’utuāfare e tai’o ra i te mau pāpa’ira’a mo’a

28 nō Tītema–3 nō Tēnuare

Te Parau Ha’api’ira’a ’e te mau Parau Fafau 1

« ’A fa’aro’o mai na, e te mau ta’ata ato’a »

’A feruri i Te Parau Ha’api’ira’a ’e te mau Parau Fafau 1 ’ei ’ōmuara’a a te Fatu iho nō ni’a i teie buka heheura’a nāna i te mau mahana hope’a nei. E aha tāna i hina’aro ’ia ’ite ’outou nō ni’a i Te Parau Ha’api’ira’a ’e te mau Parau Fafau ? ’A feruri i teie uira’a ’e ’a pāpa’i i te mau mana’o ato’a e tae mai ’a tai’o ai ’outou i te tuha’a 1.

Pāpa’i i te mau mana’o e tae mai

I te ’āva’e Novema 1831, hō’ē matahiti ’e te ’āfa noa tō te ’Ēkālesia a Iesu Mesia. Noa atu ā tē tupu ra i te rahi, e mea huru ta’a ’ore ri’i teie pupu feiā fa’aro’o e ora ra i te mau ’ōti’a o te fenua ’aita i ta’ata-roa-hia, arata’ihia e te hō’ē peropheta piti ’ahuru ti’ahapa noa matahiti. Tē hi’o nei rā te Atua i teie nau feiā fa’aro’o ’ei tāvini nāna ’e ’ei ve’a ho’i, ’e ’ua hina’aro ’oia i tāna mau heheura’a tāna i hōro’a ia rātou ’ia pūharahia i tō te ao nei.

Te Parau Ha’api’ira’a ’e te mau Parau Fafau, tufa’a 1 ’o te ’ōmuara’a parau ïa a te Fatu nō te ha’aputura’a o teie mau heheura’a, ’e tē fa’a’ite pāpū nei te reira ē, noa atu ā te na’ina’i o te pupu melo nō te ’Ēkālesia, e ’ere te poro’i tā te Atua i hina’aro i tōna feiā mo’a ’ia fa’a’ite i te mea na’ina’i. ’O te « reo fa’aara » i « te mau ta’ata ato’a o te ao nei », ’o tē ha’api’i ia rātou ’ia tātarahapa ’e ’ia ha’amau i te « fafaura’a mure ’ore » a te Atua (mau ’īrava 4, 8, 22). Te mau tāvini e hōpoi atu i teie poro’i, ’o « te feiā paruparu ’e te mea ’ite ’ore » ïa, terā rā, ’o te mau tāvini ha’eha’a iho tā te Atua i hina’aro—i terā ra tau ’e i teienei—nō te « fa’atupu mai i [tāna ’Ēkālesia] nō roto mai i te vāhi mo’emo’e ’e te vāhi pōiri ho’i » (mau ’īrava 23, 30).

Nō te tahi atu ā mau parau nō ni’a i te ’ā’amu o Te Parau Ha’api’ira’a ’e te mau Parau Fafau 1, hi’o Feiā mo’a, 1:140–43.

ītona tuatāpapara’a a te ta’ata hō’ē

Mau mana’o nō te tuatāpapara’a pāpa’ira’a mo’a a te ta’ata hō’ē

Te Parau Ha’api’ira’a ’e te mau Parau Fafau 1

Tē ani nei te Fatu iā’u ’ia « mā’imi i teie nei mau fa’auera’a ».

E fa’a’ite te hō’ē ’ōmuara’a parau nō ni’a i te hō’ē buka. E fa’ata’a te reira i te mau tumu parau ’e te fā o te reira, ma te tauturu i te ta’ata tai’o ’ia fa’aineine nō te tai’o. ’A tai’o ai ’oe i te tufa’a 1—te « ’ōmuara’a parau » o Te Parau Ha’api’ira’a ’e te mau Parau Fafau (’īrava 6)—’a hi’o i te mau tumu parau ’e te fā tā te Fatu i hōro’a nō tāna mau heheura’a. E aha te ha’api’ira’a tā ’oe i ’apo mai i roto i te tufa’a 1 ’o tē tauturu ia ’oe ’ia ho’ona roa tā ’oe tuatāpapara’a i Te Parau Ha’api’ira’a ’e te mau Parau Fafau ? ’Ei hi’ora’a, e nehenehe tā ’oe e feruri e aha te aura’a o te parau « fa’aro’o i te reo o te Fatu » i roto i teie mau heheura’a (’īrava 14) ’aore rā te aura’a o te parau « mā’imi i teie mau fa’auera’a » (’īrava 37).

