

• Vaiiho i te mau tamari’i ’ia fa’aū i te ’ohipara’a o teie hepetoma ’a fa’a’ite noa ai ’outou i te video « Te mau fanau’a ’e te moa ufa » (ChurchofJesusChrist.org). E ani i te mau tamari’i ’ia fa’aro’o e mea nāhea te mo’a ’ia pāruru i te mau fanau’a.

• I muri a’e i te tai’ora’a i te Te Parau Ha’api’ira’a ’e te mau Parau Fafau 29:1–2, e hauti i te fa’ahōho’ara’a o te Mesia i te ha’aputuputura’a i tōna mau ta’ata « mai te moa e ha’aputuputu i tāna mau fanau’a ». E nehenehe hō’ē tamari’i e fa’ariro iāna ’ei moa ufa ’e ’ia mā’iti i te hō’ē poro o te piha i reira e ti’a ai. ’Ia « totō » ’oia, e ani i te mau tamari’i pā’āto’a ’ia ha’aputuputu hā’ati iāna. E nehenehe te mau tamari’i e riro ’ei moa ufa, te tahi i muri mai i te tahi. E ’āfa’i i te hō’ē hōho’a o te Fa’aora i ni’a ’e e ani i te mau tamari’i ’ia ha’aputuputu mai iāna ra. E fa’a’ite i te mau tamari’i nāhea Iesu i te tauturu ia tātou ’ia ha’aputuputu iāna ra.

  te moa ufa ’e te fanau’a

  E hia rahira’a taime, nā Liz Lemon Swindle

Te Parau Ha’api’ira’a ’e te mau Parau Fafau 29:2–11

E nehenehe au e fa’aineine nō te fārerei i te Fa’aora.

I te hō’ē mahana, e ti’a tātou tāta’itahi i mua i te aro o Iesu Mesia. Noa atu ē e mea ātea te reira mahana, e nehenehe te mau tamari’i e feruri e aha rā tōna huru ’e nāhea e ti’a ai ia rātou ’ia fa’aineine nō te reira.

Te mau ’ohipa e nehenehe e rave

• E fa’a’ite i te hō’ē hōho’a nō te tae pitira’a mai (hi’o te Buka hōho’a o te ’evanelia, no. 66), ’e e tauturu i te hō’ē tamari’i ’ia tai’o i Te Parau Ha’api’ira’a ’e te mau Parau Fafau 29:11. Tauturu i te mau tamari’i ’ia fa’a’ite mai i te mau pereota i roto i te pāpa’ira’a mo’a ’o tē fa’ata’a ra i te mea tā rātou e ’ite ra i roto i te hōho’a. E fa’a’ite i te mau tamari’i e aha tō ’outou mana’o nō ni’a i te ho’i-fa’ahou-ra’a mai o Iesu Mesia i te fenua nei.

• E hīmene ’ei piha ha’api’ira’a i te hō’ē hīmene nō ni’a i te tae-piti-ra’a mai, mai te « Quand Jésus reviendra » (Chants pour les enfants,46–47). E fa’a’ite i te mau tamari’i i te mau hōho’a nō te mau mea tā rātou e nehenehe e rave nō te fa’aineine ’ia fārerei i te Fa’aora ’e ’ia ora i pīha’i iho iāna e a muri noa atu (hi’o te Buka hōho’a o te ’evanelia nō te tahi mau mana’o.) Tauturu ia rātou ’ia ’imi i te tahi atu mau rāve’a nō te fa’aineine i roto i Te Parau Ha’api’ira’a ’e te mau Parau Fafau 29:2–10.

ītona ha’api’ira’a

Ha’api’i i te ha’api’ira’a tumu : Te mau tamari’i pa’ari

Te Parau Ha’api’ira’a ’e te mau Parau Fafau 29

’Ua fa’aineine te Metua i te ao ra i te hō’ē fa’anahora’a nō te fa’aorara’a nō’u.

Rahi noa atu tō te hō’ē tamari’i ’ite nō ni’a i te fa’anahora’a nō te fa’aorara’a a te Atua, rahi noa ato’a atu tōna fa’a’ohipara’a i te fa’aro’o i te Metua i te ao ra ’e ia Iesu Mesia nō te pe’e i te reira fa’anahora’a. E aha te mau tuha’a o te fa’anahora’a tā ’outou e mana’o nei e fa’atumu i ni’a iho ?

