Vahefonua Teivisi, Mīsulí

14–20 Sune

Tokāteline mo e Ngaahi Fuakava 64–66

“ʻOku Fie Maʻu ʻe he ʻEikí ʻa e Loto mo e ʻAtamai Fie Faí”

ʻI hoʻo teuteu ke faiakó, fakakaukau ki he founga te ke lava ʻo liliu ai hoʻo foungá ke feʻunga mo e ngaahi fiemaʻu ʻa e fānaú. Manatuʻi te ke lava ʻo fakaʻaongaʻi ha taha pē ʻo e ngaahi ʻekitivitī ʻi he fokotuʻutuʻu fakalēsoni ko ʻení ki he fānau iiki angé pe fānau lalahi angé.

Lekooti Hoʻo Ngaahi Ongó

Fakaafeʻi e Feʻinasiʻakí

ʻOange ki he fānau takitaha ha faingamālie ke ne puke ha fakatātā ʻo e Fakamoʻuí pea vahevahe ha meʻa kau kiate Ia mo ʻEne ongoongoleleí.

Akoʻi e Tokāteliné: Fānau Iiki Angé

Tokāteline mo e Ngaahi Fuakava 64:9–10

ʻOku kole mai ʻa Sīsū Kalaisi ke u fakamolemoleʻi e niʻihi kehé.

Ko e hā ha ngaahi lēsoni fakataumuʻa pe ngaahi ʻekitivitī ʻokú ke lava ʻo fakakaukau ki ai ʻe tokoni ke mahino ai ki he fānaú ʻa e ʻuhinga ko ia ke fakamolemoleʻí? ʻI hoʻomou aleaʻi ʻa e fakamolemolé, fakamanatu ange ki he fānaú ʻoku ʻikai ʻuhinga e fakamolemolé ke fakaʻatā ʻa e niʻihi kehé ke nau fakamamahiʻi kitautolu.

Ngaahi ʻEkitivitī ʻe Ala Fakahokó

• Lau ʻa e kupuʻi lea “ʻOku totonu ke mou fefakamolemoleʻaki” (Tokāteline mo e Ngaahi Fuakava 64:9), pea ʻeke ki he fānaú ʻa e ʻuhinga ke fakamolemoleʻi ai ha tahá. Ke tokoni ke mahino kiate kinautolu, vahevahe ha ngaahi sīpinga faingofua. Tokoniʻi kinautolu ke nau fakatātaaʻi ʻa e ngaahi sīpinga ko ʻení ke akoako fakahoko ai ʻa e fakamolemoleʻí.

• Lau māmālie ki he fānaú ʻa e Tokāteline mo e Ngaahi Fuakava 64:10 , pea ʻai ke nau lulululu mo ha fānau kehe ʻi he taimi ʻoku nau fanongo ai ki he foʻi lea ko e “fakamolemolé.” Vahevahe hoʻo fakamoʻoni ki he nonga mo e fiefia ʻoku maʻu ʻi he taimi ʻoku tau fakamolemoleʻi ai ʻa e niʻihi kehé.

• Fakakaukau ke hivaʻi ha foʻi hiva fekauʻaki mo e fakamolemolé, hangē ko e “Tokoniʻi Au Tamai” (Tohi Hiva ʻa e Fānaú, 52). Ko e hā ‘oku akoʻi mai ʻe he hivá ni fekauʻaki mo hono fakamolemoleʻi ʻo e niʻihi kehé?

Tokāteline mo e Ngaahi Fuakava 64:34

Te u lava ʻo talangofua kia Sīsū ʻaki hoku lotó mo e ʻatamaí.

Naʻe akoʻi ʻe he ʻEikí e Kāingalotú ʻoku fie maʻu ke foaki honau lotó mo ha loto fiemālie ke langa ʻa Saione. Fakakaukau ki he founga te ke tokoni ai ke nau kamata fakakaukau ki he ʻuhinga ʻo e meʻá ni kiate kinautolú.

