Nofo Kemi ʻi Mīsulí, tā ʻe Bryan Mark Taylor

31 Mē–6 Sune

Tokāteline mo e Ngaahi Fuakava 60–62

“ʻOku ʻi Hoku Nimá ʻa e Kakano Kotoa Pē”

Manatuʻi te ke maʻu ʻa e teuteu lelei taha ki hono akoʻi ʻo e Tokāteline mo e Ngaahi Fuakava 60–62 ʻi hoʻo ako fakataautaha mo fakafāmili e ngaahi vahe ko ʻení.

Lekooti Hoʻo Ngaahi Ongó

Fakaafeʻi e Feʻinasiʻakí

ʻOange ki he fānaú takitaha ha faingamālie ke vahevahe ha meʻa kuo nau ako mei he folofolá he kalasi Palaimeli ʻo e uike pe Sāpate kuo ʻosí. Hili e vahevahe e fānaú takitaha, fakaafeʻi ha tokotaha kehe ke ne fakamatalaʻi fakanounou e meʻa naʻe vahevahé.

Akoʻi e Tokāteliné: Fānau Iiki Angé

Tokāteline mo e Ngaahi Fuakava 60:4; 61: 1–2, 36; 62:1

ʻOku akoʻi au ʻe he folofolá ʻo kau kia Sīsū Kalaisi.

ʻOku ʻi he Tokāteline mo e Ngaahi Fuakava 60–62 ha ngaahi fakamatala lahi ʻe lava ke tokoni ke mahino ki he fānau ʻokú ke akoʻí pe ko hai ʻa Sīsū Kalaisi pea fakatupulaki ʻenau ʻofa kiate Iá.

Ngaahi ʻEkitivitī ʻe Ala Fakahokó

• Fakaʻaliʻali ha fakatātā ʻo Sīsū Kalaisi, pea kole ange ki he fānaú ke nau vahevahe ʻa e ʻuhinga ʻoku nau ʻofa ai ʻia Sīsuú. Fili ha ngaahi kupuʻi lea mei he Tokāteline mo e Ngaahi Fuakava 60–62 ʻokú ne akoʻi koe fekauʻaki mo e Fakamoʻuí, pea vahevahe kinautolu mo e fānaú (hangē ko ʻení, vakai, Tokāteline mo e Ngaahi Fuakava 60:4; 61:1–2, 36; 62:1). Tokoniʻi e fānaú ke mou toutou lau fakataha e kupuʻi leá. Vahevahe ʻa e ongo ʻokú ke maʻu fekauʻaki mo Sīsū Kalaisí.

• Fakaʻaliʻali ha ngaahi fakatātā ʻo Sīsū mei Heʻene ngāue fakafaifekau he māmani (vakai, Tohi Fakatātā ʻo e Ongoongoleleí, fika 34–61). Tuku ke tokoni atu e fānaú ke fakamatalaʻi ʻa e meʻa ʻoku fai ʻe Sīsū ʻi he ngaahi fakatātaá. ʻOkú Ne fakahaaʻi fēfē ʻa ʻEne ʻofa ki he fānau ʻa e Tamai Hēvaní? Fakamatalaʻi ki he fānaú ha taha hoʻo ngaahi potufolofola manako ʻokú ne akoʻi fekauʻaki mo Sīsuú.

• Hivaʻi mo e fānaú ʻa e “ʻOku ou Feinga ke Hangē ko Sīsuú” (Tohi Hiva ʻa e Fānaú, 40–41; vakai foki ki he hiva fakataha mo e vitioó ʻi he ChurchofJesusChrist.org). ʻI hoʻo hiva fekauʻaki mo e ngaahi founga ke hangē ai ko Sīsuú, kiʻi taʻofi ʻi ha ngaahi taimi ʻe niʻihi pea kole ki he fānaú ke nau fakakakato e sētesi “Te u lava ʻo hangē ko Sīsuú ʻi heʻeku …”

  

  Ko e ʻUhinga ʻEni Kuó U Haʻu Aí, tā ʻe Yongsung Kim

Tokāteline mo e Ngaahi Fuakava 62:3

ʻOku finangalo ʻa Sīsū Kalaisi ke u vahevahe ʻEne ongoongoleleí.

