Hōho’a nō te pāpa’ira’a mātāmua o te Buka a Moromona.

1–7 nō Fepuare

Te Parau Ha’api’ira’a ʼe te mau Parau Fafau 10–11

« ’Ia upo’oti’a oe’»

Ma te pure ’a tai’o Te Parau Ha’api’ira’a ’e te mau Parau Fafau 10–11, feruri e nāhea ’outou e nehenehe ai e tauturu i te mau tamarii ’ia māramarama i te mau parau mau i roto i teie mau tuha’a. E nehenehe te mau mana’o i roto i teie arata’i—e tauturu—te mau tamari’i ’āpī ’e te mau tamari’i pa’ari.

Pāpa’i i te mau mana’o e tae mai

Tītau i te mana’o

E ani i te mau tamari’i ’ia fa’a’ite mai e aha tā rātou e ha’amana’o nei nā roto mai i te hō’ē ha’api’ira’a nā mua atu nō ni’a ia Martin Harris ’e te mau ’api i mo’e nō te ’īritira’a o te Buka a Moromona. Fa’a’ite i te tahi mau mea ri’i tei mo’ehia ia rātou. E hina’aro paha ’outou e hi’ohi’o i te « Pene 4 : Martin Harris ’e te mau ’api i mo’e » (Te mau ’ā’amu nō Te Parau Ha’api’ira’a ’e te mau Parau Fafau, 18–21).

Ha’api’i i te ha’api’ira’a tumu : Te mau tamari’i ’āpī

Te Parau Ha’api’ira’a ’e te mau Parau Fafau 10:5

’Ia pure ana’e au i te mau taime ato’a, e ha’amaita’i mai te Metua i te ao ra iā’u.

I te tahi mau taime e mana’o paha te mau tamari’i ē, e ti’a noa ia rātou e pure i te mau taime ’e i te mau vāhi ta’a ’ē maita’i, ’e mai te mea noa e tūturi rātou ’aore rā, te tāpirira’a i tō rātou mata. Nāhea ’outou e nehenehe ai e tauturu ia rātou ’ia ’apo mai e nāhea ’ia « pure i te mau taime ato’a » ?

Te mau ’ohipa e nehenehe e rave

• Fa’a’ite i te mau hōho’a o te mau mea tā tātou e rave pinepine nei, mai te tāmā’ara’a, te ta’otora’a, ’aore rā, te ha’utira’a. Nāhea teie mau mea i te tauturu ia tātou ? E fa’a’ite i te hō’ē hōho’a nō te hō’ē tamari’i e pure ra ’a tai’o ai ’outou i te mau tamari’i te mau parau nō roto mai i Te Parau Ha’api’ira’a ’e te mau Parau Fafau 10:5 « ’a pure noa i te mau taime ato’a ». Ani i te mau tamari’i ’ia fa’ahiti i teie mau parau e rave rahi taime. Nāhea te purera’a i te mau taime ato’a i te tauturu ia tātou ?

• Fa’a’ohipa i te ’api ’ohipara’a nō teie hepetoma nō te tauturu i te mau tamari’i ’ia feruri i te mau vāhi ’e i te mau taime e rave rahi i reira tātou e nehenehe ai e pure.

• Ani i te mau tamari’i ’ia pāpa’i hōho’a ia rātou iho ’aore rā, tō rātou ’utuāfare e pure ra i te mau taime ’e i te mau vāhi ta’a ’ē, mai te huru ra i te fare purera’a, hou te ha’api’ira’a, ’aore rā, i te taime ta’otora’a. E fa’ata’a ē, te purera’a i te mau taime ato’a ’o tē pure-pinepine-ra’a ïa i te roara’a o te mahana. Nāhea tātou e nehenehe ai e pure, ’ia hā’ati-ana’e-hia tātou e te tahi mau ta’ata, mai tē huru ra i te fare ha’api’ira’a ’aore rā, ’e tō tātou mau hoa ?

  

  E tauturu mai te Fatu ia tātou mai te mea e pure tātou.

