’Ua pi’i ’oia iā’u ma tō’u i’oa nā Michael Malm

11–17 nō Tēnuare

Te Parau Ha’api’ira’a ’e te mau Parau Fafau 2; Iosepha Semita—’Ā’amu 1:27–65

« E riro te mau ’ā’au o te mau tamari’i i te fāriu i tō rātou ra mau metua »

Ha’amata i tā ’outou fa’aineinera’a nā roto i te tai’ora’a i Te Parau Ha’api’ira’a ’e te mau Parau Fafau 2 ’e Iosepha Semita—’Ā’amu 1:27–65. E tauturu te mau mana’o i roto i teie arata’i ia ’outou ’ia ha’api’i i te mau parau mau i roto i teie mau pāpa’ira’a.

Pāpa’i i te mau mana’o e tae mai

Tītau i te mana’o

E nehenehe ’outou e ha’amata i te piha ha’api’ira’a ma te anira’a i te mau tamari’i ’ia fa’a’ite mai i te mea tā rātou i ’ite nō ni’a i te tere fārerei o te melahi Moroni ia Iosepha Semita.

Ha’api’i i te ha’api’ira’a tumu : Te mau tamari’i ’āpī

Iosepha Semita—’Ā’amu 1:27–54

’Ua pi’i te Metua i te Ao ra ia Iosepha Semita nō te tauturu iāna ’ia rave i tāna ’ohipa.

E nehenehe te māuruuru o te mau tamari’i nō te peropheta Iosepha Semita e rahi atu ā ’a ha’api’i mai ai rātou nō ni’a i te ’ohipa tā te Atua i pi’i iāna ’ia rave.

Te mau ’ohipa e nehenehe e rave

• ’A fa’a’ite i te hō’ē hōho’a nō Moroni i te fārereira’a ia Iosepha Semita (hi’o i te Buka hōho’a o te ’evanelia, no. 91). E ani i te mau tamari’i ’ia fa’a’ite mai i te mau mea tā rātou e ’ite ra i roto i te hōho’a. ’A ha’apoto i te ’ā’amu nō te tere fārerei o Moroni ia Iosepha. Mai te mea e hina’arohia, ’a hi’o i te Iosepha Semita—’Ā’amu 1:27–54 ’e « Pene 3 : Te melahi Moroni ’e te mau ’api auro » (Te Parau Ha’api’ira’a ’e te mau Parau Fafau, 13–17). E ani i te mau tamari’i ’ia fa’ariro ia rātou mai ia Iosepha Semita i te mau taime e rave rahi i roto i te ’ā’amu nā roto i te tūfenera’a i tō rātou rima mai te huru ē, tē pure ra rātou, tē ta’uma ra i ni’a i te aivi Tumora, ’e tē vai atu ra.

• Tai’o ha’apūai Iosepha Semita—’Ā’amu 1:33., ’e ’a ani i te mau tamari’i ’ia ti’a i ni’a ’ia fa’aro’o ana’e rātou i te parau ra « e ’ohipa tā te Atua e hōro’a mai iā’u ’ia rave ». E aha tā te Atua i hina’aro ia Iosepha ’ia rave ? E aha tāna e ani nei ia tātou ’ia rave ? Vaiiho i te mau tamari’i ’ia pāpa’i i te mau hōho’a nō te mau mea tā te Atua e hina’aro ’ia rave rātou, mai te purera’a, te tāvinira’a, ’aore rā, te tai’ora’a i te mau pāpa’ira’a mo’a.

Te Parau Ha’api’ira’a ’e te mau Parau Fafau 2.

’Ua hōro’a Elia ia Iosepha Semita i te mana nō te tā’ati i te mau ’utuāfare.

E nehenehe te ha’api’ira’a mai nō ni’a i te mana tā’atira’a tei fa’aho’ihia mai nā roto mai ia Iosepha Semita e tauturu i te mau tamari’i ’ia māuruuru i te mau ha’amaita’ira’a o te ’utuāfare mure ’ore.