Ngaahi ʻEkitivitī ʻe Ala Fakahokó

• Lau ki he fānaú mei he Tokāteline mo e Ngaahi Fuakava 64:34: “Vakai, ʻoku fie maʻu ʻe he ʻEikí ʻa e loto mo e ʻatamai fie faí.” Toutou lau ʻa e kupuʻi lea ko ʻení, pea tuhu ki ho mafú mo e ʻulú ʻi hoʻo lau ʻa e ngaahi lea ko iá, pea fakaafeʻi ʻa e fānaú ke nau fai e meʻa tatau. Te tau lava fēfē ʻo foaki hotau lotó mo e ʻatamaí ki he Fakamoʻuí? (Mahalo ʻe ala tokoni ke fakamatalaʻi ʻoku ʻuhinga ʻa e lotó ki heʻetau ngaahi ongó pea mo e ʻofá pea ʻoku ʻuhinga e ʻatamaí ki heʻetau ngaahi fakakaukaú.)

• Hivaʻi ha foʻi hiva fekauʻaki mo e ʻofá pea mo e muimui ki he Fakamoʻuí ʻo hangē ko e “ʻOku ongo ʻa e ʻOfá” (Tohi Hiva ʻa e Fānaú, 42–43; kae tautautefito ki he veesi 3). ʻOku tau fakahaaʻi fēfē ki he Fakamoʻuí ʻoku tau ʻofa ʻiate Iá? Vahevahe ange hoʻo ngaahi ongo kia Sīsū Kalaisí.

Tokāteline mo e Ngaahi Fuakava 66

ʻOku ʻafioʻi mo ʻofeina au ʻe he ʻEikí.

Ne ʻi ai ha ngaahi fehuʻi pau ʻe nima ʻa Uiliami E. Makalelini ki he ʻEikí. Naʻe maʻu ʻe Siosefa Sāmita honau ngaahi talí ʻi ha fakahā neongo ne ʻikai ke ne ʻilo pe ko e hā e ngaahi fehuʻi ʻa Uiliamí. ʻE tokoni atu ʻa e aʻusia ko ʻení ke ke akoʻi ki he fānaú ʻoku ʻafioʻi kinautolu ʻe he ʻOtuá pea lava ke tali ʻenau ngaahi fehuʻí.

Ngaahi ʻEkitivitī ʻe Ala Fakahokó

• Fakamatala fekauʻaki mo e founga naʻe tali ai ʻe he ʻEikí e ngaahi fehuʻi ʻa Uiliami E. Makaleliní ʻo fakafou ʻi ha fakahā mei he Palōfita ko Siosefa Sāmitá (vakai, Tokāteline mo e Ngaahi Fuakava 66, ʻuluʻi fakamatala ʻo e vahé). Fakamoʻoni ʻoku ʻafioʻi kitautolu ʻe he Tamai Hēvaní mo finangalo ke tokoniʻi kitautolu. Kole ki ha fānau ke vahevahe e founga ʻoku nau ʻiloʻi ai ʻoku ʻofa ʻa e ʻOtuá ʻiate kinautolú.

• Lau ki he fānaú ʻa e Tokāteline mo e Ngaahi Fuakava 66:4 Fakamatala ki he fānaú ki ha taimi naʻe fakahaaʻi atu ai ʻe he ʻEikí ʻa e meʻa naʻá Ne finangalo ke ke faí. Toe lau e vēsí, ka ke fakahū ʻa e hingoa ʻo ha taha ʻo e fānaú. Toe fai pē ia ki he fānaú takitaha.

  

  ʻOku ʻofa ʻa Sīsū Kalaisi ʻiate kitautolu kotoa.

Akoʻi e Tokāteliné: Fānau Lalahi Angé

Tokāteline mo e Ngaahi Fuakava 64:7–10

ʻOku finangalo e ʻEikí keu fakamolemoleʻi ʻa e tokotaha kotoa.