Te Parau Ha’api’ira’a ’e te mau Parau Fafau 11:12–13

E arata’i te Vārua Maita’i iā’u ’ia rave i te ’ohipa maita’i.

Noa atu e matahiti ’āpī, e nehenehe te mau tamari’i e ha’amata i te ’ite i te taime e paraparau mai ai te Vārua ia rātou.

Te mau ’ohipa e nehenehe e rave

• E huna i te hō’ē mōrī ’aore rā, hō’ē mōrī pata ’e hō’ē hōho’a nō te hō’ē hōho’a mata ’oa’oa i te hō’ē vāhi i roto i te piha. E ani i te mau tamari’i ’ia ’imi mai i teie mau tao’a. Tai’o i Te Parau Ha’api’ira’a ’e te mau Parau Fafau 11:13, ’e e tauturu i te mau tamari’i ’ia ’ite mai i te mau parau e tū’ati i ni’a i te mau tao’a tei ’itehia mai e rātou. E aha tā teie mau parau e ha’api’i nei nō ni’a e nāhea te Vārua Maita’i i te tauturu ia tātou ?

• Hōro’a i te mau tamari’i e rave rahi huru tupura’a i reira rātou e tītauhia ai e rave i te hō’ē mā’itera’a i roto i te maita’i ’e te ’ino—mai te mā’itira’a ’ia parau i te parau mau ’aore rā, ’ia ha’avare, ’aore rā, te mā’itira’a ’ia riro ’ei ta’ata maita’i ’aore rā, ’ei ta’ata ’ino. Nāhea tātou e ’ite ai ē, e aha te mā’itira’a ti’a ? Tai’o ’āmui i Te Parau Ha’api’ira’a ’e te mau Parau Fafau 11:12, ’e ’a fa’a’ite pāpū ē, e tauturu te Vārua Maita’i ia tātou ’ia rave i te mā’itira’a ti’a mai te mea e fa’aro’o tātou iāna.

• ’A hīmene i te hō’ē hīmene nō ni’a i te arata’ira’a a te Vārua Maita’i, mai te « Listen, Listen » (Children’s Songbook, 107). ’A ani i te mau tamari’i e aha tā te hīmene e ha’api’i nei ia rātou nō ni’a e nāhea te Vārua Maita’i i te tauturu ia tātou.

Ha’api’i i te ha’api’ira’a tumu : Te mau tamari’i pa’ari

Te Parau Ha’api’ira’a ’e te mau Parau Fafau 10:5

’Ia pure ana’e au i te mau taime ato’a, e nehenehe au e upo’oti’a i ni’a i te mau fa’ahemara’a a Sātane.

E nehenehe ’outou e tauturu i te mau tamari’i ’ia māramarama ē, nā te pure tāmau e hōro’a mai ia rātou te mana nō te upo’oti’a i ni’a i te fa’ahemara’a.

Te mau ’ohipa e nehenehe e rave

• Pāpa’i i te mau ta’o ’aore rā, i te mau pereota nō roto mai i Te Parau Ha’api’ira’a ’e te mau Parau Fafau 10:5 i ni’a i te mau tuha’a ’api parau, ’e e ani i te mau tamari’i ’ia ’āna’i ti’a i te reira. E fa’aitoito ia rātou ’ia hi’o fa’ahou i te ’īrava mai te mea e hina’aro rātou i te tauturu. ’Ia au i teie ’īrava, e aha te mau ha’amaita’ira’a e fāri’ihia mai te mea e pure tātou i te mau taime ato’a ? Nāhea te ha’amana’ora’a ’ia pure i te roara’a o te mahana i te tauturu ia tātou, i te mau taime ihoā rā e fa’ahemahia tātou ’ia rave i te hō’ē ’ohipa ’ino ?

• Ani i te mau tamari’i ’ia hāmani i te hō’ē tāpura nō te mau taime e nehenehe ai tātou e pure ’e te mau vāhi e nehenehe ai tātou e pure. Nō te tahi atu mau mana’o, ’a fa’aitoito ia rātou ’ia hi’o i roto i te Alama 34:17–27.

