8–14 nō Māti

Te Parau Ha’api’ira’a ʼe te Mau Parau Fafau 23–26

« ’Ia fa’a’eta’eta i te ’Ēkālesia »

’A fa’aineine ai ’outou nō te ha’api’i, ’a feruri i te mau mana’o nō te ’ohipara’a i roto i te tuha’a « Te mau tamari’i ’āpī » ’e « Te mau tamari’i pa’ari »

Pāpa’i i te mau mana’o e tae mai

Tītau i te mana’o

Fa’a’ite i te hō’ē hōho’a nō Emma Smith (hiʼo i te arata’i nō teie hepetoma i roto i te Mai, pe’e mai—nō te ta’ata hō’ē ’e te ’utuāfare). ’A ani i te mau tamari’i ’ia fa’a’ite mai i te mea tā rātou i ’ite nō ni’a iāna, tae noa atu i te mau mea tā rātou i ha’api’i mai nā roto i te tuatāpapara’a i Te Parau Ha’api’ira’a ’e te mau Parau Fafau 25 i teie hepetoma i ma’iri a’e nei ».E nehenehe te Pene 13 : Iosepha ’e o Emma » (Te mau ’ā’amu nō Te Parau Ha’api’ira’a ’e te mau Parau Fafau, 51–55.) e tauturu.

Ha’api’i i te ha’api’ira’a tumu : Te mau tamari’i ’āpī

Te Parau Ha’api’ira’a ’e te mau Parau Fafau 23:6 ; 26:1

Tē hina’aro nei te Atua ’ia pure au ’e ’ia ha’api’i mai nā roto mai i te mau pāpa’ira’a mo’a i te mau mahana ato’a.

’Ua a’o te Fatu i te feiā fa’atere mātāmua ’e i te mau hoa o te ’Ēkālesia ’ia pure (hi’o Te Parau Ha’api’ira’a ’e te mau Parau Fafau 23:6), ’e ’ia tuatāpapa i te mau pāpa’ira’a mo’a (hi’o Te Parau Ha’api’ira’a ’e te mau Parau Fafau 26:1). Nāhea e ti’a ai ia ’outou ’ia tauturu i te mau tamari’i ’ia fa’ariro i te pure ’e i te mau pāpa’ira’a mo’a ’ei tuha’a nō tō rātou orara’a ?

Te mau ’ohipa e nehenehe e rave

• E tai’o i te mau tamari’i i Te Parau Ha’api’ira’a ’e te mau Parau Fafau 23:6, ma te ha’amata nā ni’a « e pure ’oe » E tauturu ia rātou ’ia ’ite mai i te mau rāve’a rau ’e i te mau vāhi tā te Fatu i parau mai ia tātou e pure. E ani ia rātou ’ia pāpa’i hōho’a ’ia rātou iho e pure ra i roto i te hō’ē o te reira mau rāve’a ’aore rā, mau vāhi.

• Mai te mea e hina’arohia, e fa’ata’a i te mau tamari’i nāhea ’ia pure. E nehenehe te hō’ē hīmene nō ni’a i te pure, mai te « I Pray in Faith » (Children’s Songbook,14), e tauturu.

• E tai’o i te mau tamari’i « E ha’apa’ohia tō ’outou taime i te ha’api’ira’a mai i te mau pāpa’ira’a mo’a » (Te Parau Ha’api’ira’a ’e te mau Parau Fafau 26:1). E parau ia rātou nō te aha ’outou e tuatāpapa ai i te mau pāpa’ira’a mo’a. Tauturu ia rātou ’ia feruri i te mau rāve’a e nehenehe ai ia rātou ’ia ha’api’i mai i te mau pāpa’ira’a mo’a, noa atu ē, ’aitā rātou e nehenehe e tai’o.

• E hīmene ’āmui « Quand je lis l’Écritures saintes » (Chants pour les enfants, 66) ’aore rā, te tahi atu hīmene nō ni’a i te pure ’e te tuatāpapara’a i te mau pāpa’ira’a mo’a. Tauturu i te mau tamari’i ’ia ’ite mai i te mau ha’amaita’ira’a tei fafauhia mai i roto i te hīmene. E parau ia rātou nō ni’a i te mau mana’o pae vārua tā ’outou i fāri’i ’a pure ai ’e ’a tai’o ai i te mau pāpa’ira’a mo’a.

