29 Māʻasi–4 ʻEpeleli

Toetuʻú

“Ko Au Ia ʻA Ia ʻOku Moʻuí, Ko Au Ia ʻA Ia Naʻe Fakapōngí”

Ko e kalasi Palaimeli ʻi he Sāpate Toetuʻú ko ha faingamālie lelei ʻaupito ia ke tokoniʻi ai e fānaú ke fakamālohia ʻenau tui kia Sīsū Kalaisi mo ʻEne Fakaleleí. Fekumi ki he fakahinohino ʻa e ʻEikí ke maʻu e founga ke fai ai iá. ʻE malava ke ke ʻilo ha ngaahi fakakaukau ke tokoni ʻi he fokotuʻutuʻu fakanounou ko ʻení.

Lekooti Hoʻo Ngaahi Ongó

Fakaafeʻi e Feʻinasiʻakí

Tuku ki he fānaú ke nau vahevahe atu ʻa e meʻa ʻoku nau ʻilo fekauʻaki mo e ʻuhinga ʻoku tau fakamanatu ai ʻa e Toetuʻú. Fehuʻi kiate kinautolu pe ko e hā ʻoku fai ʻi honau ngaahi fāmilí ke fakamanatu ʻa e Toetuʻu ʻa Sīsū Kalaisí ʻi he taimi Toetuʻú. Pe tuku ke nau vahevahe e meʻa ʻoku nau ako ʻi ʻapi pea mo e folofolá fekauʻaki mo Sīsū Kalaisí.

Akoʻi e Tokāteliné: Fānau Iiki Angé

Tokāteline mo e Ngaahi Fuakava 138:11–17

Koeʻuhi ko Sīsū Kalaisi, te u toetuʻu.

ʻI hoʻo akoʻi ki he fānaú ʻa e Toetuʻu ʻa Sīsū Kalaisí, ʻe lava ke tokoni atu ʻa e Tokāteline mo e Ngaahi Fuakava 138:11–17 ke ke fakamatalaʻi ʻa hono ʻuhinga ʻo e toetuʻú. ʻE lava foki ke tokoni ʻa e ngaahi veesi ko ʻení ke langaki ʻenau tui te nau toetuʻu ʻi ha ʻahó

Ngaahi ʻEkitivitī ʻe Ala Fakahokó

• Fakaʻaliʻali ha ʻū fakatātā ʻo e pekiá, telió, mo e Toetuʻu ʻa e Fakamoʻuí (vakai, Tohi Fakatātā ʻo e Ongoongoleleí, fika 57, 58, mo e 59). Fehuʻi ki he fānaú pe ko e hā ʻoku nau ʻilo fekauʻaki mo e ngaahi meʻa ko ʻeni ne hokó. Fakamoʻoniʻi ange naʻe pekia ʻa Sīsū maʻatautolu pea naʻá ne toe tuʻu mei he maté kae lava ke tau toetuʻu kotoa hili ʻetau maté.

• Fakakaukau ki ha lēsoni fakatātā ʻe lava tokoni ke mahino ki he fānaú ʻa e meʻa ʻoku hoko ʻi he taimi ʻoku tau mate aí (ʻoku mavahe ʻa hotau laumālié mei hotau sinó) pea ko e taimi ʻoku tau toetuʻu aí (ʻoku fakataha leva ʻa hotau laumālié mo hotau sinó). Hangē ko ʻení, ko e hā e meʻa ʻoku hoko ʻi he taimi ʻoku tau toʻo ai ʻa e maká mei ha kasa pe ko e vaitohí mei ha peni? Ko e hā e meʻa ʻoku hoko ʻi he taimi ʻoku fakatahaʻi ai ʻa e ngaahi meʻá ni?

• Lau ki he fānaú mei he Tokāteline mo e Ngaahi Fuakava 138:17: “Ke toe fakatahaʻi ʻa e laumālié pea mo e sinó, pea ʻe ʻikai ke toe fakamavahevaheʻi, koeʻuhí ke nau maʻu ʻa e kakato ʻo e fiefiá.” Ko e hā e ʻuhinga ʻoku tau houngaʻia ai ʻi hotau sinó? Vahevahe ʻa e fiefia ʻokú ke ongoʻi ʻi hoʻo ʻiloʻi te tau toetuʻu kotoa pea toe maʻu hotau sinó.