• Tauturu i te mau tamari’i ’ia hāmani i te hō’ē tāpa’o na’ina’i ’aore rā, hō’ē hōho’a ’o tē fa’aha’amana’o ia rātou ’ia pure noa i te mau taime ato’a. E ani ia rātou ’ia fa’atautau i tā rātou tāpa’o i roto i tō rātou fare i te hō’ē vāhi e ’ite tāmau noa rātou i te reira.

Te Parau Ha’api’ira’a ’e te mau Parau Fafau 11:12–13

E arata’i te Vārua Maita’i iā’u ’ia rave i te ’ohipa maita’i.

Pinepine te feiā ’āpī i te uiui ē, mai te aha te arata’ira’a a te Vārua Maita’i. E nehenehe ’outou e fa’a’ohipa i Te Parau Ha’api’ira’a ’e te mau Parau Fafau 11 nō te ha’api’i i te mau tamari’i nāhea ’ia ’ite « te reira Vārua ’o tē fa’aarata’i atu ’ia rave i te ’ohipa maita’i » (’īrava 12).

Te mau ’ohipa e nehenehe e rave

• Tauturu i te mau tamari’i ’ia hāmani i te hō’ē tāpura o te mau ta’ata tā rātou e haere e fārerei ’ia hina’aro ana’e rātou i te tauturu ’aore rā, e uira’a tā rātou. Nō te aha tātou e ti’aturi ai i teie mau ta’ata nō te tauturu ia tātou ? Ani i te mau tamari’i ia tai’o i Te Parau Ha’api’ira’a ’e te mau Parau Fafau 11:12 ’e ’ia ’imi e aha te mea tei parauhia ia Hyrum Smith ’ia ti’aturi. E aha tā tātou i ’apo mai nā roto mai i teie ’īrava nō ni’a e nō te aha e tītauhia ia tātou ’ia ti’aturi i ni’a i te arata’ira’a a te Vārua Maita’i ?

• Ani i te mau tamari’i e aha tā rātou e parau atu i te hō’ē hoa ’o tē ani mai ia rātou ē, mai te aha te huru ’ia paraparau ana’e mai te Vārua Maita’i ia rātou. E ani i te mau tamari’i ’ia tai’o i Te Parau Ha’api’ira’a ’e te mau Parau Fafau 11:12–13 nō te ’ite mai i te tahi mau pāhonora’a.

• E fa’a’ite i te mau tamari’i i te tahi mau ’itera’a tā ’outou i fāri’i nō tō te Vārua Maita’i arata’ira’a ia ’outou ’ia rave i te mau ’ohipa maita’i. Ani i te mau tamari’i ’ia feruri e aha te taime i fāri’i ai rātou i te mau ’itera’a mai teie te huru, i muri iho ’ia fa’a’ite mai i te reira mai te mea e hina’aro rātou. ’A fa’a’ite pāpū ē, e hina’aro te Metua i te ao ra e arata’i ia tātou nā roto i te Vārua Maita’i. E fa’aitoito i te mau tamarii ’ia pāpa’i i te roara’a o te hepetoma e haere mai nei, i te mea tā rātou i fāri’i mai tei fa’ata’ahia i roto i Te Parau Ha’api’ira’a ’e te mau Parau Fafau 11:12–13.

Te Parau Ha’api’ira’a ’e te mau Parau Fafau 11:21, 26

E ti’a iā’u ’ia ’ite maita’i i te ’evanelia ’ia nehenehe iā’u ’ia tauturu ia vetahi ’ē ’ia ’ite mai i te parau mau.

E roa’a i te mau tamari’i tā ’outou e ha’api’i ra e rave rahi mau rāve’a nō te fa’a’ite i te ’evanelia. E nehenehe teie mau ’īrava e ha’api’i ia rātou nāhea i te fa’aineine nō te reira mau rāve’a.

