E tu’u te mau turi ato’a i raro, nā J. Kirk Richards

22–28 nō Māti

Te Parau Ha’api’ira’a ’e te mau Parau Fafau 29

E ha’aputuputu mai Iesu Mesia i tōna ra mau ta’ata

Hō’ē fā nō te tuatāpara’a pāpa’ira’a mo’a, ’o te ha’api’ira’a ïa nō ni’a i te ha’api’ira’a tumu, ’aore rā nō ni’a i te mau parau mau o te ’evanelia tei tītau-roa-hia nō tō tātou fa’aorara’a. ’A tuatāpapa ai ’outou i Te Parau Ha’api’ira’a ’e te mau Parau Fafau 29 i teie hepetoma, ’a hi’o i te mau ha’api’ira’a tumu tā ’outou e tāpe’a mai.

Pāpa’i i te mau mana’o e tae mai

Noa atu ā ’ua fa’anahohia Te ’Ēkālesia a Iesu Mesia i te matahiti 1830, e mea rahi ā te mau parau mau o te ’evanelia ’aita i heheuhia mai, ’e e mau uira’a tā te mau melo o te ’Ēkālesia e rave rahi. ’Ua tai’o rātou i te mau parau tohu i roto i te Buka a Moromona nō ni’a i te ha’aputuputura’a o ’Īserā’ela ’e te patura’a ia Ziona (hi’o 3 Nephi 21). Nāhea pa’i te reira e tupu ai ? Te mau heheura’a tā Hiram Page i parau ’ua fāri’i ’oia, nō ni’a mau ïa i terā tumu parau, ’ua fa’arahi roa atu ïa te reira i te ānoenoe o te mau melo (hi’o Te Parau Ha’api’ira’a ’e te mau Parau Fafau 28). ’Ua uiui te mana’o o te tahi atu mau ta’ata nō ni’a i te Hi’ara’a ’o Adamu ’e ’o Eva, nā reira ato’a te pohe pae vārua. ’Ua māuruuru te Fatu nō taua mau uira’a ra i te matahiti 1830 ma te parau i te feiā mo’a ē : « ’O tā ’outou e ani mai nā roto i te fa’aro’o, ’a tāhō’ē ai i te mana’o ’ia pure ra mai te au i tā’u ra fa’auera’a, e noa’a ïa te reira ia ’outou » (Te Parau Ha’api’ira’a ’e te mau Parau Fafau 29:6). ’E tē māuruuru nei ’oia i tā tātou mau uira’a i teie nei tau ; tē tīa’i noa nei ’oia ia tātou ’ia ani mai iāna nā roto i te pure. ’Oia mau, mai tei fa’a’itehia i roto i te heheura’a ha’api’ira’a tumu rahi nō Te Parau Ha’api’ira’a ’e te mau Parau Fafau 29, i te tahi taime, e pāhono mai ’oia ma te hōro’a mai i te tahi atu parau mau ’e te tahi atu ’ite tei hau atu i te mau uira’a i uihia i te ha’amatara’a.

Mau mana’o nō te tuatāpapara’a pāpa’ira’a mo’a a te ta’ata hō’ē

Te Parau Ha’api’ira’a ’e te mau Parau Fafau 29

’Ua fa’aineine te Metua i te Ao ra i te fa’anahora’a maita’i roa a’e nō tō tātou fa’ateiteira’a.

Tē ha’api’i nei Te Parau Ha’api’ira’a ’e te mau Parau Fafau 29 i te mau parau mau e rave rahi nō ni’a i te fa’anahora’a a te Atua nō tāna mau tamari’i. ’A tai’o noa ai ’oe, ’a hi’o mai i te mau parau mau tā ’oe i ’apo mai nō ni’a i te mau tuha’a tāta’itahi i muri nei nō te fa’anahora’a.

• Te orara’a hou te tāhuti nei (hi’o mau ’īrava 36–37)

• Te poietera’a (hi’o mau ’īrava 31–33)

• Te hi’ara’a ’o Adamu ’e ’o Eva (hi’o mau ’īrava 40–41)

• Te orara’a tāhuti nei (hi’o mau ’īrava 39, 42–45)

• Te tāra’ehara a Iesu Mesia (hi’o mau ’īrava 1, 42–43, 46–50)

• Te ti’afa’ahoura’a (hi’o mau ’īrava 13, 26)

• Te ha’avāra’a hope’a (hi’o mau ’īrava 12–13, 27–30)

E aha te tahi atu mau mea ’āpī tā ’oe i ’apo mai ? E aha te ta’a-’ē-ra’a i roto i tō ’oe orara’a āhani ’aita te reira mau parau mau ?