Hangē ko ia ʻoku hā ʻi he ngaahi veesi ko ʻení, naʻa mo e kau ākonga ʻa Sīsū Kalaisí ne faʻa faingataʻa ke nau fefakamolemoleʻaki. Fakakaukau ki he founga te ke tokoni ai ke mahino ki he fānaú ʻa e fekau ko ia ʻa e ʻEikí ke “fakamolemoleʻi e kakai kotoa peé.” (Fakamahino ʻoku ʻikai ʻuhinga e fakamolemoleʻí ke fakaʻatā e kakaí ke nau fakamamahiʻi kitautolu; ʻoku totonu ke nau tala maʻu pē ki ha tokotaha lahi falalaʻanga ʻo kapau ʻoku fakamamahiʻi kinautolu ʻe ha taha.)

Ngaahi ʻEkitivitī ʻe Ala Fakahokó

• Fakaafeʻi ʻa e fānaú ke nau fakakaukau naʻe kole ange ke nau akoʻi ha kiʻi tokoua/tuofefine pe tuongaʻane siʻisiʻi ange ʻo kau ki hono fakamolemoleʻi e niʻihi kehé. Te nau fakahoko fēfē ia? Fakaafeʻi kinautolu ke lau tautau toko ua ʻa e Tokāteline mo e Ngaahi Fuakava 64:7–10 pea kumi e ngaahi kupuʻi lea te nau fakaʻaongaʻi ʻi heʻenau faiakó. Te nau lava foki ʻo akoako fefaiakoʻaki hono akoʻi ʻo e niʻihi kehé.

• Hivaʻi fakataha ʻa e Tokoniʻi Au Tamaí” (Tohi Hiva ʻa e Fānaú, 52). ʻOku tokoni fēfē ʻa e Tamai Hēvaní ke tau fakamolemoleʻi e niʻihi kehé?

• Fakakaukau ki ha talanoa fakatātā ʻe ala tokoni ke mahino ki he fānaú ʻa e founga ʻoku “tauteaʻi” ai kitautolu ʻi he taimi ʻoku ʻikai ke tau fakamolemole aí (veesi 8). Hangē ko ʻení, fakaʻaliʻali ki he fānaú ha tangai pelepela pe kelekele, kole ange leva ke nau fakakaukau ne tolo pelepelaʻi kinautolu ʻe ha taha. ʻE faitatau fēfē nai ʻa e ʻikai ko ia ke tau fakamolemolé mo haʻatau tānaki e pelepelá pea tau toʻo holo maʻu pē iá? Ko e hā ʻe lelei ange ai ke tau liʻaki e pelepelá? Tokoni ki he fānaú ke nau fakakaukau ki ha ngaahi talanoa fakafehoanaki ʻokú ne akoʻi ʻa e ʻuhinga ʻoku mahuʻinga ai ke fakamolemolé.

Tokāteline mo e Ngaahi Fuakava 64:33-34

ʻOku fie maʻu ʻe he ʻEikí ʻa hoku “lotó mo ha ʻatamai fie fai (ngāue).”

Ko ha “ngāue maʻongoʻonga”— ʻa hono langa ʻo Saioné—pe ko hono tokoniʻi ʻo e Siasí ke tupulakí. Ke fakahoko iá, ʻoku fie maʻu ʻe he ʻEikí ke tau foaki kiate Ia hotau lotó mo e ʻatamai fie faí (ngāué). Ko kinautolu ʻoku nofo ʻi Saioné ʻoku nau “loto-taha pē mo fakakaukau taha” (Mōsese 7:18).

Ngaahi ʻEkitivitī ʻe Ala Fakahokó

• Fakaʻaliʻali ki he fānaú ha ngaahi meʻa ʻoku faʻu ʻaki ha fanga kiʻi meʻa kongokonga iiki ʻo hangē ko ha pāsolo pe ha kāpeti fulufulú. Tokoni ke nau fakakaukau ki ha ngaahi sīpinga kehe. Fakaafeʻi ʻa e fānaú ke lau ʻa e Tokāteline mo e Ngaahi Fuakava 64:33. Ko e hā ʻoku finangalo e ʻOtuá ke tau fai ke tau tokoni ai kiate Ia ke fakahoko ʻEne “ngāue lahí”? Ko e hā ʻa e “ngaahi meʻa iiki” te tau lava ʻo fakahoko ke tokoni ke ikunaʻi e ngāue ko ʻení?