Te mau ’ohipa e nehenehe e rave

• Tauturu i te mau tamari’i ’ia parau i te i’oa « Elia » e rave rahi taime. E ani ia rātou ’ia fa’aro’o i te reira i’oa ’a tai’o ai ’outou i Te Parau Ha’api’ira’a ’e te mau Parau Fafau 2:1. E fa’ata’a ē, e mau parau teie nā Moroni ia Iosepha Semita, ’e tē ha’api’i ra te reira ē, e haere mai Elia nō te fa’aho’i mai i te mana fa’atere o te autahu’ara’a. I muri a’e, ’ua fā mai o Elia ia Iosepha Semita i roto i te hiero nō Keterani ’e ’ua hōro’a i te peropheta i te mana nō te tā’ati i te mau ’utuāfare.

• ’A ani i te mau tamari’i ’ia fa’ati’a mai ia ’outou i te hō’ē mea tā rātou i au nō ni’a i tō rātou ’utuāfare. ’A hōhora i te hō’ē hōho’a o te hō’ē ’utuāfare i pīha’i iho i te hiero—tō ’outou iho ’utuāfare, mai te mea e nehenehe (’aore rā hi’o i te Buka hōho’a o te ’evanelia, no. 120). ’A fa’a’ite pāpū ē, tē hina’aro nei te Metua i te ao ra ’ia tāhō’ēhia te mau ’utuāfare e a muri noa atu, ’e teie te hō’ē tumu i hōro’a mai ai ’oia ia tātou i te mau hiero.

• Hīmene ’āmui « Ensemble à tout jamais » (Chants pour les enfants, 98). E aha tā teie hīmene e parau nei e nehenehe tā tātou e rave nō te pārahi i pīha’i iho i tō tātou ’utuāfare e a muri noa atu ?

Te Parau Ha’api’ira’a ’e te mau Parau Fafau 2.

E nehenehe te ha’api’ira’a mai nō ni’a i tō’u mau tupuna e hōro’a mai iā’u i te ’oa’oa.

E nehenehe ato’a te mau tamari’i na’ina’i e ’ana’anatae ’e e ’oa’oa nō te ’ā’amu ’utuāfare.

Te mau ’ohipa e nehenehe e rave

• Ani i te hō’ē metua o te hō’ē o te mau tamari’i ’ia haere mai i roto i te piha ha’api’ira’a ’e ’ia fa’a’ite mai i te hō’ē ’ā’amu nō ni’a i te hō’ē tupuna (’e ’a hōhora mai i te hō’ē hōho’a mai te mea tē vai ra). ’A paraparau nō ni’a i te ’oa’oa tā ’outou i fāri’i ’a ha’api’i mai ai ’outou nō ni’a i tō ’outou ’ā’amu ’utuāfare.

• Hōro’a i te tamari’i tāta’itahi i te hō’ē māfatu papie. ’A tauturu ia rātou ’ia pāpa’i i tō rātou i’oa ’e i teie parau « Tē fafau nei au ’ia ha’amana’o i tō’u mau tupuna » i ni’a iho. Tai’o i Te Parau Ha’api’ira’a ’e te mau Parau Fafau 2:2, ’e ’a fa’ata’a atu ē, ’ua haere mai Elia nō te fa’afāriu i tō tātou ’ā’au i tō tātou mau tupuna.

Ha’api’i i te ha’api’ira’a tumu : Te mau tamari’i pa’ari

Iosepha Semita—’Ā’amu 1:28–29

E nehenehe au e pure ’ia fa’a’orehia tā’u hara.

I te tahi taime e nehenehe te mau tamari’i tā ’outou e ha’api’i ra ’e mana’o ē, « ’ua fa’autu’ahia rātou nō [tō] rātou mau ’ino ’e tō rātou parau-ti’a ’ore » (Iosepha Semita—’Ā’amu 1:29.) mai tā Iosepha Semita i feruri. ’A tauturu ia rātou ’ia ha’api’i mai ē, e nehenehe rātou e fāriu atu i te Metua i te ao ra nō te fa’a’orera’a hara.

