Taime ’ō’otira’a i Farani, nā James Taylor Harwood

18–24 nō Tēnuare

Te Parau Ha’api’ira’a ʼe te mau Parau Fafau 3–5

« E haere ïa tā’u ’ohipa i mua »

’A tuatāpapa ai ’outou i Te Parau Ha’api’ira’a ’e te mau Parau Fafau 3–5, e nehenehe ’outou e fāri’i i te mau mana’o nō ni’a i te mau mea tā te mau tamari’i tā ’outou e ha’api’i ra e hina’aro ’ia māramarama. E nehenehe ato’a te mau ’ohipara’a i roto i teie arata’i e hōro’a mai i te mau mana’o ia ’outou.

Pāpa’i i te mau mana’o e tae mai

Tītau i te mana’o

’A fa’a’ite i te hōho’a o Iosepha Semita i roto i te arata’i nō teie hepetoma i roto i te Mai, pe’e mai—nō te ta’ata hō’ē ’e te ’utuāfare, ’e ’a tauturu i te mau tamari’i ’ia fa’a’ite mai i te mea tā rātou i ’ite nō ni’a i te ’ā’amu i fa’ahōho’ahia. Tauturu ia rātou ’ia ha’amana’o i te ’ā’amu o Martin Harris i te mo’era’a te mau ’api mātāmua o te ’īritira’a o te Buka a Moromona (hi’o « Pene 4 : Martin Harris ’e te mau ’api mo’e », Te mau ’ā’amu nō Te Parau Ha’api’ira’a ’e te mau Parau Fafau, 18–21; ’aore rā, Feiā Mo’a, 1:51–56).

Ha’api’i i te ha’api’ira’a tumu : Te mau tamari’i ’āpī

Te Parau Ha’api’ira’a ’e te mau Parau Fafau 3:7–10

E nehenehe au e mā’iti i te maita’i ’a tāmata ai vetahi i te fa’arave iā’u i te ’ino.

Tauturu i te mau tamari’i ’ia ’apo mai i te mea tā Iosepha Semita i ha’api’i mai : Mai te mea ’ua ti’aturi rātou i te Metua i te Ao ra, e pārahi mai ’oia « i pīha’i iho ia [rātou] i te mau taime pe’ape’a ato’a » (Te Parau Ha’api’ira’a ’e te mau Parau Fafau 3:8).

Te mau ’ohipa e nehenehe e rave

• Hi’o fa’ahou i te ’ā’amu o Martin Harris ’e te mau ’api parau pāpa’i i mo’e (hi’o Te mau ’ā’amu nō Te Parau Ha’api’ira’a ’e te mau Parau Fafau, 18–21, ’aore rā, te video nō ni’a i te reira i ni’a i te ChurchofJesusChrist.org). ’A fa’a’ite i te mau tamari’i i te tahi mau tupura’a i te mau taime e fa’ahemahia ai rātou ’ia rave i te hō’ē ’ohipa tā rātou i ’ite e ’ere i te mea maita’i. Nāhea e ti’a ai i te Metua i te ao ra ’ia tauturu ia tātou ’ia mā’iti i te maita’i ? (hi’o Te Parau Ha’api’ira’a ’e te mau Parau Fafau 3:8).

  

  Martin Harris, nā Lewis A.Ramsey

• ’A tai’o i teie mau parau i roto i Te Parau Ha’api’ira’a ’e te mau Parau Fafau 3:8 : « E ’ua fa’atoro mai ïa ’oia i tōna rima ’ei tauturu nō ’oe ». Ani i te mau tamari’i ’ia ti’a i ni’a ’e ’ia fa’atoro i tō rātou rima ’a tai’o fa’ahou ai ’outou i te reira pereota. ’A fa’a’ite ia rātou i te tahi mau rāve’a i fa’atoro ai te Fatu i tōna rima nō te tauturu ia rātou ’a tāmata ai vetahi i te fa’arave ia rātou i te mau ’ohipa ’ī’ino. Vaiiho ia rātou te tahi i muri iho i te tahi ’ia fa’atoro i tō rātou rima ’a parau ai rātou i te tahi atu mau rāve’a i fa’atoro ai te Fatu i tōna rima nō te tauturu ia tātou.

