Te fare fa’a’apu a Martin Harris

Te fare fa’a’apu a Martin Harris, nā Al Rounds

22–28 nō Fepuare

Te Parau Ha’api’ira’a ʼe te mau Parau Fafau 18–19

« E faufa’a rahi tō te mau vārua ta’ata »

Ani i te Metua i te Ao ra ’ia tauturu mai ia ’outou ’ia ’ite mai i te mau parau tumu i roto i Te Parau Ha’api’ira’a ’e te mau Parau Fafau 18–19, ’o tē riro ’ei mea faufa’a nō te mau tamari’i.

Pāpa’i i te mau mana’o e tae mai

ītona fa’a’itera’a

Tītau i te mana’o

E tai’o i Te Parau Ha’api’ira’a ’e te mau Parau Fafau 18:2, ’e ’a fa’ata’a ē, ’ua tauturu te Vārua ia Oliver Cowdery ’ia ’ite ē, e parau mau te mau pāpa’ira’a mo’a. E parau i te mau tamari’i nō ni’a i te hō’ē ’itera’a ’a fa’a’ite pāpū ai te Vārua ia ’outou ē, e parau mau te mau pāpa’ira’a mo’a. Vaiiho ia rātou ’ia fa’a’ite mai i te mau ’itera’a ’a ’ite ai rātou ē, e parau mau te mau pāpa’ira’a mo’a.

ītona ha’api’ira’a

Ha’api’i i te ha’api’ira’a tumu : Te mau tamari’i ’āpī

Te Parau Ha’api’ira’a ’e te mau Parau Fafau 18:10–12

E faufa’a rahi tō tātou tāta’itahi i te Atua.

’Ia ’ite ana’e te mau tamari’i ē, tē here nei te Metua i te ao ra ia rātou—’e i tāna mau tamari’i pā’āto’a—e hau atu tō tātou ti’aturi ’e te hāmani maita’i ia vetahi ’ē.

Te mau ’ohipa e nehenehe e rave

• Tauturu i te mau tamari’i ’ia fa’ahiti nā muri iho ia ’outou i Te Parau Ha’api’ira’a ’e te mau Parau Fafau 18:10 e rave rahi taime. ’A fa’ata’a ē, « te mau vārua » e parau ïa nō te mau tamari’i tā’āto’a a te Atua. E fa’ahiti fa’ahou i te ’īrava 10 ’e te mau tamari’i, i teie taime, e mono i parau « te mau vārua » i te i’oa o te mau tamari’i. (Hi’o ato’a i te ’api ’ohipara’a nō teie hepetoma).

• Tauturu i te mau tamari’i ’ia feruri i te mau mea tā te ta’ata e fa’ariro nei ’ei mea faufa’a rahi. I muri iho, ’a vaiiho i te mau tamari’i, te tahi i muri iho i te tahi, ’ia hi’o i roto i te hō’ē hi’o, ’e ’ia nā reira rātou, ’a parau i te tamari’i tāta’itahi ē, e tamari’i ’oia nā te Atua ’e te faufa’a rahi. ’A fa’a’ite pāpū ē, nō te Metua i te ao ra, e mea faufa’a rahi a’e rātou i te mau mea ato’a tā rātou i feruri nā mua atu.

Te Parau Ha’api’ira’a ’e te mau Parau Fafau 18:13–16.

E hōro’a mai te fa’a’itera’a i te ’evanelia i te ’oa’oa rahi.

Nāhea ’outou i te fa’auru i te mau tamari’i ’ia ani ia vetahi ’ē ’ia haere mai i te Mesia ra ’e ’ia ’ite i te ’oa’oa rahi ?

Te mau ’ohipa e nehenehe e rave

• E parau i te mau tamari’i nō ni’a i te hō’ē mea tei hōro’a mai ia ’outou i te ’oa’oa. Vaiiho i te tamari’i tāta’itahi ’ia parau mai nō ni’a i te hō’ē mea ’o tē hōro’a mai iāna i te ’oa’oa. E tai’o i Te Parau Ha’api’ira’a ’e te mau Parau Fafau 18:13, 16. E aha te mea e hōro’a mai i te ’oa’oa i te Fatu ? E aha tāna i parau ’o tē hōro’a mai i te ’oa’oa ia tātou ?

