5–11 ʻEpeleli

Tokāteline mo e Ngaahi Fuakava 30–36

“ʻOku Ui Koe ke Malangaʻaki ʻEku Ongoongoleleí”

ʻI hoʻo ako ʻi he faʻa lotu ʻa e Tokāteline mo e Ngaahi Fuakava 30–36 lolotonga hoʻo fakakaukau ki he fānau ʻi hoʻo kalasí, ʻe ala ʻoatu ʻe he Laumālié ha ngaahi fakakaukau kiate koe fekauʻaki mo e founga ke ke akoʻi ai kinautolú. Fekumi ki ha ngaahi fakakaukau kehe ʻi he fokotuʻutuʻu fakanounou ko ʻení.

Lekooti Hoʻo Ngaahi Ongó

Fakaafeʻi e Feʻinasiʻakí

Pukepuke hake ha fakatātā ʻo ha kau faifekau, pea kole ki he fānaú ke nau vahevahe ʻa e meʻa ʻoku nau ʻilo kau ki he ngāue fakafaifekaú.

Akoʻi e Tokāteliné: Fānau Iiki Angé

Tokāteline mo e Ngaahi Fuakava 33:2–3, 6–10

Te u lava ʻo vahevahe ʻa e ongoongolelei ʻo Sīsū Kalaisí.

ʻE lava foki ʻe he fānau iiki angé ʻo vahevahe ʻenau fakamoʻoni ki he ongoongolelei ʻo Sīsū Kalaisí. Te ke fakaʻaongaʻi fēfē nai ʻa e ngaahi veesi ko ʻení ke tokoni ke ueʻi fakalaumālie kinautolu ke nau fakahoko iá?

Ngaahi ʻEkitivitī ʻe Ala Fakahokó

• Fakaafeʻi ʻa e fānaú ke nau feinga ke lea ʻaki ha kupuʻi lea lolotonga e mapuni honau ngutú, hangē ko e “ʻOku ʻofa ʻa e ʻOtuá ʻiate koe.” Fakamahinoʻi ange he ʻikai ke tau lava ʻo akoʻi e ongoongoleleí ki he kakaí ʻo kapau he ʻikai ke fakaava hotau ngutú. Lau ʻa e Tokāteline mo e Ngaahi Fuakava 33:8–10, pea fakaafeʻi ʻa e fānaú ke fakaava honau ngutú he taimi kotoa pē ʻoku nau fanongo ai ki he kupuʻi lea “fakaava homou ngutú.” Ko e hā e ʻuhinga ʻoku finangalo ai ʻa e Tamai Hēvaní ke fakaava hotau ngutú ʻo vahevahe ʻa e ongoongoleleí ki he niʻihi kehé?

• Fanafana leʻo siʻi ha meʻa ki he fānaú, hangē ko e “Ko Siosefa Sāmita ko ha palōfita ʻo e ʻOtuá,” pea kole ange ke nau toe lea ʻaki e meʻa naʻá ke lea ʻakí. Toe lea ʻaki leva ʻa e kupuʻi lea tatau kae leʻo lahi ange. Lau ʻa e Tokāteline mo e Ngaahi Fuakava 33:2. Tokoni ke mahino ki he fānaú ʻoku ʻuhinga ʻa e “hiki hake [hotau] leʻó” ke ʻoua naʻa tau manavahē ke talanoa ki he niʻihi kehé kau kia Sīsū Kalaisi, ko e Tohi ʻa Molomoná, mo e ngaahi moʻoni kehe ʻo e ongoongoleleí.

• Hili takai ʻi he lokí ha ʻū tamapua pepa pe fakatātā ʻo ha kakai. Fakaafeʻi ʻa e fānaú ke nau kumi e kakaí pea tānaki fakataha kinautolu ki muʻa ʻi he lokí. Lau ʻa e Tokāteline mo e Ngaahi Fuakava 33:6, pea fakamatalaʻi ange ʻa e ʻuhinga ko ia ʻe “tānaki [ʻe he ʻEikí ʻa Hono] kakai filí.” Fakamoʻoni ange te tau lava ʻo tokoni ke tānaki fakataha ʻa e kakaí ki he ʻEikí ʻi he taimi ʻoku tau vahevahe ai ʻa e ongoongoleleí.

