Tau ’auhune i te fenua Farāni ; nā James Taylor Harwood

18–24 nō Tēnuare

Te Parau Ha’api’ira’a ’e te mau Parau Fafau 3–5

« E haere ïa tā’u ’ohipa i mua »

Pāpa’i e aha tā ’outou i ha’api’i mai ’e i putapū ’a tai’o ai ’outou i te mau pāpa’ira’a mo’a. E tauturu te reira ia ’outou ’ia ha’amana’o i te reira mau putapūra’a ’e ’ia fa’a’ite atu ia vetahi ’ē.

Pāpa’i i te mau mana’o e tae mai

I roto i nā matahiti mātāmua ’ei peropheta nā te Fatu, ’aita ’o Iosepha Semita i ta’a pauroa nō ni’a i te « ’ohipa māere » ’ua pi’ihia ’oia ’ia rave. Hō’ē rā mea tā tōna mau ’itera’a mātāmua i ha’api’i iāna, ’oia ho’i, nō te fa’ata’a ia ’oe ’ia rave i te ’ohipa a te Atua, e mea tītauhia i tōna mata ’ia « rōtahi i te hanahana o te Atua » (Te Parau Ha’api’ira’a ’e te mau Parau Fafau 4:1, 5). ’Ei hi’ora’a, mai te mea e hōro’a te Fatu iāna i te hō’ē parau a’o ’o tē pāto’i i tōna iho mau hina’aro, tītauhia iāna ’ia pe’e i te parau a’o a te Fatu. ’E noa atu ā ’ua noa’a iāna « e rave rahi… heheura’a [’e] te mana nō te ravera’a i te hō’ē mau ’ohipa rarahi », ’ia rahi atu te faufa’a o tōna iho hina’aro i tōna mata i te hina’aro o te Atua, « ’ia hi’a atu ’oia e ti’a ai » (Te Parau Ha’api’ira’a ’e te mau Parau Fafau 3:4). ’Ua ha’api’i rā Iosepha i te tahi atu ā mea faufa’a rahi nō ni’a i te ravera’a i te ’ohipa a te Atua : « E aroha tō te Atua », ’e mai te mea e tātarahapa mau Iosepha, « ’ua vai ā [tōna] mā’itira’a i reira » (’īrava 10). Inaha te ’ohipa a te Atua, e ’ohipa fa’aorara’a ho’i. ’E « e ’ore e ti’a i [terā ’ohipa] ’ia fa’a’orehia » (’īrava 1).

Mau mana’o nō te tuatāpapara’a pāpa’ira’a mo’a a te ta’ata hō’ē

Te Parau Ha’api’ira’a ’e te mau Parau Fafau 3:1–15

’Ia tu’u vau i tō’u ti’aturi i ni’a i te Atua e ti’a ai, ’eiaha rā e mata’u i te ta’ata.

I te ha’amatara’a te tāvinira’a a Iosepha Semita, e mea pa’ari ’ia ’ite mai i te mau hoa maita’i—te mau hoa iho ā rā mai ia Martin Harris, e ta’ata fa’aturahia ’e te manuia maita’i, e ti’ara’a maita’i ho’i nō te tauturu pāpū mai. ’E ’ua hina’aro ’e ’ua turu ho’i Martin ia Iosepha, noa atu ā ’ua hi’o ’ē mai te tahi atu mau feiā iāna ’e noa atu ā ’ua tītauhia te tahi fa’atusiara’a moni.

Nō reira, e mea ’ōhie ’ia ’ite nō te aha Iosepha i hina’aro ai e fāri’i i te tītaura’a a Martin e rave i te tuha’a mātāmua nō te ’īritira’a o te Buka a Moromona nō te fa’a’ite i tāna vahine tei fē’a’a i te parau o te Buka a Moromona. ’Ua tāmau noa Iosepha i te ani i te Fatu nō ni’a i tāna tītaura’a, noa atu ā ’ua ’ōpani te Fatu i te reira, ē i te hope’a, i te torura’a o te tītaura’a, ’ua fāri’i te Fatu. Te vāhi ’ino rahi rā, ’ua mo’e te mau parau tei hōro’ahia ia Martin ra, ’e ’ua fa’ahapa-’eta’eta-hia Iosepha ’e o Martin e te Fatu (hi’o Feiā mo’a, 1:51–53).

