Te uru rā’au mo’a, nā Greg K.Olsen

4–10 nō Tēnuare

Iosepha Semita—’Ā’amu 1:1–26

« ’Ua ’ite atu ra vau i te pou māramarama »

’A tuatāpapa ai ’outou i te mau pāpa’ira’a mo’a, ’a feruri i te mau tamari’i tā ’outou e ha’api’i ra. E nehenehe te Vārua Maita’i e fa’auru mai ia ’outou, nā roto i te mau mana’o tā ’outou e fāri’i, ’ia ’ite e aha te mea e fa’atumu i ni’a iho i roto i te piha ha’api’ira’a.

Pāpa’i i te mau mana’o e tae mai

Tītau i te mana’o

E ani i te tahi mau tamari’i ’ia fa’a’ite mai e aha tā rātou i ’ite nō ni’a ia Iosepha Semita ’e tāna pure i roto i te uru rā’au mo’a (e tauturu te fa’a’itera’a i te hō’ē hōho’a nō te ’ōrama mātāmua). E ani ia rātou e aha tō rātou mana’o ’ia fa’aro’o ana’e rātou ē, ’ua haere mai te Metua i te ao ra ’e o Iesu Mesia e fārerei ia Iosepha Semita. ’Āhiri e haere mai o Iosepha Semita e fārerei i tā tātou piha ha’api’ira’a, e aha tā tātou e ani iāna nō ni’a i te ’ohipa tei tupu i ni’a iāna ?

Ha’api’i i te ha’api’ira’a tumu : Te mau tamari’i ’āpī

Iosepha Semita—’Ā’amu 1:3–20

’Ua ineine o Iosepha Semita ’ia riro ’ei peropheta nā te Atua.

E nehenehe te ha’api’ira’a mai nō ni’a i te ’āpīra’a o Iosepha Semita, e tauturu i te mau tamari’i ’ia tū’ati i ni’a iāna ’e ’ia fa’aineine nō te ha’api’i mai nā roto mai i tōna mau ’itera’a. Penei a’e e nehenehe ’outou e tauturu ia rātou ’ia ’ite i te huru o tō te mau ’itera’a o Iosepha ’ei tamaiti i te tauturura’a iāna ’ia fa’aineine ’ia riro ’ei peropheta nā te Atua.

Te mau ’ohipa e nehenehe e rave

• Ani i te hō’ē tamari’i ’ia tāpe’a i te hō’ē hōho’a o Iosepha Semita (hi’o i te Buka hōho’a o te ’evanelia, no. 87) ’a fa’a’ite ai ’outou i te tahi mau mea nō ni’a ia Iosepha i roto i te Iosepha Semita—’Ā’amu 1:3–14.(hi’o ato’a « pene 1 : Iosepha Semita ’e tōna ’utuāfare », Te mau ’ā’amu nō Te Parau Ha’api’ira’a ’e te mau Parau Fafau, 6–8, ’aore rā, te video nō ni’a i te reira, i ni’a i te ChurchofJesusChrist.org). E tauturu ia rātou ’ia fa’aau i te mau huru ri’i o tōna ’utuāfare ’e tōna orara’a i ni’a i tō rātou. ’A fa’a’ite i tō ’outou ’itera’a pāpū ē, nā te Atua i mā’iti ia Iosepha ’ei peropheta (hi’o «Te mau reo o te Fa’aho’i-fa’ahou-ra’a mai : Te ’utuāfare o Iosepha Semita », i roto i te Mai, pe’e mai—nō te ta’ata hō’ē ’e te ’utuāfare). Mai te mea e tītauhia, ’a ha’api’i i te mau tamari’i ē, hō’ē peropheta o te hō’ē ïa ta’ata ’o tē parau nō te Atua.

