« 4–10 nō Tēnuare. Iosepha Semita—’Ā’amu 1:1–26 : ‘’Ite atu ra vau i te hō’ē pou māramarama’ » Mai, pe’e mai—nō te ta’ata hō’ē ’e te ’utuāfare : Te Parau Ha’api’ira’a ’e te mau Parau Fafau 2021 (2020)
« 4–10 nō Tēnuare. Iosepha Semita—’Ā’amu 1:1–26 », Mai, pe’e mai—nō te ta’ata hō’ē ’e te ’utuāfare : 2021
Te uru rā’au mo’a, nā Greg K. Olsen
4–10 nō Tēnuare.
Iosepha Semita—’Ā’amu 1:1–26
« ’Ite atu ra vau i te hō’ē pou māramarama »
’Ia tai’o ’outou i te Iosepha Semita—’Ā’amu 1:1–26, e aha te mau poro’i tā ’outou e ’ite nei nō tō ’outou orara’a ? E aha te mea faufa’a a’e nō ’outou ’e nō tō ’outou ’utuāfare ?
Pāpa’i i te mau mana’o e tae mai
Te Parau Ha’api’ira’a ’e te mau Parau Fafau, ’o te hō’ē ïa buka nō te mau pāhonora’a i te mau pure : E rave rahi heheura’a mo’a i roto i teie buka ’ua tae mai ’ei pāhonora’a i te mau uira’a. Nō reira, e mea tano ’ia ha’amata te tuatāpapara’a i Te Parau Ha’api’ira’a ’e te mau Parau Fafau nā roto i te ferurira’a i te uira’a tei ha’amata te mani’ira’a o te heheura’a i te mau mahana hope’a nei—teie tā Iosepha Semita i ui i roto i te hō’ē uru rā’au i te matahiti 1820. « I rotopū i taua mau ’arora’a parau ra ’e te māniania nō te fa’a’itera’a i te mana’o » (Iosepha Semita—’Ā’amu 1:10) ’ua ta’a ’ore roa atu ra Iosepha nō ni’a i te ha’apa’ora’a fa’aro’o ’e te vaira’a o tōna vārua ; penei a’e ’ua ’ite ato’a ’outou i te reira. E rave rahi mau mana’o ’e mau reo titotito i tō tātou nei tau, ’e ’ia hina’aro tātou e tīti’a i teie mau poro’i nō te ’ite mai i te parau mau, e nehenehe tātou e rave mai tā Iosepha i rave. E nehenehe tātou e ui i te mau uira’a, tuatāpapa i te mau pāpa’ira’a mo’a, e feruri ’e e ui atu i te Atua i te hope’a. ’Ei pāhonora’a i te pure a Iosepha, ’ua pou mai te hō’ē pou māramarama mai te ra’i mai ; ’ua fā mai te Atua te Metua ’e Iesu Mesia ’ei pāhonora’a i tāna mau uira’a. Tē ha’apāpū roa nei te ’itera’a pāpū o Iosepha Semita nō ni’a i teie temeio ē, « te ta’ata tei ’ere i te ’ite, e nehenehe tāna e ani i te Atua, ’e e roa’a iāna te ’ite » (Iosepha Semita—’Ā’amu 1:26). E nehenehe tātou pā’āto’a e fāri’i, e ’ere paha i te hō’ē ’ōrama hanahana, i te hō’ē ’ōrama māramarama a’e paha, tei tūramahia e te māramarama o te ra’i.
Mau mana’o nō te tuatāpapara’a pāpa’ira’a mo’a a te ta’ata hō’ē
’O Iosepha Semita te peropheta nō te fa’aho’i-fa’ahou-ra’a mai.
Te fā nō te ’ā’amu o Iosepha Semita, ’o te hōro’ara’a mai ïa i « te mau mea tei tupu » inaha ’ua taui-haere-noa-hia te parau mau nō ni’a ia Iosepha (Iosepha Semita—’Ā’amu 1:1). ’Ia tai’o ’oe i te Iosepha Semita—’Ā’amu 1:1–26, e aha te mea e ha’apūai nei i tō ’oe ’itera’a pāpū nō ni’a i tōna pi’ira’a hanahana ? ’A tāpa’o i te mau fa’a’itera’a tā ’oe e ’ite ra nō ni’a i te fa’aineinera’a te Fatu ia Iosepha Semita nō tāna misiōni ’ei peropheta. ’A tai’o noa ai ’oe, e nehenehe ato’a tā ’oe e pāpa’i i te mau mana’o i roto i tō ’oe ferurira’a ’e tō ’oe ’ā’au nō ni’a ia Iosepha Semita ’e tōna ’itera’a pāpū.
Hi’o ato’a Feiā mo’a, 1:3–19.
