Te fare o Peter Whitmer, nā Al Rounds

1–7 nō Māti

Te Parau Ha’api’ira’a ’e te mau Parau Fafau 20–22

« Te tupuraʼa o te ’Ēkālesia a te Mesia »

’Ia tuatapapa ’outou i Te Parau Ha’api’ira’a ’e te mau Parau Fafau 20–22 i teie hepetoma, e tae mai te mau mana’o nō te ha’api’ira’a i roto i tō ’outou ferurira’a. E ’ite hau mai ’outou te mau mana’o nō te ha’api’ira’a i roto i teie arata’i.

Pāpa’i i te mau mana’o e tae mai

Tītau i te mana’o

Fa’a’ite i te hōho’a i roto i te arata’i nō teie hepetoma i roto i te Mai, peʼe mai—nō te ta’ata hō’ē ’e te ’utuāfare,’e e ani i te mau tamari’i ’ia fa’a’ite mai e aha tā rātou i ’ite nō ni’a i te fa’anahora’ahia te ’Ēkālesia. Nō te tauturu, e hi’o « Pene 9 : Te fa’anahora’ahia te ’Ēkalesia a Iesu Mesia » (Te mau ’ā’amu nō Te Parau Ha’api’ira’a ’e te mau Parau Fafau, 40–42).

Ha’api’i i te ha’api’ira’a tumu : Te mau tamari’i ’āpī

Te Parau Ha’api’ira’a ’e te mau Parau Fafau 20–21

’Ua fa’aho’i-fa’ahou-hia mai te ’Ēkalesia a Iesu Mesia.

I te 6 nō ’Ēperēra 1830, ’ua ha’aputuputu o Iosepha Semita rāua o Oliver Cowdery e te tahi atu mau ta’ata nō te fa’anaho i te ’Ēkālesia a Iesu Mesia i fa’aho’i-fa’ahou-hia mai. Nāhea e ti’a ai ia ’outou ’ia tauturu i te mau tamari’i tā ’outou e ha’api’i ra ’ia māramarama i te faufa’a rahi o teie ’ohipa ?

Te mau ’ohipa e nehenehe e rave

• E fa’a’ohipa i te upo’o parau o te tuha’a nō Te Parau Ha’api’ira’a ’e te mau Parau Fafau 21 ’aore rā, te pene 9 nō Te mau ’ā’amu nō Te Parau Ha’api’ira’a ’e Te mau Parau Fafau nō te parau poto noa i te mau tamari’i i te ’ohipa tei tupu i te mahana ’a fa’anahohia ai te ’Ēkālesia. Nō te tauturu ia rātou ’ia māramarama i teie ’ohipa i tupu, e fa’a’ite i te video « Te fa’anahora’ahia te ’Ēkālesia » (ChurchofJesusChrist.org).

• E parau i te mau tamari’i nō te aha ’outou i māuruuru ai ē tē vai ra Te ’Ēkālesia a Iesu Mesia i te Feiā Mo’a i te mau Mahana Hope’a nei. E fa’ata’a ē, te rirora’a ’ei melo nō te ’Ēkālesia, tē fa’aineine ra ïa ia tātou nō te ora fa’ahou i pīha’i iho i te Atua. E tauturu ia rātou ’ia fa’ahiti fa’ahou e rave rahi taime ’aore rā, e hīmene i te pereota ra « Tei roto vau i te ’Ēkālesia a Iesu Mesia i te Feiā Mo’a i te mau Mahana Hope’a nei » « L’Eglise de Jésus-Christ » (Chants pour les enfants, 77).

Te Parau Ha’api’ira’a ’e te mau Parau Fafau 20:37, 71–74

Tē fa’aineine nei au ’ia bāpetizohia.

Tē fa’aineine nei te mau tamari’i tā ’outou e ha’api’i nei ’ia bāpetizohia. Tauturu ia rātou ’ia māramarama e aha te aura’a te parau ’ia bāpetizohia ’e e aha tā rātou e nehenehe e rave ’ia vai ineine noa.