E nehenehe ’oe e tuatāpapa nō ni’a i te fa’anahora’a a te Metua i te Ao ra i roto i « Te ’ōpuara’a nō te ora » (’Ia Poro Haere i Ta’u Nei ’Evanelia : Hō’ē arata’i nō te ’ohipa misiōnare, ChurchofJesusChrist.org/manual/missionary).

Te Parau Ha’api’ira’a ’e te mau Parau Fafau 29:1–8

E ha’aputuputu Iesu Mesia i tōna mau ta’ata nā mua a’e i tōna tae-piti-ra’a mai.

Tē fa’ahiti nei Iesu Mesia nō ni’a i te ha’aputuputura’a o tōna mau ta’ata « mai te moa ufa e ha’aputuputu i tāna ra mau fanau’a i raro a’e i tōna pererau » (Te Parau Ha’api’ira’a ’e te mau Parau Fafau 29:2). E aha te ha’api’ira’a i roto i terā fa’ahōho’ara’a nō ni’a i te hina’aro o te Fa’aora e ha’aputuputu ia ’oe ? ’A tai’o ai ’oe i Te Parau Ha’api’ira’a ’e te mau Parau Fafau 29:1–8, ’a hi’o i te mau parau nō ni’a i te tumu tātou e ha’aputuputu ai, ’o vai tē ha’aputuputu ’e nāhea tātou e nehenehe ai e tauturu i te ha’aputuputura’a o te « feiā i mā’itihia » (’īrava 7).

I tō tātou nei ’anotau, te aura’a nō te ha’aputuputura’a i Ziona, ’o te ha’aputuputura’a ïa i roto i te mau titi nō Ziona ’ati a’e i te ao nei. Nāhea te ha’aputuputura’a tātou ’ei feiā mo’a i te tauturu ia tātou « ’ia vai fa’aineinehia i roto i te mau mea ato’a ra » nō te mau ’ati e tae mai nā mua a’e i te tae-piti-ra’a mai o te Fa’aora ? (’īrava 8 ; hi’o ato’a mau ’īrava 14–28).

Hi’o ato’a Hīro’a fa’aro’o 1:10 ; Russell M. Nelson ’e Wendy W. Nelson, « Ti’aturira’a nō Ziona » (purera’a nā te feiā ’āpī ’ati a’e i te ao nei, 3 nō Tiunu 2018, ChurchofJesusChrist.org).

E fea rahira’a taime, nā Liz Lemon Swindle

Te Parau Ha’api’ira’a ’e te mau Parau Fafau 29:31–35

« Nō te pae vārua te mau mea ato’a iā’u nei. »

Nō te aha e nehenehe e parau ē e mau fa’auera’a pae vārua ana’e ? Te ’itera’a ē e mau fa’auera’a pae vārua ana’e, e aha tā te reira e ha’api’i nei nō ni’a i te fā o te mau fa’auera’a ? E nehenehe e tāpura i te tahi ri’i mau fa’auera’a ma te feruri i te mau parau tumu pae vārua e tū’ati ia rātou tāta’itahi.

E aha tē nehenehe e taui mai te mea e hi’o ’oe i te aura’a pae vārua ’aore rā te fā pae vārua i roto i tā ’oe mau ’ohipa nō te mau mahana ato’a, noa atu ā pa’i ’ia hi’ohia e ’ohipa pae tino ’aore rā e ’ohipa faufa’a ’ore ?

Hi’o ato’a Roma 8:6 ; 1 Nephi 15:30–32.

Te Parau Ha’api’ira’a ’e te mau Parau Fafau 29:36–50

Tē fa’aora nei Iesu Mesia ia tātou i te Hi’ara’a.