ʻOku saiʻia e fānaú ke vahevahe e meʻa ʻoku nau ʻiló mo e niʻihi kehé. Tokoni ke mahino kiate kinautolu ko e taimi ʻoku nau vahevahe ai e meʻa ʻoku nau ʻilo fekauʻaki mo e ongoongoleleí, ʻoku hoifua mai ʻa e Tamai Hēvaní kiate kinautolu.

Ngaahi ʻEkitivitī ʻe Ala Fakahokó

• Fakamatalaʻi ange naʻe kole e ʻEikí kia Siosefa Sāmita mo ha kau taki kehe ʻo e Siasí ke nau fononga mei Ketilani, ʻOhaiō, ki he Vahefonua Siakisoni, Mīsulí. Naʻá Ne kole kiate kinautolu ke malanga ʻaki ʻa e ongoongoleleí ʻi heʻenau fononga atú pea ʻi heʻenau foki ki ʻapí. Lau ʻa e Tokāteline mo e Ngaahi Fuakava 62:3, pea kole ki he fānaú ke nau fakafanongo ki he meʻa naʻe fai ʻe he kau faifekaú ne hōifua ki ai e ʻEikí. Fakamoʻoni ange ʻoku hōifua mai ʻa e ʻEikí kiate kitautolu ʻi heʻetau vahevahe e ongoongoleleí mo e niʻihi kehé.

• Tokoniʻi e fānaú ke nau ngaahi ha ngaahi pine ʻokú ne fakahaaʻi ʻoku nau fie hoko ko ha kau faifekau ʻo e Siasí. ʻAi ke nau tui honau ngaahi piné pea akoako fevahevaheʻaki ʻenau fakamoʻoní.

• Hivaʻi fakataha ha hiva fekauʻaki mo hono vahevahe ʻo e ongoongoleleí, hangē ko e “ʻOku Ou Fie Hoko Leva ko ha FaifekauTohi Hiva ʻa e Fānaú,90). Tokoniʻi e fānaú ke nau fakakaukau ki he meʻa ʻe lava ke nau lea ʻaki ʻo kapau ʻe ʻeke ange ʻe ha taha kiate kinautolu pe ko e hā ʻoku nau ʻofa ai ʻia Sīsū Kalaisi mo Hono Siasí. Fakaafeʻi kinautolu ke tā ha ngaahi fakatātā ʻo e ngaahi meʻa ʻoku nau saiʻia ai ʻi he ongoongolelei ʻo Kalaisí.

Akoʻi e Tokāteliné: Fānau Lalahi Angé

Tokāteline mo e Ngaahi Fuakava 60:7, 13; 62:3, 9

Te u lava ʻo fakaava hoku ngutú ke vahevahe ʻa e ongoongolelei ʻo Sīsū Kalaisí.

ʻE lava ke mālohi tatau pē ʻa e fakamoʻoni ʻa e fānaú mo e fakamoʻoni ʻa e kakai lalahí, he ko e mālohi ʻo e fakamoʻoní ʻoku ʻikai maʻu ia mei he taʻu motuʻá pe aʻusia ʻa ha taha ka ʻoku mei he Laumālie Māʻoniʻoní. Tokoni ke maʻu ʻe he fānaú ha loto-falala te nau lava ʻo fakaava honau ngutú pea vahevahe mo e niʻihi kehé ʻa e meʻa ʻoku nau ʻiló.