Te mau ’ohipa e nehenehe e rave

• Fa’a’ite i te hō’ē hōho’a o te hō’ē tamari’i e bāpetizohia ra (hi’o i te Buka hōho’a o te ’evanelia, no.104,) ’e e ani i te mau tamari’i ’ia fa’a’ite mai i te mau mea tā rātou i ’ite. Tai’o ’aore rā, e ha’apoto i Te Parau Ha’api’ira’a ’e te mau Parau Fafau 20:71–74, ’e e tauturu i te mau tamari’i ’ia ’ite nāhea te hōho’a e tū’ati ai i te mau arata’ira’a i roto i teie mau ’īrava. E fa’a’ite pāpū ē, e ti’a ia tātou ’ia pe’e i te hi’ora’a o te Fa’aora ’e ’ia bāpetizohia mai tāna i fa’aue mai.

• Ha’apoto i Te Parau Ha’api’ira’a ’e te mau Parau Fafau 20:37. E aha tā tātou e ’apo mai nā roto mai i teie ’īrava nō ni’a i te mau ta’ata e hina’aro nei ’ia bāpetizohia ? Fa’a’ite i te mau hōho’a nō te mau rāve’a e nehenehe ai te mau tamari’i e fa’aineine nō te bāpetizora’a, mai te tāvinira’a ia vetahi ’ē ’e te purera’a.

• Hīmene i te hō’ē hīmene nō ni’a i te bāpetizora’a, mai te « Le jour de mon baptême  » (Chants pour les enfants, 53), ’aore rā, e māta’ita’i i te « Te bāpetizora’a o Iesu » (biblevideos.ChurchofJesusChrist.org). E ani i te mau tamari’i ’ia fa’a’ite mai i tō rātou mau mana’o nō ni’a ’ia bāpetizohia rātou.

Te Parau Ha’api’ira’a ’e te mau Parau Fafau 20:75–79

E tauturu te ’ōro’a mo’a iā’u ’ia ha’amana’o ia Iesu Mesia.

Nāhea e ti’a ai ia ’outou ’ia tauturu i te mau tamari’i ’ia māramarama maita’i e nō te aha tātou e rave ai i te ’ōro’a mo’a i te hepetoma tāta’itahi ?

Te mau ’ohipa e nehenehe e rave

• Tai’o i Te Parau Ha’api’ira’a ’e te mau Parau Fafau 20:77 i te mau tamari’i. E ani ia rātou ’ia ti’a i ni’a ’ia fa’aro’o ana’e rātou e aha te ti’a ia tātou ’ia ha’amana’o ’ia ’amu ana’e tātou i te faraoa o te ’ōro’a mo’a. E nā reira ato’a nō te ’īrava 79.. (E hina’aro paha ’outou e ha’apāpū ē, e inu tātou i te pape, ’eiaha rā te uaina.) Nāhea e ti’a ai ia tātou ’ia fa’a’ite ē, tē ha’amana’o nei tātou ia Iesu ?

• E fa’ati’a i te mau tamari’i nō ni’a i te hō’ē taime ’a rave ai ’outou i te hō’ē fafaura’a ’e ’a ha’apa’o ai i te reira. E ani ia rātou ’ia fa’ati’a mai i tō rātou iho mau ’ā’amu mai te reira te huru. E fa’ata’a ē, ’ia rave ana’e tātou i te ’ōro’a mo’a, e rave tātou i te mau fafaura’a. Tai’o i Te Parau Ha’api’ira’a ’e te mau Parau Fafau 20:77, ma te ha’apāpū i te mau fafaura’a tā tātou e rave « ’ia ha’amana’o tāmau noa iāna » ’e « ’ia ha’apa’o i tāna mau fa’auera’a ». E ani i te mau tamari’i ’ia fa’a’ite mai i te hō’ē taime ’a ha’amana’o ai rātou i te Fa’aora ’aore rā, ’a ha’apa’o ai rātou i te hō’ē fa’auera’a.

  

  E fa’aha’amana’o te ’ōro’a mo’a iā’u ’ia feruri ia Iesu Mesia.