Tē ha’amata nei teie heheura’a nā roto i te paraura’a te Fatu iāna iho ’ei Fa’aora nō tātou tei « ha’amatara i tā [tātou] mau hara » (’īrava 1). I muri iho tē fa’ata’a nei te heheura’a i te tahi mau tumu e tītauhia te hō’ē Fa’aora. E feruri nāhea ’oe i te fa’a’ohipa i te mau ’īrava 36–50 nō te fa’ata’a i te tumu e tītauhia te tāra’ehara nā roto i te Fa’aora Iesu Mesia. I roto i te mau ha’apa’ora’a fa’aro’o e rave rahi, tē hi’ohia nei te Hi’ara’a ’ei ’ohipa ’oto rahi ; e aha tā ’oe e ’ite ra i roto i teie mau ’īrava ’o tē ha’api’i nei i te pae maita’i o te Hi’ara’a ? (Hi’o ato’a 1 Korinetia 15:22 ; 2 Nephi 2:6–8, 15–29 ; Mosia 3:1–19 ; Mose 5:9–12.)

Mau mana’o nō te tuatāpapara’a pāpa’ira’a mo’a a te ’utuāfare ’e te pō ’utuāfare

Te Parau Ha’api’ira’a ’e te mau Parau Fafau 29.E nehenehe e fa’a’ohipa i te mau hōho’a i te hope’a o teie arata’i, nā reira ato’a Te Parau Ha’api’ira’a ’e te mau Parau Fafau 29 nō te ha’api’i i tō ’outou ’utuāfare nō ni’a i te fa’anahora’a nō te fa’aorara’a. ’Ei hi’ora’a, e nehenehe te mau melo o te ’utuāfare e ha’api’i nō ni’a i te mau tuha’a ta’a ’ē o te fa’anahora’a nā roto i te tai’ora’a ’e te ’āparaura’a i te mau ’īrava i hōro’ahia mai. Pāpa’i i te mau mea tā ’outou i ’apo mai. Nō te aha tātou e māuruuru ai ’ia ’ite nō ni’a i te fa’anahora’a nō te fa’aorara’a ? Nāhea te ’itera’a nō ni’a i te reira i te fa’auru i tō tātou orara’a tāmāhana ?

Te Parau Ha’api’ira’a ’e te mau Parau Fafau 29:2, 7–8.E aha te aura’a ’ia ha’aputuputuhia tātou e te Fa’aora ? Nāhea e nehenehe ai ia tātou ’ia tauturu iāna ’ia ha’aputuputu i te feiā mā’itihia ?

Te Parau Ha’api’ira’a ’e te mau Parau Fafau 29:3–5.E aha te ha’api’ira’a tā tātou e ’apo mai nō ni’a i te Fa’aora i roto i teie mau ’īrava ’o tē tauturu ia tātou ’ia « ha’amā’e i tō [tātou] mau ’ā’au i ni’a ’e ’ia ’oa’oa » ? (’īrava 5).

Te Parau Ha’api’ira’a ’e te mau Parau Fafau 29:34–35.E nehenehe te tai’ora’a i teie mau ’īrava e fa’afāna’o i tō ’outou ’utuāfare i te rāve’a nō te paraparau nō ni’a i te mau tumu pae vārua i muri mai i te tahi o te mau fa’auera’a ’aore rā te mau parau a’o a te peropheta o tā ’outou e tāmata nei i te pe’e. ’Ei hi’ora’a, nō te aha te Fatu e hina’aro ai ia tātou ’ia tai’o i te mau pāpa’ira’a mo’a ’ei ’utuāfare ? E aha te mau maita’i pae vārua tā tātou i ’ite nō te ha’apa’ora’a i te mau fa’auera’a ?

Nō te tahi atu mau mana’o nō te ha’api’ira’a i te mau tamari’i, hi’o te arata’i o teie hepetoma i roto Mai, pe’e mai—nō te Paraimere.

Hīmene tei mana’ohia : « Pi’i mai ra te Atua », Te mau himene, n°8.

Ha’amaita’ira’a i tā tātou ha’api’ira’a

’Imi ia Iesu Mesia. Tē ha’api’i nei te mau pāpa’ira’a mo’a ē, tē fa’a’ite pāpū nei te mau hāmanira’a ato’a a te Atua nō Iesu Mesia (hi’o Mose 6:62–63), nō reira ’a ’imi iāna ’a tai’o ai i te mau pāpa’ira’a mo’a. E nehenehe e pāpa’ipa’i ’aore rā e tāpa’opa’o i te mau ’īrava e ha’api’i nei nō ni’a iāna.