• Hivaʻi fakataha ha foʻi hiva fekauʻaki mo e Toetuʻú, hangē ko e “Naʻe Toetuʻu Nai ʻa Sīsū?” pe “Kuo Toetuʻu ʻa Sīsū” (Tohi Hiva ʻa e Fānaú, 45, 44). ʻOange ki he fānaú ha ʻū fakatātā ʻokú ne fakafofongaʻi ha ngaahi foʻi lea pe kupuʻi lea ʻi he hivá (hangē ko ʻení, vakai ki he Tohi Fakatātā ʻo e Ongoongoleleí, fika 59, 60, mo e 61), pea fakaafeʻi ke nau puke hake ʻenau ʻū fakatātaá ʻi he taimi ʻoku nau hivaʻi ai e ngaahi foʻi lea ko iá.

Tokāteline mo e Ngaahi Fuakava 76:11–24; 110:1–7; Siosefa Sāmita—Hisitōlia 1:14–17

Naʻe mamata ʻa e Palōfita ko Siosefa Sāmitá kia Sīsū Kalaisi.

Ko e founga ʻe taha ke tokoni ai ki he fānaú ke fakamālohia ʻenau tui ki he Fakamoʻuí ko hono vahevahe mo kinautolu ʻa e fakamoʻoni ʻa Siosefa Sāmitá: “‘Okú ne moʻui! He naʻá ma mamata kiate ia, ʻio ʻi he toʻukupu toʻomataʻu ʻo e ʻOtuá” (Tokāteline mo e Ngaahi Fuakava 76:22–23).

Ngaahi ʻEkitivitī ʻe Ala Fakahokó

• Fakaʻaliʻali ki he fānaú ha fakatātā ʻo e ʻUluaki Mata Meʻa-Hā-Mai ʻa Siosefa Sāmitá (vakai ki he fokotuʻutuʻu fakanounou ki he 4–10 Sānualí ʻi he Haʻu, ʻo Muimui ʻIate Au—Maʻá e Fakafoʻituituí mo e Ngaahi Fāmilí). Fakaafeʻi ʻa e fānaú ke nau talaatu pe ko e hā e meʻa ʻoku hoko ʻi he fakatātaá, pea kole ange ke nau fekumi pe ko e fē ʻa Sīsū Kalaisi. Fehuʻi ki he fānaú pe ʻoku nau ʻilo ki ha toe taimi kehe naʻe mamata ai ʻa Siosefa Sāmita ki he Fakamoʻuí. ʻI he lea pē ʻa ʻaú, talanoa kau ki he ngaahi aʻusia ʻoku fakamatalaʻi ʻi he Tokāteline mo e Ngaahi Fuakava 76:11–24; 110:1–7 . Talaange ki he fānaú ʻa e founga ʻoku langaki ai ʻe he ngaahi potufolofola ko ʻení ʻa hoʻo tui kia Sīsū Kalaisí.

• Lolotonga hono valivali ʻe he fānaú ʻa e peesi ʻekitivitī ki he uike ní, lau kiate kinautolu ʻa e ngaahi folofola ʻoku kaunga ki aí. Fakamahinoʻi ange ha ngaahi fakaikiiki ʻi he ʻū fakatātaá ʻoku fakamatalaʻi ʻi he ngaahi vēsí. Fakamoʻoni ki he fānaú naʻe mamata ʻa e Palōfita ko Siosefa Sāmitá kia Sīsū Kalaisi, pea ko e ʻuhinga ʻeni ʻe taha ʻoku tau ʻiloʻi ai ʻoku moʻui ʻa Sīsuú.

Akoʻi e Tokāteliné: Fānau Lalahi Angé

Tokāteline mo e Ngaahi Fuakava 76:11–24; 110:1–10; Siosefa Sāmita—Hisitōlia 1:14–17

Naʻe fakamoʻoni ʻe he Palōfita ko Siosefa Sāmitá ʻoku moʻui ʻa Sīsū Kalaisi.