• E ani i te hō’ē feiā ’āpī tamāroa i roto i te pāroita ’ia haere mai i roto i tā ’outou piha ha’api’ira’a, mai te huru ra ē, ’o Iosepha Semita ’oia. ’A fa’aineine i te tahi mau uira’a nā te mau tamari’i nō te ui iāna, ’o tei pāhonohia i roto i te Iosepha Semita—’Ā’amu 1:3–20 (e ti’a ia ’outou ’ia fa’a’ite i te reira mau uira’a i te feiā ’āpī tamāroa nā mua a’e). I muri iho, e ani i te feiā ’āpī tamāroa ’ia tai’o i te tahi o te mau parau a Iosepha Semita iho nō ni’a i te ’Ōrama Mātamua (’ei hi’ora’a, Iosepha Semita—’Ā’amu 1:25.).

Iosepha Semita—’Ā’amu 1:10–17

Tē fa’aro’o nei ’e tē pāhono nei te Metua i te Ao ra i tā’u mau pure.

E nehenehe te ’itera’a o Iosepha Semita e fa’auru i te mau tamari’i ’ia pure ma te ti’aturi ē, e fa’aro’o mai te Atua ia rātou.

Te mau ’ohipa e nehenehe e rave

• ’A parau i te mau tamari’i nō ni’a i te mau uira’a a Iosepha Semita (hi’o Iosepha Semita—’Ā’amu 1:10.). E aha tā tātou e nehenehe e rave mai te mea ē, e uira’a tā tātou nō ni’a i te Atua ? E fa’a’ite i te mau tamari’i i te hō’ē Bibilia, ’e ’a fa’ata’a ē, i te tai’ora’a Iosepha i te Bibilia, ’ua ha’api’i mai ’oia ē, e nehenehe tāna « e ani atu i te Atua » (Iakobo 1:5 ; hi’o ato’a i te Buka hōho’a o te ’evanelia , no. 89). ’A fa’a’ite i tō ’outou ’itera’a pāpū ē, e nehenehe tātou e ui i te mau uira’a i te Atua nā roto i te pure.

• ’A fa’ati’a i te hō’ē ’itera’a ’a tupu ai te pāpū ’ore i roto ia ’outou, ’a ani atu ai ’outou i te Atua i te tauturu, ’e ’a fāri’i ai ’outou i te hō’ē pāhonora’a. E tauturu i te mau tamari’i ’ia feruri i te mau taime ’a pāhonohia mai ai tā rātou mau pure. E nehenehe ato’a ’outou e fa’a’ite i te hō’ē ’ā’amu nō roto mai i te mau ve’a a te ’Ēkālesia nō ni’a i te pure a te hō’ē tamari’i tei pāhonohia.

Iosepha Semita—’Ā’amu 1:17–19

’Ua ’ite Iosepha Semita i te Metua i te ao ra ’e i tāna Tamaiti ’o Iesu Mesia.

E nehenehe ’outou e tauturu i te mau tamari’i ’ia ha’amau i te niu nō te hō’ē ’itera’a pāpū pūai nō te ’Ōrama Mātāmua o Iosepha Semita. E fa’a’ite ia rātou e mea nāhea te noa’ara’a tō ’outou ’itera’a pāpū nō teie ’ohipa faufa’a roa.

Te mau ’ohipa e nehenehe e rave

• E fa’a’ite i te hōho’a nō te ’Ōrama Mātāmua i roto i te arata’i nō teie hepetoma i roto i te Mai, pe’e mai—nō te ta’ata hō’ē ’e te ’utuāfare, ’e ’ia fa’a’ite nā roto i tā ’outou iho mau parau, i te ’ohipa i tupu ’a pure ai Iosepha. E ani i te mau tamari’i ’ia pāpa’i i tā rātou iho mau hōho’a o te ’ā’amu.

• E ani i te mau tamari’i ’ia fa’aū i te ’api ’ohipara’a nō teie hepetoma ’e ’ia fa’a’ohipa i te reira nō te fa’ati’a i te ’ā’amu nō te ’Ōrama Mātāmua (hi’o ato’a « Pene 2 : Te ’Ōrama Mātāmua a Iosepha Semita ». Te mau ’ā’amu nō te Parau Ha’api’ira’a ’e te mau Parau Fafau, 9–12, ’aore rā, te video nō ni’a i te reira, i ni’a i te ChurchofJesusChrist.org).

• ’A tai’o Iosepha Semita—’Ā’amu 1:17, ’e ’a fa’a’ite i te mau tamari’i i te mau parau tā te Metua i te ao ra i parau ia Iosepha Semita.

