’Ua pi’i mai ’oia iā’u ma tō’u i’oa, nā Michael Malm

11–17 nō Tēnuare

Te Parau Ha’api’ira’a ’e te mau Parau Fafau 2 ; Iosepha Semita–’Ā’amu 1:27–65

« E riro te mau ’ā’au o te mau tamari’i i te fāriu i tō rātou ra mau metua »

E ti’a i te Vārua Maita’i ’ia ha’api’i ia ’outou i te mau taime ato’a e tai’o ’outou i te mau pāpa’ira’a mo’a—tae noa atu i te mau ’īrava tā ’outou i tai’o e rave rahi taime nā mua atu. Nō reira, ’ia vai matara noa ’outou i te mau hi’ora’a ’āpī ’e te fa’aurura’a.

Pāpa’i i te mau mana’o e tae mai

’A toru atu ra matahiti tō te Atua te Metua ’e tāna Tamaiti, ’o Iesu Mesia, fāra’a ia Iosepha Semita i roto i te uru rā’au, ’aita rā Iosepha i fāri’i i te tahi atu heheura’a mai terā taime. ’Ua ha’amata tōna mana’o i te feruri nō ni’a i tōna vaira’a i mua i te Fatu. Mai ia tātou pā’āto’a nei, ’ua rave ’oia i te tahi mau hape, ’e ’ua tae mai tō te reira mana’o fa’ahapa. Terā rā, e ’ohipa ā tā te Atua nāna. ’E te ’ohipa i pi’ihia Iosepha ’ia rave, ’ua tū’ati ïa i te mea tā te Atua e ani nei ia tātou. E fa’atae mai Iosepha i te Buka a Moromona ; e aha tei anihia ia tātou ’ia rave i te reira ? E fāri’i Iosepha i te mau tāviri o te autahu’ara’a nō te fa’afāriu i te ’ā’au o te mau tamari’i i ni’a i tō rātou metua ; nāhea tātou e fāriu i tō tātou ’ā’au i i ni’a i tō tātou hui tupuna ? ’Ua parauhia Iosepha e mau parau tohu tē fātata i te tupu ; e aha tā tātou tuha’a i roto i te tauturura’a e fa’atupu i te reira ? ’Ia rave tātou i te hō’ē tuha’a i roto i te ’ohipa a te Atua, e nehenehe tātou e tīa’i mai i te pāto’ira’a ’e tae noa atu i te hāmani-’ino-ra’a, mai tei tupu i te peropheta. E ti’a ato’a ’ia vai te fa’aro’o ē, e fa’ariro te Fatu ia tātou ’ei mauiha’a i roto i tōna rima, mai tāna i rave nō Iosepha.

Hi’o ato’a Feiā mo’a, 1:20–48.

Mau mana’o nō te tuatāpapara’a pāpa’ira’a mo’a a te ta’ata hō’ē

Iosepha Semita—’Ā’amu 1:27–33

E ’ohipa tā te Atua nā’u.

’Ia tai’o ’oe i te Iosepha Semita—’Ā’amu 1:27–33, ’a feruri ē, e ’ohipa tā te Atua nā ’oe, mai tāna i rave nō Iosepha Semita. ’A feruri i teie anira’a a te peresideni Russell M. Nelson : « ’A ani i tō ’outou Metua i te Ao ra nā roto i te i’oa o Iesu Mesia i tōna mana’o nō ni’a ia ’outou ’e nō ni’a i tā ’outou misiōni i ni’a i te fenua nei. Mai te peu e ani ’outou ma te mana’o pāpū, e riro te Vārua ’āraua’e i te muhumuhu ia ’outou i te parau mau e taui roa ai i te orara’a.… Tē parau fafau atu nei au ia ’outou ē, i te taime e haru mai ’outou i te hō’ē noa a’e hōho’a iti nō te huru o te Metua i te Ao ra ’o tē hi’o nei ia ’outou, ’e te mea tāna e ti’aturi nei ia ’outou ’ia rave nōna, e taui roa mai tō ’outou orara’a ! »(« Becoming True Millennials » [purera’a ’ati ti’a i te ao nei nā te feiā ’āpī pa’ari, 10 nō Tēnuare 2016, broadcasts.ChurchofJesusChrist.org).