Te mau ’ohipa e nehenehe e rave

• Tai’o ’e te mau tamari’i i te Iosepha Semita—’Ā’amu 1:29. E aha te mana’o o Iosepha Semita nō ni’a i tāna mau hape ? E aha tāna i rave nō te reira ? E aha tā tātou e nehenehe e ha’api’i mai i roto i te hi’ora’a o Iosepha ’o tē nehenehe e tauturu ia tātou ’ia rave ana’e tātou i te hape ? Ani i te mau tamari’i e aha tō rātou mana’o i te ’itera’a ē, ’ua pi’ihia o Iosepha e te Atua noa atu ē, ’aita ’oia i te mea maita’i hope roa.

• Nō te aha e mea faufa’a ’ia feruri i tō tātou huru « ti’ara’a i mua [i te Atua ] » ? (Iosepha Semita—’Ā’amu 1:29). ’A fa’ati’a i te mau tamari’i i te ’ohipa tā ’outou e rave ’ia uiui ana’e ’outou nō ni’a i tō ’outou ti’ara’a ’e te Atua.

Iosepha Semita—’Ā’amu 1:30–54

’Ua pi’ihia Iosepha Semita e te Atua nō te rave i te hō’ē ’ohipa faufa’a roa.

E nehenehe te tuatāpapara’a i te poro’i a Moroni ia Iosepha Semita e taututu i te mau tamari’i ’ia ha’apūai i tō rātou ’itera’a pāpū nō ni’a i te pi’ira’a mo’a o Iosepha.

Te mau ’ohipa e nehenehe e rave

• E ani i te mau tamari’i ’ia ha’uti ’aore rā, ’ia pāpa’i i te mau hōho’a nō te mau ’ohipa i tupu i roto i te Iosepha Semita—’Ā’amu 1:30–54, mai tē fāra’a mai o Moroni ia Iosepha ( te mau ’īrava 30–47), Iosepha i te paraparaura’a i tōna metua tāne ( te mau ’īrava 48–50) ’e Iosepha i te ’itera’a mai i te mau ’api (te mau ’īrava 51–54). E aha tā tātou i ’apo mai i roto i teie ’ā’amu nō ni’a i te ’ohipa i pi’ihia ai Iosepha ’ia rave ?

• Tai’o ’e te mau tamari’i i te Iosepha Semita—ʼĀʼamu 1:33–35, ’e e ani ia rātou ’ia fa’aro’o nō te aha Moroni i hina’aro ai ’ia ’ite Iosepha nō ni’a i te ’ohipa i anihia ia Iosepha ’ia rave. Nāhea tātou i te ha’amaita’ihia nō tō Iosepha Semita fa’aotira’a i tāna ’ohipa ’ei ta’ata huri parau nō te Buka a Moromona ? Ani i te mau tamari’i ’ia tai’o tāmau i te Buka a Moromona.

Te Parau Ha’api’ira’a ’e te mau Parau Fafau 2.

Tē hina’aro nei te Metua i te ao ra ’ia tā’atihia te mau ’utuāfare i roto i te hiero.

’Ua parau o Moroni ia Iosepha Semita ē, e haere mai Elia nō te « heheu mai i te autahu’ara’a » (’īrava 1). E parau teie nō te mana tā’ati o te autahu’ara’a ’o te fa’ati’a ’ia tāhō’ēhia te mau ’utuāfare e a muri noa atu ’e e fa’ati’a ia tātou ’ia fāri’i i te mau ’ōro’a nō tō tātou mau tupuna i roto i te hiero.