Hi’o ato’a te parau ’ōmuara’a nō Te Parau Ha’api’ira’a ’e te mau Parau Fafau.

Te Parau Ha’api’ira’a ’e te mau Parau Fafau 1:1–6, 23–24, 37–39

Tē paraparau nei te Atua nā roto i tāna mau tāvini, ’e e tupu tāna mau parau.

E ha’amata ’e e hope te tufa’a 1 nā roto i te fa’a’itera’a a te Atua ē, tē paraparau nei ’oia nā roto i te mau tāvini tāna i mā’iti (hi’o mau ’īrava 4–6, 23–24, 38). ’A pāpa’i i te ha’api’ira’a tā ’oe i ’apo mai i roto i teie heheura’a nō ni’a i te Fatu ’e tōna reo. E aha tā ’oe i ha’api’i mai nō ni’a i te mau tāvini a te Fatu ? I afea tō ’oe fa’aro’ora’a i te reo o te Fatu nā roto i te reo o tāna mau tāvini ? (hi’o ’īrava 38).

tuha’a purera’a o te ’āmuira’a rahi

E ha’api’i te mau peropheta ’e te mau ’āpōsetolo ia tātou i te mau fa’auera’a a te Atua.

Te Parau Ha’api’ira’a ’e te mau Parau Fafau 1:3, 24–28, 31–33

’Ia fa’aha’eha’a vau iā’u, e nehenehe te fa’autu’ara’a a te Fatu e arata’i iā’u i te tātarahapara’a.

’A hi’o na i roto i te ’īrava 3 ’e te mau ’īrava 24–28, ’ua parau te Fatu ē e ’itehia te mau hara ’e mau hape a te mau ta’ata. I te hō’ē pae, e ’ohipa māuiui mau ’e te ’oto rahi, ’e i te tahi pae, e ha’api’ira’a rahi. Nō te aha teie ta’a-’ē-ra’a ? ’A feruri na i tō ’oe huru ’ia ’ite ’oe i tā ’oe mau hara ’e mau paruparu. E aha te mau maita’i e ’itehia i roto i te mau ’īrava 24–28 ’o tē nehenehe e tauturu ia ’oe ’ia pāhono ti’a atu ? E aha tā teie mau ’īrava, nā reira ato’a te mau ’īrava 31–33, e ha’api’i nei ia ’oe nō ni’a e nāhea te Fatu e hi’o mai nei i tō ’oe mau paruparu ’e mau hara ?

Hi’o ato’a Maseli 3:11–12 ; Etera 12:27 ; Moroni 6:8.

Te Parau Ha’api’ira’a ’e te mau Parau Fafau 1:12–30, 35–36

’Ua fa’aho’i fa’ahou mai te Fatu i tāna ’evanelia nō te tauturu iā’u ’ia fa’aruru i te mau tāmatara’a nō te mau mahana hope’a nei.

Noa atu ā e mau mahana ’oto tei fa’aarahia i roto i te tufa’a 1 tē vai ato’a nei rā te hō’ē poro’i tāmarū : « ’O vau ’o te Fatu, nō tō’u ’itera’a i te ’ati rahi ’o tē tae mai i ni’a i te mau ta’ata ato’a o te ao nei, ’ua ti’aoro atu vau i tā’u tāvini ia Ioseha Semita, tamaiti, ’e ’ua parau atura iāna nā ’ō mai i te ra’i » (’īrava 17).

E hi’o maita’i na i te mau ’ati rahi tā te Fatu i fa’aara (hi’o, ’ei hi’ora’a, mau ’īrava 13–16, 35). E aha te tahi atu ā mau ’ati rahi tā ’oe e ’ite ra i roto i teie nei ao—’aore rā i roto i tō ’oe iho orara’a ? Tē fa’ata’a nei te mau ’īrava 17–30 e aha tā te Fatu i rave a’ena nō ’oe nō te fa’aineine nō teie mau ’ati rahi. E nehenehe e hāmani i te hō’ē tāpura nō te mau mea i ’itehia ia ’oe.

