Iosepha Semita

15–21 nō Māti

Te Parau Ha’api’ira’a ’e te mau Parau Fafau 27–28

« ’Ia ravehia te mau mea ato’a ma te au maita’i e ti’a ai »

E nehenehe te mau parau mau i ha’api’ihia i roto i Te Parau Ha’api’ira’a ʼe te mau Parau Fafau 27–28 e ha’apūai i te mau ’itera’a pāpū o te mau tamari’i o tā ’outou e ha’api’i nei. ’A feruri ai ’outou i te mau hina’aro o te mau tamari’i, e aha te mau parau mau tā ’outou e hina’aro e ha’afaufa’a i roto i te piha ha’api’ira’a ?

Pāpa’i i te mau mana’o e tae mai

ītona fa’a’itera’a

Tītau i te mana’o

Fa’a’ite i te hō’ē hōho’a o te peropheta Iosepha Semita ’e hō’ē hōho’a o te peropheta nō teie mahana. E ani i te mau tamari’i ’ia fa’a’ite mai i te i’oa o te mau ta’ata i roto i te mau hōho’a ’e ’ia fa’a’ite mai i te ’ohipa tā te mau peropheta e rave ra.

ītona ha’api’ira’a

Ha’api’i i te ha’api’ira’a tumu : Te mau tamari’i ’āpī

Te Parau Ha’api’ira’a ’e te mau Parau Fafau 27:1–2

E tauturu te ’ōro’a mo’a iā’u ’ia ha’amana’o ia Iesu Mesia.

E nehenehe te mau tamari’i ’āpī e ha’api’i mai i te faufa’a rahi o te ’ōro’a mo’a ’e ’ia ’ite mai i te mau rāve’a nō te ha’amana’o i te Fa’aora i te roara’a o taua ’ōro’a mo’a ra.

Te mau ’ohipa e nehenehe e rave

• Fa’a’ite i te mau tamari’i i te hō’ē hōho’a nō Iesu e hōro’a ra i te ’ōro’a mo’a i tāna mau ’Āpōsetolo (hi’o te Buka hōho’a o te ’evanelia, no.°54). E aha te huru ’ia rave i te ’ōro’a mo’a ’e te Fa’aora ? (hi’o Te Parau Ha’api’ira’a ʼe te mau Parau Fafau 27:5). Tai’o i Te Parau Ha’api’ira’a ʼe te mau Parau Fafau 27:2, ha’amata nā te « ma te ha’amana’o i te Metua ra », ’e ’a ani i te mau tamari’i ’ia fa’aro’o i te mea tā te Fa’aora e hina’aro ’ia ha’amana’o tātou ’a rave ai tātou i te ’ōro’a mo’a.

• Fa’a’ite i te mau tamari’i i te tahi faraoa ’e te pape ’e te hō’ē hōho’a o te Fa’aora. E vaiiho i te mau tamari’i ’ia tāpe’a i te hōho’a ’a ha’api’i ai ’outou ia rātou ē, e tauturu te ’ōro’a mo’a ia tātou ’ia ha’amana’o ia Iesu Mesia.

• E tauturu i te mau tamari’i ’ia feruri i te mau mea tā rātou e nehenehe e rave nō te ha’amana’o ia Iesu i te roara’a o te ’ōro’a mo’a. E aha tā tō rātou ’utuāfare e rave nō te tauturu i te tahi ’e te tahi ’ia fa’atura ? E ani i te mau tamari’i ’ia pāpa’i i te hō’ē hōho’a tā rātou e nehenehe e hi’o i te taime nō te ’ōro’a mo’a nō te tauturu ia rātou ’ia ha’amana’o i te Fa’aora.

Te Parau Ha’api’ira’a ’e te mau Parau Fafau 27:15–18

E pāruru te ha’ana tama’i a te Atua iā’u.

E feruri i te mau rāve’a e nehenehe ’outou e tauturu i te mau tamari’i tā ’outou e ha’api’i ra ’ia ’ite ē, nāhea te ha’apa’ora’a i te mau fa’auera’a e fa’ahōho’a i te ’ahura’a i te ha’ana tama’i a te Atua.