Ngaahi ʻEkitivitī ʻe Ala Fakahokó

• Ko e hā ha ngaahi tāpuaki naʻe talaʻofa mai ʻe he ʻEikí ʻi he Tokāteline mo e Ngaahi Fuakava 60: 7; 62: 3, 9 kiate kinautolu ʻoku nau vahevahe ʻEne ongoongoleleí? ʻOku tāpuekina fēfē ʻa e niʻihi kehé ʻi hono vahevahe ʻo e ongoongoleleí? Fakakaukau ke vahevahe ha aʻusia mei hoʻo moʻuí ʻi ha taimi naʻá ke vahevahe ai e ongoongoleleí—ko e hā ha ngaahi tāpuaki naʻe maʻu mei hoʻo ngaahi ngāué? Fakaafeʻi ʻa e fānaú ke vahevahe ha ngaahi meʻa kuo nau aʻusia. ʻE lava ke mou hivaʻi ha foʻi hiva kau ki he ngāue fakafaifekaú, hange ko e “Laka he Tui pea Fakahā” (Ngaahi Himi, fika 162), pea talanoa fekauʻaki mo e ngaahi tāpuaki ʻoku lau ki ai ʻa e foʻi hivá.

• Tokoniʻi e fānaú ke nau fakatātaaʻi ʻa e ngaahi tūkunga te nau mei lava ai ʻo vahevahe e ongoongoleleí mo honau kaungāmeʻá. Hangē ko ʻení, ko e hā te nau talaange kapau ʻe fehuʻi ʻe ha taha kiate kinautolu pe ko e hā ʻoku nau ʻalu ai ki he lotú? Pē ʻe fēfē kapau ʻe sio hanau kaungāmeʻa ʻoku nau tui ha mama FKT pe lau ʻa e Tohi ʻa Molomoná pea nau fai ha ngaahi fehuʻi? Ko e hā e meʻa te nau lea ʻakí?

Tokāteline mo e Ngaahi Fuakava 60: 7; 61:1– 2, 36; 62: 1

ʻOku loto fiemālie ʻa e ʻEikí ke fakamolemoleʻi au ʻo kapau te u fakatomala.

Naʻe ʻikai ke haohaoa ʻa Siosefa Sāmita mo e kau taki kehe ʻo e Siasí. Naʻa nau fakakikihi pea ʻikai faʻa kātaki he taimi ʻe niʻihi (vakai, “Ezra Booth and Isaac Morley,” Revelations in Context, 133). Ka naʻe ʻaloʻofa ʻa e ʻEikí kiate kinautolu pea fakamolemoleʻi kinautolu ʻo kapau ne nau fakatomala.

Ngaahi ʻEkitivitī ʻe Ala Fakahokó

• Lau mo e fānaú ʻa e Tokāteline mo e Ngaahi Fuakava 60: 7; 61: 2, pea kole ange ke nau kumi ha ngaahi foʻi lea ʻoku faitatau ai ʻa e ngaahi veesi ko ʻení. Fakamanatu ki he fānaú, naʻe fai mai ʻa e ngaahi fakahaá ni kia Siosefa Sāmita mo ha kau taki kehe ʻo e Siasí. Ko e hā naʻe finangalo ʻa e ʻEikí ke nau ʻiló? Ko e hā ʻoku tau ako mei he ngaahi veesi ko ʻení ʻo fekauʻaki mo e ongo ʻoku maʻu ʻe he Fakamoʻuí kiate kitautolu ʻi heʻetau fai ha ngaahi fehalaākí?

• Tohi ʻa e ʻOku anga fēfē ʻa Sīsū Kalaisi? ʻi he palakipoé. Lau fakataha ʻa e Tokāteline mo e Ngaahi Fuakava 61:1–2, 36; 62: 1, pea hiki ha lisi ʻo e ngaahi tali ki he fehuʻi ko ʻeni ʻoku maʻu ʻe he fānaú ʻi he ngaahi vēsí. ʻOku tokoni fēfē ʻa e ngaahi ʻulungaanga ʻi he palakipoé ke mahino kiate kitautolu ʻa e ʻuhinga ʻoku finangalo ai e Fakamoʻuí ke fakamolemoleʻi kitautolú? Ko e hā ha ngaahi founga te tau lava ai ʻo muimui ki Heʻene sīpingá?