ītona tuatāpapara’a a te ’utuāfare

Mau mana’o nō te tuatāpapara’a pāpa’ira’a mo’a a te ’utuāfare ’e te pō ’utuāfare

Te Parau Ha’api’ira’a ’e te mau Parau Fafau 1:1–6, 37–39.Nō te ha’amata i te hō’ē ’āparaura’a nō ni’a i te mau fa’aarara’a a te Fatu, e nehenehe tā ’outou e paraparau nō ni’a i te tahi atu mau fa’aarara’a nō te tahi mau fifi ’aita tātou e ’ite nei—mai te hō’ē tahua he’e, te hō’ē vero pūai ’aore rā te hō’ē pere’o’o e haere mai ra. E aha tā teie mau hi’ora’a e ha’api’i nei nō ni’a i te mau fa’aarara’a a te Fatu ? ’Ia au i Te Parau Ha’api’ira’a ’e te mau Parau Fafau 1:1–6, 37–39, mea nāhea te Fatu i te fa’aara ia tātou ? E aha tāna i fa’aara ia tātou ’aita i maoro a’enei ? E nehenehe e māta’ita’i ’aore rā e tai’o i te tahi tuha’a nō te ’āmuira’a rahi i ma’iri a’enei nō te hi’o i te tahi mau hi’ora’a nō te « reo fa’aara » a te Atua.

Te Parau Ha’api’ira’a ’e te mau Parau Fafau 1:16.E aha te aura’a ’ia « fa’atupu i te parau-ti’a [a te Fatu] » ? Nāhea tātou i te ha’apāpū ē, tē rave nei tātou i te reira, ’e ’aita tātou e hāhaere nei i « tō [tātou] ihora haere’a » ?

Te Parau Ha’api’ira’a ’e te mau Parau Fafau 1:30.E aha te aura’a te parau ē, ’o te ’Ēkālesia « parau-ti’a ana’e ’e te mea ora » ? Nō te ha’aferuri i tō ’outou ’utuāfare nō ni’a i teie uira’a, e nehenehe e fa’a’ite i te tahi mau hōho’a nō te mau mea ora ’e te mau mea pohe. E nehenehe ato’a tā ’outou e paraparau nō ni’a i te mea tā te ’utuāfare e nehenehe e rave nō te tauturura’a i te « fa’atupu[ra’a i te ’Ēkālesia] nō roto mai i te vāhi mo’emo’e ’e te vāhi pōiri ho’i ».

Te Parau Ha’api’ira’a ’e te mau Parau Fafau 1:37.E nehenehe e fa’anaho ’e te ’utuāfare nāhea ’outou i te « mā’imi i teie mau fa’auera’a » i roto i Te Parau Ha’api’ira’a ’e te mau Parau Fafau i teie matahiti. Nāhea ’outou i te fa’ariro i te tutāpapara’a pāpa’ira’a mo’a ’ei taime tāmau i roto i te orara’a o te ’utuāfare ? E aha te mau mana’o tuatāpapara’a e nehenehe e tauturu ia ’outou ’ia ’apo mai i te ha’api’ira’a i roto i te mau pāpa’ira’a mo’a ? Hi’o i te vāhi ra « Mau mana’o nō te ha’amaita’i i te tuatāpapara’a pāpa’ira’a mo’a a te ’utuāfare », i te mau ’api mātāmua o teie buka.)

Nō te tahi atu mau mana’o nō te ha’api’ira’a i te mau tamari’i, hi’o te arata’i o teie hepetoma i roto Mai, pe’e mai—nō te Paraimere

Hīmene tei mana’ohia : « Suis les prophetes », Chants pour les enfants 58–59, te ’īrava hope’a iho ā rā.

Ha’amaita’i i tā ’oe iho tuatāpapara’a pāpa’ira’a mo’a

’Imi ia Iesu Mesia. Te fā o te mau pāpa’ira’a mo’a, ’o te fa’a’ite-pāpū-ra’a ïa nō ni’a i te Fa’aora ’e tāna ’evanelia. ’Ia tai’o ’outou i Te Parau Ha’api’ira’a ’e te mau Parau Fafau 1, e nehenehe e tāpa’opa’o ’aore rā e pāpa’ipa’i i te mau ’īrava e ha’api’i nei ia ’outou i te hō’ē mea nō ni’a ia Iesu Mesia.

Buka nō te mau fa’auera’a

’Ua ha’aputuhia te mau heheura’a mātāmua o te ’Ēkālesia i fa’aho’ihia mai i roto i te Buka nō te mau fa’auera’a.