• Hivaʻi fakataha ha foʻi hiva fekauʻaki mo hono vahevahe ʻo e ongoongoleleí, hangē ko e “ ʻOku Ou Fie Hoko Leva ko ha Faifekau” (Tohi Hiva ʻa e Fānaú, 90). Tokoniʻi e fānaú ke nau fakakaukau ki ha ngaahi founga te nau lava ai ʻo tokoniʻi e niʻihi kehé ke nau ako kau kia Sīsū Kalaisi.

Tokāteline mo e Ngaahi Fuakava 33:12–17

Te u lava ʻo langa ʻa ʻeku moʻuí ʻi he ongoongoleleí ʻo Sīsū Kalaisí.

ʻE ala tokoni ki he fānau ʻokú ke akoʻí ʻa e faleʻi naʻe fai ʻe he ʻEikí kia ʻĒsela Teia mo Notelopi Suití, ke langa ʻena moʻuí ʻi he ongoongolelei ʻo Sīsū Kalaisí.

Ngaahi ʻEkitivitī ʻe Ala Fakahokó

• Fakaʻaliʻali ki he fānaú ha fakatātā ʻo ha fakavaʻe ʻo ha fale, pea kole kiate kinautolu ke nau fakamatalaʻi ia. Ko e hā e ʻuhinga ʻoku fie maʻu ai ki ha fale ha fakavaʻe mālohi mo maʻú? Lau mo e fānaú ʻa e Tokāteline mo e Ngaahi Fuakava 33:12–13, pea fakamatalaʻi ange ʻoku finangalo ʻa e ʻEikí ke fokotuʻu ʻa ʻetau moʻuí ʻi Heʻene ongoongoleleí. Tokoniʻi ʻa e fānaú ke nau fakakaukau ki ha ngaahi founga te nau lava ai ʻo langa ʻenau moʻuí ʻi he ongoongolelei ʻo Sīsū Kalaisí.

• ʻOange ki he fānaú ha ngaahi meʻa te nau lava ʻo fakaʻaongaʻi ke langa ʻaki ha taua, hangē ko ha ʻū poloka pe ipu pelesitiki. Fakahingoa e meʻa takitaha ʻaki ha fakatātā ʻokú ne fakafofongaʻi e ngaahi meʻa naʻe folofola ʻaki ʻe he ʻEikí ʻi he Tokāteline mo e Ngaahi Fuakava 33:14–17. Fakaafeʻi ʻa e fānaú ke nau langa ha taua lolotonga hoʻo talanoa mo kinautolu fekauʻaki mo e founga ʻoku tokoni ai e ʻū meʻá ni ke langa ʻetau moʻuí ʻi he ongoongolelei ʻo Sīsū Kalaisí.

Akoʻi e Tokāteliné: Fānau Lalahi Angé

Tokāteline mo e Ngaahi Fuakava 30:1–2

ʻOku totonu ke tukutaha ʻeku tokangá ʻi he ngaahi meʻa ʻa e ʻOtuá ʻo laka ange he ngaahi meʻa ʻo e māmaní.

Ko e faleʻi ko ia ʻa e ʻEikí kia Tēvita Uitemā ʻi he vahe 30 ʻe lava ia ke tokoni ki he fānau ʻokú ke akoʻí ke nau nofo faivelenga ʻi he ongoongolelei ʻo Sīsū Kalaisí.

Ngaahi ʻEkitivitī ʻe Ala Fakahokó

• Lau fakataha ʻa e Tokāteline mo e Ngaahi Fuakava 30:1, pea kole ki he fānaú ke nau fakamatalaʻi fakanounou, ʻi he lea pē ʻanautolu, ʻa e faleʻi naʻe fai ʻe he ʻEikí kia Tēvita Uitemaá. Ko e hā ha ngaahi founga ʻoku tau faʻa “manavahē [ai] ki he tangatá,” pe tokanga ki he fakakaukau ʻa e niʻihi kehé, kae ʻikai ke tau fai e meʻa ʻoku tau ʻilo ʻoku totonu ke tau faí?