• E hīmene ’āmui i te hō’ē hīmene nō ni’a i te ’ohipa misiōnare, mai « Je voudrais déjà partir en mission » (Chants pour les enfants, 90), ’e e tauturu i te mau tamari’i ’ia feruri i te mau rāve’a e nehenehe ai rātou e fa’a’ite i te ’evanelia, i roto ato’a i tō rātou iho ’utuāfare. ’A fa’ati’a nō ni’a i te hō’ē taime ’a fa’a’ite ai ’outou i te ’evanelia, ’e e vaiiho i te mau tamari’i ’ia fa’a’ite mai i tō rātou ’itera’a.

Te Parau Ha’api’ira’a ’e te mau Parau Fafau 19:18–19, 23–24

’Ua ha’apa’o Iesu Mesia i te parau a te Metua i te ao ra, noa atu ē, e mea teimaha.

Te hina’aro o te Fa’aora ’ia « inu i te ’āu’a maramara e [’aita] e oriorio » (’īrava 18) ’o te hō’ē te reira hi’ora’a nō tātou pā’āto’a nō te ha’apa’ora’a i te hina’aro o te Metua i te ao ra. ’A feruri nāhea ’outou i te fa’auru i te mau tamari’i ’ia pe’e i te hi’ora’a o Iesu.

Te mau ’ohipa e nehenehe e rave

• E fa’a’ite i te hō’ē hōho’a o Iesu Mesia i te māuiuira’a i Getesemane (hi’o te arata’i nō teie hepetoma i roto i te Mai, pe’e mai—nō te ta’ata hō’ē ’e te ’utuāfare E ani i te mau tamari’i ’ia parau mai ia ’outou e aha tā rātou i ’ite nō ni’a i te ’ohipa e tupu nei i roto i teie hōho’a. ’A ha’apoto nā roto i tā ’outou iho mau parau i te mea tā te Fa’aora i parau i roto i Te Parau Ha’api’ira’a ’e te mau Parau Fafau 19:18–19 nō ni’a i tōna māuiui. E ha’apāpū ē, te māuiuira’a nō tā tātou mau hara, ’o tē ’ohipa pa’ari roa a’e ïa tā te hō’ē ta’ata e rave, terā rā, maoti tō Iesu here i tōna Metua ’e ia tātou, ’ua ha’apa’o ’oia i te hina’aro o te Atua. Nāhea e nehenehe ai ia tātou ’ia ha’apa’o i te parau a te Metua i te ao ra ?

• Tauturu i te mau tamari’i ’ia feruri i te mau ’ohipa ’ōhie ’o tē tū’ati i te mau parau i roto i Te Parau Ha’api’ira’a ’e te mau Parau Fafau 19:23. E tai’o i te ’īrava e rave rahi taime ’a rave ai te mau tamari’i i te mau ’ohipa. Tauturu ia rātou ’ia feruri i te mau rāve’a e nehenehe ai tātou e ha’api’i mai nō ni’a i te Mesia ’e e fa’aro’o i tāna mau parau.

ītona ha’api’ira’a

Ha’api’i i te ha’api’ira’a tumu : Te mau tamari’i pa’ari

Te Parau Ha’api’ira’a ’e te mau Parau Fafau 18:10–12

E faufa’a rahi tō tātou tāta’itahi i te Atua.

E rave rahi ta’ata e aro nei i tō rātou mana’ora’a e mea faufa’a ’ore rātou; e mea ’ino vetahi i ni’a i te mau ta’ata e huru ta’a ’ē i tō rātou. E nehenehe te parau poro’i pūai o Te Parau Ha’api’ira’a ’e te mau Parau Fafau 18:10 e taui i tō tātou huru hi’ora’a ia tātou iho ’e i te mau ta’ata ’ati a’e ia tātou.