Te Parau Ha’api’ira’a ’e te mau Parau Fafau 25:11–12

’Ua here Iesu i « te hīmene o te ’ā’au ».

’Ua parau te Fatu ē, ’ua riro te hīmene mo’a, « ’ei ha’amāuruurura’a iā’u. » Tauturu i te mau tamari’i ’ia hi’o i te hīmenera’a ’eiaha ’ei ’ohipa ’ārearea noa ’ei rāve’a ato’a rā nō te ha’amori iāna.

Te mau ’ohipa e nehenehe e rave

• E ani i te tamari’i tāta’itahi ’ia fa’a’ite mai i tāna hīmene ’aore rā, te hīmene purera’a au roa, ’e e hīmene ’āmui i te tahi o te reira mau hīmene. Tai’o i Te Parau Ha’api’ira’a ’e te mau Parau Fafau 25:12 i te mau tamari’i, ’e e ani ia rātou ’ia feruri e nāhea te Metua i te ao ra ’e o Iesu Mesia ’ia fāri’i i te reira ’ia fa’aro’o ana’e rāua ia tātou ’ia hīmene i te reira mau hīmene.

• Ha’api’i i te mau tamari’i i te hō’ē hīmene nō ni’a i te hīmenera’a, mai te « Lift Up Your Voice and Sing » (Children’s Songbook, 252), ’aore rā, i te hō’ē hīmene nō ni’a ia Iesu Mesia, mai te « Il envoya son Fils aimé » (Chants pour les enfants, 20–21). E ani ia rātou ’ia hīmene i te reira hīmene ’e tō rātou ’utuāfare i teie hepetoma.

  

  Te hīmenera’a o te hō’ē ïa rāve’a e nehenehe tātou e fa’a’ite i tō tātou here i te Atua.

Te Parau Ha’api’ira’a ’e te mau Parau Fafau 25:13, 15

E nehenehe au e fa’aineine nō te rave i te mau fafaura’a mo’a.

Tē fa’aineine rā te mau tamari’i tā ’outou e ha’api’i nei, nō te rave i tā rātou fafaura’a mātāmua ’e te Metua i te ao ra ’ia bāpetizo-ana’e-hia rātou. Nāhea e ti’a ai ia ’outou ’ia tauturu ia rātou ’ia ’ite i te faufa’a rahi o tā tātou mau fafaura’a ?

Te mau ’ohipa e nehenehe e rave

• Tai’o Te Parau Ha’api’ira’a ’e te mau Parau Fafau 25:13 i te mau tamari’i. E fa’ata’a ē, te aura’a nō te ta’o ra « a ’ati atu » i roto i teie ’īrava ’oia ho’i, ’ia tāpe’a pa’ari i ni’a i te hō’ē mea. Nō te tauturu ia rātou ’ia māramarama, ’a hōro’a i te hō’ē mea pa’ari, mai te hō’ē ōfa’i (’aore rā, hō’ē tāpū auri), fa’a’ati i te piha ’e e ani i te mau tamari’i ’ia tāpe’a i te reira tao’a ma te pūai hope e ti’a ia rātou. ’A fa’ata’a ē, te aura’a nō te parau ē, e ’ati atu i tā tātou mau fafaura’a ’oia ho’i, e tāpe’a (’aore rā, e ha’apa’o ) i te mau parau tohu tā tātou i rave ’e te Metua i te ao ra ’e ’eiaha e vaiiho ’ia reva (’aore rā, ’eiaha e fa’aru’e fa’ahou).

• E fa’a’ohipa i te ’api ’ohipara’a nō teie hepetoma nō te ha’api’i i te mau tamari’i nō ni’a i te mau taime a rave ai tātou i te mau fafaura’a ’e te Metua i te ao ra. E tai’o i Te Parau Ha’api’ira’a ’e te mau Parau Fafau 25:15, ’e e fa’ata’a ē, « te korona parau-ti’a » e fa’ahōho’ara’a ïa i te mau ha’amaita’ira’a nō te ho’i-fa’ahou-ra’a e ora i pīha’i iho i te Atua, tō tātou Ari’i i te ao ra.