• Kole ki he fānaú ke nau feinga ke fakahoko ha ngāue ʻe ua ʻi he taimi pē ʻe taha, hangē ko hano lau maʻuloto ha tefito ʻo e tuí lolotonga iá ʻoku nau hiki e ngaahi hingoa ʻo e fānau kotoa ʻi he kalasí. Fehuʻi ange pe ko e hā e ʻuhinga ne faingataʻa ai ke nau tokanga taha ki he ngāue ʻuluakí. Ko e hā ha ngaahi “meʻa ʻo e māmaní” (Tokāteline mo e Ngaahi Fuakava 30:2) te ne lava ʻo tohoakiʻi ʻetau tokangá mei heʻetau manatu kia Sīsū Kalaisi mo ʻEne ongoongoleleí? Te tau lava fēfē ʻo tokanga taha kiate Ia kae ʻikai ko e ngaahi meʻa ʻoku ʻikai fuʻu mahuʻingá?

Tokāteline mo e Ngaahi Fuakava 30–34

Te u lava ʻo vahevahe ʻa e ongoongolelei ʻo Sīsū Kalaisí.

ʻOku tokolahi ha fānau ʻi he Siasí ʻoku nau loto vēkeveke ke ngāue fakafaifekau taimi kakato pe ngāue fakafaifekau tokoni. ʻE lava ke tokoni ʻa e ngaahi aʻusia ʻa e kau faifekau ʻi he vahe 30–34 ke nau mateuteu ai.

Ngaahi ʻEkitivitī ʻe Ala Fakahokó

• Fakaafeʻi ha mēmipa ʻo e uōtí ke ako kau ki ha taha ʻo e kau faifekau ne uiuiʻi ʻi he Tokāteline mo e Ngaahi Fuakava 30–34 pea ke vahevahe mo e fānaú ʻa e meʻa ne nau akó (vakai “Voices of the Restoration: Early Converts” ʻi he Haʻu, ʻo Muimui ʻIate Au—Maʻá e Fakafoʻituituí mo e Ngaahi Fāmilí pe “The Faith and Fall of Thomas Marsh,,” “Ezra Thayer: From Skeptic to Believer,” “Orson Prattʻs Call to Serve,” Revelations in Context, 54–69).

• Tā ha ngutu ʻoku lahí ʻi he palakipoé, pea tokoniʻi e fānaú ke nau kumi ʻi he Tokāteline mo e Ngaahi Fuakava 33:8–10 ʻa e ngaahi talaʻofa ʻa e ʻEikí kiate kitautolu ʻi he taimi ʻoku tau fakaava ai hotau ngutú ke vahevahe ʻa e ongoongoleleí. Tuku ki he fānaú ke nau tohi ʻa e ngaahi talaʻofa ko ʻení ʻi he palakipoé, pea tokoniʻi ke mahino kiate kinautolu ʻa e ʻuhinga ʻo e ngaahi talaʻofa ko ʻení. Kole ki he fānau takitaha ke nau tohi ʻi loto ʻi he ngutú ha moʻoni ʻo e ongoongoleleí te nau lava ʻo vahevahe mo e niʻihi kehé.

• Fakaʻaliʻali ha fakatātā ʻo ha talupite, pea talanoa kau ki hono ʻuhinga ke malanga ʻaki e ongoongoleleí “ʻo hangē ko e leʻo ʻo ha talupité.” ʻOku founga fēfē ʻetau “hiki hake” hotau leʻó? (Tokāteline mo e Ngaahi Fuakava 33:2; 34:6).

