15–21 nō Māti

Te Parau Ha’api’ira’a ’e te mau Parau Fafau 27–28

« ’Ia rave-’āfaro-noa-hia te mau mea ato’a e ti’a ai »

’Ua parau Elder D. Todd Christofferson ē, ’ia tuatāpapa ’outou i te mau pāpa’ira’a mo’a ’e ’ia pāpa’i ’outou i te mau mana’o e tae mai, « e hōro’a… ’outou i te hō’ē vāhi i roto i tō ’outou nei ’ā’au nō te parau a te Atua ’e e paraparau mai ’oia ia ’outou » (« ’E ’ia fa’afāriuhia mai ’oe ra », Ensign ’aore rā Liahona, Mē 2004, 11).

Pāpa’i i te mau mana’o e tae mai

E mea ’āpī ā te parau nō te heheura’a i te feiā mo’a ’a tāmau ai te Fa’aho’i-fa’ahou-ra’a mai i te tupu. ’Ua ’ite te mau melo o te ’Ēkālesia ē, e nehenehe te peropheta Iosepha Semita e fāri’i i te heheura’a nō te ’Ēkālesia, e ti’a ato’a rā i te tahi mau pu’era’a ? E mau uira’a faufa’a rahi roa te reira i te ti’aturira’a ’o Hiram Page, hō’ē o nā ’ite to’ova’u ē, e mau heheura’a ato’a tāna nō te ’Ēkālesia. E rave rahi feiā mo’a ha’apa’o maita’i tei ti’aturi ē, e mau heheura’a nā te Atua. ’Ua pāhono mai te Fatu nā roto i te ha’api’ira’a ē, i roto i tāna ’Ēkālesia « ’ia rave-’āfaro-noa-hia te mau mea ato’a e ti’a ai » (Te Parau Ha’api’ira’a ’e te mau Parau Fafau 28:13), te aura’a, hō’ē noa ta’ata tei « mā’itihia ’ia fāri’i i te mau fa’auera’a ’e te mau heheura’a » nō te ’Ēkālesia tā’āto’a (Te Parau Ha’api’ira’a ’e te mau Parau Fafau 28:2). Noa atu rā, e ti’a i te tahi atu mau ta’ata ’ia fāri’i i tā rātou iho heheura’a nō tā rātou tuha’a i roto i te ’ohipa a te Fatu. ’Oia mau, e ha’amana’ora’a te mau parau a te Fatu ia Oliver Cowdery nō tātou pā’āto’a : « E hōro’ahia ia ’oe… te ’ohipa tā ’oe e rave ra » (Te Parau Ha’api’ira’a ’e te mau Parau Fafau 28:15).

Mau mana’o nō te tuatāpapara’a pāpa’ira’a mo’a a te ta’ata hō’ē

Te Parau Ha’api’ira’a ’e te mau Parau Fafau 27:1–4

E rave au i te ’ōro’a ma te mata rōtahi i te hanahana o te Atua.

’Ua bāpetizohia Sally Knight ’e Emma Smith i te ’āva’e Tiunu 1830, ’ua tāpe’ahia rā tō rāua ha’amaura’a e te hō’ē pupu ta’ata ’ī’ino. Piti ’āva’e i muri mai, ’ua haere mai Sally ’e tōna hoa fa’aipoipo e fārerei ia Emma ’e Iosepha, ’e ’ua fa’aotihia ē, e ravehia i terā taime te mau ha’amaura’a ’e e rave ’āmui taua pupu ra i te ’ōro’a. ’E tē haere ra Iosepha e ti’i i te uaina nō te ’ōro’a, tāpe’a ihora te hō’ē melahi iāna. E aha tā te melahi i ha’api’i iāna nō ni’a i te ’ōro’a ? (hi’o Te Parau Ha’api’ira’a ’e te mau Parau Fafau 27:1–4).

E aha tā teie mau ’īrava e ha’api’i nei ia ’oe nō ni’a i te huru te Fa’aora e hina’aro nei ia ’oe ’ia feruri nō ni’a i te ’ōro’a mo’a ? E aha te mana’o i fa’auruhia mai nā roto i te mea tā ’oe e ha’api’i ra ?

