Iosepha Semita ’e nā ʼite toʼotoru te tūturi nei i roto i te pure

15–21 nō Fepuare

Te Parau Ha’api’ira’a ’e te mau Parau Fafau 14–17

« ’Ia ti’a mai ’ei ’ite »

Nāhea ’outou i te tauturu i te mau tamari’i ’ia ti’a mai ’ei ’ite nō te ’evanelia ? E nehenehe te mau ’ohipara’a i roto i teie arata’i e hōro’a mai ia ’outou i te mau mana’o.

Pāpa’i i te mau mana’o e tae mai

ītona fa’a’itera’a

Tītau i te mana’o

’A feruri i te ani i te tahi mau tamari’i ’ia fa’a’ite mai i te hō’ē mea tā rātou i ’apo mai i teie hepetoma, i te fare, ’aore rā, i roto i te Paraimere, tā rātou i ti’aturi e parau mau.

ītona ha’api’ira’a

Ha’api’i i te ha’api’ira’a tumu : Te mau tamari’i ’āpī

Te Parau Ha’api’ira’a ’e te mau Parau Fafau 14:1–7.

E nehenehe au e tauturu i te Fatu ’ia rave i tāna ’ohipa.

’A feruri e nāhea te mau parau a te Fatu ia David Whitmer i te tauturu i te mau tamari’i ’ia māramarama e nāhea rātou i te ’āmui mai i roto i te ’ohipa a te Atua.

Te mau ’ohipa e nehenehe e rave

• E fa’a’ite poto noa i te tahi mau ha’apāpūra’a nō ni’a i te ’utuāfare Whitmer (hi’o Feiā mo’a, 1: 68–71 ’aore rā, te arata’i nō teie hepetoma i roto i te Mai, pe’e mai—nō te ta’ata hō’ē ’e te ’utuāfare). ’Ei hi’ora’a, ’a fa’a’ite ’o vai o David Whitmer ’e e mea nāhea ’oia ’e tōna ’utuāfare i te tauturura’a ia Iosepha Semita i te ’īritira’a i te Buka a Moromona.

• E tauturu i te mau tamari’i ’ia māramarama i te mau fa’aaura’a i rotopū i te ’ohipara’a i roto i te hō’ē fa’a’apu ’e te ’āmuira’a i roto i te « ’ohipa rahi ’e te mea māere ho’i » a te Atua (’īrava 1). ’Ei hi’ora’a, e nehenehe te ’ō’otira’a i te auhune e fa’ahōho’ahia i te hōpoira’a mai i te mau vārua i te Mesia ra. E nehenehe ’outou e fa’a’ite i te hō’ē hōho’a o te hō’ē ta’ata fa’a’apu, e hōpoi mai i te mau ’ahu o te feiā fa’a’apu nō te fa’atāmata i te mau tamari’i, ’aore rā, e ’āparau nō te mau ’ohipa tā te ta’ata fa’a’apu e rave i te mau mahana ato’a. E fa’ata’a ē, e ta’ata fa’a’apu o David Whitmer, tei hina’aro ’ia ’ite e nāhea e ti’a iāna ’ia tauturu i te Fatu. E tai’o i Te Parau Ha’api’ira’a ’e te mau Parau Fafau 14:3–4 i te mau tamari’i, ’e e tauturu ia rātou ’ia ’ite e aha tā te Fatu i parau ia David Whitmer e rave. Nāhea e nehenehe ai ia tātou e tauturu i roto i te ’ohipa a te Fatu ?