• Kole ki he fānaú ke nau vahevahe e founga ʻoku nau teuteu ai ke ngāue fakafaifekau ʻi ha ʻahó. Kapau ʻoku nau ʻilo ha taha (mahalo ko ha mēmipa ʻo e fāmilí) ʻoku lolotonga ngāue fakafaifekau, fakaafeʻi kinautolu ke nau talanoa ki heʻenau ngaahi aʻusiá. Pe fakaafeʻi ha kau faifekau, tokotaha ʻosi ngāue fakafaifekau, pe ko ha taha teuteu ngāue fakafaifekau ke ne vahevahe ʻene loto-vēkeveke ki he ngāue fakafaifekaú. Vahevahe ha niʻihi ʻo hoʻo ngaahi aʻusia ʻi hono vahevahe ʻo e ongoongoleleí, kau ai e ngaahi aʻusia ʻi hoʻo moʻui fakaʻahó.

  

  Te u lava ʻo vahevahe ʻa e ongoongoleleí mo hoku ngaahi kaungāmeʻá.

Tokāteline mo e Ngaahi Fuakava 33:12–17

Te u lava ʻo langa ʻa ʻeku moʻuí ʻi he ongoongolelei ʻo Sīsū Kalaisí.

Kapau ʻe ako ʻa e fānaú ʻi heʻenau kei siʻí ki he founga ke fokotuʻu ai ʻenau moʻuí ʻi he ongoongolelei ʻo Sīsū Kalaisí, ʻe lahi ange e faingamālie ke nau tauhi faivelenga ai kiate Iá. ʻE lava ke tokoni ʻa e akonaki ʻoku ʻomi ʻi he ngaahi veesi ko ʻení kiate kinautolu.

Ngaahi ʻEkitivitī ʻe Ala Fakahokó

• ʻOmi ki he kalasí ha ngaahi meʻa ʻoku kehekehe ʻenau fefeká, hangē ko ha kiʻi tamapua molū, ko ha vavae, ʻumea, mo ha foʻi maka. Tuku ki he fānaú ke nau ala ki he ngaahi meʻa naʻe ʻomí. Kole ange ke nau fekumi ʻi he Tokāteline mo e Ngaahi Fuakava 33:12–13 ki he anga hono fakamatalaʻi ʻe he ʻEikí ʻa ʻEne ongoongoleleí. Ko e hā e ʻuhinga ʻoku hoko ai e “maká” ko ha foʻi lea lelei ke fakamatalaʻi ʻaki ʻa e ongoongoleleí? Te tau langa fēfē ʻetau moʻuí ʻi he maka ʻo e ongoongoleleí?

• Tokoniʻi e fānaú ke nau lau ʻa e Tokāteline mo e Ngaahi Fuakava 33:12–17 pea kumi e ngaahi meʻa te tau lava ʻo fai ke langa ʻetau moʻuí ʻi he ongoongolelei ʻo Sīsū Kalaisí. Fakaafeʻi ʻa e fānaú ke nau tā ha fakatātā ʻo e meʻa ʻoku nau maʻú, pea tuku ke nau femateʻiʻaki ʻa e ngaahi meʻa ʻoku fakafofongaʻi ʻe he fakatātā ʻa e niʻihi kehé.

Poupouʻi e Ako ʻi ʻApí

Fakaafeʻi ʻa e fānaú ke nau hoko ʻo hangē ko ha kau faifekaú ʻaki ʻenau vahevahe mo honau ngaahi fāmilí ha meʻa ne nau ako ʻi he Palaimelí he ʻahó ni.

Fakaleleiʻi ʻEtau Akoʻí

Fakamoʻoni ki he ngaahi tāpuaki kuo talaʻofa maí. ʻI he taimi te ke fakaafeʻi ai ʻa e fānaú ke nau moʻui ʻaki ha tefitoʻi moʻoni ʻo e ongoongoleleí, vahevahe ha ngaahi talaʻofa kuo fai ʻe he ʻOtuá kiate kinautolu ʻoku nau moʻui ʻaki ʻa e tefitoʻi moʻoni ko iá. Hangē ko ʻení, te ke lava ʻo vahevahe hoʻo fakamoʻoni ki he ngaahi tāpuaki ʻoku foaki ʻe he ʻEikí kiate kinautolu ʻoku fakaava honau ngutú ke vahevahe ʻa e ongoongoleleí.