Ha’api’i i te ha’api’ira’a tumu : Te mau tamari’i pa’ari

Iosepha Semita—’Ā’amu 1:10–13

E nehenehe te Atua e pāhono i tā’u mau uira’a nā roto i te mau pāpa’ira’a mo’a.

’Ua fa’auruhia Iosepha Semita nā te hō’ē ’īrava i roto i te Bibilia, ’e nā te reira i arata’i i te ’Ōrama Mātāmua ’e i te Fa’aho’i-fa’ahou-ra’a mai o te ’Ēkālesia a te Mesia. E tauturu i te mau tamari’i ’ia ’ite nāhea te tuatāpapara’a i te mau pāpa’ira’a mo’a i te tauturu ia rātou ’ia ’imi i te mau pāhonora’a i tā rātou mau uira’a pae vārua.

Te mau ’ohipa e nehenehe e rave

• ’A fa’a’ite i te mau tamari’i e rave rahi huru buka (mai te hō’ē buka parau pa’ari ’aore rā, hō’ē buka nō te tunu i te mā’a), ’e ’a tauturu ia rātou ’ia feruri i te mau uira’a tā teie mau buka e nehenehe e pāhono. I muri iho, ’a fa’a’ite ia rātou i te hō’ē buka pāpa’ira’a mo’a. E aha te mau uira’a tā teie mau buka e nehenehe e pāhono ? E nehenehe ’outou e hōro’a i te hō’ē hi’ora’a nō te hō’ē uira’a tei pāhonohia i roto i te mau pāpa’ira’a mo’a. E tai’o ’āmui i te Iosepha Semita—’Ā’amu 1:10–11 nō te ’ite mai e aha te mau uira’a a Iosepha Semita ’e e aha te mau pāhonora’a tei ’itehia iāna i roto i te mau pāpa’ira’a mo’a.

• E tauturu i te mau tamari’i ’ia ’imi i te mau parau i roto i te ’īrava 12 ’o tē fa’ata’a ra i te ’ohipa i tupu i ni’a ia Iosepha Semita ’a tai’o ai ’oia i te Iakobo 1:5. ’A fa’a’ite i te hō’ē ’itera’a tā ’outou i fāri’i nā roto i te mau pāpa’ira’a mo’a—’ei hi’ora’a, ’a ’itehia ai ia ’outou hō’ē pāhonora’a i te hō’ē o tā ’outou mau uira’a nā roto i te tai’ora’a i te mau pāpa’ira’a mo’a. E hīmene ’āmui « Quand je lis l’Écritures saintes » (Chants pour les enfants, 66).

Iosepha Semita—Aamu 1:10–19

Tē fa’aro’o nei ’e tē pāhono nei te Metua i te Ao ra i tā’u mau pure.

’Ua mātau te Atua ia Iosepha Semita, ’e ’a pure ai Iosepha, ’ua fa’aro’o te Atua iāna. Noa atu e mea ta’a ’ē te mau ’itera’a o te mau tamari’i tā ’outou e ha’api’i ra i te mau ’itera’a o Iosepha, e nehenehe ’outou e tauturu ia rātou ’ia ’ite ē, ’ua mātau te Atua ia rātou ’e te fa’aro’o mai nei ’oia ia rātou ’ia pure rātou.

Te mau ’ohipa e nehenehe e rave

• E ani i hō’ē metua o te hō’ē o te mau tamari’i ’ia ti’a i rāpae’au i te piha ha’api’ira’a ’e ’ia pāhono i te mau uira’a nā roto mai i te mau tamari’i ma te fa’a’ohipa i te mau rāve’a mai te hāponora’a i te hō’ē parau poro’i ’āfa’ifa’i, te niuniura’a, te pāpa’ira’a i te hō’ē nota, ’aore rā, te tonora’a i te hō’ē ve’a. E aha te tahi mau rāve’a a te Metua i te ao ra nō te paraparau mai ia tātou ? (hi’o « Heheura’a », Arata’i nō te mau pāpa’ira’a mo’a, scriptures.ChurchofJesusChrist.org). ’Ia au i te Iosepha Semita—’Ā’amu 1:16–19, nāhea tō te Metua i te ao ra pāhonora’a i te pure a Iosepha Semita ? Nāhea ’oia i te pāhonora’a i tā ’outou mau pure ?