• E fa’a’ohipa i te hō’ē tao’a hōro’a nō te ha’api’i i te mau tamari’i nō ni’a i te hōro’a o te ora mure ’ore a te Atua. ’Ei hi’ora’a, e fa’a’ite i te mau tamari’i i te hō’ē tao’a hōro’a ’e te hō’ē ’api parau i roto tei pāpa’ihia, « Ora mure ’ore » (Te Parau Ha’api’ira’a ’e te mau Parau Fafau 14:7). ’A vaiiho i te hō’ē tamari’i ’ia ’īriti i te pū’ohu o te tao’a hōro’a, ’e ’ia tai’o ha’apūai i Te Parau Ha’api’ira’a ’e te mau Parau Fafau 14:7. E fa’a’ite ē, te aura’a ’o te ora mure ’ore, ’o te orara’a ïa e a muri noa atu i pīha’i iho i te Atua ’e ’ia riro mai iāna te huru. ’A fa’a’ite i tō ’outou ’itera’a pāpū nō te mau ha’amaita’ira’a nō te ha’apa’ora’a i te mau fa’auera’a ’e te fāri’ira’a i te ora mure ’ore.

  mau misiōnare e ha’api’i ra i te hō’ē ’utuāfare

  Te ’ohipa misiōnare ’o te hō’ē ïa rāve’a e nehenehe ai tātou e tauturu i te Fatu ’ia rave i tāna ’ohipa.

Te Parau Ha’api’ira’a ’e te mau Parau Fafau 15:6 ; 16:6

E nehenehe au e tauturu ia vetahi ’ē ’ia ha’afātata atu ia Iesu Mesia.

E mau taea’e o John Whitmer ’e o Peter Whitmer Jr nō David Whitmer. Mai ia David, ’ua hina’aro rāua ’ia ’ite nāhea e ti’a ai ia rāua ’ia tauturu i te Fatu. ’Ua ani ’oia ia rāua ’ia tauturu « ’ia fa’afāriu mai i te mau vārua » iāna ra.

Te mau ’ohipa e nehenehe e rave

• E ani i te mau tamari’i ’ia fa’ata’a mai i te hō’ē mea faufa’a roa nō rātou (mai te hō’ē tauha’a ha’uti, hō’ē buka, ’aore rā, hō’ē ha’uti). ’A tai’o i Te Parau Ha’api’ira’a ’e te mau Parau Fafau 15:6 ’aore rā 16:6, ’e ’a ani i te mau tamari’i ’ia ’āfa’i mai i tō rātou rima i ni’a ’ia fa’aro’o ana’e rātou i te mea tā te Fatu i parau « ’ei faufa’a rahi ».

• E hāmani ’e te mau tamari’i i te hō’ē tāpura nō te mau rāve’a tā rātou e nehenehe e tauturu i te hō’ē ta’ata ’ia pe’e ia Iesu Mesia, mai te rirora’a ’ei hoa nō vetahi ’ē, te fa’a’itera’a i te mau pāpa’ira’a mo’a i te hō’ē hoa, ’aore rā, te purera’a nō te hō’ē ta’ata nava’i ’ore. Nō te hōro’a i te mau mana’o i te mau tamari’i, e nehenehe ’outou e fa’a’ite i te tahi mau hōho’a tano maita’i nō roto mai i te mau ve’a a te ’Ēkālesia ’aore rā, Te buka hōho’a o te ’evanelia. ’Aore rā, e nehenehe te mau tamari’i e pāpa’i i tā rātou iho mau hōho’a. E ani ia rātou ’ia tāmata i te hō’ē mea i ni’a i tā rātou tāpura i roto i te hepetoma.

Te Parau Ha’api’ira’a ’e te mau Parau Fafau 17.

E nehenehe au e riro ’ei ’ite nō te mau mea tā te Atua i rave nō’u.

’Ua riro mai o David Whitmer ’ei hō’ē o nā ’ite e toru o te Buka a Moromona, ’e e maha o tōna mau taea’e tei roto i nā ’ite to’ova’u. Mai ia David ’e tōna mau taea’e, e nehenehe tātou tāta’itahi e « ti’a mai ’ei ’ite » nō te parau mau (Te Parau Ha’api’ira’a ’e te mau Parau Fafau 14:8).