Te mau ’ohipa e nehenehe e rave

• E ani i te mau tamari’i e rave rahi ’ia fa’a’ite mai i te hō’ē hi’ora’a nō te hō’ē taime ’a hāmani ai rātou i te hō’ē fa’anahora’a, mai te hō’ē tere ’aore rā, nō te fa’aotira’a i te hō’ē ’ohipa. E nehenehe ato’a ’outou e fa’a’ite i te mau hi’ora’a nō te mau fa’anahora’a, mai te hō’ē tārena tāmahana tei pāpa’ihia te mau ’ohipara’a i ni’a iho, ’aore rā, te mau arata’ira’a nō te hāmani i te hō’ē ’ohipa. Nō te aha e mea faufa’a te mau fa’anahora’a ? E fa’a’ite i te mau tamari’i ē, e fa’anahora’a tā te Metua i te ao ra ’o tē fa’ati’a ia tātou ’ia riro mai iāna te huru.

• Nō te tauturu i te mau tamari’i ’ia hāro’aro’a i te fa’anahora’a a te Atua, e hāmani i te mau tāpa’o ma teie mau parau : te orara’a hou te tāhuti nei, te poietera’a, te hi’ara’a, te orara’a i te fenua nei, ’e te tae-piti-ra’a mai. I muri ae i te fa’ata’ara’a i te mau parau tāta’itahi (hio Te Parau Ha’api’ira’a ’e te mau Parau Fafau 29:9–45), e hōro’a te tāpa’o tāta’itahi i te hō’ē tamari’i ta’a ’ē, ’e e ani ia rātou ’ia ti’a mai rātou i ni’a i te hō’ē rēni ma te ana’ira’a tano nō te fa’a’ite i te tupura’a tāta’itahi o te mau ’ohipa i roto i te fa’anahora’a a te Metua i te ao ra. E nehenehe te tamari’i tāta’itahi e fa’a’ite mai e aha tāna i ’ite nō ni’a i tāna tāpa’o. Tauturu i te mau tamari’i ’ia ’ite e nāhea te ’itera’a nō ni’a i te fa’anahora’a a te Metua i te ao ra i te tauturu ia tātou ’ia riro hau atu mai iāna ’e mai te Fa’aora te huru.

• Fa’a’ohipa i te hō’ē ’aore rā, hau atu, o te mau ’ohipara’a i raro nei nō te ha’api’i i te mau parau mau nō ni’a i te fa’anahora’a ’e e nāhea te reira e tano ai nō tātou. E feruri e ani i te tahi mau tamari’i ’ia haere ineine mai nō te tauturu ia ’outou ’ia ha’api’i.

  • Ti’amāra’a ’ia mā’iti. Tauturu i te mau tamari’i ’ia hāro’aro’a ē, ’ua hōro’a mai te Metua i te ao ra ia tātou i te ti’amāra’a—te ti’amāra’a nō te mā’iti—’e e amo tātou i te hōpoi’a nō tā tātou mau mā’itira’a (hi’o Te Parau Ha’api’ira’a ’e te mau Parau Fafau 29:39–40). Hāmani e piti tāpa’o nā te tamari’i tāta’itahi : Hō’ē ’o tē fa’ahōho’a i te ravera’a i te hō’ē mā’itira’a maita’i (’ei hi’ora’a, hō’ē hōho’a mata ’ata’ata) ’e hō’ē ’o tē fa’ahōho’a i te ravera’a i hō’ē mā’itira’a ’ino (’ei hi’ora’a, hō’ē hōho’a mata tu’atu’a). E fa’a’ite i te mau hi’ora’a nō te mau mā’itira’a maita’i ’e nō mau mā’itira’a ’ino, ’e ’a ani i te mau tamari’i ’ia āfa’i te tāpa’o tano i ni’a. E ani i te mau tamari’i ’ia fa’a’ite mai i te mau ha’amaita’ira’a e fāri’ihia ’ia pe’e ana’e tātou ia Iesu Mesia. Nō te aha te Metua i te ao ra e vaiiho ai ia tātou ’ia rave i tā tātou iho mau mā’itira’a.

  • Te mau fa’auera’a. E ani i te mau tamari’i ’ia tāpura mai i ni’a i te tāpura ’ere’ere i te tahi mau fa’auera’a. (’Ei hi’ora’a, e nehenehe e ’imi i te Exodo 20:3–17 ’e te Buka hōho’a o te ’evanelia, 103–15.) Nō te aha te Metua i te ao ra i hōro’a mai ai i te mau fa’auera’a ia tātou ? E aha tā tātou i ha’api’i mai nā roto i Te Parau Ha’api’ira’a ’e te mau Parau Fafau 29:35 nō ni’a i te mau fa’auera’a a te Metua i te ao ra ?