Ko e ngāue mahuʻinga taha ʻa ha palōfita ko e fakamoʻoni kia Sīsū Kalaisi. Tokoniʻi e fānaú ke langaki ʻenau tui ki he Fakamoʻuí ʻaki ʻenau ako mei he fakamoʻoni ʻa Siosefa Sāmita kau kiate Iá.

Ngaahi ʻEkitivitī ʻe Ala Fakahokó

• ʻOku fakamatalaʻi ʻe he ngaahi potufolofola ko ʻení ʻa e ngaahi taimi naʻe hā ai ʻa Sīsū Kalaisi kia Siosefa Sāmitá: Tokāteline mo e Ngaahi Fuakava 76:11–24; 110:1–10; Siosefa Sāmita—Hisitōlia 1:14–17. Lisi ʻi he palakipoé ha ngaahi moʻoni ʻe niʻihi ʻoku tau ako fekauʻaki mo e Fakamoʻuí mei he ngaahi veesi ko ʻení. Fakaafeʻi ʻa e fānaú ke nau feinga ke ʻiloʻi pe ko e fē ʻa e ngaahi veesi ʻokú ne akoʻi ʻa e ngaahi moʻoni ne lisi ʻi he palakipoé. Ko e hā mo ha toe meʻa ʻoku tau ako fekauʻaki mo Sīsū Kalaisi mei he ngaahi aʻusia ʻa Siosefa Sāmitá?

• ʻI he peesi ʻekitivitī ki he uike ní, tokoniʻi e fānaú ke nau fakahoa ʻa e ʻū fakatātaá ki he ngaahi veesi folofolá. Ko e hā e ʻuhinga ʻoku mahuʻinga ai ke tau ʻiloʻi naʻe mamata ʻa Siosefa Sāmita ki he Fakamoʻui kuo toe tuʻú? Vahevahe hoʻo fakamoʻoni ʻoku moʻui ʻa Sīsū Kalaisi pea ko Siosefa Sāmitá ko ha palōfita ia.

Tokāteline mo e Ngaahi Fuakava 63:49; 88:14–17, 27; 138:11, 14–17

Koeʻuhí ko Sīsū Kalaisi, te u toetuʻu .

Te ke tokoni fēfē nai ke fakaloloto ʻe he fānaú ʻenau houngaʻia ʻi he meʻafoaki ʻa e Fakamoʻuí ke tau toetuʻu kotoá?

Ngaahi ʻEkitivitī ʻe Ala Fakahokó

• Vahe ki he fānau takitaha ha taha ʻo e ngaahi potufolofola ko ʻení: Tokāteline mo e Ngaahi Fuakava 63:49; 88:14–17, 27; 138:11, 14–17. Fakaafeʻi ʻa e fānaú ke nau fekumi ʻi heʻenau ngaahi vēsí ke ʻiloʻi ha kupuʻi lea ʻoku nau pehē ʻokú ne kātoi ai ʻa e pōpoaki ʻo e Toetuʻú. Tuku ke nau vahevahe ʻenau ngaahi fakakaukaú. Kapau ʻoku lahi e taimí, tuku ke nau faʻu ha ʻū kaati ʻoku hā ai ʻa e ngaahi kupuʻi lea ne nau maʻú ke nau lava ʻo ʻave ki he kau mēmipa ʻo honau fāmilí pe ngaahi kaungāmeʻá.

• Fehuʻi ki he fānaú ʻa e founga te nau fakamatalaʻi ai ki haʻanau tehina pe kaungāmeʻa ʻa e ʻuhinga ʻo e toetuʻú. Ke maʻu ha ngaahi fakakaukau, lau fakataha ʻa e Tokāteline mo e Ngaahi Fuakava 138:14–17, pea fakakaukau ki he ngaahi fehuʻi hangē ko ʻení: Ko e hā e meʻa ʻoku hoko ki hotau laumālié mo e sinó ʻi he taimi te tau mate aí? Ko e hā e meʻa ʻe hoko ʻi he taimi te tau toetuʻu aí? Naʻe founga fēfē hono ʻai ʻe Sīsū Kalaisi ke malava ʻa e toetuʻú?