Te mau ’ohipa e nehenehe e rave

• Ani i te mau tamari’i ’ia tai’o i te parau tohu i roto i Te Parau Ha’api’ira’a ’e te mau Parau Fafau 2:1. Ani ia rātou ’ia ’imi o vai tā te Fatu e tono mai i te mau mahana hope’a nei ’e e aha tā te reira ta’ata e heheu mai. ’A hōhora i te hō’ē hōho’a nō Elia i roto i te hiero nō Ketelani (hi’o i te Buka hōho’a o te ’evanelia, no. 95,) ’e ’a paraparau nō ni’a e nāhea tō teie parau tohu tupura’a 13 matahiti i muri a’e i te tere o Moroni (hi’o Te Parau Ha’api’ira’a ’e te mau Parau Fafau 110:13–15).

• E fa’ata’a ē, ’ua fa’aho’i mai o Elia i te mau tāviri o te autahu’ara’a ’o tē fa’ati’a i te mau ’utuāfare ’ia tā’atihia e a muri noa atu. ’A fa’a’ite atu i te tahi mau tao’a ’o tē nehenehe e tauturu i te mau tamari’i ’ia hāro’aro’a i te aura’a ’ia tā’ati i te hō’ē mea, mai te hō’ē fa’ari’i mā’a ’aore rā, hō’ē pūtē urina vaira’a tauiha’a e tāmaura’a huti tōna. Nāhea teie mau tao’a i te tauturu ia tātou ’ia hāro’aro’a i te aura’a nō te hō’ē ’utuāfare ’ia tā’atihia ?

• ’A fa’a’ite i te hō’ē hōho’a o te hō’ē hiero, ’e ’a tauturu i te mau tamari’i ’ia hōro’a mai i te i’oa o te tahi mau mea tā tātou e rave i roto i te hiero. ’A fa’ata’a ē, te mau bāpetizora’a nō te feiā i pohe, te fa’aipoipora’a mure ’ore, ’e te tā’atira’a i te mau ’utuāfare i roto i te hiero, e hope pā’āto’a te reira i te ravehia nā roto i te mau tāviri o te autahu’ara’a tā Elia i fa’aho’i mai.

• Ani i te hō’ē tamāhine ’aore rā, i te hō’ē tamāroa feiā ’āpī i roto i te pāroita ’ia fa’a’ite mai i te hō’ē ’itera’a nō ni’a i te ’itera’ahia iāna te i’oa o te hō’ē tupuna ’e ’a bāpetizohia ai ’oia nō tāua tupuna ra i roto i te hiero.

  

  E tā’atihia te mau ’utuāfare i roto i te hiero nā roto i te mana tei fa’aho’ihia mai nā roto mai ia Elia.

Fa’aitoito i te ha’api’ira’a mai i te fare

E fa’aitoito i te mau tamari’i ’ia ani i tō rātou mau metua ’ia fa’ati’a mai ia rātou i te hō’ē ’ā’amu nō ni’a i te hō’ē o tō rātou mau tupuna ’aore rā, ’a tauturu ia rātou ’ia fa’aineine i te hō’ē mā’a au-roa-hia e te hō’ē tupuna ’e ’ia ’amu ’āmui i te reira.

Ha’amaita’iraʼa i tā tātou ha’api’ira’a

Tauturu i te mau tamari’i ’āpī ’ia ’apo mai nā roto mai i te mau pāpa’ira’a mo’a. Nō te tauturu i te mau tamari’i ’āpī ’ia ’apo mai nā roto mai i te mau pāpa’ira’a mo’a, a fa’atumu i ni’a i te hō’ē ’īrava ’aore rā, hō’ē noa a’e pereota faufa’a. E nehenehe ’outou e ani i te mau tamari’i ’ia ti’a i ni’a ’aore rā, ’ia ’āfa’i i tō rātou rima i ni’a ’ia fa’aro’o ana’e rātou i te reira ta’o ’aore rā, te reira pereota. (Hi’o Ha’api’ira’a mai tā te Fa’aora, 21