8–14 nō Fepuare

Te Parau Ha’api’ira’a ’e te mau Parau Fafau 12–13 ; Iosepha Semita—’Ā’amu 1:66–75

« I ni’a iho ia ’ōrua e tā’u nā tāvini taea’e nei »

’Ua rau te huru o te orara’a o te mau tamari’i tā ’outou e ha’api’i ra ’e ’ua rau te mau hina’aro o te tahi ’e te tahi. ’A fa’aineine ai ’outou, ’a feruri e nāhea ’outou e nehenehe ai e tauturu maita’i a’e ia rātou ’ia ’apo mai i te mau parau mau i ha’api’ihia i roto i Te Parau Ha’api’ira’a ’e te mau Parau Fafau 12–13 ’e Iosepha Semita—’Ā’amu 1:66–75.

Pāpa’i i te mau mana’o e tae mai

Tītau i te mana’o

Ani i te mau tamari’i ’ia fa’a’ite mai i te mau taime ’a ’ite ai rātou i te hō’ē ta’ata i te bāpetizora’ahia ’aore rā, i te fāri’ira’a i te hō’ē ha’amaita’ira’a autahu’ara’a. E mea nāhea tō Iosepha Semita ’e tō Oliver Cowdery fāri’ira’a i te autahu’ara’a ?

Ha’api’i i te ha’api’ira’a tumu : Te mau tamari’i ’āpī

Te Parau Ha’api’ira’a ’e te mau Parau Fafau 13

’Ua fa’aho’i fa’ahou mai o Ioane Bāpetizo i te Autahu’ara’a a Aarona.

I te 15 nō Mē 1829, ’ua fā mai Ioane Bāpetizo ia Iosepha Semita rāua o Oliver Cowdery ’e ’ua hōro’a mai ia rāua i te Autahu’ara’a a Aarona. Nāhea tē ha’api’ira’a mai nō ni’a i teie ’ohipa i tupu i te ha’amaita’i i te mau tamari’i tā ’outou e ha’api’i nei ?

Te mau ’ohipa e nehenehe e rave

• ’A fa’ati’a i te mau tamari’i e mea nāhea te fa’aho’i-fa’ahou-ra’a-hia mai te Autahu’ara’a a Aarona (hi’o Iosepha Semita—’Ā’amu 1:68–70 ; hi’o ato’a « Pene 6 : Te fāri’ira’a Iosepha ’e Oliver i te autahu’ara’a », Te mau ’ā’amu o te Parau Ha’api’ira’a ’e te mau Parau Fafau, 26–27). ’Aore rā, e ani i te hō’ē tāne i roto i te pāroita ’ia haere mai i roto i te piha ha’api’ira’a ’e ’ia fa’ati’a mai i te ’ā’amu mai te huru ē, ’o ’oia o Ioane Bāpetizo, ma te tai’o i mua i te mau tamari’i i te mau parau a Ioane ia Iosepha Semita ’e ia Oliver Cowdery.

• ’A pia i te mau hōho’a nō Ioane Bāpetizo i te bāpetizora’a i te Fa’aora ’e i te fa’aho’i-fa’ahou-ra’a mai i te Autahu’ara’a a Aarona (Buka hōho’a o te ’evanelia, 35, 93 ; hi’o ato’a i te hōho’a i roto te arata’i nō teie hepetoma i roto i te Mai, pe’e mai—nō te ta’ata hō’ē ’e te ’utuāfare). E ani i te mau tamari’i ’ia fa’a’ite mai e aha tā rātou i ’ite nō ni’a i te ’ohipa e tupu nei i roto i te mau hōho’a (hi’o Mataio 3:13–17 ; Te Parau Ha’api’ira’a ’e te mau Parau Fafau 13 ; Iosepha Semita—’Ā’amu 1:68–70).

• Tauturu i te mau tamari’i ’ia ha’api’i mai i te hō’ē hīmene nō ni’a i te autahu’ara’a, mai te « La prêtrise est rétablie » (Chants pour les enfants,60). E ani i te mau tamari’i ’ia haere hā’ati nā roto i te piha ’a hīmene noa ai, ma te tāpe’a, te tahi i muri i te tahi, i te hōho’a nō roto mai i te arata’i nō teie hepetoma i roto i te Mai, pe’e mai—nō te ta’ata hō’ē ’e te ’utuāfare.