Te Parau Ha’api’ira’a ’e te mau Parau Fafau 4

Tē hina’aro nei te Fatu iā’u ’ia rave i tāna ’ohipa.

E nehenehe te mau tamari’i e « ha’amata i te rave i te ’ohipa a te Atua » (Te Parau Ha’api’ira’a ’e te mau Parau Fafau 4:2) i roto i te mau rāve’a e rave rahi, ’e e nehenehe rātou e fa’aineine i teienei i te mau rāve’a hau atu i roto i tō rātou orara’a nō ’ananahi.

Te mau ’ohipa e nehenehe e rave

• ’A tai’o Te Parau Ha’api’ira’a ’e te mau Parau Fafau 4:1 i te mau tamari’i. ’A ’āfa’i mai i te tahi mau hōho’a ’o tē fa’a’ite ra i te ’ohipa « māere » a te Atua nō te mau mahana hope’a nei (mai te hōho’a o te mau misiōnare, te mau hiero ’e te Buka a Moromona). Vaiiho i te mau tamari’i te tahi i muri iho i te tahi ’ia mā’iti i te hō’ē hōho’a ’e ’ia paraparau mai nō ni’a i te reira. E fa’a’ite ē, nō te aha e mea māere nō ’outou te ’ohipa a te Fatu.

• Tauturu i te mau tamari’i ’ia feruri i te mau ’ohipa ’aore rā, ’ia pāpa’i hōho’a ’o tē fa’a’ite ra i te parau ē, « tāvini iāna ma tō ’ā’au ato’a, ma tō pūai, tō mana’o ’e ma tō itoito ho’i » (Te Parau Ha’api’ira’a ’e te mau Parau Fafau 4:2). ’A fa’a’ite i te hō’ē hi’ora’a nō te hō’ē ta’ata tā ’outou i mātau ’o tē tāvini nei i te Atua mai teie te huru.

• Hīmene ’āmui i te hō’ē hīmene nō ni’a i te ’ohipa misiōnare, mai te « Je voudrais déjà partir en mission » (Chants pour les enfants, 90). ’A ’āparau e aha tā te hīmene e ha’api’i nei nō ni’a e nāhea e ti’a ai ia tātou ’ia tauturu i te Atua ’ia rave i tāna ’ohipa.

Te Parau Ha’api’ira’a ’e te mau Parau Fafau 5:10

’Ua fāri’i tātou i te parau a te Atua nā roto ia Iosepha Semita.

Nāhea e ti’a ai ia ’outou ’ia tauturu i te mau tamari’i ’ia ha’apūai i tō rātou ’itera’a pāpū ē, tē ha’api’i nei Iosepha Semita ’e te tahi atu mau peropheta i te parau a te Atua ?

Te mau ’ohipa e nehenehe e rave

• ’A huna i te hō’ē hōho’a o Iosepha Semita i te tahi vāhi nā roto i te piha ha’api’ira’a (hi’o i Te Buka hōho’a o te ’evanelia, no. 87). Tai’o i Te Parau Ha’api’ira’a ’e te mau Parau Fafau 5:10 ’e e ani i te mau tamari’i ’ia ’imi i te hōho’a nō te ’ite mai ē, o vai tā te ta’o « ’oe » e parau nei. ’A fa’a’ite i tō ’outou ’itera’a pāpū ē, ’ua fāri’i tātou i te parau a te Atua nā roto mai ia Iosepha Semita.

• ’A fa’a’ite i te mau tamari’i i te tahi mau Buka a Moromona ’e Te Parau Ha’api’ira’a ’e te mau Parau Fafau. E fa’ata’a ē, ’ua hōro’a mai te Atua i teie mau pāpa’ira’a mo’a ia tātou nā roto mai ia Iosepha Semita. Fa’a’ite i te tahi o tā ’oe mau ’īrava au roa i roto i teie mau buka, ’e ’a parau nō te aha ’outou i māuruuru ai i te reira.