Te mau ’ohipa e nehenehe e rave

• E parau i te mau tamari’i nō ni’a i nā ’ite e toru ’e e va’u (hi’o « Pene 7: ’Ua hi’o te mau ’ite i te mau ’api auro » [Te mau ’ā’amu nō Te Parau Ha’api’ira’a ’e te mau Parau Fafau, 31–33], ’aore rā, te video nō te reira, i ni’a i te ChurchofJesusChrist.org). ’A ani i te mau tamari’i ’ia pāpa’i i te hō’ē hōho’a nō te mau ’ite e hi’o ra i te mau ’api.

• ’A ani i te mau tamari’i ’ia fa’a’ū i tāna ’api ’ohipara’a nō teie hepetoma, ’e ’ia fa’a’ohipa i te reira nō te fa’ati’a i te ’ā’amu o nā ’ite e toru.

• ’A fa’a’ite i te hō’ē Buka a Moromona, ’e ’a tai’o i te mau tamari’i i te rēni hōpe’a o Te Parau Ha’api’ira’a ’e te mau Parau Fafau 17:6 : « Mai tō ’outou Fatu ’e tō ’outou Atua e ora nei, e parau mau te reira ». E parau i te mau tamari’i e mea nāhea tō ’outou ’itera’a ē, e parau mau te Buka a Moromona. E ani i te mau tamari’i ’ia riro ’ei mau ’ite nō te Buka a Moromona nā roto i te tai’ora’a i te reira ’e te purera’a nō te ’ite ē, e parau mau ānei ’e i muri iho, te fa’a’itera’a i tō rātou ’itera’a pāpū ia vetahi ’ē.

ītona ha’api’ira’a

Ha’api’i i te ha’api’ira’a tumu : Te mau tamari’i pa’ari

Te Parau Ha’api’ira’a ’e te mau Parau Fafau 14–16.

E nehenehe au e tauturu i te Fatu ’ia rave i tāna ’ohipa.

’A ’āparau ai ’outou nō te mau heheura’a a te mau taea’e Whitmer, e nehenehe ’outou e fa’a’ite i te tahi mau rāve’a tā te Fatu i ani manihini ia tātou tāta’itahi ’ia tauturu iāna i roto i tāna ’ohipa.

Te mau ’ohipa e nehenehe e rave

• E fa’a’ite i te mau ’ā’amu nō ni’a ia David Whitmer ’e tōna ’utuāfare tā ’outou e mana’o nei e riro ’ei fa’aurura’a nō te mau tamari’i (hi’o Feiā mo’a, 1:68–71). Nāhea tō te Fatu fa’a’ohipara’a ia Whitmer mā nō te tauturu i te patu i tōna bāsileia ?

• ’A pāpa’i ni’a i te mau tuha’a ’api parau i te tahi mau uira’a ’ōhie ’e te mau fa’ahorora’a pāpa’ira’a mo’a e tū’ati nā roto mai i Te Parau Ha’api’ira’a ’e te mau Parau Fafau 14–16. ’Ei hi’ora’a : Mai te aha te huru o te parau a te Atua ? (14:2). E aha te hōro’a rahi roa a’e a te Atua ? (14:7). E aha tā te Fatu i parau e riro ’ei tao’a faufa’a rahi a’e ? (15:6 ; 16:6). E ani i te tamari’i tāta’itahi ’ia mā’iti i te hō’ē uira’a ’e ’ia ’ite mai i te mau pāhonora’a i roto i te mau ’īrava.

• Pāpa’i e piti upo’o parau i ni’a i te tāpura ’ere’ere : Te ’ohipa fa’a’apu ’e Te ’ohipa a te Fatu. Tauturu i te mau tamari’i ’ia ’imi i Te Parau Ha’api’ira’a ’e te mau Parau Fafau 14:3–4 nō te mau pereota e tū’ati i te ’ohipa fa’a’apu, ’e e pāpa’i i te reira i raro a’e i te upoo parau mātāmua. E aha tā teie mau pereota e ha’api’i nei ia tātou nō ni’a i te ’ohipa a te Atua ? E pāpa’i i te mau pāhonora’a a te mau tamari’i i raro a’e i te upo’o parau piti. Nāhea tātou i te tauturu i te ’ohipa a te Fatu ?