• Huluʻi ʻa e vitiō “Because He Lives” (ChurchofJesusChrist.org), pea tuku ki he fānaú ke nau vahevahe ʻa e ongo ʻoku nau maʻu kau ki he meʻa naʻe fakahoko ʻe he Fakamoʻuí maʻanautolú.

  

  ʻEiki ʻo e Lotu, tā ʻe Yongsung Kim

Tokāteline mo e Ngaahi Fuakava 18:10–13; 19:16–19; 45:3–5; 58:42–43

Koeʻuhí ko Sīsū Kalaisi, ʻoku lava ke fakamolemoleʻi ʻeku ngaahi angahalá .

ʻOku ʻikai ngate pē ʻi hono fakamoʻui kitautolu mei he mate fakatuʻasinó, ka naʻe ʻomi ʻe Sīsū Kalaisi ha founga ke fakahaofi ai kitautolu mei he mate fakalaumālié—ʻi hono fakalea ʻe tahá, ke fakamolemoleʻi ʻetau ngaahi angahalá pea foki hake ki he ʻao ʻo e ʻOtuá.

Ngaahi ʻEkitivitī ʻe Ala Fakahokó

• Hiki ʻi he palakipoé ʻa e ongo ʻuluʻitohi hangē ko ʻení: Meʻa naʻe fakahoko ʻe he Fakamoʻuí mo e Meʻa kuo pau ke u fakahokó. Fakaafeʻi e fānau takitaha ke nau fekumi ʻi ha taha ʻo e ngaahi potufolofola ko ʻení ke ʻiloʻi ai e meʻa ke lisi ʻi lalo ʻi he ongo ʻuluʻitohi ko ʻení: Tokāteline mo e Ngaahi Fuakava 18:10–13; 19:16–19; 45:3–5; 58:42–43. Vahevahe hoʻo fiefia mo e houngaʻia ʻi he meʻa naʻe fakahoko ʻe he Fakamoʻuí maʻatautolú.

• Tokoniʻi ʻa e fānaú ke nau ako e tefito ʻo e tui hono tolú. Te ke lava ʻo tokoniʻi kinautolu ke ako maʻuloto ia ʻaki hano fakaʻaliʻali ange ha ʻū fakatātā ʻoku fekauʻaki mo e ngaahi kupuʻi lea mahuʻingá.

• Huluʻi ʻa e vitiō “The Shiny Bicycle” (ChurchofJesusChrist.org), pe fakamatala haʻo talanoa pē ʻaʻau fekauʻaki mo ha taha naʻá ne fai ha fili hala peá ne fakatomala. Tokoniʻi e fānaú ke nau aleaʻi ʻa e meʻa naʻe fai ʻe he tokotaha ʻi he talanoá ke ne maʻu ai ha fakamolemolé. Kuo fakafaingofuaʻi fēfē nai ʻe he Fakamoʻuí ke malava ʻo fakamolemoleʻi kitautolú?

Poupouʻi e Ako ʻi ʻApí

Tokoniʻi e fānaú ke nau fakakaukau ki ha meʻa te nau lava ʻo fai ke tala ki he niʻihi kehé—tautautefito ki he kau mēmipa honau fāmilí—ʻa e meʻa kuo fai ʻe Sīsū Kalaisi maʻatautolú. ʻI hoʻomou fakataha hoko maí, kole ange ke nau vahevahe atu e meʻa ne nau faí.

Fakatupulaki ʻEtau Akoʻí

ʻOku ʻaonga ki he fānaú ʻa hono toutou fakahoko ha meʻa. ʻOua ʻe manavasiʻi ke toutou fakahoko ha ngaahi ʻekitivitī, tautautefito ki he fānau iiki angé. ʻE tokoni hono toutou fakahokó ke manatuʻi ʻe he fānaú e meʻa ʻoku nau akó.