E tae mai paha i te tahi taime tō ’oe mana’o mai tō Iosepha i roto i te mau ’īrava 28–29. E aha te ha’api’ira’a tā ’oe e nehenehe e ’apo mai i roto i te hi’ora’a o Iosepha nō ni’a i te mea e rave i te taime ’aita tā ’oe mau ’ohipa i tū’ati roa i te ’ohipa tā te Atua i pi’i ia ’oe ’ia rave ?

Iosepha Semita—’Ā’amu 1:34–65

Tei roto i te Buka a Moromona « te ’īra’a o te ’evanelia mure ’ore ».

’Ia tai’o ’oe i te Iosepha Semita—’Ā’amu 1:34–65, ’a feruri e aha te mau parau ta’a ’ē i roto i teie mau ’īrava nō ’oe ’āhani ’aita a’enei ’oe i fa’aro’o nō ni’a i te Buka a Moromona nā mua a’e. Nō ’oe te ta’ata fa’aro’o, nō te aha e mea faufa’a rahi teie fa’ati’ara’a nō tō ’oe ’itera’a pāpū nō te Buka a Moromona ?

E feruri nāhea te Buka a Moromona i te fa’atupu i teie mau parau tohu o te Isaia 29:4, 11–18.

Iosepha Semita—’Ā’amu 1:36–41

’Ua fa’atupu te fa’aho’i-fa’ahou-ra’a mai o te ’evanelia i te mau parau tohu tahito.

’Ua fa’ahiti ’o Moroni ia Iosepha i te mau parau tohu nō te Faufa’a Tahito ’e te Faufa’a ’Āpī mai te Isaia 11 ; Te ’Ohipa 3:22–23 ; ’e te Ioela 2:28–32. Nō te aha pa’i e mea faufa’a nā Iosepha ’ia ’ite i teie mau parau tohu ? Nō te aha e mea faufa’a te reira nō ’oe ’ia ’ite ?

Te Parau Ha’api’ira’a ’e te mau Parau Fafau 2

E aha tā Elia i fa’aho’i mai ?

’Ua parau te peresideni Henry B. Eyring ē : « E mea faufa’a ’ia ’ite nō te aha te Fatu i parau fafau ai nō te tono mai ia Elia. E peropheta rahi ’o Elia ’e e mana rahi tei hōro’ahia iāna e te Atua. ’Ua mau ’oia i te mana rahi roa a’e tā te Atua i hōro’a i tāna mau tamari’i : ’Ua mau ’oia i te mana nō te tā’atira’a, te mana nō te tā’ati i ni’a i te fenua nei ’e ’ia tā’ati ato’a i ni’a i te ra’i » (« Te ’ā’au i au-tahi-māite-hia », Ensign ’aore rā Liahona, Mē 2005, 78).

hi’o ato’a Te Parau Ha’api’ira’a ’e te mau Parau Fafau 110:13–16 ; David A. Bednar, « E patuhia teie nei fare i tō’u nei i’oa », Ensign ’aore rā Liahona, Mē 2020, 84–87.

Hiero nō Palmyra (New York). E tā’atihia te mau ’utuāfare i roto i te hiero nā roto i te mana i fa’aho’ihia mai nā roto ia Elia.

Te Parau Ha’api’ira’a ’e te mau Parau Fafau 2

’Ua haere mai Elia nō te fa’afāriu i tō’u nei ’ā’au i ni’a i tō’u mau tupuna.

E aha tā te mau ta’o mai te « tanu », « ’ā’au » ’e « fāriu » i roto i teie tuha’a e ha’api’i nei ia ’oe nō ni’a i te misiōni a Elia nā reira ato’a te mau ha’amaita’ira’a o te mau tāviri o te autahu’ara’a tāna i fa’aho’i-fa’ahou-mai ? Nāhea ’oe i te ’itera’a i tō ’oe ’ā’au i te fāriura’a i ni’a i tō ’oe mau tupuna ? E feruri i te mau rāve’a e nehenehe ai ’oe e putapū pinepine a’e i te reira. Penei a’e e nehenehe tā ’oe e ani i te hō’ē fēti’i ’ia fa’a’ite mai i te hō’ē ’ā’amu nō ni’a i te hō’ē tupuna—te mea au roa atu, e nehenehe ’oe e pāpa’i i te reira. Penei a’e e nehenehe ’oe e hi’o mai i te hō’ē tupuna tei ’ore i fāri’i a’enei i te mau ’ōro’a o te ’evanelia ’e ’ia rave i te reira ’ohipa i roto i te hiero.