Ha’api’i i te ha’api’ira’a tumu : Te mau tamari’i pa’ari

Te Parau Ha’api’ira’a ’e te mau Parau Fafau 20–21

’Ua fa’ati’a-fa’ahou-hia te ’Ēkālesia a Iesu Mesia

Nō te ha’apa’ora’a i te fa’auera’a a te Fatu, ’ua fa’anaho Iosepha Semita, Oliver Cowdery, ’e te tahi atu mau ta’ata i te ’Ēkālesia a Iesu Mesia i fa’aho’i-fa’ahou-hia mai i te 6 nō ’Ēperēra 1830. ’A feruri i te mau rāve’a nō te tauturu i te mau tamari’i ’ia ’ite e mea nāhea teie ’ohipa i tupu i te ha’amaita’ira’a i tō rātou orara’a.

Te mau ’ohipa e nehenehe e rave

• E fa’aha’amana’o i te mau tamari’i i te tahi o te mau ’ohipa faufa’a roa i tupu ’o tā rātou i ha’api’i mai—mai te fa’aho’i-fa’ahou-ra’a-hia mai te autahu’ara’a ’e te ’īritira’ahia te Buka a Moromona. Nō te aha i tītauhia ai ’ia tupu teie mau ’ohipa hou te ’Ēkālesia e fa’anahohia ai ?

• Fa’a’ite i te mau hōho’a o te mau ’ohipa tā tātou e rave nei i roto i te ’Ēkālesia ’o tei fa’ata’ahia i roto i te tuha’a 20, mai tē ha’api’ira’a mai nō ni’a i te Atua ’e ia Iesu Mesia, te aupurura’a, te bāpetizora’a, ’e te ravera’a i te ’ōro’a mo’a. Tauturu i te mau tamari’i ’ia fa’atū’ati i teie mau hōho’a i te mau pāpa’ira’a moa ’o tē fa’ata’a ra i te reira, mai Te Parau Ha’api’ira’a ’e te mau Parau Fafau 20:17–21, 47, 70, 72–74, 75–79, ’e te upo’o parau nō te tuha’a 21. E aha tō tātou mau ha’amaita’ira’a nō tō tātou rirora’a ’ei melo nō te ’Ēkālesia ?

• Hīmene ’āmui « L’Eglise de Jésus-Christ » (Chants pour les enfants, 48).

Te Parau Ha’api’ira’a ’e te mau Parau Fafau 20:37, 77, 79

I tō’u bāpetizora’ahia, ’ua fafau vau e pe’e ia Iesu Mesia.

E rave rahi mau tamari’i i roto i tā ’outou piha ha’api’ira’a tei bāpetizohia. E fa’aha’amana’o ia rātou i te fafaura’a tā rātou i rave « ’ia rave i ni’a iho ia rātou i te i’oa o Iesu Mesia » (Te Parau Ha’api’ira’a ’e te mau Parau Fafau 20:37).

Te mau ’ohipa e nehenehe e rave

• E ani i te tahi mau tamari’i ’ia haere ineine mai nō tē fa’a’ite mai i te mea tā rātou i fāri’i ’aore rā, i tō rātou ’itera’a i te taime ’a bāpetizohia ai rātou. E nehenehe paha rātou e ’āfa’i mai i te hō’ē hōho’a nō te mahana o tō rātou bāpetizora’a nō te fa’a’ite i te piha ha’api’ira’a. Nō te aha rātou i mā’iti ai e bāpetizo ia rātou ? Nāhea tō rātou bāpetizora’ahia ’e te fāri’ira’a i te Vārua Maita’i i te ha’amaita’ira’a ia rātou ?

• E tai’o ’āmui i Te Parau Ha’api’ira’a ’e te mau Parau Fafau 20:77, ’e e ani i te mau tamari’i ’ia fa’a’ite mai i te mau fafaura’a tā tātou e rave i roto i te ’ōro’a mo’a. Nō te tauturu i te mau tamari’i ’ia māramarama ē, tē vai ra te mau mea e nehenehe rātou e rave i te mau mahana ato’a nō te « ha’amana’o tāmau noa » ia Iesu Mesia, e ani i te hō’ē tamari’i ’ia ha’uti mai i te hō’ē mea tāna e nehenehe e rave nō te ha’amana’o i te Fa’aora. E ani i te tahi atu pae ’ia ’imi e aha te reira ’ohipa. Mai te au i te ’īrava 77, nāhea tātou i te ha’amaita’ihia ’ia ha’amana’o tāmau noa ana’e tātou i te Fa’aora ?