Te Parau Ha’api’ira’a ’e te mau Parau Fafau 13

Te autahu’ara’a ’o te mana ïa o te Atua.

E riro te mau ha’api’ira’a nō ni’a i te fa’aho’i-fa’ahou-ra’a mai o te Autahu’ara’a a Aarona ’ei mau taime maita’i roa nō te tauturu i te mau tamari’i ’ia māramarama maita’i a’e e aha te autahu’ara’a, ’e nāhea te reira i te ha’amaita’i ia rātou.

Te mau ’ohipa e nehenehe e rave

• E hōpoi mai i te tahi mau tao’a i roto i te piha ha’api’ira’a, e tae noa atu i te hō’ē tāviri. E fa’a’ite i te mau tao’a, ’e e ani i te mau tamari’i ’ia fa’aro’o ’a tai’o ai ’outou i Te Parau Ha’api’ira’a ’e te mau Parau Fafau 13 ’e ’ia ’ite mai i te tao’a i fa’ahitihia i roto i te pāpa’ira’a mo’a. E aha tā tātou e nehenehe e rave i te hō’ē tāviri ? Fa’a’ite i te mau hōho’a o te mau mea tā tātou e nehenehe nō te mea ’ua fa’aho’i-fa’ahou-hia mai te Autahu’ara’a a Aarona (hi’o i te ’api ’ohipara’a o teie hepetoma ; hi’o ato’a i te Buka hōho’a o te ’evanelia, 103–4, 107–8). E parau i te mau tamari’i e mea nāhea te autahu’ara’a i te ha’amaita’ira’a i tō ’outou orara’a.

• Nō te tauturu i te mau tamari’i ’ia tāmau i te pereota Te autahu’ara’a ’o te mana ïa o te Atua, e ani ia rātou ’ia pa’ipa’i i te rima ’a fa’ahiti ai rātou i te tuha’a ta’o tāta’itahi. Fa’a’ite i te hō’ē ’ohipa ’o tē tītau i te hō’ē putu uira nō te fa’atere, ’e ’a ha’api’i ē, mai te putu e hōro’a i te uira i roto i terā tao’a, e hōro’a mai te autahu’ara’a i te mana o te Atua i roto i tō tātou orara’a. ’A fa’a’ite i tō ’outou ’itera’a pāpū nō ni’a i te mau ha’amaita’ira’a o tā ’outou e fāri’i maoti te autahu’ara’a.

Iosepha Semita—’Ā’amu 1:66–75

E nehenehe au e bāpetizohia.

’Ua tai’o o Iosepha Semita ’e o Oliver Cowdery nō ni’a i te bāpetizora’a i roto i te Buka a Moromona e ’ua hina’aro rāua ’ia ’ite hau atu ā. E nehenehe ’outou e tauturu i te mau tamari’i tā ’outou e ha’api’i ra ’ia tīa’i i tō rātou bāpetizora’a ’e ’ia ’apo rahi mai nō ni’a i teie ’ōro’a mo’a.

Te mau ’ohipa e nehenehe e rave

• Fa’a’ite i te video « Te fa’aho’i-fa’ahou-ra’a mai o te Autahu’ara’a a Aarona » (ChurchofJesusChrist.org). Tāpe’a i te video mā’a taime ri’i nō te ui i te mau tamari’i i te mau uira’a mai teie te huru « Nō te aha Iosepha Semita ’e o Oliver Cowdery i haere ai i roto i te uru rā’au ? » ’e « I tō ’outou mana’ora’a, e aha tā Iosepha Semita ’e tā Oliver Cowdery i fāri’i i muri a’e i tō rāua bapetizora’ahia ? » ’A ani ia rātou ’ia fa’a’ite mai i tō rātou mana’o nō ni’a i mea tā rātou i fāri’i i tō rātou bāpetizora’ahia.