• Kole ki he fānaú ke nau fakakakato ha ngāue ʻoku fie maʻu ki ai ha meʻa ʻe ua, kae ʻoange pē kiate kinautolu ha meʻa ʻe taha (hangē ko e tohi ʻi he palakipoé kae ʻikai ha sioká pe kosiʻi ha laʻipepa kae ʻikai ha helekosí). Fakaafeʻi ʻa e fānaú ke nau lau ʻa e Tokāteline mo e Ngaahi Fuakava 64: 34 ke ʻiloʻi pe ko e hā ha meʻa ʻe ua ʻoku kole mai ʻe he ʻEikí ke tau faí. Ko e hā ʻoku fie maʻu ai ke tau foaki hotau lotó mo e ʻatamaí fakatouʻosi ki he ʻEikí? Te tau fakahoko fēfē nai ʻeni?

Tokāteline mo e Ngaahi Fuakava 65

Te u lava ʻo tokoni ke teuteu ʻa e māmaní ke tali ʻa Sīsū Kalaisi.

Ko e misiona ʻo e Siasí—ʻa e puleʻanga ʻo e ʻOtuá ʻi he māmaní—ke teuteuʻi e māmaní ki he toe hāʻele mai ʻa e Fakamoʻuí. Ko e fānau ʻokú ke akoʻí ko ha konga mahuʻinga ia ʻo e misiona ko ʻení. Ko e hā te ke lava ʻo fai ke tokoniʻi kinautolu ke nau kau mai?

Ngaahi ʻEkitivitī ʻe Ala Fakahokó

• Lau fakakalasi pe tauhoa, ʻa e Tokāteline mo e Ngaahi Fuakava 65, pea lau pe kuo tohi tuʻo fiha ʻa e foʻi lea ko ia ko e “teuteú”. Ko e hā ʻoku kole mai ʻe he ʻEikí ke tau teuteu ki aí? Ko e hā te tau lava ʻo fai ke tau mateuteu ai pea mo e māmaní?

• Fakaʻaliʻali ha fakatātā ʻo e Hāʻele ʻAnga Ua Mai ʻa e Fakamoʻuí (vakai, Tohi Fakatātā ʻo e Ongoongoleleí, fika 66), pea kole ki he fānaú ke fakamatalaʻi ʻa e meʻa ʻoku nau sio ki aí pe ko e meʻa ʻoku nau ʻilo fekauʻaki mo e meʻa ko ʻeni ʻoku hokó. ʻOange ki he fānaú ha ngaahi foʻi lea mo ha kupuʻi lea ke kumi ʻi he Tokāteline mo e Ngaahi Fuakava 65 (hangē ko e “fakafonu ʻa e māmaní” mo e “ngaahi ngāue fakaofó”). Ko e hā ʻoku akoʻi mai ʻe he ngaahi foʻi leá mo e ngaahi kupuʻi leá fekauʻaki mo e Hāʻele ʻAnga Ua Maí pea mo hotau fatongia ke teuteu ki aí?

Poupouʻi e Ako ʻi ʻApí

Tokoniʻi e fānaú ke kumi ha veesi ʻi he Tokāteline mo e Ngaahi Fuakava 64–66 ʻoku nau saiʻia ai pea te nau loto ke vahevahe mo ha mēmipa ʻo e fāmilí pe kaungāmeʻá.

Fakatupulaki ʻEtau Founga Akoʻí

Ako ke ʻiloʻi e fakahaá. ʻI hoʻo lotu mo fakalaulauloto ki he folofolá, te ke ʻilo ai ʻe lava ke maʻu e ngaahi fakakaukaú mo e ongó ʻi ha faʻahinga taimi pe feituʻu pē—“ʻi hoʻo ʻalu ki he ngāué, fai e ngaahi ngāue fakaʻapí, pe feohi mo e fāmilí mo e kaungāmeʻá” (Ko e Faiako ʻi he Founga ʻa e Fakamoʻuí, 12).