« 1–7 nō Māti. Te Parau Ha’api’ira’a ’e te mau Parau Fafau 20–22 : ‘Te tupura’a o te ’Ēkālesia a te Mesia’ », Mai, pe’e mai—nō te ta’ata hō’ē ’e te ’utuāfare : Te Parau Ha’api’ira’a ’e te mau Parau Fafau 2021 (2020)

« 1–7 nō Māti. Te Parau Ha’api’ira’a ’e te mau Parau Fafau 20–22 », Mai, pe’e mai—nō te ta’ata hō’ē ’e te ’utuāfare : 2021

Hōho’a

te fare o Peter Whitmer

Te fare o Peter Whitmer, nā Al Rounds

1–7 nō Māti

Te Parau Ha’api’ira’a ’e te mau Parau Fafau 20–22

« Te tupura’a o te ’Ēkālesia a te Mesia »

’A tai’o ai ’outou i Te Parau Ha’api’ira’a ’e te mau Parau Fafau 20–22, ’ia vai matara noa ’outou i te mau mana’o o te Vārua Maita’i e tae mai. E nehenehe e pāpa’ipa’i i te reira, ’ia noa’a ia ’outou ’ia ho’i fa’ahou mai i ni’a i te reira.

Pāpa’i i te mau mana’o e tae mai

I teienei, ’ua oti te ’ohipa ’īritira’a i te Buka a Moromona a te peropheta Iosepha Semita. Te ’ohipa nō te fa’aho’i-fa’ahou-ra’a mai, nō ha’amata noa atu ra ïa. E mea pāpū i roto i te mau heheura’a nā mua atu, ta’a ’ē noa atu te fa’aho’i-fa’ahou-ra’a mai te ha’api’ira’a tumu ’e te mana fa’atere o te autahu’ara’a, ’ua hina’aro te Fatu e fa’aho’i fa’ahou mai i te hō’ē fa’anahora’a ti’a—tāna ’Ēkālesia (hi’o Te Parau Ha’api’ira’a ’e te mau Parau Fafau 10:53 ; 18:5). Nō reira, i te 6 nō ’Ēperēra 1830, ’ua hau i te 40 feiā fa’aro’o tei fa’aō i roto i te fare rā’au nō Whitmer mā i Fayette (New York), nō te hi’o i te fa’anahora’a o te ’Ēkālesia a Iesu Mesia.

Tērā rā, tē uiui noa nei ā te mana’o o vetahi, nō te aha e tītauhia ’ia fa’anaho i te hō’ē ’Ēkālesia ? E ’itehia te pāhonora’a, te hō’ē a’e tuha’a, i roto i te mau heheura’a e tū’ati i terā rurura’a mātāmua a te ’Ēkālesia i te matahiti 1830. I’ō nei, ’ua fa’ata’ahia te mau ha’amaita’ira’a e’ita e noa’a mai te mea ’aita te ’Ēkālesia mau a Iesu Mesia e « fa’ati’a-mau-hia [’e e] fa’atumu-mau-hia » i te mau mahana hope’a nei (Te Parau Ha’api’ira’a ’e te mau Parau Fafau 20:1).

Hi’o ato’a Feiā mo’a, 1:84–86.

Hōho’a

ītona tuatāpapara’a a te ta’ata hō’ē

Mau mana’o nō te tuatāpapara’a pāpa’ira’a mo’a a te ta’ata hō’ē

Te Parau Ha’api’ira’a ’e te mau Parau Fafau 20:1–36

’Ua niuhia Te ’Ēkālesia a Iesu Mesia i te Feiā Mo’ā i te mau Mahana Hōpe’a nei i ni’a i te ha’api’ira’a tumu mau.

’Ua hōro’ahia mai te Tufa’a 20 ’ei « heheura’a nō ni’a i te fa’aterera’a ’e te hau nō te ’Ēkālesia » (upo’o tufa’a). Hou rā te hōhorara’a i te mau ture a te ’Ēkālesia, te mau tōro’a autahu’ara’a ’e te terera’a ’ohipa nō te ravera’a i te mau ’ōro’a, tē ha’amata ra teie heheura’a nā roto i te ha’api’ira’a i te ha’api’ira’a tumu niu. ’A tai’o ai ’oe i nā ’īrava mātāmua e 36 o teie heheura’a, nō te aha pa’i te reira. E nehenehe ato’a e hāmani i te hō’ē tāpura nō te mau parau mau tā ’oe e ’ite mai. Teie te tahi mau hi’ora’a :

Te Buka a Moromona ’e tō te reira ti’ara’a i roto i te fa’aho’i-fa’ahou-ra’a mai (mau ’īrava 8–12)
Te nātura o te Atua (mau ’īrava 17–19)
Te tāra’ehara a Iesu Mesia (mau ’īrava 20–27)

Nō te aha e mea faufa’a ’ia niuhia teie mau parau mau ’a ha’amauhia ai te ’Ēkālesia ?