Ha’api’i i te ha’api’ira’a tumu : Te mau tamari’i pa’ari

Te Parau Ha’api’ira’a ’e te mau Parau Fafau 3:5–10 ; 5:21–22.

E ti’a iā’u ’ia ha’apa’o maita’i a’e ’ia auhia mai e te Atua i te auhia mai e vetahi ’ē.

’A ’apo mai ai te mau tamari’i i te ’ohipa i tupu nō ni’a ia Iosepha Semita nō te mau ’api o te ’īritira’a o te Buka a Moromona tei mo’e, e nehenehe rātou e fa’auruhia ’ia tāpe’a noa i te fa’aro’o noa atu e fa’ahema mai vetahi ia rātou ’ia ha’apa’o ’ore.

Te mau ’ohipa e nehenehe e rave

• Tau mahana nā mua ri’i noa a’e, ’a ani i te hō’ē o te mau tamari’i ’ia haere mai i te piha ha’api’ira’a ma te ineine nō te fa’a’ite mai i te ’ā’amu o Iosepha Semita ’e o Martin Harris i te mo’era’a te mau ’api mātāmua o te ’īritira’a o te Buka a Moromona (hi’o i Te mau ’ā’amu nō Te Parau Ha’api’ira’a ’e te mau Parau Fafau, 18–21; ’aore rā, Feiā Mo’a, 1:51–56). Tai’o ’āmui i Te Parau Ha’api’ira’a ’e te mau Parau Fafau 3:5–8 ; 5:21–22 ’e ’a ’imi i te mau ha’amaita’ira’a e roa’a ia tātou ’ia vai ha’apa’o noa tātou i te Atua.

• Hōro’a i te mau tamari’i i te taime nō te feruri i te hō’ē ’ohipa i tupu i reira te hō’ē hoa i te tāmatara’a i te fa’arave ia rātou i te hō’ē ’ohipa ’ino. Ani ia rātou ’ia ’ite mai i te hō’ē tuha’a parau i roto i Te Parau Ha’api’ira’a ’e te mau Parau Fafau 3:5–8 ; 5:21–22 ’o tē tauturu ia rātou i roto i taua mau taime ra. ’A ha’uti teata i te tahi mau hi’ora’a.

Te Parau Ha’api’ira’a ’e te mau Parau Fafau 4

Tē hina’aro nei te Fatu ’ia rave au i tāna ’ohipa.

E nehenehe Te Parau Ha’api’ira’a ’e te mau Parau Fafau 4 e fa’auru i te mau tamari’i ’ia riro ’ei tuha’a nō te « ’ohipa māere » a te Fatu (’īrava 1).

Te mau ’ohipa e nehenehe e rave

• ’A pāpa’i i ni’a i te tāpura ’ere’ere Tāvini i te Atua. Ani i te mau tamari’i ’ia ’imi Te Parau Ha’api’ira’a ’e te mau Parau Fafau 4 ’e ’ia hāmani i te hō’ē tāpura o te mau ’ohipa tā rātou i ’apo mai nō ni’a i te aura’a o te parau ra tāvini i te Atua. Ani ia rātou ’ia tu’u i ni’a i te tāpura i te mau ’ohipa tā rātou i ’apo mai i roto i te hīmene ra « Je serai vaillant » (Chants pour les enfants, 85) ’aore rā, te tahi atu hīmene nō ni’a i te tāvinira’a i te Atua.

• Hōpoi mai i te mau mauiha’a (’aore rā, mau hōho’a o te mau mauiha’a ) tā te hō’ē ta’ata e fa’a’ohipa nō rave i te ’ohipa i roto i te fa’a’apu. Nāhea teie mau mauiha’a i te tauturu ia tātou ? Tauturu i te mau tamari’i ’ia ’ite mai i te mau mea i roto i Te Parau Ha’api’ira’a ’e te mau Parau Fafau 4:5–6 ’o tē nehenehe e riro ’ei mau mauiha’a nō te rave i te ’ohipa a te Atua.