Te mau ’ohipa e nehenehe e rave

• E ani i te tamari’i tāta’itahi ’ia pāpa’i i tōna i’oa i ni’a iho i te hō’ē ’api parau ’e ’ia fa’ahaere i te mau ’api parau ’ati a’e te piha. E ani ia rātou ’ia pāpa’i i ni’a iho i te ’api parau tāta’itahi tā rātou e fāri’i i te hō’ē mea tā rātou e au nō ni’a i te reira ta’ata. E fa’aitoito ia rātou ’ia fa’a’ite i te maita’i ’e te ara maita’i i roto i tā rātou mau parau. I muri iho, e tauturu i te mau tamari’i ’ia tai’o i Te Parau Ha’api’ira’a ’e te mau Parau Fafau 18:10–12, ’e e ani ia rātou ’ia fa’a’ite mai e aha tā rātou i ha’api’i mai nō ni’a i te huru o te Atua i nō ni’a ia tātou. E fa’ata’a ē e faufa’a rahi tō tātou pā’āto’a i te Atua nō te mea e tamari’i tātou nāna.

• Fa’a’ite i te mau tamari’i i te hō’ē ’ohipa e mea faufa’a roa nō ’outou. Nāhea tātou i te rave i te mau ’ohipa e mea faufa’a nō tātou ? E ani i te hō’ē tamari’i ’ia tai’o i Te Parau Ha’api’ira’a ’e te mau Parau Fafau 18:10. Nāhea e nehenehe ai ia tātou ’ia fa’a’ite i te tahi atu mau ta’ata ē, « e faufa’a rahi tō tō rātou vārua » i tā tātou hi’ora’a ?

  Iesu e tāpe’a nei i te hō’ē tamaiti iti

  Faufa’a o te hō’ē vārua, nā Liz Lemon Swindle

Te Parau Ha’api’ira’a ’e te mau Parau Fafau 19:16–19

’Ua māuiui Iesu Mesia nō’u.

Nāhea ’outou i te ani i te hō’ē vārua fa’atura i roto i tā ’outou piha ha’api’ira’a ’ia nehenehe ho’i i te Vārua Maita’i ’ia fa’a’ite pāpū i te mau tamari’i ē, ’ua aufau Iesu Mesia i te ho’o nō tā tātou mau hara ?

Te mau ’ohipa e nehenehe e rave

• E fa’ati’a i te ’ā’amu o Iesu Mesia i te mamaera’a nō tā tātou mau hara (hi’o « Pene 51 : ’Ua mamae Iesu i roto i te ’ō nō Getesemane », Te mau ’ā’amu nō te faufa’a ’āpī, 129-32., ’aore rā, te video nō ni’a i te reira i ni’a i te ChurchofJesusChrist.org). E ani i te mau tamari’i ’ia fa’ati’a fa’ahou mai i te ’ā’amu nā roto i tā rātou iho mau parau, ’e i muri iho, e ani ia rātou ’ia tai’o e mea nāhea tō te Fa’aora fa’ata’ara’a i te ’itera’a rau i roto i Te Parau Ha’api’ira’a ’e te mau Parau Fafau 19:16–19. E aha tā tātou e ha’api’i mai nei nā roto mai i tāna tātarara’a ?

• E ani i te mau tamarii ’ia tāpiri i tō rātou mata ’a tai’o ai ’outou i Te Parau Ha’api’ira’a ’e te mau Parau Fafau 19:16–19 ’e ’ia feruri e aha tā rātou e fāri’i ra nō ni’a i te Fa’aora. Tauturu i te mau tamari’i ’ia hi’o i roto i Te mau hīmene ’aore rā, i te Chants pour les enfants nō te mau hīmene ’o tē tauturu ia rātou ’ia fa’a’ite i tō rātou mau ’āehuehu nō ni’a ia Iesu Mesia (hi’o i te fa’ahorora’a tumu parau i roto i teie mau buka). E ani i te mau tamari’i ’ia hīmene i te mau hīmene tā rātou i mā’iti ’e ’ia fa’a’ite i tō rātou ’itera’a pāpū.