Ha’api’i i te ha’api’ira’a tumu : Te mau tamari’i pa’ari

Te Parau Ha’api’ira’a ’e te mau Parau Fafau 23:3–7 ; 25:7

Tē hina’aro nei Iesu ’ia ha’apūai au i te feiā ’ati a’e iā’u.

I te fa’anaho-mātāmua-ra’a-hia te ’Ēkālesia, ’aita i rahi te melo. ’Ua ani te Fatu i te Feiā Mo’a ’ia patu i te ’Ēkālesia nā roto i te fa’a’itera’a i te ’evanelia ’e te ha’apūaira’a i te tahi ’e te tahi. E nehenehe tātou e nā reira ato’a i teie mahana.

Te mau ’ohipa e nehenehe e rave

• E ani i te mau tamari’i ’ia ’ite mai i te mau fa’ahōho’ara’a ato’a nō te mau ta’o ra « fa’aa’ora’a » ’e « fa’aa’o » i roto i Te Parau Ha’api’ira’a ’e te mau Parau Fafau 23:3–7 ; 25:7. Tauturu ia rātou ’ia tātara i te aura’a o teie mau ta’o. Nāhea te fa’aa’ora’a i te hō’ē ta’ata i te fa’aitoito ia rātou ? ’A ani i te mau tamari’i ’ia ha’uti teata mai te « fa’aa’ora’a » i te hō’ē ta’ata e rave rā nā roto i te here.

• Nāhea tātou e nehenehe ai e rave maita’i a’e i roto i te ’ohipa nō te ha’apūaira’a i te tahi atu mau melo o te ’Ēkālesia ? Nō te fa’ahōho’a i teie parau tumu, e hōro’a i te hō’ē tamari’i i te hō’ē ’ohipa ’o tē tītau e rave rahi ta’ata tauturu. I muri iho e ani i te tahi atu mau tamari’i ’ia tauturu, ’e ’ia ’āparau e nāhea ’ia fa’ariro i te ’ohipa ’ei mea ’ōhie. Fa’a’ite i te hō’ē ’itera’a i reira ’outou i ha’apūaihia ai nā roto i te tāvinira’a a te mau melo hoa o te ’Ēkālesia.

Te Parau Ha’api’ira’a ’e te mau Parau Fafau 24:1, 8

E nehenehe te Fa’aora e fa’ateitei iā’u « mai roto mai i [tō’u] ra mau pe’ape’a ».

’Ua māuiui o Iosepha Semita i te mau tāmatara’a e rave rahi, terā rā, ’ua ti’a iāna « ’ia fa’a’oroma’i i roto i te mau pe’ape’a » nō te mea ’ua fafau mai te Fatu ē, e vai noa ’oia i pīha’i iho iāna.

Te mau ’ohipa e nehenehe e rave

• Tauturu i te mau tamari’i ’ia tāpura i ni’a i te tāpura ’ere’ere te tahi o te mau ’ati ’aore rā, te mau tāmatara’a tā Iosepha Semita ’e te tahi atu mau feiā mo’a mātāmua i fa’aruru (hi’o « Pene 11 : Rahi atu te ta’ata i tomo mai i roto i te ’Ēkalesia », Te mau ’ā’amu nō Te Parau Ha’api’ira’a ’e te mau Parau Fafau, 46–47, ’aore rā, te video nō ni’a i te reira i ni’a i te ChurchofJesusChrist.org). I muri iho e ani ia rātou ’ia ’ite mai e aha tā te Fatu i parau ia Iosepha nō ni’a i tōna mau ’ati i roto i Te Parau Ha’api’ira’a ’e te mau Parau Fafau 24:1, 8. Nāhea tātou e nehenehe ai e ’imi i te tauturu a te Fa’aora ’ia tae ana’e mai te mau tau fifi ?

