te fare fa’a’apu a Martin Harris

Te fare fa’a’apu a Martin Harris, nā Al Rounds

22–28 nō Fepuare

Te Parau Ha’api’ira’a ’e te mau Parau Fafau 18–19

« E faufa’a rahi tō te mau vārua ta’ata »

’Ua hōro’ahia te mau heheura’a i roto i Te Parau Ha’api’ira’a ’e te mau Parau Fafau ’ei pāhonora’a nō te tahi tupura’a ta’a ’ē fātata ’a 200 matahiti, ’aita rā te mau parau tumu e ha’api’ihia nei i marau. ’A ’imi mai i teie mau parau tumu ’a tai’o ai ’outou, ’a feruri ato’a nāhea te reira e tano ai ia ’outou.

Pāpa’i i te mau mana’o e tae mai

Nō Martin ’e Lucy Harris hō’ē o te mau fare fa’a’apu maita’i roa a’e nō Palmyra (New York). E rave rahi matahiti tō rāua ha’ara’a ’ia noa’a mai te reira, e maoti te reira i ti’a ai ia rāua ’ia ’atu’atu i te hō’ē ’utuāfare, ’e fāna’o i te tahi ti’ara’a i roto i te huira’atira. I te matahiti 1829 rā, ’ua ta’a-pāpū-hia ē, e’ita te Buka a Moromona e pūharahia maori rā ’ia tu’uhia te hīpotate i ni’a i tāna fare fa’a’apu nō te ’aufau i te ta’ata nene’i. E ’itera’a pāpū tō Martin nō te Buka a Moromona, ’aita rā tō Lucy e ’itera’a pāpū. Mai te mea e tu’u Martin i te hīpotate ’e ’aita te Buka a Moromona e ho’o-maita’i-hia, e ’ere roa ïa ’oia i tāna fare fa’a’apu ’e e fifi tōna fa’aipoipora’a. I te hō’ē taime o te orara’a, e fa’aruru tātou i te mau uira’a mai tā Martin : E aha te faufa’a o te ’evanelia a Iesu Mesia nō’u ? E aha tā’u i ineine e fa’atusia nō te tauturu i te patura’a i te bāsileia o te Atua ? E nehenehe te ha’amana’ora’a i muri nei e tauturu ia tātou, ’oia ho’i, ’aita hō’ē o tātou i ’aufau a’enei i te hō’ē ho’o rahi a’e i tā Iesu Mesia nō te ha’amaita’i i te mau tamari’i a te Atua, « tei hau a’e i te mau mea ato’a ra » (Te Parau Ha’api’ira’a ’e te mau Parau Fafau 19:18).

Fa’aoti a’era Martin e tu’u i te hīpotate i ni’a i tāna fare fa’a’apu. ’Ua ’aufau tāna tusia i te nene’ira’a o e 5 000 Buka a Moromona. ’E i teienei, hau i te 190 mirioni buka i muri mai, ’ua tau mirioni vārua ’ati a’e i te ao nei tei ha’amaita’ihia.

Nō te tahi atu ā ha’amāramaramara’a nō ni’a i te pūharara’a o te Buka a Moromona, hi’o Feiā mo’a, 1:76–84.

ītona tuatāpapara’a a te ta’ata hō’ē

Mau mana’o nō te tuatāpapara’a pāpa’ira’a mo’a a te ta’ata hō’ē

Te Parau Ha’api’ira’a ’e te mau Parau Fafau 18:10–16

Tē ha’apōpou nei te Fatu ’ia tātarahapa ana’e tātou.

’A hi’o na i te pinepine o te ta’o tātarahapa i fa’a’ohipahia i roto i Te Parau Ha’api’ira’a ’e te mau Parau Fafau 18 ’e te 19, ’e ’a feruri i te ha’api’ira’a tā ’oe e ’apo mai nā roto i teie mau parau, i te mau taime tāta’itahi ’ua fa’a’ohipahia te reira. E hi’o ta’a ’ē i Te Parau Ha’api’ira’a ’e te mau Parau Fafau 18:10–16 ; e aha tā teie mau ’īrava e fa’atupu i roto ia ’oe nō ni’a i te tātarahapa—tā ’oe iho tātarahapara’a ’e te hōpoi’a e ani ia vetahi ’ē ’ia tātarahapa ?