Tē fa’aha’amana’o nei te ’ōro’a mo’a ia tātou i te tusia a te Fa’aora.

Te Parau Ha’api’ira’a ’e te mau Parau Fafau 27:15–18

E tauturu mai te ha’ana tama’i a te Atua ’ia pāto’i i te ’ino.

’Ua parau te peresideni M. Russell Ballard : « ’Aita e ’ohipa hope ’e te rahi tā tātou e nehenehe e rave ’ia mau tātou i te mauiha’a pae vārua. Tei roto te mana pae vārua mau i te mau ’ohipa na’ina’i ri’i tei rara’a-’āmui-hia ’ei mātēria pūai pae vārua ’o tē pāruru ia tātou i te mau ’ino ato’a » (« Be Strong in the Lord », Ensign, Tiurai 2004, 8).

’A tai’o ai ’oe i Te Parau Ha’api’ira’a ’e te mau Parau Fafau 27:15–18, e nehenehe e hāmani i te hō’ē tāpura mai teie i raro nei. E aha tā ’oe e rave ra nō te ’ō’omo i te tuha’a tāta’itahi nō te ha’ana tama’i a te Atua ?

Tuha’a ha’ana tama’i	Tuha’a o te tino e pāruruhia	Te fa’ahōho’ara’a nō taua tuha’a ra o te tino
Te pāruru ’ōuma nō te parau-ti’a	Te māfatu	Tō tātou mau hina’aro ’e mau mana’o au nō te hō’ē mea
Te tāupo’o pāruru o te ora	Te upo’o ’aore rā te ferurira’a

Hi’o ato’a Ephesia 6:11–18 ; 2 Nephi 1:23.

Te Parau Ha’api’ira’a ’e te mau Parau Fafau 28

’O te peropheta ora te auvaha o te Atua nō tāna ’Ēkālesia.

E feruri na e aha ra te huru ’ahiri e ti’a i te ta’ata ato’a e fāri’i i te mau fa’auera’a ’e te heheura’a nō te ’Ēkālesia tā’āto’a. I te paraura’a Hiram Page ’ua fāri’i ’oia i te reira huru heheura’a, ’ua tupu te ta’a ’ore i rotopū i te mau melo o te ’Ēkālesia. I roto i Te Parau Ha’api’ira’a ’e te mau Parau Fafau 28, ’ua heheu te Fatu i te hō’ē fa’anahora’a nō te heheura’a i roto i tāna ’Ēkālesia. E aha te ha’api’ira’a tā ’oe i ’apo mai i roto i teie tufa’a nō ni’a i te ti’ara’a ta’a ’ē o te Peresideni o te ’Ēkālesia ? E aha te ha’api’ira’a tā ’oe e ’apo mai nei i roto i te mau parau a te Fatu ia Oliver Cowdery i te ’īrava 3 ? E aha te ha’api’ira’a tā ’oe e ’apo mai nei i roto i teie tufa’a nō ni’a i te huru te Atua e arata’i ia ’oe ?

Hi’o ato’a Dallin H. Oaks, « E piti rēni nō te ’āparaura’a », Ensign ’aore rā Liahona, Nov. 2010, 83–86.

Te Parau Ha’api’ira’a ’e te mau Parau Fafau 28:8–9

Nō te aha e mea faufa’a te misiōni a Oliver Cowdery i te mau ’āti Lamana ra ?

Hō’ē fā o te Buka a Moromona, ’oia ho’i, « ’ia noa’a i te ’āti Lamana te ’ite o tō rātou ra mau metua, ’e ’ia ’ite ho’i rātou i te mau fafaura’a a te Fatu » (Te Parau Ha’api’ira’a ’e te mau Parau Fafau 3:20). ’Ua tū’ati te reira i te mau parau fafau a te Fatu i te mau peropheta e rave rahi nō te Buka a Moromona (1 Nephi 13:34–41 ; Enosa 1:11–18 ; Helamana 15:12–13). ’Ua hi’o te mau melo mātāmua o te ’Ēkālesia i te mau Initia Amerika ’ei hua’ai nō te nūna’a o te Buka a Moromona. (Te ti’ara’a mana o te ’Ēkālesia i teie mahana, ’oia ho’i, ’o te mau ’āti Lamana « te tahi o te mau tupuna nō te mau Initia Amerika » (’Ōmuara’a o te Buka a Moromona].)