’Ia ani au ma te fa’aro’o, e pāhono mai te Atua.
’Ua « ’ere » a’ena ānei ’oe i te pa’ari ’aore rā ’ua ta’a ’ore ānei ’oe e aha te fa’aotira’a e rave ? (Iosepha Semita—’Ā’amu 1:13). E aha te ha’api’ira’a tā ’oe e ’apo mai i roto i te ’ohipa i tupu nō Iosepha Semita i roto i te mau ’īrava 5–20 ? ’A feruri i tō ’oe iho hina’aro i te pa’ari ’e te māramarama rahi a’e, ’e ’a feruri nāhea ’oe i te ’imi i te parau mau.
Hi’o ato’a 1 Nephi 10:17–19 ; 15:6–11 ; Russell M. Nelson, « Heheura’a nō te ’Ēkālesia, heheura’a nō tō tātou orara’a », Ensign ’aore rā Liahona, Mē 2018, 93–96.
E nehenehe tā tātou e ui i te Atua i tā tātou mau uira’a nā roto i te pure.
Nō te aha ’ua rau te mau fa’ati’ara’a nō te ’Ōrama mātāmua ?
I roto i tōna orara’a, ’ua pāpa’i Iosepha Semita i te ’ohipa i tupu i roto i te uru rā’au mo’a e maha a’e taime, pinepine nā te hō’ē ta’ata e pāpa’i nōna. Hau atu, e rave rahi ’ā’amu tei pāpa’ihia e te mau ta’ata tei fa’aro’o ia Iosepha i te fa’ati’ara’a i tāna ’ōrama. Noa atu ā te tahi ri’i mau ta’a-’ē-ra’a i roto i teie mau fa’ati’ara’a, tei te huru te ta’ata ’e te vāhi, ’ua tū’ati ra te ’ā’amu. ’E e ha’amāramarama mai terā tuha’a ’e terā tuha’a i te ’ohipa i tupu nō Iosepha Semita, mai nā maha ’evanelia e tauturu nei ia tātou ’ia māramarama maita’i a’e i te tāvinira’a a te Fa’aora.
Nō te tai’o i te tahi atu mau fa’ati’ara’a nō Iosepha, hi’o « Mau fa’ati’ara’a o te ’Ōrama Mātāmua » (Mau tumu parau o te ’evanelia, topics.ChurchofJesusChrist.org). E aha tā ’oe i ’apo mai ’a tai’o ai ’oe i teie mau fa’ati’ara’a ato’a ?
’Ua ’ōmua te ’Ōrama Mātāmua i te fa’aho’i-fa’ahou-ra’a mai o te ’evanelia a Iesu Mesia.
’Ua ti’aturi Iosepha Semita ē, e pāhono te Atua i tāna pure, ’aita rā ’oia i mana’o ē, e taui roa terā pāhonora’a i tōna orara’a—’e te ao nei. ’Ia tai’o ’oe i te ’ohipa i tupu nō Iosepha, ’a feruri nāhea te ’Ōrama Mātāmua i te tauira’a i tō ’oe orara’a. ’Ei hi’ora’a, e rave rahi huru nō te fa’aoti i teie pereota : « Maoti te ’Ōrama Mātāmua i ’ite ai au ē… » Nāhea ’oe i te ha’amaita’ira’ahia maoti te ’Ōrama Mātāmua ?
Hi’o ato’a « ’A ani i te Atua : Te ’Ōrama Mātāmua a Iosepha Semita », te video, ChurchofJesusChrist.org ; Te feiā mo’a, 1:14–19 ; Russell M. Nelson, « ’A fa’aro’o iā’na », Ensign ’aore rā Liahona, Mē 2020, 88–92.
E nehenehe au e vai ha’apa’o noa i tā’u i ’ite, noa atu ā e tau’a ’ore mai vetahi iā’u.
Hō’ē o te mau ha’amaita’ira’a nō te mau pāpa’ira’a mo’a, ’o te mau hi’ora’a fa’auru ïa nō ni’a i te mau tāne ’e te mau vahine itoito tei fa’aruru i te fifi ma te fa’aro’o ia Iesu Mesia. I te fa’arurura’a Iosepha Semita i te pāto’ira’a nō ni’a i tōna ’ōrama, ’ua fa’atū’ati ’oia iāna i te ’āpōsetolo Paulo, tei hāmani-’ino-ato’a-hia nō tōna fa’a’itera’a ē, e ’ōrama tāna i fāri’i. ’A tai’o ai ’oe i te ’ā’amu nō Iosepha, e aha te mea e fa’auru ia ’oe ’ia vai ha’apa’o noa i tō ’oe ’itera’a pāpū ? E aha te tahi atu mau hi’ora’a—i roto i te mau pāpa’ira’a mo’a ’aore rā nō roto mai i te mau ta’ata tā ’oe i mātau—e hōro’a nei ia ’oe i te itoito nō te vai ha’apa’o noa i te mau ’ohipa pae vārua i tupu nō ’oe ?