Hi’o ato’a Alama 36:18–21 ; Dale G. Renlund, « Te tātarahapara’a, te hōʼē māʼitiraʼa ʼoaʼoa », Ensign ’aore rā Liahona, Nov. 2016, 121–24.

Te Parau Ha’api’ira’a ’e te mau Parau Fafau 18:34–36

E nehenehe tā’u e fa’aro’o i te reo o te Fatu i roto i Te Parau Ha’api’ira’a ’e te mau Parau Fafau.

Mai te mea e ani mai te tahi ta’ata ē, mai te aha te reo o te Fatu, e aha tā ’oe e parau atu ? ’A feruri i te reira ’a tai’o ai i Te Parau Ha’api’ira’a ’e te mau Parau Fafau 18:34–36. E aha te ha’api’ira’a tā ’oe i ’apo mai nō ni’a i te reo o te Fatu i te tai’ora’a i Te Parau Ha’api’ira’a ’e te mau Parau Fafau ? E aha tā ’oe e nehenehe e rave nō te fa’aro’o pāpū atu ā i tōna reo ?

Te Parau Ha’api’ira’a ’e te mau Parau Fafau 19:15–20

’Ua mamae Iesu Mesia ’ia ti’a iā’u ’ia tātarahapa ’e ’ia haere iāna ra.

Tē fa’ahiti nei te Faufa’a ’Āpī i te parau nō te mamae o te Fa’aora i Getesemane, i te hi’ora’a o te feiā māta’ita’i. I roto i Te Parau Ha’api’ira’a ’e te mau Parau Fafau 19:15–20, tē parau ra ’o Iesu Mesia iho nō ni’a i tōna mamae. ’A tai’o ai ’oe i tāna iho fa’ahitira’a mo’a, ’a hi’o i te mau ta’o ’e te mau pereota e fa’ata’a nei i te parau nō te mamae o te Fa’aora. ’A feruri e aha te ha’api’ira’a o te mau ta’o tāta’itahi ’e te mau pereota tāta’itahi. Nō te aha i ineine ai te Fa’aora e mamae ? E nehenehe e pāpa’i i tō ’oe mau mana’o nō ni’a ia Iesu Mesia ’e tāna tāra’ehara nō ’oe.

Hi’o Ioane 15:13 ; Mosia 3:7 ; Alama 7:11–12 ; Te Parau Ha’api’ira’a ’e te mau Parau Fafau 18:10–13.

Iesu ’e te hō’ē tamaiti iti

Te faufa’a o te hō’ē vārua, nā Liz Lemon Swindle

Te Parau Ha’api’ira’a ’e te mau Parau Fafau 19:26–27, 34–41

E mea hau atu te mau ha’amaita’ira’a a te Atua i te mau tao’a o te fenua nei.

’Aita te Buka a Moromona i ho’o-maita’i-hia i Palmyra, ’e nō reira, ’ua tītauhia ia Martin Harris ’ia ho’o i te hō’ē vāhi o tāna fare fa’a’apu nō te ’aufau i te tārahu. ’A feruri hōhonu i taua tusia ra—nā reira ato’a te mau ha’amaita’ira’a tā ’oe i fāri’i maoti te reira—’a tai’o noa ai i teie mau ’īrava. E nehenehe ato’a e feruri e aha tā te Fatu i ani ia ’oe ’ia fa’atusia. E aha tā ’oe e ’ite ra i roto i teie mau ’īrava ’o tē fa’auru ia ’oe ’ia fa’atusia i te reira ma « te parau ’oa’oa » ’e te « ’oa’oa rahi » ? (hi’o ato’a mau ’īrava 15–20).

Te Parau Ha’api’ira’a ’e te mau Parau Fafau 19:23

E tae mai te hau nā roto i te ’apora’a mai i te ha’api’ira’a a Iesu Mesia ’e te pe’era’a iāna.

’A feruri i te anira’a a te Fa’aora ’ia « ha’api’i mai i te mau mea nō’u nei ». E aha te ha’api’ira’a tā ’oe i ’apo mai nō ni’a ia Iesu Mesia i roto i Te Parau Ha’api’ira’a ’e te mau Parau Fafau 19 ? ’A pāpa’i i tō ’oe mau mana’o, ’e ’a feruri nāhea teie mau parau mau nō ni’a i te Fa’aora i te tauturu ia ’oe ’ia ’ite i te hau. ’Ia ’oe, e aha te aura’a te parau « hāhaere i roto i te marū o [tōna] Vārua » ?