Te Parau Ha’api’ira’a ’e te mau Parau Fafau 17.

E nehenehe au e riro ’ei ’ite nō te mau mea tā te Atua i rave nō’u.

I roto i Te Parau Ha’api’ira’a ’e te mau Parau Fafau 17, ’ua parau te Fatu ia Oliver Cowdery, David Whitmer, ’e ia Martin Harris ē, e riro rātou ’ei nā ’ite e toru nō te Buka a Moromona. E tauturu i te mau tamari’i ’ia ’apo mai e mea nāhea e ti’a ai ia rātou ’ia riro ’ei ’ite ato’a nō te parau mau.

• E ani i te hō’ē tamari’i ’ia haere mai nō te fa’a’ite i te ’ā’amu o nā ’ite e toru (hi’o « Pene 7 : Tē hi’o nei te mau ’ite i te mau ’api auro » [Te mau ’ā’amu nō Te Parau Ha’api’ira’a ’e te mau Parau Fafau, 31–33], ’aore rā, te video nō ni’a i te reira i ni’a i te ChurchofJesusChrist.org). E aha tā tātou e nehenehe e ’apo mai i roto i teie ’ā’amu nō ni’a i te rirora’a ’ei mau ’ite itoito ? E nehenehe ato’a tā ’outou e fa’a’ite i te mau tuha’a i mā’itihia mai i roto i te video « Hō’ē mahana nō te tau a muri noa atu » (ChurchofJesusChrist.org ; e ha’amata te tuha’a nō ni’a i nā ’ite e toru i te 15:00).

• E tai’o ’āmui i te fafaura’a a te Fatu i roto i Te Parau Ha’api’ira’a ’e te mau Parau Fafau 17:1–3, ’e e tauturu i te mau tamari’i ’ia ’ite mai i te fa’aotira’a o te reira i roto i « Te ’itera’a pāpū o nā ’ite e toru » i roto i te Buka a Moromona.

• E tai’o ’āmui i Te Parau Ha’api’ira’a ’e te mau Parau Fafau 17:3–5 nō te ’ite mai e aha tei anihia ia Oliver Cowdery, Martin Harris ’e ia David Whitmer ’ia rave i muri a’e i tō rātou ’itera’a i te mau ’api auro. E aha te tahi mau parau mau tā tātou e nehenehe e fa’a’ite pāpū ? E parau e nāhea tō ’outou fa’a’itera’a i tō ’outou ’itera’a pāpū ia vetahi ’ē, ’e e ani i te mau tamari’i ’ia fa’a’ite mai i te tahi mau ’itera’a tei roa’a ia rātou.

ītona ’apora’a ha’api’ira’a

Fa’aitoito i te ha’api’ira’a mai i te fare

E ani i te mau tamari’i ’ia ti’a ’ei ’ite nō te hō’ē mea tā rātou i ha’api’i mai i roto i te piha ha’api’ira’a i teie mahana. E ani ia rātou ’ia fa’a’ite mai e nāhea rātou i te rave i te reira i roto i te piha ha’api’ira’a i muri nei.

Ha’amaita’ira’a i tā tātou ha’api’ira’a

Vaiiho i te mau tamari’i ’ia vai pe’epe’e noa. E nehenehe ’outou e patu i ni’a i te huru pe’epe’e o te mau tamari’i nā roto i te anira’a ia rātou ’ia ha’uti teata i te hō’ē ’ā’amu ’aore rā, ’ia rave i te mau ha’uti e tū’ati i te hō’ē hīmene ’aore rā, i te hō’ē tuha’a pāpa’ira’a mo’a. (Hi’o Ha’api’ira’a mai tā te Fa’aora,25–26

’api ’ohipara’a : E nehenehe au e riro ’ei ’ite nō te Atua.