• E parau i te mau tamari’i nō ni’a ia Iosepha Semita ’e ia Oliver Cowdery i te bāpetizora’ahia rāua (hi’o Iosepha Semita—’Ā’amu 1:68–74 ; hi’o ato’a « Pene 6 : Te hōro’ara’ahia te autahu’ara’a ia Iosepha ’e ia Oliver », Te Parau Ha’api’ira’a ’e te mau Parau Fafau, 26–28). E ha’apāpū i te ’oa’oa i fāri’ihia e Iosepha ’e e Oliver, ’e ’a parau i te mau tamari’i nō ni’a i tō ’outou bāpetizora’a. E ani ia rātou ’ia pāpa’i i te hō’ē hōho’a nō rātou iho e bāpetizohia i te hō’ē mahana.

  

  E nehenehe au e bāpetizohia nō te mea ’ua fa’aho’i-fa’ahou-hia mai te autahu’ara’a.

Ha’api’i i te ha’api’ira’a tumu : Te mau tamari’i pa’ari

Te Parau Ha’api’ira’a ’e te mau Parau Fafau 13 ; Iosepha Semita—’Ā’amu 1:66–72

’Ua fa’aho’i fa’ahou mai Ioane Bāpetizo i te Autahu’ara’a a Aarona.

E nehenehe te mau ’ā’amu o te fa’aho’i-fa’ahou-ra’a-hia mai te Autahu’ara’a a Aarona e tauturu i te mau tamari’i tā ’outou e ha’api’i ra ’ia hāro’aro’a i te mau parau mau faufa’a roa nō ni’a i te autahu’ara’a ’e te mau fa’atōro’ara’a i te autahu’ara’a.

Te mau ’ohipa e nehenehe e rave

• E tai’o ’āmui Iosepha Semita—’Ā’amu 1:66–72, ’e e ani i te mau tamari’i ’ia pāpa’i hōho’a i te mau mea tā teie mau ’īrava e fa’ata’a nei. I muri iho, e vaiiho i te mau tamari’i ’ia fa’ati’a mai i te ’ā’amu ma te fa’a’ohipa i tā rātou mau hōho’a. E ani i te hō’ē ta’ata ’ia fa’a’ite mai i te hō’ē ’itera’a ’a ’ite ai ’oia i te hō’ē ta’ata i te fa’atōro’ara’ahia i te hō’ē tōro’a o te autahu’ara’a. Nāhea te reira i te ’aifāitora’a i te huru nō te fa’atōro’ara’ahia o Iosepha ’e o Oliver mai tei fa’ata’ahia i roto i te Iosepha Semita—’Ā’amu 1:66–72. ?

• Hōro’a i te mau tamari’i i te tahi taime nō te hāmani i te hō’ē tāpura nō te mau mea ato’a tā rātou i ’ite nō ni’a ia Ioane Bāpetizo, ’e i muri iho e fa’ati’a ia rātou ’ia fa’a’ite mai i te mea tā rātou i pāpa’i. E ani i te mau tamarii ’ia ’ohipa tāta’ipiti nō te tai’o i te hō’ē o te mau ’īrava i muri nei, ’e ’ia tu’u atu i roto i tā rātou tāpura : Mataio 3:13–17 ; Te Parau Ha’api’ira’a ’e te mau Parau Fafau 13 ; Iosepha Semita—’Ā’amu 1:66–72.

Te Parau Ha’api’ira’a ’e te mau Parau Fafau 13

Tē fāri’i nei au i te mau ha’amaita’ira’a nā roto mai i te Autahu’ara’a a Aarona.

E fāri’i tātou e rave rahi ha’amaita’ira’a nā roto mai i te Autahu’ara’a a Aarona. E aha tā ’outou e nehenehe e rave nō te tauturu i te mau tamari’i tā ’outou e ha’api’i ra ’ia māramarama ē, e roa’a teie mau ha’amaita’ira’a nō te mea ’ua fa’aho’i-fa’ahou-hia mai te autahu’ara’a ?