Te Parau Ha’api’ira’a ’e te mau Parau Fafau 20:37, 75–79

E tuha’a faufa’a rahi te mau ’ōro’a mo’a nō te ’Ēkālesia tei fa’aho’i-fa’ahou-hia mai.

I te fa’anahora’ahia te ’Ēkālesia, ’ua ha’api’i te Fatu i tōna feiā mo’a nō ni’a i te mau ’ōro’a mo’a, mai te bāpetizora’a ’e te ’ōro’a mo’a. ’A tai’o ai ’oe i te mau arata’ira’a « nō ni’a i te rāve’a nō te bāpetizora’a » i roto i te ’īrava 37, ’a feruri i tō ’oe iho bāpetizora’a. ’Ua tupu ānei ’ia ’oe te mau mana’o i fa’ahitihia i roto i teie ’īrava ? Tē tupu ra ānei te reira mau mana’o i teienei ? ’A feruri hōhonu e aha tā ’oe e nehenehe e rave ’ia vai oraora noa « te hina’aro mau ’ia tāvini atu [ia Iesu Mesia] ē tae noa atu i te hope’a ra ».

’A tai’o ai ’oe i te parau nō ni’a i ’ōro’a mo’a i roto i Te Parau Ha’api’ira’a ’e te mau Parau Fafau 20:75–79, ’a tāmata i te tai’o i teie nau pure mo’a mai te huru ē e ta’ata e fa’aro’o mātāmua ra i te reira. E aha te mau hāro’aro’ara’a tā ’oe i fāri’i nō ni’a i te ’ōro’a mo’a ? nō ni’a ia ’oe iho ? E aha tā teie mau hāro’aro’ara’a i fa’atupu i te huru o tō ’oe fa’aineinera’a nō te rave i te ’ōro’a mo’a i teie hepetoma ?

Te Parau Ha’api’ira’a ’e te mau Parau Fafau 20:38–60

Tē ha’amaita’i nei te tāvinira’a autahu’ara’a i te mau melo ’e te mau ’utuāfare o te ’Ēkālesia.

Mai te mea e ani mai te tahi ta’ata e tu’u i te hō’ē i’oa i ni’a i te mau hōpoi’a a te ta’ata tei mau i te autahu’ara’a, e aha tā ’oe e parau atu ? Tai’o i Te Parau Ha’api’ira’a ’e te mau Parau Fafau 20:38–60, ’o tē tāpura nei i te mau hōpoi’a o te mau tōro’a autahu’ara’a rau. Tē vai ra ānei hō’ē mea i roto i teie mau ’īrava tei taui i te huru o tō ’oe ferurira’a nō ni’a i te mau hōpoi’a a te autahu’ara’a ’e nō ni’a i te huru te Fa’aora e rave ai i tāna ’ohipa ? Nāhea ’oe i te ha’amaita’ira’ahia nā roto i te ’ohipa i fa’a’itehia i roto i teie mau ’īrava ?

Nō te ’apo mai nō ni’a e nāhea te mau vahine i te fa’a’ohipa i te mana fa’atere o te autahu’ara’a i roto i te ’ohipa a te ’Ēkālesia, hi’o Dallin H. Oaks, « Te mau tāviri ʼe te mana fa’atere o te Autahuʼaraʼa » », Ensign ’aore rā Liahona, Mē 2014, 49–52.

Te Parau Ha’api’ira’a ’e te mau Parau Fafau 21

Tē arata’ihia nei te ’Ēkālesia a Iesu Mesia e te hō’ē peropheta ora.

E aha te ha’api’ira’a tā ’oe i ’apo mai i roto i Te Parau Ha’api’ira’a ’e te mau Parau Fafau 21:4–9 nō ni’a i te mau parau a te mau peropheta a te Fatu ? ’A feruri i te mau parau fafau tei fa’ahitihia i roto i te ’īrava 6 nō te feiā e fāri’i nei i te mau parau a te Fatu nā roto mai i tāna peropheta. E aha te aura’a o teie mau parau fafau nō ’oe ?

Nāhea ’oe i te fāri’i i te mau parau a te peropheta ora « mai te mea ra ē nō roto mai i [te vaha iho o te Atua] » ? (’īrava 5). E aha te parau a’o i hōro’ahia mai e te peropheta nō teie mahana ’o tē nehenehe e arata’i i te mau ha’amaita’ira’a i fafauhia mai i roto i te ’īrava 6 ?