Te mau ’ohipa e nehenehe e rave

• E fa’a’ite i te mau tamari’i i te hō’ē hōho’a nō te ha’ana tama’i (hi’o te arata’i nō teie hepetoma i roto i te Mai, pe’e mai—nō te ta’ata hō’ē ’e te ’utuāfare. ’A tai’o ai ’outou i Te Parau Ha’api’ira’a ʼe te mau Parau Fafau 27:15–18, ’a tauturu i te mau tamari’i i te ’itera’a mai i te mau tuha’a o te ha’ana tāma’i i ni’a i te hōho’a. E parau i te mau tamari’i ē, e mea nāhea te ha’ana o te Atua i te tauturu i te « pāruru ia [’outou] iho nā i te mahana ’ino rahi ra » (’īrava 15).

• Tē vai ra hō’ē ’api ’ohipara’a nō ni’a i te ha’ana tāma’i o te Atua i roto i te arata’i a Ephesia i roto i te Mai, pe’e mai—nō te Paraimere : Faufa’a ’āpī 2019. E tāpūpū i te mau tuha’a o te ha’ana tāma’i, ’e e vaiiho i te mau tamari’i ’ia tu’u i te reira i ni’a i te hō’ē o te mau hōho’a ’a tai’o ai ’outou i Te Parau Ha’api’ira’a ʼe te mau Parau Fafau 27:15–18. E tauturu i te mau tamari’i ’ia māramarama i te mau mea tā rātou e nehenehe e rave nō te ’ahu i te ha’ana tāma’i o te Atua, mai te pure, te mā’itira’a i te maita’i, te tāvinira’a ia vetahi ’ē, ’e tē vai atu ra.

  te mau tamari’i e ha’uti nei

  E nehenehe au e ’ahu i te ha’ana tāma’i o te Atua.

Te Parau Ha’api’ira’a ’e te mau Parau Fafau 28:2, 6–7

E arata’i te peropheta i te ’Ēkālesia.

’Ua ’ite ānei te mau tamari’i tā ’outou e ha’api’i ra nō te aha e peropheta tō tātou ? Fa’a’ohipa i Te Parau Ha’api’ira’a ʼe te mau Parau Fafau 28 nō te tauturu ia rātou ’ia ’ite ē, ’o te peropheta ana’e ’o tē nehenehe e arata’i i te ’Ēkālesia.

Te mau ’ohipa e nehenehe e rave

• Tai’o ’aore rā, e fa’ati’a nā roto i tā ’outou iho mau parau i te ’ā’amu o Hiram Page (hi’o « Pene 14 : Te peropheta ’e te mau heheura’a nō te ’Ēkālesia », Te mau ’ā’amu nō Te Parau Ha’api’ira’a ʼe te mau Parau Fafau, 56–57). Fa’a’ite i tō ’outou ’itera’a pāpū ē, ’ua mā’iti te Metua i te ao ra ’e o Iesu Mesia ia Iosepha Semita nō te arata’i i te ’Ēkālesia i tōna ra tau (hi’o Te Parau Ha’api’ira’a ʼe te mau Parau Fafau 28:2). E fa’a’ite i tō ’outou ’itera’a pāpū ē, ’ua pi’ihia te peropheta i teie mahana nō te tauturu i te Fatu ’ia arata’i i tāna ’Ēkālesia i tō tātou nei ’anotau.

• E ani i te mau tamari’i ’ia ha’uti « ’a pe’e i te ta’ata arata’i »—e nehenehe te hō’ē tamari’i e ti’a i mua i te piha ha’api’ira’a, ’e e pe’e te toe’a o te mau tamari’i i te mau mea ato’a tāna e rave. E nehenehe te reira e fa’atupu i te hō’ē ’āparaura’a nō ni’a, nō te aha tātou e pe’e ai i te peropheta. E nehenehe ’outou e fa’a’ite i te hō’ē hōho’a nō Iesu Mesia ’e e ha’apāpū ē, e pe’e tātou i te peropheta nō te mea tē pe’e nei ’oia i te Fa’aora ’e tē parau nei ’oia i te mau parau a te Fa’aora.