Mau mana’o nō te tuatāpapara’a pāpa’ira’a mo’a a te ’utuāfare ’e te pō ’utuāfare
-
Iosepha Semita—’Ā’amu 1:6.Nāhea tātou ’ia fa’aruru i te mau mana’o tū ’ore ma te ’ore e mārō roa mai te mau ta’ata i fa’ahitihia i roto i teie ’īrava ?
-
Iosepha Semita—’Ā’amu 1:11–13.E nehenehe te tai’ora’a i teie mau ’īrava e fa’auru i te mau melo o te ’utuāfare ’ia fa’a’ite mai i te ’ohipa i tupu i te putapūra’a tō rātou ’ā’au i te hō’ē tuha’a ’īrava ’e tei fa’auru ia rātou e rave.
-
Iosepha Semita—’Ā’amu 1:16–20.’A tai’o ai tō ’outou ’utuāfare i teie mau ’īrava, ’a feruri i te fa’a’ite atu i te hōho’a pēni e ’āpe’e i teie arata’i ’aore rā i te tahi atu hōho’a nō te ’Ōrama mātāmua (penei a’e e au mai tō ’outou ’utuāfare e pāpa’i i tā rātou iho hōho’a nō te reira). E nehenehe ato’a ’outou e māta’ita’i i te video « Ani i te Atua : Te ’Ōrama Mātāmua o Iosepha Semita » (ChurchofJesusChrist.org). E nehenehe ’outou tāta’itahi e hāmani i te hō’ē tāpura nō te mau parau mau tā tātou e ’apo mai i roto i teie ’ōrama, ’ei reira e fa’a’ite atu ai i tā ’outou mau tāpura i te tahi ’e te tahi. E taime rahi mau te reira nō te mau melo o te ’utuāfare nō te fa’a’ite nāhea i te noa’ara’a tō rātou ’itera’a pāpū nō ni’a i te ’Ōrama Mātāmua o Iosepha Semita.
-
Iosepha Semita—’Ā’amu 1:17.I te fāra’a te Atua ia Iosepha Semita, ’ua pi’i ’oia ia Iosepha i tōna i’oa. E aha te taime ’a ’ite ai te mau melo o tō ’outou ’utuāfare ē, ’ua ’ite ta’a ’ē te Metua i te Ao ra ia rātou ?
-
Iosepha Semita—’Ā’amu 1:21–26.Nāhea tātou i te pāhono ’ia vahavaha te ta’ata i tō tātou ’itera’a pāpū ?
Nō te tahi atu mau mana’o nō te ha’api’ira’a i te mau tamari’i, hi’o te arata’i nō teie hepetoma i roto Mai, pe’e mai—nō te Paraimere.
Hīmene tei mana’ohia : « Te pure mātāmua a Iosepha Semita », Te mau Hīmene, no.°15.
Mau reo nō te fa’aho’i-fa’ahou-ra’a mai
Te ’utuāfare o Iosepha Semita
’Ua putapū hōhonu roa tātou pā’āto’a nā tō tātou orara’a ’utuafare, ’e ’aita ’o Iosepha Semita i ta’a ’ē roa atu. ’Ua ueue te mau mana’o pāpū ’e te mau peu pae fa’aro’o o tōna nā metua i te mau huero nō te fa’aro’o tei fa’atupu i te fa’aho’i-fa’ahou-ra’a mai. ’Ua pāpa’i Iosepha i roto i tāna buka ’ā’amu i teie parau fa’ahanahana : « ’Aita e parau ’e ’aita e reo ’o tē nehenehe e fa’a’ite i tō’u māuruuru i te Atua nō te hōro’ara’a mai iā’u i nā metua maita’i roa ».1
E fa’a’ite te mau fa’ahitira’a i muri nei nō tōna metua vahine ia Lucy Mack Smith ; tōna taea’e ’o William Smith ; ’e te peropheta iho, i te fa’aurura’a pae fa’aro’o i roto i te ’utuāfare Smith.