• Tauturu i te mau tamari’i ’ia fa’atū’ati i Te Parau Ha’api’ira’a ’e te mau Parau Fafau 20:37 i te ’īrava 77 nō te ’ite mai i te hō’ē pereota tei fa’ahitihia e piti taime. Fa’a’ite i te mau tamari’i i te hō’ē mea e i’oa tō ni’a iho (mai te hō’ē i’oa tāpa’o ’aore rā, te hō’ē i’oa ta’ata). E aha tā te i’oa e parau mai nei ia tātou nō ni’a i te tao’a ? Tai’o ’āmui i Te Parau Ha’api’ira’a ’e te mau Parau Fafau 20:37 nō te ’ite mai, tō vai te i’oa tā tātou e rave i ni’a iho ia tātou ’ia bāpetizohia tātou. E aha te aura’a ’ia rave i te i’oa o Iesu Mesia i ni’a iho ia tātou ? Nāhea tātou i te feruri ’e i te ha’a nō te mea tei ia tātou nei teie i’oa ?

Te Parau Ha’api’ira’a ’e te mau Parau Fafau 21:4–6

E ha’amaita’ihia vau ’ia pe’e ana’e au i te peropheta.

Nāhea ’outou i te tauturu i te mau tamari’i ’ia fāri’i i te mau ha’amaita’ira’a i fafauhia i roto i teie mau ’īrava nō te feiā e pe’e i te peropheta ?

Te mau ’ohipa e nehenehe e rave

• E pāpa’i i ni’a i te tāpura ’ere’ere Te mau fa’auera’a ’e Te mau ha’amaita’ira’a. E ani i te mau tamari’i ’ia tai’o i Te Parau Ha’api’ira’a ’e te mau Parau Fafau 21:4–6, ma te ’imi i te mau fa’auera’a tā te Fatu i hōro’a mai ’e te mau ha’amaita’ira’a tāna i fafau mai. E ani ia rātou ’ia pāpa’i i ni’a i te tāpura ’ere’ere i te mau mea tā rātou i ’ite mai.

• E fa’a’ite i te hō’ē hōho’a o te peropheta i teie mahana, ’e e ani i te mau tamari’i ’ia fa’a’ite mai i te hō’ē mea tā rātou i ’apo mai ’aore rā, i fa’aro’o nā roto mai iāna ’aita i maoro a’e nei. E tai’o ’āmui i Te Parau Ha’api’ira’a ’e te mau Parau Fafau 21:5. E ani i te mau tamari’i ’ia pāpa’i ’aore rā, e pāpa’i hōho’a i te hō’ē mea e nehenehe tā rātou e rave nō te pe’e i te peropheta. ’A fa’a’ite i tō ’outou ’itera’a pāpū ē, ’ia pe’e ana’e tātou i te peropheta, tē pe’e ra ïa tātou i te Fa’aora.

Fa’aitoito i te ha’api’ira’a mai i te fare

E ani i te mau tamari’i ’ia hāmani i te hō’ē tāpura nō te mau tumu tā rātou e māuruuru nei nō te ’Ēkālesia a Iesu Mesia tei fa’aho’i-fa’ahou-hia mai. E fa’aitoito ia rātou ’ia fa’a’ite i tā rātou tāpura i te hō’ē melo o te ’utuāfare ’aore rā, i te hō’ē hoa.

Ha’amaita’ira’a i tā tātou ha’api’ira’a

Fa’a’ohipa i te mau ’ā’amu nō te ha’api’i i te parau ha’api’ira’a. « E tauturu te mau ’ā’amu i te mau tamari’i ’ia hi’o e nāhea te ’evanelia i te ’ohipara’a i roto i te orara’a i te mau mahana ato’a. ’Ia ha’api’i ana’e ’outou i te mau tamari’i ’āpī, ’a fa’anaho i te mau rāve’a nō te fa’aō mai ia rātou i roto i te ’ā’amu ; ’ei hi’ora’a, e nehenehe rātou e tāpe’a i te mau hōho’a, e fa’ahiti fa’ahou i te mau pereota, ’aore rā, e ha’uti i te tahi mau tuha’a » ( Ha’api’ira’a mai tā te Fa’aora, 25).