Tokāteline mo e Ngaahi Fuakava 60: 5; 61: 22; 62: 5–8

ʻOku finangalo ʻa e ʻEikí ke u fakaʻaongaʻi ʻeku tauʻatāina ke filí mo Hono Laumālié ke fai e ngaahi fili ʻoku leleí.

Te ke fakaʻaongaʻi fēfē ʻa e ngaahi veesi ko ʻení ke akoʻi ki he fānaú ʻa e founga ʻoku tokoni ai ʻa e ʻEikí ke nau fai ha ngaahi fili ʻoku leleí?

Ngaahi ʻEkitivitī ʻe Ala Fakahokó

• Kole ki he fānaú ke nau talanoa ki ha taimi naʻe fie maʻu ai ke nau fai ha fili. Naʻa nau fili fēfē ʻa e meʻa ke faí? Lau fakataha ʻa e Tokāteline mo e Ngaahi Fuakava 62:5, 7–8 ke ako fekauʻaki mo e folofola ʻa e ʻEikí ki he kaumātuʻa ne ʻamanaki ke nau fononga mei Mīsuli ki Ketilani ʻi ʻOhaioó. Ko e hā ha ngaahi fili naʻe fie maʻu ke nau fai fekauʻaki mo ʻenau fonongá? Ko e hā kuo foaki mai ʻe he ʻEikí ke tokoni ke tau fai e ngaahi filí? Talaange ki he fānaú ʻo kau ki he founga kuó ke ngāue ʻaki ai e fakahinohino ʻa e Laumālié mo hoʻo fakaʻutoʻuta lelei tahá ke fakahoko ʻaki e ngaahi filí.

• Vahevahe e kalasí ki ha kulupu ʻe tolu, pea kole ki he kulupu takitaha ke nau lau ha taha ʻo e ngaahi veesi ko ʻení, ʻa ia naʻe fakahinohinoʻi ai ʻe he ʻEikí ha kau faifekau fekauʻaki mo e founga ke fakahoko ʻaki ʻenau ngāue fakafaifekaú: Tokāteline mo e Ngaahi Fuakava 60: 5; 61: 22; 62: 5. Ko e hā ʻoku tau fakatokangaʻi mei he fakahinohino ʻa e Fakamoʻuí ʻi he ngaahi vēsí ni? Ko e hā ʻoku faʻa lelei ai he taimi ʻe niʻihi ke tau fakaʻaongaʻi ʻetau fakaʻutoʻuta lelei tahá kae ʻoua ʻe tatali ki ha fakahinohino pau mei he ʻOtuá ki he ngaahi fehuʻi kotoa peé?

Poupouʻi e Ako ʻi ʻApí

Fakaafeʻi e fānaú ke nau akoako hono vahevahe e ongoongoleleí mo ha mēmipa ʻo e fāmilí. Hangē ko ʻení, ʻe lava ke nau vahevahe ha meʻa ne nau ako ʻi he Palaimelí.

Fakatupulaki ʻEtau Founga Akoʻí

Vahevahe hoʻo fakamoʻoní ki hoʻo kalasí. ʻE tokoni hoʻo faʻa fakahoko hoʻo fakamoʻoní ki he fānau ʻokú ke akoʻí, ke tupulaki ai ʻenau ngaahi fakamoʻoní. ʻE lava ke faingofua ha fakamoʻoni ʻo hangē ko e “ʻOku ou ʻilo ʻoku ʻofa ʻa e Tamai Hēvaní kiate kimoutolu kotoa” pe “ʻOku ou ongoʻi fiefia ʻi he taimi ʻoku ou ako ai ʻo kau kia Sīsū Kalaisí.”