Hōho’a

ītona tuatāpapara’a a te ’utuāfare

Mau mana’o nō te tuatāpapara’a pāpa’ira’a mo’a a te ’utuāfare ’e te pō ’utuāfare

Te Parau Ha’api’ira’a ’e te mau Parau Fafau 20.E aha tā tātou e pāhono atu mai te mea e ui mai te tahi ta’ata nō te aha e tītauhia te ’Ēkālesia ? E aha te mau pāhonora’a e vai ra i roto i Te Parau Ha’api’ira’a ’e te mau Parau Fafau 20 ? Hi’o ato’a D. Todd Christofferson, « Nō te aha te ’Ēkālesia », Ensign ’aore rā Liahona, Nov. 2015, 108–11.

Te Parau Ha’api’ira’a ’e te mau Parau Fafau 20:69.E aha te aura’a nō te parau « [e haere] mai te haere’a mo’a i mua i te Fatu » ? E au paha te mau melo o te ’utuāfare ’ia pāpa’i hōho’a ’aore rā e pāpa’i i ni’a i te tahi pāpie te tahi mau mea e nehenehe e tauturu ia rātou ’ia haere mai te haere’a mo’a ’aore rā te mau mea e nehenehe e fa’anevaneva ia rātou ’ia nā reira. ’Ei reira e hāmani rātou i te hō’ē ’ē’a ma te fa’a’ohipa i te mau pāpie ’e ’ia tāmata e haere nā ni’a i te ’ē’a, ma te ta’ahi noa i ni’a i te mau pāpie ’o tē fa’atae ia rātou i te Mesia ra.

Te Parau Ha’api’ira’a ’e te mau Parau Fafau 20:37, 71–74.Mai te mea e ta’ata tō roto i tō ’outou ’utuāfare ’aita ā i bāpetizohia, e nehenehe teie mau ’īrava e fa’atupu i te hō’ē ’āparaura’a nō ni’a e nāhea e fa’aineine nō te bāpetizora’a (hi’o ’īrava 37) ’e nāhea e rave i te bāpetizora’a (hi’o mau ’īrava 71–74). E nehenehe te mau melo o te ’utuāfare e fa’a’ite’ite i te tahi mau hōho’a ’aore rā mau ha’amana’ora’a nō ni’a i tō rātou bāpetizora’a.

Te Parau Ha’api’ira’a ’e te mau Parau Fafau 20:75–79.Nāhea e nehenehe ai tō ’outou ’utuāfare e fa’a’ohipa i teie mau ’īrava nō te fa’aineine nō te ’ōro’a mo’a, ’ia riro te reira ’ei ’ohipa ta’a ’ē mau ’e te tura rahi ? E tu’u mai paha teie mau ’īrava i te tahi mau mea e nehenehe e feruri i te taime nō te ’ōro’a mo’a, ’e e nehenehe te mau melo o te ’utuāfare e ’imi mai ’aore rā e pāpa’i i te mau hōho’a nō teie mau mea. Mai te mea e tano, e nehenehe e ’āfa’i i te reira mau hōho’a i te purera’a ’ōro’a ’ei ha’amana’ora’a e aha tē feruri i te taime nō te ’ōro’a mo’a.

Te Parau Ha’api’ira’a ’e te mau Parau Fafau 21:4–7.E nehenehe e ani i te mau melo o te ’utuāfare ’ia hi’o mai i te mau ta’o ’e te mau pereota i roto i te mau ’īrava 4–5 ’o tē ha’api’i nei ia tātou nō ni’a i te pe’era’a i te peropheta a te Fatu. E aha te aura’a e fāri’i i te parau a te peropheta ma te fa’a’oroma’i ? te fa’aro’o ? E aha te taime ’a fāri’i ai tātou i te mau ha’amaita’ira’a i fafauhia mai i roto i te ’īrava 6 ?

Nō te tahi atu mau mana’o nō te ha’api’ira’a i te mau tamari’i, hi’o te arata’i o teie hepetoma i roto Mai, pe’e mai—nō te Paraimere.

Hīmene tei mana’ohia : « L’Eglise de Jésus-Christ », Chants pour les enfants, 48

Ha’amaita’i i tā tātou ha’api’ira’a

Pe’e i te huru orara’a o te Fa’aora. « Te mana… o te Fa’aora nō te ha’api’i ’e nō te fa’aitoito ia vetahi ’ē, nō roto mai ïa i te huru o tōna orara’a ’e tōna huru ’ei ta’ata. Rahi noa atu ’outou i te tūtavara’a ’ia ora mai ia Iesu Mesia te huru, rahi noa ato’a atu te roa’ara’a ia ’outou ’ia ha’api’i mai iāna ra te huru » (Ha’api’ira’a mai tā te Fa’aora,13).