• Hīmene ’āmui « La prière d’un enfant » (Chants pour les enfants, 6–7).

  

  Tē fa’aro’o nei ’e tē pāhono mai nei te Atua i tā tātou mau pure.

Iosepha Semita—’Ā’amu 1:14–19, 25

’Ua fā mai te Metua i te ao ra ’e o Iesu Mesia ia Iosepha Semita.

E tītauhia i te mau tamari’i tāta’itahi tā ’outou e ha’api’i nei ’ia noa’a te hō’ē ’itera’a pāpū nō te ’ohipa i tupu nō Iosepha Semita i roto i te uru rā’au mo’a. Nāhea e ti’a ai ia ’outou ’ia tauturu ia rātou ’ia noa’a ’aore rā, ’ia ha’apūai i tō rātou ’itera’a pāpū ?

Te mau ’ohipa e nehenehe e rave

• Nō te hi’o fa’ahou i te ’ā’amu nō te ’Ōrama Mātāmua, ’a pāpa’i i te mau ha’apotora’a o te ’īrava tāta’itahi i roto i te Iosepha Semita—’Ā’amu 1:14–19 i ni’a i te mau tuha’a ’api parau ta’a ’ē. ’A tu’u i te mau ’āpī parau i roto i te hō’ē fa’ari’i, ’e e ani i te mau tamari’i ’ia mā’iti hō’ē hō’ē i te reira, ’e ’ia tu’u i te reira i ni’a i te tāpura i roto i te ’āna’ira’a tano.

• E ani i te mau tamari’i ’ia tāpiri i tō rātou mata ’e ’ia feruri e aha te huru ’ia riro, mai ia Iosepha ’a tai’o ai ’outou i te mau tuha’a i mā’itihia o te Iosepha Semita—’Ā’amu 1:14–17. E ani ia rātou ’ia fa’a’ite mai i tō rātou mau mana’o ’e te mau ’āehuehu nō ni’a i te ’itera’a o Iosepha.

• ’A fa’a’ite i te video « ’A ani i te Atua : Te ’Ōrama Mātāmua a Iosepha Semita » (ChurchofJesusChrist.org), ’e e ani i te mau tamari’i ’ia fa’a’ite mai i te tahi mea tā rātou i ’apo mai nō ni’a i te ’ōrama o Iosepha Semita nō ni’a i te Metua i te ao ra ’e ia Iesu Mesia.

• E tai’o ’āmui i te ’itera’a pāpū o Iosepha i roto i te Iosepha Semita—’Ā’amu 1:25. E ani i te mau tamari’i ’ia ’imi i te mau ta’o ’e te mau pereota ’o tē fa’a’ite ra i te fa’aro’o o Iosepha. Nāhea e ti’a ai ia tātou ’ia vai ha’apa’o maita’i noa i te Atua ’e i tō tātou ’itera’a pāpū a pāto’ito’i mai ai te tahi mau ta’ata ia tātou ?

Fa’aitoito i te ha’api’ira’a mai i te fare

Ani i te mau tamari’i ’ia fa’a’ite i te ’ā’amu o te ’Ōrama Mātāmua o Iosepha Semita i te hō’ē ta’ata—mai te mea e nehenehe, i te hō’ē ta’ata ’aita i fa’aro’o a’enei. E nehenehe rātou e fa’a’ohipa i te ’api ’ohipara’a o teie hepetoma nō te tauturu ia rātou ’ia fa’ati’a i te ’ā’amu.

Ha’amaita’iraʼa i tā tātou ha’api’ira’a

Fa’aitoito i te fa’aturara’a. Nō te fa’aha’amana’o i te mau tamari’i ’ia vai fa’atura, e nehenehe ’outou e hīmene ’aore rā, e hum i te hō’ē hīmene, e fa’a’ite i te hō’ē hōho’a nō Iesu, ’aore rā, e fa’a’ohipa i te hō’ē tāpa’o rima tā te mau tamari’i e ’ite mai.