Te mau ’ohipa e nehenehe e rave

• Ani i te mau tamari’i ’ia ha’uti teata ta’ata ora e nāhea rātou ’ia paraparau i te ’evanelia i te hō’ē ta’ata tei ’ore roa i fa’aro’o a’e nei i te reira. ’Ei hi’ora’a, nāhea rātou i te pāhono i te mau uira’a nō ni’a i te Buka a Moromona ? Nāhea rātou i te fa’ata’a ē, ’o vai o Iesu Mesia ? Tai’o ’e te mau tamari’i i Te Parau Ha’api’ira’a ’e te mau Parau Fafau 11:21, 26. E aha tā te Fatu i parau ia Hyrum Smith e ti’a iāna ’ia rave ’ia nehenehe iāna ’ia ha’api’i i te ’evanelia ? E aha te aura’a ’ia « noa’a » te parau a te Atua, ’e nāhea tātou i te rave i te reira ? Nāhea tātou i te « ha’aputu noa » i te parau a te Atua i roto i tō tātou ’ā’au ?

• E ani i te mau tamari’i ’ia fa’a’ite mai i te hō’ē pāpa’ira’a mo’a tā rātou i au ’e ’ia fa’ata’a mai nō te aha rātou i au ai i te reira. ’A vaiiho ia rātou ’ia parau mai nō ni’a i te huru te mau pāpa’ira’a mo’a e ha’amaita’i ai i tō rātou orara’a ’e e aha tā rātou e rave nei nō te tuatāpapa i te parau a te Atua i te fare. E fa’aitoito ia rātou ’ia ha’amau i te mau ’ōpuara’a nō te tai’o pinepine atu ā i te parau a te Atua.

• Hīmene ’āmui i te hō’ē hīmene nō ni’a i te fa’a’itera’a i te ’evanelia, mai te « Je voudrais déjà partir en mission » (Chants pour les enfants, 90). E aha tā teie hīmene e ha’api’i nei nō ni’a i te huru e ti’a ai ia rātou ’ia riro ’ei misiōnare i te mau mahana ato’a ?

• E fa’a’ite i te hō’ē mea nō roto mai i « Te ti’aturira’a o Iseraela » nā te peresideni Russell M.Nelson ’e te tuahine Wendy W.Nelson (purera’a nā te feiā ’āpī ’ati ti’a te ao nei, 3 nō Tiunu 2018, ChurchofJesusChrist.org) nō te fa’auru i te mau tamari’i ’ia tauturu i te ha’aputuputura’a i te mau tamari’i a te Atua nā roto i te fa’a’itera’a atu i te ’evanelia.

Fa’aitoito i te ha’api’ira’a mai i te fare

E ani i te mau tamari’i ’ia paraparau ’e te hō’ē melo o te ’utuāfare nō ni’a i te mea tā rātou i ’apo mai nā roto mai i Te Parau Ha’api’ira’a ’e te mau Parau Fafau 10 ’aore rā, 11 i teie mahana. ’Ei hi’ora’a, e nehenehe rātou e fa’a’ite nāhea rātou ’ia fa’anaho nō te pure i te mau taime ato’a.

Ha’amaita’ira’a i tā tātou ha’api’ira’a

’Imi i te heheura’a i te mau mahana ato’a. ’A fa’aineine ai ’outou nō te ha’api’i, ’a pure ’e ’a feruri māite i te mau pāpa’ira’a mo’a i te roara’a o te hepetoma. E ’ite mai ’outou ē, « e ha’amāramarama [te Vārua] i tō ’oe ferurira’a » (Te Parau Ha’api’ira’a ’e te mau Parau Fafau 11:13). E tae mai te mau mana’o ’e te mau ’āehuehura’a ia ’outou nō ni’a e nāhea i te ha’api’i i te mau huru taime ato’a ’e i te mau vāhi ato’a—’ia tere ’outou nō te ’ohipa, ’ia rave i te mau ’ohipa i te fare, ’aore rā, ’ia paraparau ia vetahi ’ē.