ītona ha’api’ira’a

Ha’api’i i te ha’api’ira’a tumu : Te mau tamari’i pa’ari

Te Parau Ha’api’ira’a ’e te mau Parau Fafau 27:1–2

E tauturu te ’ōro’a mo’a iā’u ’ia ha’amana’o ia Iesu Mesia.

Nāhea te ’apora’a mai i te mau parau tumu i roto i Te Parau Ha’api’ira’a ʼe te mau Parau Fafau 27:1–2 i te tauturu i te mau tamari’i tā ’outou e ha’api’i nei ’ia fāri’i i te ’itera’a faufa’a atu nō te ravera’a i te ’ōro’a mo’a ?

Te mau ’ohipa e nehenehe e rave

• E ani i te mau tamari’i ’ia pāpa’i i te mau mea tā rātou e mana’o ra ē, e hina’aro te Fa’aora ’ia ’ite rātou nō ni’a i te ’ōro’a mo’a. Mai te mea e hina’arohia, e nehenehe rātou e tai’o « ’ōro’a mo’a » i roto i te Arata’i nō te mau pāpa’ira’a mo’a (scriptures.ChurchofJesusChrist.org). Vaiiho ia rātou ’ia fa’a’ite mai i te tahi mau mea tā rātou i pāpa’i, ’e e ani ia rātou ’ia ’āmui atu i te reira i roto i tā rātou tāpura i muri a’e i te tai’ora’a i Te Parau Ha’api’ira’a ʼe te mau Parau Fafau 27:1–2. Nāhea te mau mea i ni’a i tā rātou tāpura i te fa’atupu i ni’a i te huru nō te ravera’a rātou i te ’ōro’a mo’a i te mau sābati ato’a ?

• Tauturu i te mau tamari’i ’ia feruri i te aura’a nō te ravera’a i te ’ōro’a mo’a « ma te mata hō’ē i te hanahana [o te Atua] » (’īrava 2). E ’āparau i te mau uira’a mai teie i muri nei : E aha te tahi mau fa’anevanevara’a o tō tātou mata ’aore rā, tō tātou ferurira’a e nehenehe e rōtahi i te roara’a o te ’ōro’a mo’a ? E aha tā tātou e nehenehe e rave nō te rōtahi i tō tātou mana’o i ni’a i te Fa’aora ’a rave ai tātou i te ’ōro’a mo’a ? Nāhea te reira i te tauturu ia tātou ’ia pe’e iāna i te mau mahana ato’a ?

Te Parau Ha’api’ira’a ’e te mau Parau Fafau 27:15–18

E tauturu te ha’ana tama’i a te Atua iā’u ’ia pāto’i i te ’ino

E fa’aruru te mau tamari’i tā ’outou e ha’api’i nei i te mau fa’aurura’a ’ino e rave rahi i roto i tō rātou orara’a. Tē hina’aro nei te Metua i te ao ra e tauturu ia rātou ’ia pāto’i i te ’ino. Nāhea e ti’a ai ia ’outou ’ia fa’auru ia rātou ’ia ’ahu i te ha’ana tāma’i o te Atua ?

Te mau ’ohipa e nehenehe e rave

• E ani i te mau tamari’i ’ia tai’o i Te Parau Ha’api’ira’a ʼe te mau Parau Fafau 27:15–18 ’e ’ia pāpa’i hōho’a i te mau tuha’a o te ha’ana tāma’i i fa’ahitihia (mai te mea e hina’arohia, e nehenehe rātou e hi’o i te hōho’a i roto i te arata’i nō teie hepetoma i roto i te Mai, pe’e mai—nō te ta’ata hō’ē ’e te ’utuāfare). E aha tā te mau ta’o e fa’ata’a ra nō te tuha’a tāta’itahi o te ha’ana tāma’i e ha’api’i mai nei ia tātou nō ni’a i te mea tā tātou e tītau nō te ’aro i te ’ino ’ati a’e ia tātou (’ei hi’ora’a, te parau-ti’a, te fa’aro’o, te fa’aorara’a ’e tē vai atu ra) ?