  • Te tāra’ehara a Iesu Mesia. Tauturu i te mau tamari’i ’ia ’ite ē, ’ua fa’aineine te Metua i te ao ra i te hō’ē rāve’a nō tātou ’ia fa’a’orehia tā tātou mau hara ’ia rave ana’e tātou i te mau mā’itira’a ti’a ’ore. E ani i te tamari’i tāta’itahi ’ia tai’o i te hō’ē o te mau ’īrava i roto i Te Parau Ha’api’ira’a ’e te mau Parau Fafau 29:1, 42–43 ’e ’ia fa’a’ite mai e aha tā te reira e ha’api’i nei nō ni’a i te tāra’ehara o te Fa’aora. E ’imi i te hō’ē rāve’a ta’a ’ē nō te ani i te mau tamari’i ’ia fa’a’ite mai i te mea tei ’itehia ia rātou, mai te ’āna’ira’a o tō rātou mahana fānaura’a, ’aore rā, mai te na’ina’i haere atu i te rahi, ’e tē vai atu ra.

Te Parau Ha’api’ira’a ’e te mau Parau Fafau 29:1–2

E ha’aputuputu Iesu Mesia i tōna mau ta’ata hou ’oia ’a ho’i fa’ahou mai ai.

Nāhea ’outou e nehenehe ai e tauturu i te mau tamari’i tā ’outou e ha’api’i ra ’ia ’ana’anatae i te tauturura’a i te ha’aputuputura’a ia ’Īsera’ela ?

Te mau ’ohipa e nehenehe e rave

• E ani i te mau tamari’i ’ia tai’o i Te Parau Ha’api’ira’a ’e te mau Parau Fafau 29:1–2 ’e ’ia ’imi e aha te mea tā te Fatu e fa’aau nei iāna iho. E aha tā te mau tamari’i i feruri ’ia tai’o ana’e rātou i teie fa’aaura’a ? E aha tā te Fatu i parau e ti’a ia tātou nō te ha’aputuputu ia tātou ?

• Hō’ē rāve’a nō te fa’atupu i te ’ana’anatae i te mau tamari’i nō te ha’aputuputura’a ’oia ho’i, e fa’ati’a i te ’ā’amu o te hō’ē ta’ata tei tomo mai i roto i te ’Ēkālesia. ’Ei hi’ora’a, nā vai i fa’a’ite i tō ’outou ’utuāfare i te ’Ēkālesia ? ’A feruri i te ani ātea i te mau tamari’i ’ia ’ite mai ’o vai te melo mātāmua nō te ’Ēkālesia i roto i tō rātou ’utuāfare ’e ’ia fa’a’ite mai i tōna ’ā’amu i te piha ha’api’ira’a.

• E ani i te mau tamari’i ’ia hāmani i te hō’ē tāpura nō te mau rāve’a tā rātou e nehenehe e tauturu i te ta’ata ’ia ha’aputuputu mai i te Fa’aora ra. ’Ei hi’ora’a, e nehenehe rātou e ani i te mau hoa ’aore rā, i te mau melo o te ’utuāfare ’ia haere mai i te ’ohipara’a a te Paraimere ’aore rā, i te hō’ē pō ’utuāfare ’e tō rātou ’utuāfare.

• Tē fa’ahiti ra te hīro’a fa’aro’o ’ahuru nō ni’a i te ha’aputuputura’a o ’Īsera’ela. ’Ua mau ’ā’au ānei i te hō’ē tamari’i teie hīro’a fa’aro’o ? Mai te mea ē, ’ua mau ’ā’au, e ani ia rātou ’ia fa’ahiti mai i te reira nō te piha ha’api’ira’a. Mai te mea ē, ’aita, e tauturu ia rātou ’ia ha’amau i te hō’ē ’ōpuara’a nō te tāmau ’ā’au i te reira.

ītona ’apora’a ha’api’ira’a

Fa’aitoito i te ha’api’ira’a mai i te fare

E ani i te mau tamari’i ’ia pāpa’i i te hō’ē parau mau tā rātou i ha’api’i mai i roto i te piha ha’api’ira’a. E ani i te tahi mau mana’o nō te ’ohipa tā rātou e rave i te fa’a’itera’a i teie parau mau i tō rātou ’utuāfare.

Ha’amaita’ira’a i tā tātou ha’api’ira’a

’A ha’apa’o maita’i. A ha’apa’o maita’i nō ni’a i te huru te pāhonora’a te mau tamari’i i roto i tā ’outou piha ha’api’ira’a i te mau ’ohipara’a nō te ’apora’a mai. Mai te mea ē, e huehue ri’i rātou, ’ua tae paha ïa i te taime nō te taui i te ’ohipara’a, ’aore rā, nō te orihaere ri’i. Mai te mea ē, tē ’ite ra ’outou ē, e mea itoito te mau tamari’i ’e te ’apo mai ra rātou, ’eiaha ïa e rū ’ia haere i mua.

’api ’ohipara’a : E ha’aputuputu Iesu Mesia i tōna mau ta’ata