’Ia tai’o ’oe i Te Parau Ha’api’ira’a ’e te mau Parau Fafau 3:1–15, ’a feruri nāhea te mau mana’o o te ta’ata e nehenehe ai e fa’ateimaha i ni’a ia ’oe. E nehenehe ato’a ’oe e hi’o ē, ta’a ’ē noa atu te fa’ahapara’a ia Iosepha Semita, ’ua parau ato’a te Fatu i te mau parau aroha. E aha tā ’oe i ’apo mai nō ni’a i te huru o tō te Fatu fa’atītī’aifarora’a ’e i te fa’aitoitora’a ia Iosepha ? E aha te parau a’o tā ’oe e ’ite ra ’o tē nehenehe e tauturu ia ’oe i te taime e fa’ahemahia ai ’oe ’ia mata’u rahi a’e i te ta’ata i te Atua ?

Te Parau Ha’api’ira’a ’e Te mau Parau Fafau 4

Tē ani nei te Fatu iā’u ’ia tāvini iāna ma tō’u ’ā’au ato’a

Tē fa’a’ohipa-pinepine-hia nei te tufa’a 4 nō te mau misiōnare rave tāmau. E mea au ato’a rā ’ia ’ite ē, ’ua hōro’a-mātāmua-hia teie heheura’a ia Joseph Smith, metua, tei ’ore i pi’ihia nō te hō’ē misiōni, ’āre’a rā, ’ua vai tōna « hina’aro… i te tāvini i te Atua » (’īrava 3).

Hō’ē rāve’a nō te tai’o i teie tuha’a, ’o te ferurira’a ïa i te reira ’ei parau fa’ata’ara’a ’ohipa nō te hō’ē ta’ata tei hina’aro e rave i te ’ohipa a te Fatu. E aha te mau tītaura’a ? Nō te aha e mea tītauhia teie ’aravihi ’e teie huru ? Penei a’e e nehenehe tā ’oe e mā’iti nā roto i te pure i te hō’ē ’ohipa tā ’oe e nehenehe e rave nō te « fa’aineine [ia ’oe] nō te ha’a » (’īrava 5).

Te Parau Ha’api’ira’a ’e te mau Parau Fafau 5

E nehenehe e roa’a tō’u iho ’itera’a pāpū nō ni’a i te Buka a Moromona

Martin Harris, nā Lewis A. Ramsey

’Ahani ’ua pi’ihia ’oe e fa’a’ite i mua i te hō’ē tiripuna i te parau mau nō te Buka a Moromona, e aha te mau fa’a’itera’a tā ’oe e hōro’a atu ? Te reira ato’a te uira’a i roto i te ferurira’a o Martin Harris i te parira’a tāna vahine ’o Lucy ē, ’ua tāviri Iosepha Semita i te ta’ata i te paraura’a ē, ’ua ’īriti ’oia i te mau ’api ’auro (Feiā mo’a, 1:56–58). Nō reira, ’ua ani ’o Martin ia Iosepha i te tahi mau fa’a’itera’a ē tē vai mau nei te mau ’api ’auro. Te heheura’a i roto i Te Parau Ha’api’ira’a ’e te mau Parau Fafau 5, ’o te pāhonora’a ïa i te tītaura’a a Martin.

E aha te ha’api’ira’a tā ’oe e ’apo mai i roto i Te Parau Ha’api’ira’a ’e te mau Parau Fafau 5 nō ni’a i te mau mea i muri nei :

• E aha te mana’o o te Fatu i te mau ta’ata ’aita e ti’aturi nei i te parau mau pae vārua maoti rā e mau fa’a’itera’a pāpū (hi’o mau ’īrava 5–8 ; hi’o ato’a Ioane 20:24–29).

• Te ti’ara’a nō te mau ’ite i roto i te ’ohipa a te Fatu (hi’o mau ’īrava 11–15 ; hi’o ato’a 2 Korinetia 13:1).

• Nāhea e noa’a ai tō ’oe iho ’itera’a pāpū nō te Buka a Moromona (hi’o ’īrava 16 ; hi’o ato’a Moroni 10:3–5).

Te Parau Ha’api’ira’a ’e te mau Parau Fafau 5:1–10

E fāri’i teie u’i i te parau a te Atua nā roto ia Iosepha Semita.