Mau mana’o nō te tuatāpapara’a pāpa’ira’a mo’a a te ’utuāfare ’e te pō ’utuāfare

Iosepha Semita—’Ā’amu 1:28–29.E aha tō Iosepha Semita mana’o i tāna mau hape ? E aha tāna i rave nō te pāhono i te reira mau mana’o ? E aha te ha’api’ira’a tā tātou e ’apo mai nei nā roto mai iāna nō ni’a i te ’ohipa e rave ’ia hape tātou ?

Iosepha Semita—’Ā’amu 1:33–54.E nehenehe ’outou e ani i te hō’ē melo nō te ’utuāfare ’ia tai’o pūai mai i te tahi tuha’a ’aore rā te tā’āto’ara’a o te poro’i a Moroni i roto i te Iosepha Semita—’Ā’amu 1:33–42 e maha taime (inaha ’ua fa’ahiti tāta’i maha Moroni i te reira poro’i). I roto i nā tai’ora’a tāta’itahi, e ani i te tahi atu mau melo o te ’utuāfare ’ia fa’a’ite mai e aha tā rātou i tāpe’a mai nā roto mai i tāna poro’i, ma te ’ore e hi’o i roto i te mau pāpa’ira’a mo’a. Nō te aha te Fatu i parau fa’ahou ai i te mau poro’i faufa’a rahi e rave rahi taime ? E aha te tahi atu mau rāve’a a te Fatu nō te ha’api’i ia tātou nā roto i te parau-fa’ahou-ra’a ?

Te Parau Ha’api’ira’a ’e te mau Parau Fafau 2:2.Nō te tauturu i tā ’outou mau tamari’i ’ia māramarama i « te mau fafaura’a i fafauhia i te mau metua », e nehenehe ’outou e tai’o ’āmui i te Aberahama 2:9–11 ’aore rā e māta’ita’i i te video « Te mau ’ite ta’a ’ē o te Mesia—Peresideni Russell M. Nelson » (ChurchofJesusChrist.org). Hi’o mai i te mau parau fafau tā te Atua i parau ’ei tuha’a nō tāna fafaura’a ’e o Aberahama. Nāhea tātou i te « tanu » i teie mau parau fafau i roto i tō tātou ’ā’au ?

Te Parau Ha’api’ira’a ’e te mau Parau Fafau 2:2–3.Nō te tauturu i te mau melo o te ’utuāfare ’ia fāriu i tō rātou ’ā’au i ni’a i tō rātou mau metua (’aore rā mau tupuna), e nehenehe tā ’outou e ani ia rātou ’ia ha’api’i mai i te parau nō te hō’ē tupuna ’e ’ia fa’a’ite mai i te toe’a o te ’utuāfare i tā rātou i ’apo mai. Nō te aha te Fatu e hina’aro ai ia tātou ’ia ha’api’i mai i te parau nō ni’a i te mau melo o tō tātou ’utuāfare ’e ’ia rave i te mau ’ōro’a o te hiero nō rātou. Nāhea tātou i te ha’amaita’ihia ’ia ’āmui ana’e tātou i roto i te ’ā’amu ’utuāfare ’e te ’ohipa hiero ? (hi’o Dale G. Renlund, « Te ’ohipa ’ā’amu ’utuāfare ’e te ’ohipa hiero : Tā’atira’a ’e fa’aorara’a », Ensign ’aore rā Liahona, Mē 2018, 46–49).

Nō te tahi atu mau mana’o nō te ha’api’ira’a i te mau tamari’i, hi’o te arata’i nō teie hepetoma i roto Mai, pe’e mai—nō te Paraimere.

Hīmene tei mana’ohia : « Ma généalogie », Chants pour les enfants, 100.

Ha’amaita’i i tā ’oe iho tuatāpapara’a pāpa’ira’a mo’a

Fa’a’ohipa i te mau tauturu nō te tuatāpapara’a pāpa’ira’a mo’a. E nehenehe te mau mātēria mai te fa’ata’ara’a raro, te Arata’i nō te mau parau tumu, te Dītionare nō te Bibilia, te Arata’i nō te mau pāpa’ira’a mo’a ’e tae noa atu i te ChurchofJesusChrist.org e tauturu ia ’outou ’ia māramarama maita’i a’e i te mau ta’ata, te mau ’ohipa ’e te mau parau i roto i te mau pāpa’ira’a mo’a.

Tē fāri’i ra Iosepha i te mau ’api, nā Gary E. Smith