Te ’utuāfare o Iosepha Semita, nā Dan Baxter
Lucy Mack Smith
« [I te matahiti 1802], ’ua ma’ihia vau… ’Ua nā ’ō vau iā’u iho nei ē, ’aita vau i ineine nō te pohe, ’aita ho’i au i ’ite i te mau haere’a a te Mesia, e au ē e moana tārere ta’ota’o ’e te mo’emo’e i rotopū iā’u ’e te Mesia ’o tā’u e ’ore e tāmata e tīroa atu…
« ’Ua fāriu atu vau i ni’a i te Fatu ’e ’ua tāparu ’e ’ua ti’aoro vau i te Fatu e fa’aherehere i tō’u orara’a ’ia ’atu’atu vau i tā’u mau tamari’i ’e ’ia tāmarū i te ’ā’au o tā’u tāne ; mai te reira ïa vau i te tāravara’a i terā pō tā’āto’a… ’Ua fafau vau i te Atua [ē], ’ia vaiiho mai ’oia iā’u ’ia ora, e tūtava ïa vau nō te tītau i terā ha’apa’ora’a ’ia ti’a iā’u ’ia tāvini ti’a iāna, tei roto ānei i te Bibilia ’aore rā ’ia ’itehia mai te reira, noa atu ā e noa’a mai te reira nō te ra’i mai nā roto i te pure ’e te fa’aro’o. Ē tae mai nei iā’u te hō’ē reo tei nā ’ō mai : E ’imi, e ’itea ïa ia ’outou ; e pātōtō atu, e ’īritihia mai te ’ōpani ia ’outou. ’Ia tāmāhanahanahia tō ’ā’au. Ti’aturi ’oe i te Atua ; ti’aturi ato’a ’oe iā’u nei…’
« Mai te reira atu taime, ’ua noa’a tāmau mai tō’u pūai. ’Aita vau i paraparau rahi nō ni’a i te ha’apa’ora’a fa’aro’o noa atu ā ’ua māna’ona’o rahi au i te reira, ’e ’ua mana’o vau e fa’aitoito roa vau i te taime iho ā e haere iā’u ’ia ’imi i te ta’ata paieti tei ’ite i te mau haere’a o te Atua nō te ha’api’i mai iā’u i te mau mea o te ra’i ».2
William Smith
« Nō tō’u metua vahine, teie vahine paieti mau ’e te māna’ona’o roa i te maita’i o tāna mau tamari’i, i’ō nei ’e i muri mai ato’a, ’ua fa’a’ohipa ’oia i te mau mauiha’a ato’a tei roa’a i tōna here metua, nō te fa’aō ia mātou i roto i te ’imira’a i te fa’aorara’a i tō mātou vārua, ’aore rā (mai tei parauhia i terā tau) i roto i te ha’apa’ora’a fa’aro’o’. ’Ua tūra’i māite ’oia ia mātou nō te haere i te mau rurura’a, fātata roa te ’utuāfare tā’āto’a tei ’ana’anatae i terā ’ohipa, ’e ’ua riro mai ’ei feiā ’imi parau mau ».3
« ’Ua rave noa mātou i te mau pure ’utuāfare ’ia ha’amana’o vau. Tē ha’amana’o maita’i nei au i tō’u metua tāne i te tu’ura’a i tōna nā tīti’a mata i roto i tōna pūtē pereue… ’e ’ia ’ite mātou te mau tamāroa iāna i te fāfāra’a i tōna tīti’a mata, ’ua ’ite mātou e tāpa’o te reira nō te fa’aineine nō te pure, ’e mai te peu noa atu ’aita mātou i ha’apa’o a’e, e nā ’ō mai ïa māmā : E William’, ’aore rā te tahi tamari’i ’aita i ha’apa’o mai, ‘’a fa’aineine nō te pure’. I muri mai i te pure e hīmene mātou i te hō’ē hīmene ».4
’Ua ha’api’i Joseph metua ’e Lucy Smith i tō rāua ’utuāfare ’ia tuatāpapa i te mau pāpa’ira’a mo’a.
Iosepha Semita
« I teienei, nō ni’a i [tō’u nei metua tāne], ’aita ’oia i rave a’enei i te hō’ē ’ohipa ’ino e parauhia ai ē, e ’ere ’oia i te rima here, i roto i tōna orara’a, ’ia ha’amana’o vau. ’Ua here roa vau i tō’u metua tāne ’e tōna mēharo ; ’e tē vai nei te mēharo nō tāna mau ’ohipa hanahana ari’i i rave i ni’a i tō’u ferurira’a ; ’e ’ua pāpa’ihia e rave rahi parau marū metua i ni’a i te ’iri pāpa’i o tō’u ’ā’au. E mea mo’a nō’u te mau mana’o tā’u e poihere nei nō te ’ā’amu o tōna orara’a, tei ’ohu i roto i tō’u ferurira’a ’e tei tanuhia i reira, nā roto i tā’u iho nei hi’ora’a mai tō’u fānaura’a mai ā… ’O tō’u metua vahine ato’a hō’ē o te mau ta’ata huru ari’i roa, ’e te vahine maita’i roa a’e i roto i te mau vahine ».5
Te ’Ōrama Mātāmua o te fa’aho’i-fa’ahou-ra’a mai, nā Michael Bedard