ītona tuatāpapara’a a te ’utuāfare

Mau mana’o nō te tuatāpapara’a pāpa’ira’a mo’a a te ’utuāfare ’e te pō ’utuāfare

Te Parau Ha’api’ira’a ’e te mau Parau Fafau 18:1–5.E nehenehe te mau melo o te ’utuāfare e fa’a’ite i te tahi o « te mau hi’ora’a e rave rahi » (’īrava 2) ’ua fa’a’ite mai te Vārua ia rātou ē, e parau mau te mau pāpa’ira’a mo’a, mai tāna i rave nō Oliver Cowdery. Nāhea tō ’outou ’utuāfare e nehenehe ai e « ti’aturi i te mau mea i pāpa’ihia ra » (’īrava 3) i roto i te mau pāpa’ira’a mo’a ? Nāhea ’outou e nehenehe ai e ha’amau i tō ’outou niu ’utuāfare i ni’a i te « papa » (’īrava 4) o te ’evanelia ?

Te Parau Ha’api’ira’a ’e te mau Parau Fafau 18:10–13 ; 19:16–19.E nehenehe te melo tāta’itahi o te ’utuāfare e tai’o i Te Parau Ha’api’ira’a ’e te mau Parau Fafau 18:10–13 ’a mono ai i te mau parau « te mau vārua ta’ata », « te mau ta’ata ato’a », « te ta’ata ato’a » ’e « te vārua ta’ata ». ’Ei reira ’outou e nehenehe ai e paraparau nāhea teie mau ’īrava i te tauturu ia tātou ’ia māramarama i tō tātou faufa’a i te mata o te Metua ’e te Tamaiti (hi’o Te Parau Ha’api’ira’a ’e te mau Parau Fafau 19:16–19).

Te Parau Ha’api’ira’a ’e te mau Parau Fafau 18:21–25.E aura’a ta’a ’ē ānei tō tō ’outou i’oa ? E nehenehe ’outou e paraparau nō te aha e mea faufa’a te mau i’oa ’e e aha te aura’a ’ia rave i ni’a ia tātou i te i’oa o Iesu Mesia (hi’o Mosia 5:7). E taime maita’i paha te reira nō te tauturu i te mau melo o te ’utuāfare ’ia fa’aineine i te rave i te i’oa o te Mesia i ni’a ia rātou i te bāpetizora’a.

Te Parau Ha’api’ira’a ’e te mau Parau Fafau 19:15–20.Nō te tauturu i tō ’outou ’utuāfare ’ia fāri’i mai i te tahi mea ta’a ’ē i roto i teie mau ’īrava, e nehenehe ’outou e tai’o i te reira ma te fa’a’ite i te hōho’a nō Iesu Mesia (tē vai ra hō’ē i roto i teie arata’i). ’Ei reira e nehenehe ai rātou e fa’a’ite mai i tō rātou mana’o nō ni’a i te Fa’aora. E nehenehe ato’a te hō’ē hīmene auhia nō ni’a i te Fa’aora e tītau i te Vārua.

Nō te tahi atu mau mana’o nō te ha’api’ira’a i te mau tamari’i, hi’o te arata’i o teie hepetoma i roto Mai, pe’e mai—nō te Paraimere.

Hīmene tei mana’ohia : « Tē maēre nei au », Te mau hīmene, n°111.

Ha’amaita’ira’a i te tuatāpapara’a pāpa’ira’a mo’a a te ta’ata iho

E ui i te mau uira’a. E fa’a’itera’a Te Parau Ha’api’ira’a ’e te mau Parau Fafau nō te arata’i te mau uira’a i te heheura’a. ’A tuatāpapa ai ’outou i te mau pāpa’ira’a mo’a, ’a pāpa’i i te mau uira’a e hiti mai. ’Ei reira e feruri hōhonu ai ’e e pure ai nō te mau pāhonora’a.

tē pure ra te Mesia i roto i te ’ō nō Getesemane

Tē pure ra te Mesia i roto i te ’ō nō Getesemane, nā Hermann Clementz