• Tauturu i te mau tamari’i ’ia tāmau ’ā’au i te hiro’a fa’aro’o toru.

Te Parau Ha’api’ira’a ’e te mau Parau Fafau 19:26, 34–35, 38

E rahi a’e te mau ha’amaita’ira’a a te Atua i te mau tao’a o te fenua nei.

E moni rahi nō te nene’i i te Buka a Moromona, ’e e’ita te reira e mara’a ia Iosepha Semita. ’Ua ani te Fatu ia Martin Harris ’ia « tae a’e i te tahi tufa’a o [tōna] fenua », tāna fare fa’a’apu ruperupe, nō te aufau i te ta’ata nene’i (’īrava 34). ’Ua fāri’i tātou i te mau ha’amaita’ira’a rarahi nō te mau tusia a Martin ’e a te tahi atu mau ta’ata e rave rahi.

Te mau ’ohipa e nehenehe e rave

• ’A pāpa’i i ni’a i te tāpura ’ere’ere i te mau uira’a mai teie i muri nei nō te tauturu i te mau tamari’i ’ia hāro’aro’a i Te Parau Ha’api’ira’a ’e te mau Parau Fafau 19:26, 34–35, 38 : E aha tā te Fatu i ani ia Martin Harris ’ia rave ? Nō te aha ’oia i ani ai iāna ’ia rave i te reira ? E aha tāna i fafau mai ? E ani i te mau tamari’i ’ia ’ohipa ’āpitipiti nō te ’ite mai i te mau pāhonora’a i roto i teie mau ’īrava. E ani ia rātou e aha tā rātou e mana’o ’āhiri ē, o Martin Harris rātou.

• Fa’a’ite i te mau tamari’i i te hō’ē Buka a Moromona, ’e e parau ia rātou i te hō’ē mea auhia e ’outou nō ni’a i te reira. E ani ia rātou ’ia fa’a’ite mai i tō rātou mana’o nō ni’a i te reira. E parau poto noa nō ni’a i te tusia a Martin Harris ’ia nehenehe te Buka a Moromona ’ia nene’ihia (Te mau ’ā’amu nō Te Parau Ha’api’ira’a ’e te mau Parau Fafau, 33). E aha tā te Fatu i te parau ia Martin i roto i Te Parau Ha’api’ira’a ’e te mau Parau Fafau 19:38 ’o tei tauturu iāna ’ia vai itoito noa ’e te ha’apa’o ? Tauturu i te mau tamari’i ’ia feruri i te hō’ē mea tā rātou e nehenehe e fa’atusia nō te ha’apa’o i te parau a te Atua ’aore rā, nō te tauturu i tāna ’ohipa.

ītona ’apora’a ha’api’ira’a

Fa’aitoito i te ha’api’ira’a mai i te fare

Ani i te mau tamari’i ’ia feruri i te hō’ē ta’ata ’o tē nehenehe e tauturuhia nā roto i te mea tā rātou i ha’api’i mai i roto i Te Parau Ha’api’ira’a ’e te mau Parau Fafau 18 ’aore rā 19—’ei hi’ora’a, e faufa’a rahi tō tātou pā’āto’a i te Atua. E fa’aitoito ia rātou ’ia fa’anaho nāhea rātou i te fa’a’ite i te mea tā rātou i ha’api’i mai i tāua ta’ata ra.

Haʼamaitaʼiraʼa i tā tātou haʼapiʼiraʼa

Tauturu i te mau tamari’i ’ia ’apo mai nā roto mai i te mau pāpa’ira’a mo’a. Tē fifi nei te tahi mau tamari’i ’ia tai’o i te mau pāpa’ira’a mo’a. Te rōtahira’a i ni’a i te hō’ē noa a’e ’īrava ’aore rā, hō’ē noa a’e pereota e tauturu te reira ia rātou.

’api ’ohipara’a : E faufa’a rahi tō’u