Te mau ’ohipa e nehenehe e rave

• ’A tu’u i te mau hōho’a o te hō’ē bāpetizora’a ’e te ’ōro’a mo’a i roto i te hō’ē fa’ari’i o te tītau i te hō’ē tāviri nō te tātara. E ’āparau nō te aha e mea faufa’a roa te mau tāviri, ’e e vaiiho i te mau tamari’i ’ia fa’a’ohipa i te tāviri nō te tātara i te fa’ari’i. E ani i te mau tamari’i ’ia tai’o i Te Parau Ha’api’ira’a ’e te mau Parau Fafau 13 ’e ’ia ’imi mai i te mau ta’o ’e i te mau pereota ’o tē ha’api’i ia rātou e aha te mau ha’amaita’ira’a e fāri’ihia nā roto mai i te Autahu’ara’a a Aarona.

• Fa’a’ite i te video « Te mau ha’amaita’ira’a o te autahu’ara’a » (ChurchofJesusChrist.org), ’e e ani i te mau tamari’i ’ia ’ite mai i te mau rāve’a ’a ha’amaita’ihia ai te mau ta’ata i roto i te video maoti te autahu’ara’a.

Iosepha Semita—’Ā’amu 1:73–74

E nehenehe te Vārua Maita’i e tauturu iā’u ’ia hāro’aro’a i te mau pāpa’ira’a mo’a.

’Ia oti o Iosepha Semita ’e o Oliver Cowdery i te bāpetizohia, ’ua tauturu te Vārua Maita’i ia rāua ’ia hāro’aro’a maita’i a’e i te mau pāpa’ira’a mo’a. E nehenehe te reira e fa’aitoito i te mau tamari’i, ’o tē feruri nei e mea pa’ari ’ia hāro’aro’a i te mau pāpa’ira’a mo’a.

Te mau ’ohipa e nehenehe e rave

• Hōpoi mai i te hō’ē puzzle i roto i te piha ha’api’ira’a, ’e e ani i te mau tamari’i ’ia fa’atano i te reira. ’A rave ai rātou, ’a ui ia rātou e nāhea te tai’ora’a i te mau pāpa’ira’a mo’a e tū’ati ai i te fa’atanora’a i te hō’ē puzzle. E tai’o ’āmui Iosepha Semita—’Ā’amu 1:73–74, ’e e ani i te mau tamari’i ’ia fa’a’ite mai e aha te mea tei tauturu ia Iosepha ’e ia Oliver ’ia hāro’aro’a i te mau pāpa’ira’a mo’a. E aha tā tātou e nehenehe e rave nō te ’imi i te tauturu a te Vārua Maita’i ’a tuatāpapa ai tātou i te mau pāpa’ira’a mo’a ?

• E ani i te mau tamari’i ’ia hāmani i te hō’ē tāreta tāpa’o ’api ’o tā rātou e nehenehe e tu’u i roto i tā rātou pāpa’ira’a mo’a nō te fa’aha’amana’o ia rātou ’ia ’imi i te tauturu a te Vārua Maita’i ’a tai’o ai rātou. Penei a’e e ’itehia mai ia rātou te hō’ē pereota fa’auru i roto i te Iosepha Semita—’Ā’amu 1:74 ’o tā rātou e nehenehe e pāpa’i i ni’a i tā rātou tāreta tāpa’o ’api.

Fa’aitoito i te ha’api’ira’a mai i te fare

Mai te mea ’aita tō ’outou e taime nō te mau tamari’i nō te fa’a’ī i te ’api ’ohipara’a i roto i te piha ha’api’ira’a, ’a feruri e hāpono i te mau ’api parau i te fare ’ia ti’a i te mau tamari’i ’ia ’ohipa i ni’a i te reira ’e tō rātou ’utuāfare.

Ha’amaita’ira’a i tā tātou ha’api’ira’a

’A fa’aau ’ōhie ’e ’a fa’aro’o i te Vārua. ’Eiaha e mana’o ē, e tītauhia ia ’outou ’ia fa’a’ohipa i te mau mana’o i roto i teie arata’i. ’Ua mātau ’outou i te mau tamari’i tā ’outou e ha’api’i nei ; ’a ani i te Metua i te ao ra ’ia arata’i mai ia ’outou i te mau rāve’a maita’i a’e nō te tauturu ia rātou ’ia ha’api’i mai i te parau ha’api’ira’a o te ’evanelia ’e ’ia patu i tō rātou fa’aro’o.