• Nō te ha’api’i i te mau tamari’i ē, i te tahi taime, e tītauhia ia tātou ’ia « fa’a’oroma’i i [tō tātou] mau ’ati », e nehenehe ’outou e fa’a’ite i te video « Tāmau noa i te fa’a’oroma’i » (ChurchofJesusChrist.org). E ani i te mau tamari’i ’ia feruri i te hō’ē mea tā rātou e hina’aro mau terā rā ’ua tītauhia ’ia tīa’i. Nō te aha te Fatu e tītau ai ia tātou i te tahi taime ’ia fa’a’oroma’i i roto i te mau taime fifi i roto i tō tātou orara’a ? Nāhea ’oia i te fa’a’ite mai ia tātou ē, « tei pīha’i iho ’oia [ia tātou] » i roto i tō tātou mau ’ati ?

Te Parau Ha’api’ira’a ’e te mau Parau Fafau 25:13.

E nehenehe au e « ’ati atu i te mau fafau » tā’u i rave.

’Aita i maoro, i muri a’e i te bāpetizora’ahia o Emma Smith, ’ua parau te Fatu iāna « a ’ati atu i te mau fafau tā ’oe i fa’aau ra ». E feruri nāhea teie parau a’o e nehenehe ai e ha’amaita’i i te mau tamari’i tā ’outou e ha’api’i ra.

Te mau ’ohipa e nehenehe e rave

• Tai’o ’āmui i Te Parau Ha’api’ira’a ’e te mau Parau Fafau 25:13, ’e e ani i te mau tamari’i e aha te aura’a i roto i teie ’īrava « ’a ’ati atu i te mau fafau » tā tātou e rave. Nō te fa’ahōho’a, ’a hōro’a fa’a’ati i te mau tao’a tei tā’amu-pa’ari-’āmui-hia ’e e vaiiho i te mau tamari’i ’ia tāmata i te fa’ata’a ’ē i te reira. Nō te aha te ta’o « ’ati » i riro ai ’ei ta’o maita’i nō te fa’ata’a e nāhea tātou e nehenehe ai e feruri i tā tātou mau fafaura’a ?

• Mai te mea e hina’arohia, ’a tai’o fa’ahou ’e te mau tamari’i i te mau fafaura’a tā tātou e rave ’ia bāpetizo-ana’e-hia tātou (hi’o Mosia 18:8–10 ; Te Parau Ha’api’ira’a ’e te mau Parau Fafau 20:37). E aha te aura’a nō te parau ra e « ’ati » atu i teie mau fafaura’a ?

• E hi’o ’āmui i te tahi o te mau mea tā ’outou i ’ite nō ni’a i te orara’a o Emma Smith (hi’o « Pene 13 : Iosepha ’e o Emma » [Te mau ’ā’amu nō te Parau Ha’api’ira’a ’e te mau Parau Fafau, 51–55], ’aore rā, te video nō ni’a i te reira i ni’a i te ChurchofJesusChrist.org). E hōro’a i te tamari’i tāta’itahi i te hō’ē ’īrava ’aore rā, e piti nō roto mai i te tuha’a 25, ’e e ani ia rātou ’ia fa’a’ite mai nāhea te a’ora’a ’e te fa’auera’a a te Fatu i te tauturura’a ia Emma ’ia « ’ati atu i te mau fafaura’a » tāna i rave. Nāhea e ti’a ai ia tātou ’ia pe’e i tōna hi’ora’a ?

Fa’aitoito i te ha’api’ira’a mai i te fare

Ani i te mau tamari’i ’ia rave i te hō’ē ’īrava auhia ’o tā ’outou e ’āparau ’āmui, e pāpa’i i te fa’ahorora’a, ’e e fa’a’ite i te reira i te hō’ē melo o te ’utuāfare ’aore rā, i te hō’ē hoa.

Ha’amaita’iraʼa i tā tātou ha’api’ira’a

Fa’aitoito i te fa’aturara’a. Tauturu i te mau tamari’i ’ia hāro’aro’a ē, te hō’ē fāito faufa’a roa o te fa’aturara’a, ’o te ferurira’a ïa i te Metua i te Ao ra ’e ia Iesu Mesia. E ti’a paha ia ’outou ’ia fa’aha’amana’o ia rātou ’ia vai fa’atura noa nā roto i te hīmene-marū-ra’a ’aore rā, te hīmenemenera’a i te hō’ē hīmene, ’aore rā, te fa’a’itera’a i te hō’ē hōho’a nō Iesu.