E aha tā Te Parau Ha’api’ira’a ’e te mau Parau Fafau 5:1–10 e ha’api’i nei ia ’oe nō ni’a i te ’ohipa faufa’a rahi a Iosepha Semita i tō tātou nei tau tu’ura’a—’e i roto ato’a i tō ’oe orara’a ? E feruri e nāhea ’oe e fāri’i ai i te parau a te Atua nā roto i te peropheta Iosepha Semita. ’A feruri e pāpa’i i roto i te hō’ē buka ’ā’amu ’aore rā e fa’a’ite atu i te hō’ē ta’ata i tō ’oe māuruuru nō te mau parau mau tei fa’aho’i-fa’ahou-hia mai ’aore rā tei ha’apāpūhia mai nā roto iāna.

Hi’o ato’a 2 Nephi 3:6–24.

Mau mana’o nō te tuatāpapara’a pāpa’ira’a mo’a a te ’utuāfare ’e te pō ’utuāfare

Te Parau Ha’api’ira’a ’e te mau Parau Fafau 3:1–4.’A ani i te hō’ē melo o te ’utuāfare ’ia pe’e i te hō’ē rēni « tīoioi » ’e i muri iho te hō’ē rēni « ’āfaro ». E aha te aura’a nō tō ’outou ’utuāfare te ’itera’a ē « e mea ’āfaro noa [te mau ’ē’a o te Atua] » ?

Te Parau Ha’api’ira’a ’e te mau Parau Fafau 3:7–10.’Ia fa’ahema te tahi ta’ata ia tātou ’ia ha’apa’o ’ore i te parau a te Atua, e aha te tahi mau parau mau i roto i teie mau ’īrava e nehenehe e tauturu ia tātou ’ia vai ha’apa’o maita’i noa ? Penei a’e e nehenehe te mau melo o te ’utuāfare ’ia ha’uti ta’ata ora i te hō’ē ’ohipa ē ’ua vai ha’apa’o maita’i noa te hō’ē ta’ata noa atu ā te fa’ahemara’a ’ia ha’apa’o ’ore i te parau a te Atua.

Te Parau Ha’api’ira’a ’e te mau Parau Fafau 4.’A paraparau ai tō ’outou ’utuāfare nō ni’a i te aura’a ’ia rohi i roto i te fa’a’apu a te Atua, e nehenehe tā rātou e raverave ri’i nā roto i te ’āua (’aore rā e fa’ahua raverave ri’i). E aha te mau mauiha’a e tītauhia nō te ’ohipa i roto i te ’āua ? E aha tā te Atua e fa’ahiti nei i roto i te tufa’a 4 ’o tē nehenehe e hi’o ’ei mauiha’a e tītauhia nō te rave i tāna ’ohipa ? E nehenehe tō ’outou ’utuāfare ’ia paraparau nō te aha e mea faufa’a rahi te mau mauiha’a tāta’itahi nō te ravera’a i te ’ohipa a te Atua.

Te Parau Ha’api’ira’a ’e te mau Parau Fafau 5:7.E aha te tahi mau hi’ora’a nō te parau mau tā tātou e nehenehe e ti’aturi ma te hi’o ’ore i te reira ? Nāhea tātou e nehenehe ai e pāhono i te hō’ē hoa tei hina’aro i te fa’a’itera’a pāpū nō te parau mau o te Buka a Moromona ?

Nō te tahi atu mau mana’o nō te ha’api’ira’a i te mau tamari’i, hi’o te arata’i o teie hepetoma i roto Mai, pe’e mai—nō te Paraimere.

Hīmene tei mana’ohia : « Je serai vaillant », Chants pour les enfants, 85.

Ha’amaita’ira’a i te tuatāpapara’a pāpa’ira’a mo’a a te ta’ata iho

Tāmau ’ā’au i te hō’ē ’īrava. « Te tāmau-’ā’au-ra’a i te hō’ē ’īrava, ’o te fa’atupura’a ïa i te hoara’a ’āpī. ’Ua riro te reira mai te ’itera’a mai i te hō’ē ta’ata ’āpī e nehenehe e tauturu mai i te taime e hina’arohia, e nehenehe e hōro’a mai i te fa’aurura’a ’e e tāmāhanahana mai, ’e ’o tē riro ’ei puna o te fa’aitoitora’a nō te tauira’a e tītauhia (Richard G. Scott, « Te mana o te pāpa’ira’a mo’a », Ensign ’aore rā Liahona, Nov. 2011, 6).

Te ahoaho nō nā ’api e 116, nā Kwani Povi Winder