• E ani i te mau misiōnare rave tāmau ’aore rā, te mau misiōnare pāroita ’ia fa’a’ite mai i te tahi mea i roto i Te Parau Ha’api’ira’a ’e te mau Parau Fafau 4 ’o tei fa’auru ia rātou ’ia rave i te ’ohipa a te Atua. E aha te ti’a ia tātou ’ia rave nō te tauturu i te ’ohipa a te Atua ?

Te Parau Ha’api’ira’a ’e te mau Parau Fafau 5:1–7, 11, 16, 23–24

E nehenehe au e riro ’ei hō’ē ’ite ē, e parau mau te Buka a Moromona.

’Ua fafauhia o Martin Harris ē, e nehenehe ’oia e riro mai ’ei hō’ē o te mau ’ite o te mau ’api auro mai te mea vai ha’apa’o maita’i noa ’oia. E’ita tātou e ’ite i te mau ’api mai ia Martin, terā rā, e nehenehe tātou e fāri’i i te hō’ē fa’a’itera’a vārua o te Buka a Moromona. Nāhea e ti’a ai ia ’outou ’ia tauturu i te mau tamari’i ’ia fa’ahotu ’e ’ia fa’a’ite i tō rātou iho ’itera’a pāpū nō te Buka a Moromona ?

Te mau ’ohipa e nehenehe e rave

• Pāpa’i i te mau uira’a mai teie i muri nei i ni’a i te tāpura ’ere’ere, ’e e tauturu i te mau tamari’i ’ia ’imi mai i te mau pāhonora’a i roto i Te Parau Ha’api’ira’a ’e te mau Parau Fafau 5:1–3, 7, 11: E aha tā Martin Harris i hina’aro ’ia ’ite ? O vai tā Iosepha Semita i fa’a’ite i te mau ’api auro ? Nō te aha e’ita te hi’o-noa-ra’a i te mau ’api e nava’i nō te fa’ati’aturi i te hō’ē ta’ata ē, e parau mau te Buka a Moromona ?

• ’A ui i te mau tamari’i e aha te hō’ē ’ite ’e nō te aha e mea faufa’a te hō’ē ’ite. E aha te ti’a ia Martin Harris ’ia rave nō te riro ’ei hō’ē ’ite nō te mau ’api auro ? (hi’o Te Parau Ha’api’ira’a ’e te mau Parau Fafau 5:23–24). Noa atu ē, ’aita tātou i ’ite i te mau ’api, e aha tā tātou e nehenehe e rave nō te riro ’ei mau ’ite nō te Buka a Moromona ? (hi’o Te Parau Ha’api’ira’a ’e te mau Parau Fafau 5:16 ; Moroni 10:3–5).

Fa’aitoito i te ha’api’ira’a mai i te fare

’A fa’aitoito i te mau tamari’i ’ia pāpa’i i tō rātou ’itera’a pāpū nō te Buka a Moromona ’e ’ia fa’a’ite i te reira i te hō’ē ta’ata tā rātou i mātau.

Ha’amaita’ira’a i tā tātou ha’api’ira’a

’A fa’atano i te mau ’ohipara’a ’ia au i te mau tamari’i huma. Nā roto i te fa’atanora’a ma’a vāhi iti i te mau ’ohipara’a, e nehenehe te reira e ha’apāpū ē, e nehenehe te mau tamari’i pā’āto’a e ha’api’i mai nā roto mai i te reira mau ’ohipara’a. ’Ei hi’ora’a, mai te mea te tītau ra te hō’ē ’ohipara’a ’ia fa’a’ite i te hō’ē hōho’a, e nehenehe ’outou e hīmene i te hō’ē hīmene nō te fa’aō mai i te mau tamari’i matapō.