E aha tā teie misiōni e ha’api’i nei ia ’oe nō ni’a i te Fatu ’e tāna ’ohipa ?

Mau mana’o nō te tuatāpapara’a pāpa’ira’a mo’a a te ’utuāfare ’e te pō ’utuāfare

Te Parau Ha’api’ira’a ’e te mau Parau Fafau 27:1–2.Nāhea e nehenehe ai ia tātou ’ia ha’amana’o maita’i a’e i te tusia a te Fa’aora nō tātou ’a rave ai i te ’ōro’a ?

Te Parau Ha’api’ira’a ’e te mau Parau Fafau 27:5–14.E aha tā tātou e ’ite nō ni’a i te mau peropheta i roto i teie mau ’īrava ? E aha te mau ha’amaita’ira’a tei matara nō tātou nā roto i te mau tāviri tā rātou i mau ? Nō te tahi atu ā ha’amāramaramara’a nō ni’a i te mau tāviri, hi’o Mataio 16:16–19 ; Te Parau Ha’api’ira’a ’e te mau Parau Fafau 110:11–16.

Te Parau Ha’api’ira’a ’e te mau Parau Fafau 27:15–18.Penei a’e e au mai tō ’outou ’utuāfare e ha’uti ta’ata ora i te hō’ē tama’i ma te tahi ’ohipa nō te fa’ahōho’a i te mauha’a tama’i a te Atua, mai te tāupo’o, te pereue, te pāreu ’aita rā te tia’a. Nāhea te ha’ana tama’i i te pāruru ia tātou i roto i te tama’i ? Paraparau i te tahi mau mana ’ino tā tō ’outou ’utuāfare e fa’aruru nei ’e te tahi mau mea tā ’outou e nehenehe e rave nō te ’ō’omo i te ha’ana tama’i pae vārua.

Te Parau Ha’api’ira’a ’e te mau Parau Fafau 28:2–7.E aha te ha’api’ira’a tā tātou e ’apo mai i roto i teie mau ’īrava nō ni’a i te pi’ira’a peropheta ? E nehenehe te mau melo o te ’utuāfare e hi’o i te tahi mau poro’i tahito a te peropheta ora ’a fa’a’ite ai nāhea tāna parau a’o i te tauturu ia tātou ’ia pe’e ia Iesu Mesia.

Te Parau Ha’api’ira’a ’e te mau Parau Fafau 28:11.’Ia hina’aro tātou e tauturu i te tahi ta’ata ’ia fa’atītī’aifaro, nō te aha e mea faufa’a ’ia rave i te reira « i rōpū iāna ’e ia ’oe ana’e » ?

Nō te tahi atu mau mana’o nō te ha’api’ira’a i te mau tamari’i, hi’o te arata’i ha’api’ira’a o teie hepetoma i roto Mai, pe’e mai—nō te Paraimere.

Hīmene tei mana’ohia : « Mai fa’aro’o i te reo o te peropheta », Te mau hīmene, n°11.

Ha’amaita’ira’a i te tuatāpapara’a pāpa’ira’a mo’a a te ta’ata iho

Tuatāpapa i te mau parau a te mau peropheta ’e te mau ’āpōsetolo o te mau mahana hope’a nei. Tai’o i te mea tā te mau peropheta ’e tā te mau ’āpōsetolo i te mau mahana hope’a nei i ha’api’i nō ni’a i te mau parau tumu tā ’outou i ’ite i roto i te mau pāpa’ira’a mo’a. E nehenehe e hi’o i te mau tumu parau o te ’āmuira’a rahi i ni’a ia conference.ChurchofJesusChrist.org ’aore rā i ni’a i te fa’anahora’a Vaira’a buka ’evanelia.