• E ani i te mau tamari’i ’ia feruri i te mau mea tā rātou e nehenehe e rave nō te pāto’i i te mau fa’ahemara’a ’ati a’e ia rātou. E ani ia rātou ’ia fa’aoti i te pereota ra « E ’ahu tātou i te ha’ana tāma’i a te Atua i te mau mahana ato’a nā roto… » ’ia au i tō rātou mau mana’o. Tauturu ia rātou ’ia hi’o e nāhea tā rātou mau tauto’ora’a ’ia haere mai i te Mesia ra i te tauturu ia rātou ’ia ’ahu i te ha’ana tāma’i o te Atua.

Te Parau Ha’api’ira’a ’e te mau Parau Fafau 28:1–7, 15

E arata’i te Metua i te ao ra iā’u nā roto i te Vārua Maita’i.

E nehenehe Te Parau Ha’api’ira’a ʼe te mau Parau Fafau 28:1–7, 15 e tauturu i te mau tamari’i tā ’outou e ha’api’i nei ’ia māramarama ē, e nehenehe te mau ta’ata ato’a e arata’ihia nā roto i te Vārua Maita’i, te heheura’a rā nō te ’Ēkālesia, e hōro’a-noa-hia mai ïa te reira i te peropheta ra.

Te mau ’ohipa e nehenehe e rave

• E fa’ati’a i te ’ā’amu nō Hiram Page i te paraura’a ē, tē fāri’i nei ’oia i te mau heheura’a nō te ’Ēkālesia (hi’o « Pene 14 : Te peropheta ’e te mau heheura’a nō te ’Ēkālesia », Te mau ’ā’amu nō Te Parau Ha’api’ira’a ’e te mau Parau Fafau,,56–57). Nāhea tātou i te pāhono i te mau parau a Hiram Page ? E tai’o ’āmui i Te Parau Ha’api’ira’a ʼe te mau Parau Fafau 28:1–7, 15 nō te tahi atu mau mana’o.

• Tauturu i te mau tamari’i ’ia ’imi i teie mau pāpa’ira’a mo’a i muri nei nō te hāmani i te hō’ē tāpura nō te mau rāve’a e nehenehe ai te Vārua Maita’i e arata’i ia rātou : Te Parau Ha’api’ira’a ʼe te mau Parau Fafau 28:1, 4, 15 ; Ioane 14:26 ; Moroni 8:26 ; 10:4–5. E vaiiho ia rātou ’ia ’ohipa ’āpitipiti mai te mea e tauturu te reira. Nō te aha e mea faufa’a rahi roa te hōro’a o te Vārua Maita’i ? Fa’a’ite nāhea te Vārua Maita’i i te arata’ira’a ia ’outou.

ītona ’apora’a ha’api’ira’a

Fa’aitoito i te ha’api’ira’a mai i te fare

E ani i te mau tamari’i ’ia ani i tō rātou nā metua e nehenehe ānei tā rātou e ha’api’i i te hō’ē ha’api’ira’a i te pō ’utuāfare nō ni’a i te hō’ē mea tā rātou i ’apo mai i roto i te piha ha’api’ira’a.

Ha’amaita’ira’a i tā tātou ha’api’ira’a

Fa’a’ohipa i te pehe. E nehenehe te mau hīmene a te Paraimere ’e te mau hīmene purera’a e tauturu i te mau tamari’i nō te mau fāito matahiti ato’a ’ia māramarama ’e ’ia fāri’i i te mau parau mau o te ’evanelia ma te fa’ahiahia. E nehenehe ato’a te reira e fa’aitoito i te mau tamari’i ’ia tāmau noa i te ’apo mai.

’api ’ohipara’a : E arata’i te Atua i tāna ’Ēkālesia